Policija (17.01.19)
Wječor so zamknyć dał
Kamjenc. Za wosebje klewerneho drje měješe so zawčerawšim, wutoru, młody muž, kiž je so wječor po wotewrjenskim času na Kamjenskej Měrowej do twaršćiznowych wikow zamknyć dał. Jako běchu předawarki a wšitcy dalši sobudźěłaćerjo wotešli, so wón ze swojeho schowa wudrapa. W tym wokomiku pak w twarjenju instalowane alarmowe systemy a pohibowanske přizjewjaki signalizowachu, zo tam něšto w porjadku njeje. Zasadźeni policisća 23lětneho muža we wikowanišću lepichu a wzachu jeho hnydom sobu na rewěr. Skućićel, kiž chcyše po wšěm zdaću wšelki grat pokradnyć, změje so nětko padustwa we wosebje ćežkim padźe dla zamołwić.
Policija (16.01.19)
Zastojnikam hrozył
Wojerecy. Wjacori podružnicy Wojerowskeho bydlenskeho domu na Budyskej aleji su so póndźelu krótko do 23 hodź. pola policije hóršili, zo jedyn ze sobuwobydlerjow wótře hudźbu słucha a nócny měr myli. Na jich klepanje a klinkanje při bydlenskich durjach pak wón njereagowaše. Bórze na to stejachu policisća před bydlenjom 24lětneho a jeho napominachu, nócny měr druhich respektować. Po tym so młody muž najprjedy tež měješe. Lědma pak běchu policisća wotjěli, dyrbjachu susodźa znowa harowanja dla na Wojerowskim rewěrje zazwonić. Nětko chcychu zastojnicy krućišo zakročić a sterejopřiprawu sćazać. To pak so 24lětnemu scyła njelubješe, tak zo so wón z kapsnej lampu do policistow da. Jenička móžna reakcija bě, alkoholizowaneho muža sputać a jeho sobu na policajski rewěr wzać. Tam pola njeho zwěsćichu, zo měješe 1,98 promilow alkohola w kreji.
Policija (15.01.19)
Křiže nastajeli
Budyšin. 23 drjewjanych křižow, něhdźe 1,70 metrow wulke, su njeznaći minjeny kónc tydźenja na Budyskim Hrodźišku nastajeli. Na nje napisachu mjena ludźi, kotřiž běchu w zašłosći w zwisku z wukrajnymi wobydlerjemi žiwjenje přisadźili. Po wuprajenju swědkow je policija jězdźidła a podhladne wosoby zwěsćiła.
Policija (14.01.19)
Kolesy wobsedźerjej wróćić móhli
Běła Woda. Padustwu kolesow su swědcy sobotu popołdnju w Běłej Wodźe zadźěwali. Woni wobkedźbowachu, kak młodaj mužej na Humboldtowej zamknjenej kolesy wotnjeseštaj, a zazwonichu policiju. Zastojnicy muži w starobje 23 a 25 lět krótko na to zajachu. Rubiznu w hódnoće 1 400 eurow měještaj wonaj hišće při sebi. Wobsedźer so połdra hodźiny pozdźišo přewšo wjeseleše, zo jemu jeho wobsydstwo wróćichu.
Policija (11.01.19)
Trabant pokradnyli a tčacy wostali
Spale. Na pólnym puću pola Spal su předwčerawšim dopołdnja wopušćeny Trabant wuhladali. Awto bě wočinjene a jedne z kolesow bě skóncowane. Kaž policija pozdźišo wuslědźi, běchu njeznaći kultowe jězdźidło ze zahrody blisko Wojerowskeje Liebknechtoweje pokradnyli. Škoda wučinja něhdźe 150 eurow. Kriminalna policija je pad přewzała a spyta nětko zwěsćić, komu je so oldtimer z časa NDR tak lubił, zo chcyše jón měć.
Policija (10.01.19)
Při zastanišću znjezbožiła
Błohašecy. Ćežko zraniła je so wutoru rano 58lětna žona při busowym zastanišću w Błohašecach. Wona tam z busa wulěze a chcyše statnu dróhu S 100 přeprěčić, při tym pak njewobkedźbowaše bližace so awto. 18lětna wodźerka Forda njemóžeše hižo zastać a zrazy do žony. Dyrbjachu ju do chorownje dowjezć.
Policija (09.01.19)
Wjelk do awta skočił
Ralbicy. Wšo druhe hač měrnu jězbu na dźěło měješe wodźerka wosoboweho awta wčera rano w Delanach. Jako bě z Ralbic do směra na Nowoslicy po puću, jej něhdźe w 7.30 hodź. runje na poł puća wjelk do awta skoči. Žona sej lědma z awta zwěri a zazwoni policiju. Zastojnicy su pad sobudźěłaćerjam wjelčeho běrowa dale dali. Na nich pak dyrbjachu něhdźe połdra hodźiny čakać. Woni zahinjeneho wjelka skónčnje sobu wzachu, zo móhli zwěsćić, hač pochadźa wón z Róžeńčanskeje abo druheje črjódy.
Policija (08.01.19)
Třo ćežko zranjeni po njezbožu
Sprjewiny Doł. Ćežke wobchadne njezbožo sta so wčera po připołdnju na zwjazkowej dróze B 97 pola Sprjewineho Doła. Ze swojim Citroënom chcyše 81lětny muž před nim jěduce nakładne awto přesćahnyć. Wón pak njewobkedźbowaše při tym napřećo přijěducy Opel kaž tež za nim jěducy Mazda a zrazy do wobeju. Jeju šoferaj w starobje 70 resp. 77 lět so runje tak ćežko zraništaj kaž 81lětny zawinowar. Wšěch třoch dowjezechu do wokolnych chorownjow.
Policija (07.01.19)
Zahrodowy domčk so wotpalił
Budyšin. Znowa je so minjeny pjatk wječor w Budyšinje masiwnje twarjena zahrodowa chěžka wotpaliła. Čehodla je woheń w pjeć króć pjeć metrow wulkej lawbje wudyrił, njeje dotal znate. Štyrceći wobornikow dyrbješe płomjenja zhašeć. Wěcnu škodu trochuja na něhdźe 25 000 eurow, kaž policija zdźěla.
Policija (04.01.19)
Paduši w cyrkwi
Załom. Ani modlić so ani pokućić no-chcychu njeznaći, kotřiž běchu so prěni dźeń noweho lěta do Załomskeje ewangelskeje cyrkwje zadobyli. Woni pokradnychu tam keyboard a dalšu techniku, kotraž pódla wołtarja steješe. Dohromady bě rubizna něhdźe 3 000 eurow hódna. Kriminalisća zawěsćichu slědy a pytaja nětko za skućićelemi.
