Policija (16.01.20)
Smjertne njezbožo
Olbersdorf. Na Bertsdorfskej dróze w Olbersdorfje sta so wčera smjertne njezbožo. Mužej w starobje 46 a 76 lět staj z rjećazowej piłu štom podrězałoj. Při tym so zdónk na njeju kuli a wobeju pohrjeba. Wohnjowi wobornicy mužow wuswobodźichu. Sanitetarjo dowjezechu jeju do bliskeje chorownje. Wottam transportowachu staršeho z helikopterom do dalšeje kliniki, hdźež wón na sćěhi ćežkich zranjenjow krótko na to zemrě. Kriminalna policija přepytuje, kak bě k njezbožu dóšło.
Policija (15.01.20)
Soko Argus prosy wo podpěru
Zhorjelc. Wosebita komisija policije w Zhorjelcu Argus je 5 000 eurow za swědkow wupisała, kotřiž móhli pomhać padustwo rozjasnić. W Hagenwerderskim předewzaću KSC Připrawotwar běchu so njeznaći loni w juliju, nowembru a decembru zadobyli. Tam pokradnychu wjacore skowanske mašiny markow „KEMPPI“ a „EWN“. Škoda wučinja wjacore dźesaćitysacy eurow. Kriminalni technikarjo slědy wuhódnoćeja. Pytani su swědcy, kotřiž běchu něšto wobkedźbowali abo wědźa, hdźe mašiny su.
Paducha lepili
Běła Woda. Policija w Běłej Wodźe je póndźelu rano pozdatneho paducha lepiła. Swědk bě zastojnikow na prawy slěd skedźbnił, dokelž napadny jemu wobškodźeny linijowy bus a koleso při Hermančanskej dróze. Wokna a durje busa běchu rozbite, skućićel tam njebě. Zastojnicy pak nańdźechu krótko na to muža, kiž bě so do nakupowanišća na Humboldtowej zadobył a měješe rubiznu z wobchoda a nuzowy hamor z busa při sebi.
Policija (14.01.20)
Swědcy njezboža pytani
Porchow. Policija pyta swědkow. Póndźelu w nocy, krótko po jednej, staj na awtodróze A 4 mjez wotbóčkomaj Porchow a Ohorn wodźer Škody a VWja znjezbožiłoj, dokelž běštej so awće při přesćehnjenju šmórnyłoj. Wěcna škoda wučinja 2 000 eurow. Swědcy, kotřiž su wašnje jězdźenja šoferow abo njezbožo wobkedźbowali, njech so pola policije přizjewja.
Policija (13.01.20)
Pkw do transportera zrazył
Njebjelčicy. Pola Njebjelčic stej so sobotu při wobchadnym njezbožu dwě wosobje zraniłoj. Něhdźe w 16.30 hodź. je z Kamjenca-Brěznje jěduce wosobowe awto na S 94 do transportera zrazyło. Wobeju šoferow dowjezechu do Kamjenskeje chorownje. Njebjelčanska wohnjowa wobora je městnosć njezboža zawěsćiła. Dróha bě dwě hodźinje zawrjena.
Policija (10.01.20)
Do towarstwoweju domow so łamali
Holešowska Dubrawka. Hnydom do dweju towarstwoweju objektow su so njeznaći w nocy na srjedu w Holešowskej Dubrawce zadobyli. Kaž policija zdźěli, su so namócnje do domow łamali, tam wjacore spindy a kamory zwočinjeli a je přeryli. Hač su paduši scyła něšto za sebje trěbne namakali, dotal znate njeje, naparali pak su škodu něhdźe 500 eurow.
Rubiznu ležo wostajili
Nowa Łuka. Paduši su srjedu rano z jednoswójbneho domu w Nowej Łuce pola Wojerec laptopaj w hódnoće 200 eurow spakosćili. Kaž policija informuje, pak wobsedźer pozdźišo zdźěli, zo je rubiznu namakał. Paduši běchu ju ležo wostajili.
Policija (09.01.20)
Z Passatom so přewaliła
Narć. Mjez Wojerecami a Narćom je 28lětna šoferka VWja wčera rano na zwjazkowej dróze B 96 ćežko znjezbožiła. Kaž policija zdźěla, suny so wona z njeznatych přičin z jězdnje, zrazy do wjacorych štomow kaž tež do wobchadneho znamješka a so přewali. Wohnjowi wobornicy dyrbjachu žonu z awta wurězać. B 96 bě nachwilnje zawrjena. Cyłkowna škoda wučinja wjace hač 30 000 eurow.
Policija (08.01.20)
Nuzowy milinowy agregat spakosćili
Dalicy. Po wšěm zdaću njemějachu paduši w Dalicach (Dahlowitz) hižo žanu milinu. Kónc abo spočatk lěta běchu so tajcy na ležownosć zawoda zadobyli a nuzowy milinowy agregat spakosćili. Dokelž trjebaš za ćěrjenje tajkeho nastroja tež ćěriwo, su dwanaće kanistrow diesela – kaž policija zdźěla, wučinja to něhdźe 430 litrow – hnydom sobu wzali. Zwěsćili su njeskutk hakle předwčerawšim. Rubizna měješe hódnotu něhdźe 1 300 eurow. Wěcna škoda wučinja 2 000 eurow.
Policija (07.01.20)
Wjac hač 8 500 eurow škody
Delni Wujězd. Hładkosće dla je njedźelu rano žona na zwjazkowej dróze B 156 mjez Delnim Wujězdom a Lěskej w Malešanskej gmejnje ze swojim BMWjom znjezbožiła. Kaž policija wčera zdźěli, bě 49lětna po puću do směra na Budyšin, je pak kontrolu nad wodźidłom zhubiła a so z awtom z jězdnje sunyła. Zbožo w njezbožu bě, zo so šoferce ničo njesta. Bolostne pak za nju přiwšěm je, zo dyrbjachu awto wotwlec, dokelž njemóžeše z nim wjace jěć. Tak drje budźe dyrbjeć hłuboko do móšnje sahnyć, chce-li je sporjedźeć dać. Škodu trochowachu zastojnicy mjenujcy na wjac hač 8 500 eurow.
Policija (06.01.20)
Kólnja so wotpaliła
Přiwćicy. Wčera je so Přiwćicach (Preititz) w Malešanskej gmejnje kólnja wotpaliła. Wohnjowu woboru a policiju běchu palaceho so domu dla wołali, štož so na zbožo jako wopačna informacija wukopa. 30 wobornikow móžeše pak tomu zadźěwać, zo płomjenja na domske přeskočichu. Škoda wučinja něhdźe 2 000 eurow.
Policija (03.01.20)
Wandalojo po puću byli
Łuh. Njeznaći su so Nowe lěto na areal wětrnika we Łuze zadobyli. Tam zwočinjachu wšitke durje, kaž policija informuje. Dale wobškodźichu płót a zapusćichu cyłu ležownosć. Policija dale zdźěla, zo po prěnim přehledźe po wšěm zdaću ničo njepobrachuje. Přiwšěm nasta škoda něhdźe 3 500 eurow. Kriminalna policija pad přepytuje.
Prózdnu hródź zapusćili
Kołwaz. Tež w Kołwazu (Kohlwesa) w Bukečanskej gmejnje su wandalojo zachadźeli. Woni zapusćichu prózdnu hródź, hdźež rozbichu 29 woknow. Škoda wučinja něhdźe 300 eurow. Policija prosy swědkow wo pomoc.
