Policija (07.05.18)
40 ludow pčołkow pokradnyli
Kromola. Při kontroli swojich pčołkow w Kromoli dyrbješe pčołar minjeny pjatk popołdnju zwěsćić, zo běchu jemu njeznaći z kromy rěpikoweho pola na wšěch 40 pčolacych ludow pokradnyli. Po wšěm zdaću sta so to w času wot 29. apryla hač do minjeneho pjatka. Na te wašnje je pčołar wjace hač milion pčołkow zhubił. Policija tuka na to, zo běchu paduši profije, kotřiž wědźa, kak maš z pčołkami wobchadźeć. Runje nalěto tajke pady přiběraja. Potrjecheny wobsedźer trochuje škodu na něhdźe 5 000 eurow. Wón pak njeje jenički, kiž pod tymle padustwom ćerpi. Ratarjo wokolnych polow so nětko strachuja, zo so pobrachowace pčołki na žně wuskutkuja.
Z motorskim do přirowa
Pěskecy. Ćežko zranił je so minjeny pjatk popołdnju młodostny na dróze mjez Smjerdźacej a Němskimi Pazlicami. W dołhej lěwej křiwicy blisko Pěskec zhubi 16lětny kontrolu nad swojim motorskim typa KTM 125 a zajědźe z nim do přirowa. Při tym so ćežko zrani. Wěcna škoda na motorskim wučinja po informacijach Zhorjelskeje policajskeje direkcije něhdźe 500 eurow.
Policija (04.05.18)
Rentnar wopor jebaka
Budyšin. Njeznaty muž je zawčerawšim 88lětneho Budyšana zjebał. Wón rentnarja w měsće narěča, wuda so jako znaty a jědźeše z nim do jeho bydlenja na Niemöllerowej. Tam přepoda jemu jako dar kožanej kapje a tobołu, za čož pak chcyše nadobo pjenjezy. To 88lětny wotpokaza, skónčnje pak tola pokaza, hdźe ma swoje pjenjezy schowane. Tam wza sej cuzy wjacore sta eurow a so zhubi. Štóž je minjene dny tohorunja kožane twory poskićene dóstał, njech přizjewi to policiji pod telefonowym čisłom 03591/ 35 60.
Policija (03.05.18)
Muž na třěchu zalězł
Biskopicy. Muž na třěše bydlenskeho doma na Belmsdorfskej w Biskopicach je zawčerawšim wječor policiju, wuchowansku słužbu a wohnjowu woboru dlěje hač dwě hodźinje zaběrał. Po rozkorje w swójbje bě 27lětny na třěchu twarjenja zalězł a nochcyše ju hižo wopušćić. Hakle po dobrym přirěčowanju policistow bě wón zwólniwy, přez třěšne wokno wróćo do domu hić. Wohnjowi wobornicy běchu mjeztym wulku płachtu přihotowali, jeli by wón runowahu zhubił. Pozdźišo bě 27lětny zwólniwy, so lěkarjej předstajić. Policisća alkoholizowaneho muža přewodźachu.
Policija (02.05.18)
Rubiznu zaso namakali
Bambruch. Njeznaći zadobychu so w nocy na póndźelu w Bambruchu do bydlenskeho domu, kiž tuchwilu přetwarjeja. Z njeho pokradnychu wšelake mašiny a grat w hódnoće něhdźe 5 000 eurow. Póndźelu připołdnju zhoni policija po pokiwje swědka wo wosobowym awće typa BMW w Kamjencu, w kotrymž bě mjenowana rubizna. Awto słuša 35lětnemu mužej, kiž je policiji znaty.
Policija (30.04.18)
Motorski smjertnje znjezbožił
Biskopicy. Tragiski wukónc měješe wčera dopołdnja jězba 53lětneho muža na statnej dróze S 120 pola Biskopic. Ze swojim motorskim typa Kawasaki zajědźe wón w lěwej křiwicy na prawy bok jězdnje a zhubi kontrolu nad swojej mašinu. Při tym so wón tak ćežko zrani, zo hišće na městnje njezboža wudycha.
Při jězoru hašeć dyrbjeli
Wojerecy. Runje sobotu popołdnju, jako mnozy doma rjane wjedro wužiwachu, wołachu wohnjowych wobornikow wokoło Wojerec k hašenju. Při Šibojskim jězoru so na płoninje něhdźe jednoho hektara lěsna póda paleše. Dohromady wosom jězdźidłow wokolnych woborow bě zasadźene. Nětko pruwuja, hač je něchtó woheń zamiškrił abo hač měješe to hinaše přičiny.
