Policija (02.09.20)
Pos zhubjenu žonu namakał
Hodźij. Tójšto zastojnikow hromadźe ze staflu policajskich psow je předwčerawšim w Chanecach (Cannewitz) pola Hodźija za 63lětnej žonu pytało. Přiwuzny bě zdźělił, zo je wona zhubjena. Wšelakich schorjenjow žony dla hrožeše strach, zo so jej něšto stanje. Tež helikopter nad potrjechenej kónčinu lětaše, najprjedy wšak podarmo. Skónčnje tak mjenowany mantrailer, na pytanje za čłowjekami wukubłany pos, prawy slěd namaka a policistow k žonje wjedźeše. Trochu wochłódnjenu dowjezechu ju do chorownje.
Policija (01.09.20)
Daloko drje njepřišoł
Bjezdowy. Z pokradnjenymi kolesami dyrbješe so policija hižo stajnje zaběrać. Nětko pak so paduši dźeń a časćišo na elektrokolesa měrja, a to nic jenož w pincach a garažach, ale samo, hdyž maja je dowolnicy na awće přičinjene. To sta so předwčerawšim rano w Bjezdowach w gmejnje Halštrowska Hola. Njeznaty bě tam e-bike wot bydlenskeho mobila wotšrubował. Koleso ma hódnotu něhdźe 1 100 eurow. Hač pak je z nim daloko přišoł, je dwělomne. Wobsedźer bě wječor do toho akku wutwarił.
Policija (31.08.20)
Z garaže kwad pokradnył
Kubšicy. Njeznaty je w nocy na njedźelu w Brězowje w Kubšiskej gmejnje z garaže kwad w hódnoće něhdźe 3 000 eurow pokradnył. Tón napadny pozdźišo w Neugersdorfje swědkej, kiž je policiju informował. Zastojnicy spytachu muža zadźeržeć, tón pak smaleše wotsal. Po tym zo je wón na polu mašinu zwróći, so pěši zminy. Jězdźidło móžachu wobsedźerjej na to wróćić.
W Olbje dale pytaja
Stróža. Za zhubjenym 44lětnym mužom w Olbje su tež kónc tydźenja pytali. Sobotu bě policija w Stróži pola Hućiny hromadźe z nadregionalnej firmu na městnje, kotraž zasadźi najmodernišu fotorealistisku sonarnu techniku. Mjez druhim wužiwachu nurjenski trut, wusyłacy live wobrazy z wody. Nimo toho ma trut mechanisku ruku a móže z njej hač do 100 kilogramow ćežke wěcy z wody sćahnyć. Po wuhódnoćenju wobrazow chcedźa jutře znowa policajskich nurjakow ze Saksko-Anhaltskeje, Durinskeje a Sakskeje zasadźić.
Policija (28.08.20)
Zapłaćić zabył
Słona Boršć. Při awtodróhowym wotpočnišću pola Słoneje Boršće je srjedu starši muž swoje awto z 20 litrami diesela natankował a potom bjez płaćenja do směra na Zhorjelc wotjěł. Alarmowana policija lepi 77lětneho krótko před tunlom pod Limasom. Kaž Nižozemjan policiji powědaše, je w tankowni kofej pił, ale potom diesel zapłaćić zabył. Wotpowědnu sumu wón hnydom zapłaći. Hač změje jeho misnjenje konsekwency, z tym so nětko statne rěčnistwo zaběra.
Policija (27.08.20)
Wjele škody načinili
Komorow. Njeznaći su so w nocy na wutoru do towarstwoweho domu w Komorowje pola Rakec zadobyli. Kaž Zhorjelska policajska direkcija zdźěli, wobškodźichu wjacore wokna a skóncowachu pohiby registrowacu připrawu. Z małeje kasy pokradnychu skućićeljo 200 eurow. Porno tomu wučinja načinjena wěcna škoda na wšě 1 500 eurow. Kriminalna policija nětko pad přepytuje.
Policija (26.08.20)
Wobšudźić so njedał
Bischheim. Z přilubjenjom, zo je wjacore tysac eurow dobył, chcychu njeznaći předwčerawšim 79lětneho muža w Bischheimje w gmejnje Haselbachtal wobšudźić. Skućićeljo rentnarjej při telefonje rjeknychu, zo měł wón w kupnicy tak mjenowane steam-karty w hódnoće 500 eurow kupić a pozdźišo w dalšim telefonaće wotpowědne čisła podać, zo móhł wupłaćenje dobyća wotzamknyć. Rentnar to wotpokaza a zazwoni policiju.
Policija (25.08.20)
Paduch w stanje pobył
Bórk. Z woporom paducha stała je so swójba, kotraž w Bórku při Budyskim spjatym jězoru stanowaše. W nocy na njedźelu zadoby so cuzy do předstana. Jako mandźelskaj z wotdźěleneho spanskeho dźěla pohladnyštaj, bě njeznaty hižo preč. Sobu wzał bě handyjej kaž tež kluče. Te namakaštaj škodowanaj pozdźišo w swojim awće, kotrež bě paduch wotamknył a z njeho por sportowych črijow spakosćił. Dohromady nasta něhdźe 200 eurow škody. Nětko pytaja swědkow, kotřiž su snano něšto wobkedźbowali.
Policija (24.08.20)
Bjez bencina a dowolnosće
Budyšin. Na twarnišću awtodróhi A 4 mjez wotbóčkomaj Budyšin-wuchod a Wóspork wčera krótko po połnocy šofer wosoboweho awto hižo dale jěć njemóžeše. Přiwołana policija zwěsći, zo bě 26lětny muž zabył, swój Alfa Romeo sčasom natankować. Při dokładnišim přepruwowanju so wukopa, zo młody muž scyła žane awto wodźić směł njeby, dokelž dyrbješe před časom swoju jězbnu dowolnosć wotedać.
Policija (21.08.20)
Drogi plahował
Łaz. We wjesnym dźělu Łazowskeje gmejny je policija minjene dny mału plantažu konopnych rostlin namakała. Na hornim poschodźe jednoswójbneho domu 60lětneho muža steješe dohromady 15 tychle rostlinow. Nimo toho namakachu zastojnicy wšelki grat za plahowanje tajkich drogow. Policija wšitko sćaza.
Policija (20.08.20)
Rentnarjow zjebali
Mužakow. Z tak mjenowanym šokowym telefonatom staj njeznataj minjene dny w Mužakowje wot dweju rentnarjow pjećcyfrowu sumu pjenjez wulišćiłoj. Při telefonje wudaštaj so jako policistaj a powědaštaj, zo trjeba přiwuzna staršeju ludźi nuznje pomoc, hewak dyrbi hnydom do jastwa. Rentnarjej staj to bohužel wěriłoj a pjenjezy přepodaštaj.
