Za paduchom spěchała

Kulow. Jako so 19lětna młodostna předwčerawšim z wuchodźowanja ze swojimaj psomaj k awtu na kromje Kulowa wróći, wuhlada wona při nim podhladneho muža z nachribjetnikom. Jeje spodźiwne začuće so bórze na to jako prawe wopokaza. Přetož jako běštej psaj w awće, žona zwěsći, zo bě lěwe nabóčne wo­kno rozbite a w jeje jězdźidle pobrachowaše laptop. Chroble spěchaše žona za cuzym, kiž bě so mjeztym wotsalił, a wutorhny jemu nachribjetnik. W nim nańdźe laptop a hišće dalše wěcy ze swojeho awta, mjez druhim pjenjezy ze swojeje móšnje. Paducha pak wona zadźeržeć njemóžeše, tón so zminy. Hódnotu rubizny trochuje policija na něhdźe 70 eurow, wěcnu škodu na awće na 400 eurow.

Młodostny w skale so zatepił

Splósk. Wot wčerawšeho wječora su w skale pola Splóska (Pielitz) w Kubšiskej gmejnje za 15lětnym młodostnym py­tali. Po wjacorych hodźinach móžachu nurjacy jeno ćěło młodostneho z wody wućahnyć. Po prěnich dopóznaćach po­licije bě wón bjez wobdźělenja dalšich ludźi­ wróćo do skały padnył, po tym zo bě po powjazu z njeje lězł. We wobłuku přepytowanjow policija z toho wuchadźa, zo jedna so wo tragiske njezbožo. Na pytanju wobdźělene běchu wšitke wohnjowe wobory Kubšiskeje gmejny a dalši kameradojo z Bukec a Budyskeje powołanskeje wohnjoweje wobory.

Kaž činiš, je wopak

Bjezdowy. Njeluba překwapjenka čakaše minjenu sobotu wječor na muža, kiž je so po wochłódnjacym kupanju w Bjezdowskim jězoru na parkowanišćo k swojemu awtu wróćił. Wěstotnych přičin dla nje­bě 42lětny swoje hódnotne wěcy sobu­ na přibrjóh wzał, dokelž móhł je tam něchtó pokradnyć, hdyž je we wodźe. Toho­dla wostaji wón wšitko w swojim VWju. To pak so tohorunja jako dobra ideja njewopokaza. Mjeztym zo muž w jězoru płuwaše, su so cuzy do jeho aw­ta­ zadobyli a nachribjetnik pokrad­­ny­li. W nim běchu thinkpad typa Lenovo, kluče a dalše wosobinske wěcy. Škoda na awće wučinja 300 eurow, hódnota rubi­zny pak 2 000 eurow.

Nastróženy pos so wobarał

Lipoj. Derje měnjene je to nawopačne wot derje činjene. Jako chcyše minjenu sobotu 75lětna žona w Lipoju (Leippe) pola Łutow (Lauta) spjaceho psa pomajkać, je wona runowahu zhubiła a na psa padnyła. Tón so tak nastróži, zo z wotwobaranskim refleksom rentnarce do šije kusny. Žonu dyrbjachu na to lěkarsce zastarać dać. 59lětna wobsedźerka štyri­no­hača bě po informacijach policije runje tak šokowana kaž rentnarka a pos.

Kompostowa hromada so paliła

Wulka Dubrawa. Njeměrnje započa so wčerawša njedźela za wohnjowych wobornikow z Radworja, Wulkeje Dubrawy, Minakała a Chrósta. Wołali su jich k hašenju do recyclingoweje firmy na kromje Wulkeje Dubrawy na Měrkowskim puću. Tam bě woheń w kompostowej hromadźe wudyrił. Při tym wuwiwaše so tak husty kur, zo bě na wokolnych pućach lědma hišće něšto spóznać. Wo zapalerstwo drje so njejedna.