Policija (24.02.17)
Do nakładneho awta zrazył
Porchow. Dźensa rano je 59lětny wodźer awta typa Kia na awtodróze A 4 mjez Ohornom a Porchowom do směra na Zhorjelc z wotmachom do před nim jěduceho nakładneho awta z napołožakom zrazył. Při tym stłóči so přezpólne jězdźidło hač k prědnjej škleńcy pod napołožak. 51lětnu sobujěducu njezbožo zawinowaceho awta dyrbjachu zranjenu do bliskeho klinikuma dowjezć. Šofer Kije pak so njezrani.
Z nimale třomi promilemi jěł
Kamjenc. Srjedu popołdnju lepi policija w Kamjencu 51lětneho, kiž bě z 2,6 promilemi alkohola z awtom po puću. Chětro wopiteho wodźerja Opela bě patrulja Kamjenskeho policajskeho rewěra kontrolowała. Zastojnicy jemu wězo hnydom jězbnu dowolnosć sćazachu.
Policija (23.02.17)
Njezbožo zawinił a ćeknył
Budyšin. Jako chcyše wčera wječor wodźer Mercedesa klasy A za Budyšinom do směra na awtodróhu nalěwo wotbočić, přewidźa wón napřećo přijěducy Simson a zrazy do njeho. 16lětny mopedist a jeho 17lětny sobujěducy padnyštaj a so wobaj zraništaj. 72lětny zawinowar njezboža pak ćekny. Pozdźišo je so policiji přizjewił.
Paduši po puću byli
Budyšin. W Budyskim wokrjesu běchu zawčerawšim zaso paduši po puću. W Kamjencu pokradnychu na Wernera Reifowej wotstajeny Škoda, we Wojerecach 20 000 eurow hódny Audi TT a tohorunja w Kamjencu z firmy blisko dwórnišća měrjensku techniku.
Policija (22.02.17)
Njezboži ze štyrjomi zranjenymi
Budyšin. W Budyskej Strowotnej studni su wčera popołdnju blisko kupnicy Kaufland tři awta do so zrazyli; při čimž so dwě wosobje zraništej. Policija přičinu njezboža hišće přepytuje. Na wotbóčce mjez statnymaj dróhomaj S 106 a S 100 pola Błohašec stej wčera popołdnju z dotal njeznateje přičiny awće do so prasnyłoj. Tež tam so dwě wosobje zraništej.
Do awta so zadobył
Njedźichow. W nocy na wutoru lepi wobydler w Njedźichowje muža, kiž bě so do Renaulta zadobył, kotryž steješe na Jahnowej hasy. Z njeho chcyše z Pólskeje pochadźacy paduch industrijowy prochsrěbak spakosćić.
Policija (21.02.17)
Třo zranjeni při zražce
Horni Wujězd. Dźensa něhdźe w 6.50 hodź. dóńdźe na statnej dróze S 101 pola Hornjeho Wujězda k ćežkemu wobchadnemu njezbožu. Jako chcyše młoda wodźerka VWja Polo nalěwo na awtodróhu wotbočić, přewidźa wona napřećo přijěducy VW Caddy a zrazy frontalnje do njeho. Wotmach bě tak wulki, zo so wobě awće z jězdnje sunyštej. Zawinowarku njezboža, kotraž so ćežko zrani, dyrbjachu ju do kliniki dowjezć. Tež šofera a sobujěduceho tamneho awta zapokazachu do chorownje.
Darjensku boksu wurumowali
Budyšin. Zawčerawšim, njedźelu, su njeznaći w Budyskim wopomnišću na Weigangowej z darjenskeje boksy tójšto pjenjez pokradnyli. Kelko, to dotal znate njeje. Wěcna škoda wučinja něhdźe 20 eurow.
Njewědomje matracu zapalił
Kamjenc. 37lětny je wčera w pincy domu na Kamjenskej Wilhelma Külzowej njewědomje matracu zamiškrił. Zo by wjace widźał, zapali wón při rjedźenju kolesa zapalak. Při tym powali blešu z rjedźenskim srědkom. Tón so na to zapali a płomjenja přeskočichu na matracu.
Policija (20.02.17)
Z domu za płunom smjerdźało
Biskopicy. Na Karla Liebknechtowej w Biskopicach je dźensa dopołdnja chětro za płunom smjerdźało. Hnydom wołachu wobydlerjo wohnjowu woboru. Kameradojo z měrjenskim aparatom zwěsćichu, zo stupaše amoniak ze zemskopłunoweje syće w pincy. Dokelž pak njebě mnóstwo přewulke, dosahaše pincu přewětrić. Na to wohnjowi wobornicy ENSO informowachu.
Kuriozny připad
Smělna. W Smělnej bě so minjeny pjatk z dotal njeznateje přičiny Peugeot dospołnje wupalił. 15 wohnjowych wobornikow njezamó tam hižo ničo wuskutkować. Při kontroli zastojnik Biskopičanskeho policajskeho rewěra zwěsći, zo njebě awto scyła přizjewjene, zo njeměještaj jeho młodaj wobsedźerjej zawěsćenski škit a běštaj bjez jězbneje dowolnosće po puću. Nimo toho bě na jězdźidle falšowane znamjo přičinjene, kotrež běštaj mužej internetnje pola Amazon skazałoj.
