Policija (23.04.20)
Žadnostce pokradnyli
Miłkecy. Kaž policija hakle nětko zdźěli, su njeznaći w nocy wot ćicheje soboty na jutrownu njedźelu w Miłkečanskim parku w Radworskej gmejnje ćežke sudobjo a terakotabarbnu šklu za kwětki pokradnyli. Sudobjo ma přeměr 45 centimetrow a je 50 centimetrow wysoke. Jedna so wo z ruku zhotowjeny unikat, na kotrymž su žorawje w rohodźi widźeć. Rubizna je něhdźe 110 eurow hódna. Policija prosy nětko wo pomoc wobydlerjow. Štóž móže informacije wo padustwje podać abo štóž wě, hdźe kwětkowej sudobjo a škla stej, njech zazwoni na Budyski policajski rewěr pod telefonowym čisłom 03591/ 35 60 abo na kóždy druhi policajski běrow.
Policija (22.04.20)
Šofer Porsche jara nuzne měł
Budyšin. Prjedy hač wutwarja awtodróhu A 4 mjez Słonej Boršću a Budyšinom, hdźež je hišće 120 km/h dowolenych, je policija póndźelu spěšnosć měriła a 36 přeńdźenjow zwěsćiła. Najnuznišo měješe wodźer Porsche ze 190 km/h. Wón dyrbi 440 eurow pokuty płaćić, dóstanje dwaj dypkaj a dyrbi so měsacaj awta wzdać.
Policija (21.04.20)
19 lět bjez zawěsćenja
Budyšin. Zo policija hdys a hdys někoho lepi, kotrehož jězdźidło žane winowatostne zawěsćenje nima, so hdys a hdys stawa. Předwčerawšim pak dyrbjachu so zastojnicy w tym zwisku w Budyšinje z wosebitym padom zaběrać. Blisko Kopornika zadźeržachu 48lětneho muža, kiž bě tam ze swojim mopedom po puću. Na nim drje bě zawěsćenske čisło přičinjene. Kaž policisća zwěsćichu, pak bě wone hižo 19 lět njepłaćiwe. Dale jěć mopedist wězo njesmědźeše.
Policija (20.04.20)
Wopiteju šoferow lepili
Smjerdźaca. Z napadnje wjele alkoholowymi deliktami w nadróžnym wobchadźe dyrbi so tele dny policija zaběrać. Tak su sobotu wječor wodźerja transportera w Smjerdźacej z jednym promilom alkohola lepili. Šofer VWja we Wojerecach měješe w samsnym času nimale dwójce telko alkohola intus.
Policija (17.04.20)
Přewjele alkohola pił
Chrósćicy. Chwilu swojeho awta wzdać drje dyrbi so přichodnje muž, kotrehož lepi policija předwčerawšim wječor w Chrósćicach. Tam zadźeržachu 49lětneho wodźerja Škody na Pomnikowym puću. Z alkoholowym testom zastojnicy zwěsćichu, zo měješe wón 1,26 promilow alkohola w kreji. Dalša konsekwenca bě, zo dyrbješe potrjecheny krej wotedać. Nimo toho přizjewichu policisća delikt wopiłstwa w nadróžnym wobchadźe a sćazachu jězbnu dowolnosć.
Policija (16.04.20)
Zadobywarjo grat ležo wostajili
Hodźij. Njeznaći su so předwčerawšim wječor do wobchoda na Budyskej dróze w Hodźiju zadobyli. Woni łamachu so namócnje do běrowowych rumnosćow a spytachu tam trezor wočinić. Jako so jim to njeporadźi, woni ćeknychu, swój sobu přinjeseny grat pak wostajichu ležo. Alarmowana policija drje za skućićelemi pytaše, njemóžeše pak jich lepić. Načinjenu wěcnu škodu trochuja mějićeljo wobchoda na 5 000 eurow.
Policija (15.04.20)
Muža znowa lepili
Großröhrsdorf. We wobłuku swojeje patrulje je wobsadka policajskeho awta jutrownu póndźelu w Großröhrsdorfje transporter zadźeržała a jeho šofera kontrolowała. Při tym pak 32lětny wodźer jězdźidła žanu jězbnu dowolnosć předpołožić njemóžeše. Po přepruwowanju blišich wobstejnosćow bě spěšnje jasne, čehodla nic. Policisća běchu jeho hižo před třomi tydźenjemi lepili, jako bě 32lětny pod wliwom alkohola po puću był. Jeho jězbnu dowolnosć tehdy sćazachu. Zastojnicy nětko wospjetny chłostajomny delikt přizjewichu.
Policija (14.04.20)
Do wobruče zajěł
Ralbicy. Runje jutrońčku rano wołachu Ralbičanskich dobrowólnych wohnjowych wobornikow na pomoc. Na kromje wsy bě wosobowe awto do wobruče zajěło, kotraž tam na puću ležeše. Na tamnej kromje wsy při wotbóčce do Łazka bě něchtó wolijowu maćiznu wukidnył. Wobornicy dyrbjachu wšitko rumować.
Přewjele intus měł
Wojerecy. Chětro hłuboko do piwoweje škleńcy hladał je jutrońčku wječor 39lětny muž we Wojerecach. Při wobchadnej kontroli na Grodkowskej dróze kolesowar swojeho wašnja jězdźenja dla policistam napadny. Hižo jako jeho zadźeržachu, zastojnicy „chorhojčku“ muža čujachu. Při kontroli so potom wukopa, zo měješe wón 1,98 promilow alkohola w kreji. Tuž dyrbješe wón tež hišće krej wotedać a změje nětko z pjenježnej pokutu ličić.
Policija (09.04.20)
Plantaža w bydlenju
Budyšin. Zastojnicy Budyskeho policajskeho rewěra su předwčerawšim w jednym tudyšim bydlenju plantažu konopje zwěsćili. Dobry nós wjedźeše jich po schodach wjaceswójbneho domu hač pod třěchu. Tam stejachu rostliny w połnym kćěwje, rěka w rozprawje Zhorjelskeje policajskeje direkcije. Wobydlerjo běchu swoje bydlenje za plahowanje cannabisa dospołnje přerumowali. Woni běchu samo mału rostlinarnju, kajkež su w drogowej scenje z wašnjom, natwarili. Zastojnicy namakachu dohromady 17 konopjowych rostlin kaž tež wjacore sudobja, w kotrychž běchu sušene dźěle dalšich rostlin. Wšo to woni sćazachu a su njeskutk 49lětneho němske- ho wobydlerja přizjewili. Kriminalna policija so z tymle padom nětko bliže zaběra.
Policija (08.04.20)
Spěšnosć měrili
Komorow. Na zwjazkowej dróze B 156 blisko Komorowa pola Klukša, hdźež je 70 km/h dowolenych, je policija předwčerawšim spěšnosć měriła. Do směra na Budyšin přepruwowachu zastojnicy dohromady 250 jězdźidłow, třinaće bě přespěšnych. Njesławny rekord docpě Mazda ze 100 km/h.
