Spěšny sudniski wusud

Wojerecy. Jenož něhdźe 24 hodźin po padustwje je sudnistwo minjenu srjedu třoch čěskich staćanow k jastwu z pruwowanskim časom zasudźiło. Wutoru lepichu policisća z pomocu swědka dweju muži w starobje 40 a 59 lět kaž tež 41lětnu žonu we Wojerowskej kupnicy. Woni běchu tam twory w hódnoće 400 eurow pokradnyli. Dalšu rubiznu wuslědźichu zastojnicy w awće čěskich staćanow, w kotrymž mějachu najwšelakoriše twory w hódnoće 850 eurow składowane. Nimo­ toho měješe jedyn ze skućićelow tak mjenowany cutterowy nóž při sebi, z čimž běchu wobstejnosće za „padustwo z brónju“ spjelnjene. Na to wšěch třoch zajachu. Hižo nazajtra zahajichu přećiwo nim sudniske jednanje a hišće samsny dźeń bě wusud jasny. W po­spěšenym jednanju zasudźi přisłušny sudnik čłonow padušneje trójki k šěsć měsacam jastwa z pruwowanskim časom. Kaž w zhromadnym nowinskim wozjewjenju policajskeje direkcije a Zhorjelskeho statneho rěčnistwa rěka, běchu zasudźeni wočiwidnje překwapjeni, najprjedy raz, dokelž běchu jich scyła lepili, a zdruha, zo su jich w Němskej tak spěšnje zasudźili.

Mortweho wjelka na A 4 našli

Słona Boršć. Patrulja awtodróhoweje policije je dźensa krótko po połnocy na awtodróze A 4 do směra na Drježdźany pola Słoneje Boršće přejědźeneho wjelka našła. Zastojnicy wzachu mortwe zwěrjo sobu na Budyski rewěr a přepodachu je zawołanemu zastupjerjej Rěčičanskeho wjelčeho běrowa. Tam chcedźa nětko zaměrnje za tym slědźić, čehodla dyrbješe wjelk nócny wulět na awtodróhu ze swojim žiwjenjom zapłaćić.

Z pokradnjenej kokošu zahinył

Weigsdorf-Köblitz. Wodźer Hyundaija je zawčerawšim rano we Weigsdorfje-Köblitzu w Kumwałdskej gmejnje ze swojim awtom do wjelka zajěł. Štyrinohaty rubježnik bě krótko do toho kokoš po­padnył a měješe ju hišće w klamje, jako awto na Hłownej dróze přijědźe a hižo borzdźić njemóžeše. Wjelk při zražce zahi­ny. Popadnjenej kokoši tohorunja hižo­ pomhać njemóžachu. Na awće nasta 2 500 eurow škody.

Třěšny kófer so wočinił

Wóspork. Njeplanowany mjezystop na swojej domojězbje do směra na Drježdźany dyrbješe 61lětny wodźer wosoboweho awta typa Subaru minjenu sobotu rano na awtodróze A 4 pola Wósporka zapołožić. Najskerje njebě wón wěko swojeho třěšneho kófra prawje začinił, přetož wokoło sedmich so wone wosrjedź jězby wočini a wšón wobsah kófra spada na awtodróhu. Na zbožo so při tym žane wobchadne njezbožo njesta. Awtodró­howa policija jězdnju na to zawrě, tak zo móžachu­ rozbrojene wěcy zezběrać. Za poł hodźiny běchu stróžele přetrate, a muž móžeše dale jěć.