Policija (07.04.17)
Baterije so palili
Kamjenc. W baterije porjedźacej firmje na Kamjenskej Sewjernej je wčera wječor woheń wudyrił. Wobydlerjo běchu wobkedźbowali, zo sylny kur z prěnjeho poschoda twarjenja stupa. Wjace hač sto wohnjowych wobornikow, wuchowanskich pomocnikow a policistow bě zasadźenych. Strach za wobydlerjow po informacijach policije žadyn njewobsteješe.
Policija (06.04.17)
Z pukom alarm „zawinił“
Běła Woda. K njewšědnemu zasadźenju wołachu zawčerawšim wječor wohnjowu woboru a policiju do lodoweje hale Běłowodźanskich Liškow. Tam bě wohnjowa připrawa alarm přizjewiła. Na městnje zwěsćichu, zo bě hašenska woda na lodowe hrajnišćo ćekła. Što bě so stało? Při treningu bě hrajer po wšěm zdaću z pukom sprinklerowy pryskowak trjechił. Na to awtomatiska woheń přizjewjaca připrawa zaskoči, samostatnje wohnjowu woboru informowaše a – štož je jeje nadawk – hašensku wodu do objekta pryskaše. Njeličomne litry wody su tak na hrajnišćo wuběželi.
Policija (05.04.17)
Do jastwa chcył
Wojerecy. Při přepruwowanju personalijow 41lětneho we wčerawšich rańšich hodźinach we Wojerecach policistam napadny, zo njebě muž dotal napołoženu pokutu 125 eurow zapłaćił. Tohodla předležeše přećiwo njemu wukaz zajeća. By-li sumu na městnje zapłaćił, móhł wón jatbje w poslednim wokomiku zadźěwać. To pak 41lětny nochcyše. Město toho wón policistow prošeše jeho do jastwa dowjezć, štož zastojnicy nablaku sčinichu. Tam ma nětko wjacore dny wotsedźeć.
Policija (04.04.17)
Awto motorskemu předjězbu wzało
Běła Woda. Jedne z prěnich lětušich njezbožow, na kotrymž bě wodźerka motorskeho wobdźělena, sta so zawčerawšim pola Běłeje Wody. Na zwjazkowej dróze B 156 bě 22lětna wodźerka Suzukija z runje tak starej sobujěducej po puću, jako wodźer awta jeju předjězbu njewobkedźbowaše a do njeju zrazy. Wobě žonje so ćežko zraništej.
Policija (03.04.17)
Trik bohužel fungował
Budyšin. Z wnučkowym trikom su njeznaći minjeny pjatk 79lětnej žonje w Budyšinje pjećcyfrowu sumu pjenjez wulišćili. Młoda žona pola njeje připołdnju zazwoni a wuda so jako wnučka, kotraž pjenjezy trjeba, dokelž chce sej awto kupić. Pozdźišo zazwonichu dalši njeznaći, kotřiž jako pozdatni prawiznicy a kriminalisća „basničku wnučki“ wobkrućichu. Skónčnje rentnarka wjacore tysac eurow njeznatemu mužej přepoda. Woprawdźita wnučka je pad nazajtra policiji přizjewiła.
Policija (31.03.17)
Pólšćina pomhała
Zhorjelc. Dźakowano swojim pólskorěčnym znajomosćam su zastojnicy Zhorjelskeho policajskeho rewěra zawčerawšim wječor mužej žiwjenje wuchowali. Policistow kaž tež wuchowansku słužbu běchu na Zhorjelsku Hospitalsku hasu wołali. Na jednym z hornich poschodow wjaceswójbneho domu sedźeše muž na kromje wokna. Jeničce pólšćinu rěčacy 52lětny bě po wšěm zdaću psychisce chory. W jeho maćeršćinje so policisća z nim nimale dwě hodźinje měrnje rozmołwjachu, doniž so jim njeporadźi muža hrabnyć a jeho njezranjeneho do bydlenja sćahnyć. Wuchowanska słužba so dale wo njeho staraše.
Policija (30.03.17)
Swoje koleso spóznała
Budyšin. Jako chcyše swoje koleso wróćene měć, bu zawčerawšim w Budyšinje 27lětna samodruha žona zranjena. Wona wuhlada je při płoće pěstowarnje na Paulijowej. Jako chcyše cuzy muž z nim wotjěć, žona jeho narěča. Tón pak 27lětnu storči, tak zo wona padny. Njeznaty so z kolesom zminy. Kriminalna policija pad pokradnjeneho kolesa nětko runje tak přepytuje kaž podawk před pěstowarnju.
Policija (29.03.17)
Mortwa žona w rěce
Budyšin. 26lětnu mortwu žonu su wčera ze Sprjewje w Budyšinje wućahnyli. Pasanća běchu připołdnju zdźělili, zo blisko spušćadła ćěło na wodźe płuwa. Wohnjowi wobornicy je na to z rěki wućahnychu. Přiwołany lěkar móžeše jenož hišće smjerć młodeje žony zwěsćić. Policija nětko pruwuje, kak je wona žiwjenje přisadźiła a hač so snano wo njeskutk jedna, zdźěli Zhorjelska policija.
Wjace hač 100 km/h spěšnišo
Njeznarowy. Najskerje słónčne nalětnje wjedro je póndźelu popołdnju motorskeho na zwjazkowej dróze B 6 w Njeznarowach (Eiserode) pola Lubija zawjedło, swojej mašinje tójšto wjace płuna dać. Při dowolenych 60 kilometrach na hodźinu błyskny jeho měrjenska připrawa, natwarjena pódla busoweho zastanišća z nahladnymi 173 km/h. Smalak změje nětko 680 eurow pokuty płaćić, dyrbi tři měsacy nóžkować a dóstanje nimo toho dwaj dypkaj w Flensburgu.
Policija (28.03.17)
E-bike pokradnyli
Kamjenc. Z prěnimi słónčnymi nalětnimi dnjemi přiběraja zaso padustwa kolesow. Při tym měrja so skućićeljo tež na drohe groćane koniki, kaž w nocy na minjenu njedźelu w Kamjencu. Na tamnišej Šěrokej hasy je so ze zachoda wjaceswójbneho domu nowy e-bike zhubił. Wobsedźer powobliča jeho hódnotu na něhdźe 2 400 eurow. Kriminalna policija za kolesom z elektriskim motorom nětko pyta.
Policija (27.03.17)
Dospołnje wopity z awtom po puću
Wóspork. Na awtodróze A 4 mjez Budyšinom a Wósporkom bě sobotu popołdnju wodźer wosoboweho awta typa Kia po puću. Wjacori swědcy policiji zdźělichu, zo šofer ze swojim wašnjom jězdźenja wobchad wohroža. Wopisane awto bě po wuprajenju swědkow wjacore razy do nabóčneho wobhrodźenja zrazyło. Při Wósporskej awtodróhowej wotbóčce policisća krótko do 16 hodź. awto zadźeržachu a 48lětneho wodźerja kontrolowachu. Při tym so wukopa, zo měješe tón 3,50 promilow alkohola w kreji. Jeho jězbnu dowolnosć sej zastojnicy wězo hnydom wobchowachu. Načinjena wěcna škoda wučinja dohromady něhdźe 20 000 eurow. Policija so z tymle padom bliže zaběra. Na kóždy pad drje dóstanje muž bórze póštu sudnistwa.
