Policija (22.08.18)
Holcy so nastróžiłoj
Róžant. Hižo minjeny pjatk je dotal njeznaty muž dwě holcy w Róžeńće nastróžił. Dźěsći běštej popołdnju z psom susoda blisko putniskeje łuki po puću, jako po swojich wuprajenjach maskěrowaneho muža w kerkach wuhladaštej. Holcy stej so mócnje nastróžiłoj a so spěšnje wotsaliłoj. Cuzy jimaj z něšto metrami wotstawkom sćěhowaše, njeje pak jej narěčał. Policija je wo tym padźe hakle předwčerawšim zhoniła a pyta nětko za swědkami: Štó je minjeny pjatk blisko Róžeńčanskeje putniskeje łuki ćmowozdrasćeneho muža widźał? Pokiwy přijimuje Kamjenski policajski rewěr pod telefonowym čisłom 03578/ 35 20, ale tež kóždy druhi policajski běrow.
Policija (21.08.18)
Pokradnjene koleso spóznał
Běła Woda. W nocy na minjenu njedźelu běchu njeznaći w Běłej Wodźe mountainbike typa Bulls pokradnyli. Njedźelu dopołdnja jědźeše přiwuzny škodowaneho do pólskeje Łęknicy, zo by tam tankował. Krótko za hraničnym mostom wuhlada wón štyrjoch młodostnych z kolesom. Hnydom wón čorno-běło-zelene jězdźidło spózna a hólcow narěča. Ći nablaku ćeknychu a koleso ležo wostajichu. Po dorěčenju z pólskej policiju je swědk sobu domoj wza a wobsedźerjej přepoda. Policija pad dale přepytuje.
Policija (20.08.18)
Drohej kolesy pokradnyli
Ochranow. Na Lubijskej dróze w Ochranowje wutorhnychu njeznaći w nocy na sobotu lěsycu před wukładnym woknom wobchoda za kolesa a zadobychu so na to do předawanišća. Tam pokradnychu najdróšej kolesy typa „Müsing Petrol“ w cyłkownej hódnoće něhdźe 7 000 eurow. Wěcna škoda, kotruž při zadobywanju načinichu, wučinja dalše 3 000 eurow. Policija nětko na to kedźbuje, štóž je z kolesom mjenowaneje marki po puću.
Policija (17.08.18)
Na S 100 přespěšni byli
Prěčecy. Tež mnozy Serbja wužiwaja statnu dróhu S 100, zo bychu so na přikład do Budyšina na dźěło dóstali, a jědu přez Prěčecy. Tam je policija zawčerawšim dopołdnja spěšnosć měriła. W dobrych třoch hodźinach je něhdźe 400 awtow nimo kontrolneho městna jěło. Z nich bě 24 přespěšnych. Wosebje nuzne měješe wodźer Opela z Kamjenskim čisłom. Při dowolenych 50 kilometrach na hodźinu lepichu jeho ze 84 km/h.
Policija (16.08.18)
Do kupjele so zadobyli
Kulow. Kupać drje so nochcychu, ale po wšěm zdaću pjenjezy kradnyć chcychu njeznaći minjene dny w Kulowskej lěsnej kupjeli. Zawčerawšim rano dyrbjachu tam zwěsćić, zo bě so něchtó do kasy při zachodźe kaž tež do předawanskeho kioska zadobył a w nimaj wšitko přepytał. Kelko škody su načinili, njeje hišće doskónčnje zwěsćene.
Policija (15.08.18)
Po kolijach do města chcył
Kubšicy. Štož njeje druhdźe na swěće žadyn problem, w Němskej dawno hišće dowolene njeje. To drje njewědźeše Indičan, kiž zawčerawšim po železniskich kolijach z Kubšic do směra na Budyšin nóžkowaše. Muža lepichu zastojnicy zwjazkoweje policije blisko železniskeho přechoda w Rabocach. 26lětneho dyrbjachu powučić, zo njejsu železniske kolije pućowanska šćežka. Na zbožo so młodemu mužej ničo stało njeje, přiwšěm dyrbjachu policisća přizjewjenje wupisać. Zo njeby Indičan znowa na ideju přišoł so po kolijach do směra na Budyšin orientować, su jeho zastojnicy po zwjazkowej dróze B 6 hač na kromu Budyšina dowjezli.
Policija (14.08.18)
Susod wina njebył
Hbjelsk. Wuhladawši w haće na swojej ležownosći mortwej rybje wołaše wobydler Hbjelska njedźelu dopołdnja policiju, dokelž tukaše, zo bě susod snano škódnu maćiznu do hata kidnył. Zastojnicy tuž proby wody sobu wzachu. Ničo pak na to njepokazowaše, zo móhł susod z tymle „padom“ něšto činić měć. Jako wobsedźer mjenujcy wjace powětra do hata wjedźeše, běchu ryby nadobo widźomnje agilniše. Dwěmaj bě w ćopłej wodźe po wšěm zdaću kislik wušoł.
Policija (13.08.18)
Haruja a myla nócny měr
Budyšin. Hižo wot spočatka lětnich prózdnin so w Budyšinje na naměsće před Němsko-Serbskim ludowym dźiwadłom wšědnje wjetše skupiny ludźi zhromadźuja a tam haruja. W nocomaj na minjenej pjatk a sobotu zwěsćichu tam stajnje něhdźe 40 wosobow, kotřiž nócny měr bliskich wobydlerjow z haru a hudźbu mylachu. Přiwołana policija zwěsći identitu zwjetša młodych ludźi. Pola někotrych z nich namakachu snadne mnóstwo drogow. Tohodla kaž tež njedodźerženja nócneho měra dla změja so woni nětko disciplinarisce zamołwić. Hakle wokoło třećeje hodźiny zaćahny na naměsće před NSLDź zaso měr. Wróćo wostachu rozbite bleše a dalše partyjowe wotpadki. Za wobydlerjow bliskich bydlenskich domow woznamjenjeja nócne hejsowanja přiběrace poćeženje, čehoždla woni wobstajnje policiju informuja.
Policija (10.08.18)
W prózdnej kupnicy so paliło
Wojerecy. Na Hasy měra we Wojerecach dyrbjachu wčera kameradojo tamnišeje powołanskeje wohnjoweje wobory něhdźe w 17 hodź. w prózdnej kupnicy wosrjedź města woheń hašeć. Hižo před tydźenjomaj bě so tam paliło. Byrnjež so z twarjenja chětro kuriło a płomjenja sapali, móžachu je wobornicy w běhu dweju hodźin zhašeć. Po zdaću je woheń něchtó zamiškrił.
Do kontejnera so zadobyli
Njebjelčicy. W Njebjelčicach su njeznaći zawčerawšim w nocy z twarskeho kontejnera rjećazowe piły a njebozowe mašiny w hódnoće 2 000 eurow pokradnyli.
Policija (09.08.18)
Izolowanje domskeho zhašeli
Porchow. W Porchowje je so wčera w nocy na Nakromnym sydlišću izolowanje domskeho paliło. Něhdźe štyri kwadratnych metrow styropora steješe w płomjenjach. Kameradojo Porchowskeje wohnjoweje wobory woheń zhašachu.
Dźěłaćer granatu našoł
Slepo. Při kopanskich dźěłach je dźěłaćer w Slepom na Grodkowskej dróze wutoru připołdnju granatu z druheje swětoweje wójny našoł. Specialisća ju wotwjezechu.