Pokradnjene awto lepili
Budyšin. Na awtodróze A 4 mjez Budyšinom a Zhorjelcom lepichu policisća sobotu připołnju awto typa Mercedes, kotrež bu dźeń do toho w Goslaru pokradnjene. 29lětneho pólskeho šofera nachwilnje zajachu a pozdźišo do přepyto- wanskeje jatby tyknychu.
Policija (27.04.18)
Jastwu zadźěwał
Kinspork. 37lětnemu mužej z Kinsporka hrožeše 30 dnjow jastwa, jeli wón přećiwo njemu wuprajenu pokutu 1 500 eurow njezapłaći. Z tajkimi padami so policija časćišo zaběra. W tym padźe pak njepřijědźechu zastojnicy k skućićelej, ale wón přizjewi so sam na rewěrje a swój dołh zapłaći. Z tym wón přebywanju w jastwje zadźěwa.
Jeničke wuwzaće
Wulka Dubrawa. Při kontroli před Wulkodubrawskej pěstowarnju zawčerawšim zwěsćichu, zo mějachu starši swoje dźěći w awće porjadnje připasane, tak zo móžachu pozitiwny facit sćahnyć. Jenož jenički nan tole ignorowaše. Z warnowanskim pjenjezom 30 eurow zastojnicy muža na jeho winowatosć dopomnichu.
Policija (26.04.18)
Konop w bydlenju plahował
Wojerecy. Dokelž njeje pokutu 280 eurow zapłaćił, je policija zawčerawšim pola 28lětneho Wojerowčana klinkała. Při tym napadny zastojnikam słódka wón w bydlenju. Pjenjezy drje wón zapłaći, te pak běchu mjeńši problem muža, přetož w bydlenju měješe wón mału plantažu konopjowych rostlin a tohorunja sušene łopjena. Policisća wšo sćazachu.
Policija (25.04.18)
Nimale so dótknyłoj
Budyšin. Lědma chutnje brał je dotal njeznaty šofer zawčerawšim rano na awtodróze A 4 při wotbóčce Budyšin-wuchod wěstotny wotstawk k před nim jěducym awtam. Wón tak smaleše, zo so jeho storkawa nimale teje před nim jěduceho dótkny. Agresiwneho zadźerženja dla čuješe so 29lětna wodźerka awta nuzowana a přizjewi tole policiji. Tež dalši šoferojo běchu potrjecheni. Pokiwy přijimuja pod telefonowym čisłom 03591/ 36 70.
Policija (24.04.18)
We wsy kóncowali
Trjebin. Po wšěm zdaću přewjele chwile mějachu njeznaći w nocy na njedźelu w Trjebinje. Tam ćehnjechu woni po wsy a kóncowachu, štož runje wuhladachu. Wjacori wobydlerjo tole njedźelu rano policiji přizjewichu. Tak skóncowachu skućićeljo wjacore listowe kašćiki, wuzběhnychu gulijowe wěka, powalichu wobchadne znamjo a wobškodźichu wabjensku taflu. Wěcna škoda pohibuje so po informacijach Zhorjelskeje policajskeje direkcije w třicyfrowym wobłuku. Kriminalna słužba Běłowodźanskeho policajskeho rewěra pad bliže přepytuje.
Policija (23.04.18)
Trawnikowy traktor so palił
Nowoslicy. Policiju a wohnjowu woboru wołachu sobotu wječor do Nowoslic. Tam bě so krótko po 20 hodź. w bróžni trawnikowy traktor palić započał. Dwě hodźinje do toho bě wobsedźer z nim hišće trawu sykł. Wjele dźěła pak wobornicy njemějachu, dokelž bě wobsedźer mašinu z bróžnje wućahnył a płomjenja zhašał. Škoda wučinja 2 500 eurow.
Wulka škoda při njezbožu
Wojerecy. Tójšto škody nasta wčera rano při wobchadnym njezbožu we Wojerecach. Tam bě 20lětny wodźer VW Tuarega do směra na Łaz po puću, jako jemu cuze awto napřećo přijědźe. Młody muž zhubi kontrolu nad jězdźidłom, so někotre razy zwróći a wosta hakle w zahrodnišću stejo. Při tym skóncowachu so wjacore płoty, tři zahrodowe domčki a wodowód zahrodoweho towarstwa. Cyłkowna škoda wučinja 90 000 eurow.
