Třěchikryjerski skład wopor wohenja
Hornja Hórka. Tójšto dźěła mějachu wohnjowi wobornicy kónc tydźenja w Hornjej Hórce. Pjatk wječor wołachu jich na Šulsku, hdźež so skład třěchikryjerskeje frimy paleše. Kaž policija zdźěli, běchu w něhdźe 40 x 40 metrow wulkej hali wjetše mnóstwa palneho drjewa a twaršćizny składowane kaž tež twarski kran wotstajeny. Wšitko sta so z woporom płomjenjow. Tež twarska substanca hale je wohenja dla chětro poćerpjeła. Wosoby so njezranichu. Škodu trochuje wobsedźer na wjac hač 150 000 eurow. Kaž w rozprawje policije dale rěka, zwěsćichu wohnjowi wobornicy wjacore městna, na kotrychž bě woheń wudyrił. Kriminalna policija pad tuž nětko přepytuje.
Muža z nožom zranił
Budyšin. K namócnemu rozestajenju mjez młodymaj mužomaj je wčera popołdnju na Budyskich Žitnych wikach dóšło. Najprjedy je 20lětny Budyšan 18lětnemu z Rozwodec z pjasću mjezwoči bił. Na to wućahny na zemi ležacy 18lětny nóž, kłóješe z nim do bička a jeho wjacekróć na noze zrani. Wuchowanska słužba dyrbješe rany 20lětneho zastarać. Přiwołani policisća nóž sćazachu a pad nětko dale přepytuja.
Wobruče fuk
Jaseńca. Njeprošeny wopyt měješe minjene tydźenje ratarski zawod w Jaseńcy w Kubšiskej gmejnje. Kaž hakle spočatk tydźenja pytnychu, běchu so tam njeznaći minjeny měsac zadobyli a dohromady 16 wobručow ratarskeje mašiny pokradnyli. Zawodej nasta něhdźe 3 200 eurow wěcneje škody.
Křesło so zhubiło
Wojerecy. W nocy na wutoru běchu njeznaći we Wojerecach po puću. Z chódby wjacebydlenskeho domu pokradnychu woni křesło. Te bě 72lětna wobydlerka před bydlenje stajiła, dokelž chcyše je ponowić dać. Swětłobrune kožane křesło bě po informacijach rentnarki něhdźe 200 eurow hódne.
Bjez dowolnosće z awtom po puću
Budyšin. Dokelž při wotbočenju z Wojerowskeje na Schliebenowu swoje jězdźidło wokomik w horšći njeměješe, je 20lětny wodźer BMWja póndźelu w Budyšinje policiji napadnył. Jako zastojnikaj za nim jědźeštaj, stupi młody muž na płun a spyta do směra na Židow a Ćemjercy ćeknyć. Na Ćemjerčanskim puću jeho skónčnje zadźeržeštaj. Tam so wukopa, zo 20lětny scyła žanu jězbnu dowolnosć njeměješe. Nimo toho namakachu w jeho awće titku z běłej maćiznu. Drogowy test pola njeho pak bě negatiwny.
Awta a sćěny pomórali
Běła Woda. Swoju „wuměłsku žiłku“ na polu grafitow su njeznaći minjeny kónc tydźenja na wjacorych městnach w Běłej Wodźe zjawnosći předstajili. Žadyn dobry wothłós pak móranja cuzych našli njejsu. Woni měrjachu so na štyri wosobowe awta a zawostajichu na nich njedefinujomne znamjenja. Tajke wuhladachu wobydlerjo tež na sćěnach wjacorych bydlenskich domow. Cyłkowna škoda njeje hišće zwěsćena.
Hospodliwosć znjewužiwał
Budyšin. Trochu hinaše měnjenje wo hospodliwosći měješe w nocy na sobotu 47lětny muž w Budyšinje, kiž bě pola 28lětneho na wopyće. Wosrjedź nocy je wón hosćićelej 80 eurow z móšnje kaž tež jeho kluče za chěžne, bydlenske a pinčne durje pokradnył. Nimo toho přiswoji sej awtowy kluč a bórze na tež šěry Seat Leon. Dohromady načini hósć něhdźe 3 600 eurow škody.
Smě dwaj měsacaj nóžkować
Njebjelčicy. Hač šoferojo maksimalnu spěšnosć 70 km/h dodźerža, je policija srjedu na statnej dróze S 94 pola Njebjelčic kontrolowała. Wot 2 000 jězdźidłow bě 134 přespěšnych. Najnuznišo měješe VW z Budyskim čisłom, pola kotrehož naměrichu 135 km/h. Za šofera woznamjenja to pokuta 440 eurow, dwaj měsacaj nóžkować a dwaj dypkaj.
Hodowna nakup fuk
Wojerecy. Swojimaj wočomaj wěrić nochcyše wobydler wjaceswójbneho domu na Wojerowskej Hufelandowej wutoru připołdnju, jako w swojej pincy za prawym hladaše. Tam dyrbješe 63lětny zwěsćić, zo běchu so njeznaći zadobyli a so z jeho składow posłužowali. Kaž wón policiji zdźěli, pobrachowaše w mróžaku jeho hodowna nakup, mjez druhim kače nóžki, butra a hromak. Škodu trochuje na něhdźe 200 eurow.
67 km/h přespěšnje jěł
Budyšin. W Hodźiju, na awtodróze A 4 a w Hornjej Kinje je policija zawčerawšim spěšnosć měriła a dohromady 8 200 jězdźidłow kontrolowała. Njesławny rekord docpě na awtodróze VW z Drježdźanskim čisłom, kotryž bě město dowolenych 120 ze 187 km/h po puću.
Žonam pjenjezy wulišćić spytali
Běła Woda. Njeznaći wobšudnicy su zawčerawšim popołdnju w Běłej Wodźe spytali, třom staršim žonam přez telefon pjenjezy wulišćić. W jednym padźe cuza žona rentnarce něšto wo strowotniskej nuzowej situaciji powědaše, w tamnymaj padomaj wudawaše so wona jako pozdatna wnučka, kotraž chcyła „wowku“ wo pjenjezy prosyć. Wšitke tři rentnarki w starobje 82 do 88 lět su pak prawje reagowali, telefonat přetorhnyli a policiju zazwonili.
Młodemu mužej pomhali
Wojerecy. Dokelž bě zawčerawšim wječor krótko do połnocy blisko zahrodnišća při zwjazkowej dróze B 96 we Wojerecach wołanje wo pomoc słyšała, informowaše žona policiju. Ta tam za prawym pohladny a namaka zymu mrějaceho 28lětneho muža. Wón zastojnikomaj powědaše, zo bě w swojim zahrodowym domčku spał, jako so njeznaći tam zadobychu a jemu něšto mjezwoči pryskachu. 28lětneho dowjezechu na to do chorownje. Nětko pyta policija swědkow, kotřiž su njedźelu wječor něšto podhladneho wobkedźbowali. Pokiwy přijimuje pod telefonowym čisłom 03571/ 46 50.