Policija (04.07.17)
Negatiwny rekord nastajił
Nowe Błohašecy. Při kontroli spěšnosće minjenu sobotu na statnej dróze S 111 w Nowych Błohašecach je wodźer wosoboweho awta nowy rekord w Budyskim wokrjesu nastajił. Jeho lepichu ze 134 km/h při dowolenych 50 km/h. Dotalny rekord 124 km/h bě dalši šofer w měrcu na samsnym městnje nastajił.
Policija (03.07.17)
Wokno awta rozbić dyrbjeli
Wojerecy. Na parkowanišću Wojerowskeje kupnicy je sobotu připołdnju 48lětna žona swojeho pjećlětneho wnučka sama w njezamknjenym awće wostajiła. Hólčec zalěze ze zadnjeho městna doprědka a stłóči njewotpohladnje na knefl za centralny zamk. Tež klučik w awće tčeše, tak zo njemóžeše je wowka wotwonka wočinić. Wšo dobre přirěčowanje njepomhaše, tak zo ničo njezby, hač zadnje wokno awta rozbić.
Policija (30.06.17)
Dwě kolesy přewjele
Kamjenc. Wobydlerka Njeswačanskeje dróhi w Kamjencu zawčerawšim policiji zdźěli, zo bě so něchtó w bydlenskim domje do pincy zadobył. Pokradnył nichtó ničo njeje, za to pak bě něchtó dwě cuzej kolesy wotstajił. Najskerje buštej wonej něhdźe pokradnjenej.
Policija (29.06.17)
Paduši hłódni byli
Wojerecy. Wobsedźerka kantiny na Wojerowskej industrijowej přestrjeni dyrbješe zawčerawšim zwěsćić, zo běchu so pola njeje na dnjach do toho njeznaći zadobyli. Po wšěm zdaću woni z hłodom tradachu, přetož z kuchnje běchu žiwidła w hódnoće 670 eurow sobu wzali. Nimo toho načinichu něhdźe 200 eurow wěcneje škody.
Policija (28.06.17)
Móraka fotografował
Budyšin. Kedźbliwy wobydler bě zawčerawšim wobkedźbował, kak młodostny telefonowu budku na Budyskej Hošic hasy z barbu pomóra. Swědk móraka fotografowaše a informowaše policiju. Dźakowano wobrazej su 17lětneho pozdźišo blisko dźiwadła dosahnyli.
Policija (27.06.17)
Sydom ludźi so zraniło
Budyšin. Na zwjazkowej dróze B 96 blisko awtodróhoweje wotbóčki Budyšin-zapad je so wčera připołdnju ćežke wobchadne njezbožo stało. 65lětna wodźerka Opela bě so w prawej křiwicy na napřećiwnu jězdnju dóstała a frontalnje do Škody zrazyła. Wona a jeje sobujěduca w samsnej starobje kaž tež dwě žonje w tamnym awće so ćežko zranichu. Wodźer Škody a jeho dźěsći w starobje jednoho a pjeć lět so snadnje zranichu.
Policija (26.06.17)
Štyrjo zranjeni po njezbožu
Njebjelčicy. Ćežke wobchadne njezbožo sta so wčera nawječor na statnej dróze S 94 pola Njebjelčic. Při wotbóčce do Kamjenca zajědźe VW z dotal njeznateje přičiny na lěwy bok jězdnje a so wjacore razy přewali. 43lětny wodźer awta, 43lětna sobujěduca kaž tež dźěsći w starobje dwanaće a wosom lět so zranichu.
Policija (23.06.17)
W młodźinskim klubje pobyli
Kašecy. Młodźinski klub při sportnišću w Kašecach njeje jenož woblubowane zetkanišćo młodostnym ze wsy. Nětko pak su jim njeznaći wjeselo skazyli. Zawčerawšim bu znate, zo bě so něchtó do kluba zadobył a z njeho dwě kasy z dohromady něhdźe tysac eurami pokradnył. Načinjenu wěcnu škodu trochuje jedyn ze zamołwitych na něhdźe 250 eurow. Policija za skućićelemi pyta.
Policija (22.06.17)
Slepy pasažěr w kupjeli
Budyšin. 24lětny muž w Budyšinje je zawčerawšim policiju wo pomoc prosył, dokelž bě w kupjeli swojeho bydlenja skorpiona wuhladał. Po wšěm zdaću bě stworjenčko jako slepy pasažěr z kófra muža wulězło, po tym zo bě so tón z dowola w Italskej nawróćił. Zastojnicy pomhachu skorpiona w kupjeli popadnyć. Zwěrjatko pak bórze na to zahiny.
Policija (21.06.17)
Techniki dla so nastróžił
Horni Wujězd. Wodźenski asistencny system bě po wšěm zdaću wina na wobchadnym njezbožu zawčerawšim na awtodróze A 4 pola Hornjeho Wujězda. Tam chcyše wodźer Škody awtodróhu wopušćić. Zajědźe tuž na prawu jězdnju, ale bjez toho zo by směrowu lampku zaswěćił. Na to reagowaše po čarje wjeducy asistent a tróšku napřećo wodźeše. Toho so šofer nastróži a sylnje do tamneho směra zawiny, tak zo je ze swojim Superbom do nabóčneho wobhrodźenja prasnył.