Policija (17.02.17)
Šofer w kabinje awta zemrěł
Bukecy. Wodźer nakładneho awta je zawčerawšim popołdnju na parkowanišću při zwjazkowej dróze B 6 w Bukecach kolegu w kabinje jeho nakładneho awta namakał. Za 57lětneho přińdźe kóždažkuli pomoc přepozdźe, přiwołany nuzowy lěkar móžeše jenož hišće smjerć muža zwěsćić. Wo přičinach dotal ničo znate njeje, po wšěm zdaću pak jedna so wo strowotny problem. Kriminalna policija pad přepytuje, zo móhli wobdźělenje třećeje wosoby wuzamknyć.
Blešu wódki nimale wupił
Hermsdorf. Na swětłym dnju dospołnje wopity bě srjedu popołdnju 49lětny muž na awtodróze A 4 z awtom po puću. Wobsadka awtodróhoweje policije je šofera Renaulta Laguna při wotbóčce Hermsdorf kontrolowała a hnydom jeho napadnu „chorhojčku“ pytnyła. Na to naměrichu pola njeho 2,26 promilow alkohola w kreji. Nimo toho měješe wón nimale wupitu blešu wódki w swojim płašću. Dalšu jězbu jemu policisća wězo zakazachu a přewodźachu jeho k wotedaću kreje.
Policija (16.02.17)
Wobchad z powětra kontrolowali
Budyšin. Rjane wjedro za lětanje wužiwaše zawčerawšim připołdnju wobchadna policajska inspekcija za wobchadnu kontrolu na awtodróze A 4 mjez wotbóčkomaj Hermsdorf a Zhorjelc. „Lětace wóčko“ dokumentowaše pjeć padow, w kotrychž wodźerjo nakładnych awtow minimalny wotstawk 50 metrow k jězdźidłu před nimi njedodźeržachu. Pilot helikoptera zdźěli tele pady wobsadkam policajskich awtow. Wone přewodźachu potrjechenych šoferow k přichodnemu parkowanišću, hdźež jim jich zmylk rozłožichu. W štyrjoch padach při tym wosta, zo změja wodźerjo pokutu 80 eurow zapłaćić. Při kontroli pjateho nakładneho awta a jeho 62lětneho wodźerja pak zastojnikam napadny, zo muž scyła žanu płaćiwu jězbnu dowolnosć njewobsedźeše. Zakazachu jemu tuž dalšu jězbu. Spedicija, za kotruž muž dźěła, dyrbješe druheho šofera pósłać, zo bychu nakładowane twory swój cil docpěli. Statne rěčnistwo so nětko z tymle padom dokładnišo zaběra.
Policija (15.02.17)
Paduši tójšto škody načinili
Wojerecy. W času wot njedźele připołdnja hač do póndźele popołdnja su so njeznaći we Wojerecach na teren zawoda na Narćanskim puću zadobyli. Tam pokradnychu po informacijach policije 26 elektroniskich twarskich dźělow. Hódnotu rubizny je wobsedźer na šěsćcyfrowu sumu pjenjez wobličił. Nimo toho nasta něhdźe 50 000 eurow wěcneje škody. Kriminalna słužba Wojerowskeho policajskeho rewěra pad přepytuje.
Šoferku słónco slepiło
Biskopicy. Po wšěm zdaću nisko stejaceho słónca dla je 34lětna žona zawčerawšim w Biskopicach wobchadne njezbožo zawiniła. Wona chcyše ze swojim VWjom z hłowneje dróhi nalěwo wotbočić, přewidźa pak napřećo přijěduce jězdźidło zymskeje słužby a zrazy do njeho.
Policija (14.02.17)
Horcy popjeł wina był
Nowe Město. Popjeł z kachlow dyrbiš najprjedy wochłódnić dać, prjedy hač směš jón do wotpadkoweho sudobja sypnyć. To wě nětko tež wobsedźer ležownosće w Nowym Měsće nad Sprjewju. Pola njeho bě so horceho popjeła dla wotpadkowe sudobjo palić započało. Płomjenja wupřestrěchu so wottam na třěchu garaže. Wohnjowi wobornicy pak je spěšnje podusychu. 56lětneho wobydlerja dyrbjachu lěkarsce zastarać.
Policija (13.02.17)
Dźiwje stanowali
Mučow. Swoje zymske prózdniny chcyše sobotu popołdnju pjeć młodostnych w Mučowje na cyle wosebite wašnje zahajić. Hólcy w starobje 14 do 17 lět zetkachu so k zhromadnemu dźiwjemu stanowanju. Za to natwarichu sej tak mjenowany štomowy domčk, podrězachu štomiki, zo móhli sej lěhwowy woheń zapalić, a na to sej hudźbu wótře wotwjertnychu. Dokelž so wobydlerjo w bliskosći myleni čujachu, zawołachu policiju. Nimo toho lěs ani młodostnym abo jich staršim njesłušeše. Zastojnicy Wojerowskeho policajskeho rewěra stanowansku akciju skónčichu. Wot młodych ludźi načinjena wěcna škoda wučinja po informacijach policije 400 eurow.
