Policija (30.10.17)
Herwart chětro zachadźał
Budyšin. Wjace hač sto razow su wčera we wobłuku Zhorjelskeje policajskeje direkcije policiju a wohnjowych wobornikow wołali, dokelž bě wichor Herwart štomy spowalał, hałzy wotłamał, třěšne cyhele z domow storhał kaž tež wjacore awta skóncował. W Pančicach-Kukowje je trójce sirena wuła, tež kameradojo ze Smjerdźaceje, Ralbic a Róžanta běchu zasadźeni. Zranił pak so na zbožo nichtó njeje. Wjacore třěšne cyhele su z Ralbičanskeje, Róžeńčanskeje a z klóšterskeje cyrkwje w Pančicach spadali.
Policija (27.10.17)
Jandźel pěston sobu jěł
Hamor. Wulke zbožo měješe wčera wodźer wosoboweho awta typa Ford na zwjazkowej dróze B 156 pola Hamora. Krótko do 7 hodź. zrazy wón do kapitalneho jelenja. Šofer bě drje hišće spinać spytał, njemóžeše pak zražce ze 14kónčkatym skoćećom zadźěwać. Přez wulkosć tajkich zwěrjatow hroža wodźerjam wosobowych awtow a jich sobujěducym wulke škody, na přikład, bychu-li mócne rohi prědnje wokno jězdźidła předyrili. Nimo toho skutkuja wahi dźiwiny dla při zražkach jara wulke fyzikaliske mocy na karoseriju. Wodźer Forda wčera rano pola Hamora měješe po wšěm zdaću jandźela pěstona jako sobujěduceho. Muž wosta njezranjeny. Jeho awto wšak hižo dale jěć njemóžeše. Wěcnu škodu trochuja na něhdźe 8 000 eurow. Policija tuž radźi, póćmje wosebje pomału přez lěsy jězdźić.
Policija (26.10.17)
Ze 104 km/h přez wjes
Dobrošecy. Na wjesnej dróze w Dobrošecach w Malešanskej gmejnje je policija zawčerawšim spěšnosć měriła. W času wot 14.30 hač do 19 hodź. je tam něhdźe 780 wozydłow nimo kontrolneho městna jěło. 30 wosobowych awtow bě wjele spěšnišo po puću hač dowolenych 50 km/h. Najnuznišo měješe VW z Budyskim čisłom. Jeho šofer smaleše ze 104 km/h přez wjes. Za to smě so wón nětko na dwuměsačny zakaz jězdźenja nastajić, dyrbi 280 eurow pokuty płaćić a dóstanje dwaj dypkaj w Flensburgu.
Policija (25.10.17)
Awto namakali, šofera nic
Hrubjelčicy. W lěsku pola Hrubjelčic skónči so wčera rano jězba Mercedesa GLE 450. Chětro drohe awto bu w nocy do toho we Wiesbadenje pokradnjene. Na zwjazkowej dróze B 6 w Spytecach je SUV policiji krótko po 8 hodź. napadnył. Jako chcychu jón kontrolować, wón najprjedy tež zasta, nadobo pak stupi šofer na płun a ćekny do směra na Budyšin. Dalša wobsadka policajskeho jězdźidła chcyše Mercedes w Błohašecach zadźeržeć. Tam pak wodźer ani njezasta, ale kontrolne městno wobjědźe. Při tym dyrbjachu zastojnicy nabok skočić, zo njebychu so zranili. W Sćijecach ćěkacy naprawo wotboči, zrazy při tym do nakładneho awta, jědźeše pak dale do směra na Hrubjelčicy. Tam policisća Mercedes skónčnje namakachu, šofer pak bě mjeztym pěši ćeknył. Za mužom w starobje 30 do 40 lět nětko pytaja.
Policija (24.10.17)
Bencin z BMWja wotklumpali
Biskopicy. Paduši njekradnu ćěriwo jeno z nakładnych awtow, w nocy na njedźelu činjachu to w Biskopicach tež pola wosoboweho awta typa BMW. Po tym zo běchu wěko tanka namócnje wočinili, wotklumpachu 20 litrow bencina a načinichu tak dohromady 80 eurow škody.
Policija (23.10.17)
Z drogami ćeknyć chcył
Wojerecy. Dobry čuch mějachu zastojnicy sobotu wječor we Wojerecach, jako chcychu młodeho muža kontrolować. Tón so mjenujcy kontroli wuwiny a ćekny, po krótkim přesćěhanju pak jeho tola dosahnychu a sej jeho na to wězo trochu bliže wobhladachu. Při tym namakachu policisća pola njeho titku ze sylnje wonjacymi kćenjemi. Dokelž jednaše so wo drogi, je zastojnicy sćazachu.
Policija (20.10.17)
Woheń w bungalowje
Wulke Ždźary. 15 000 eurow škody je wuslědk wohenja, kiž je wčera rano w bungalowje we Wulkich Ždźarach wudyrił. K hašenju wołachu 30 kameradow wokolnych woborow. Zwjazkowu dróhu B 96 dyrbjachu dwě hodźinje zawrěć.
Policija (19.10.17)
Žane wjeselo z rubizny
Běła Woda. Dokelž bě w nocy na wutoru we Łazu Audi A6 bjez zadnjeho čisła po puću, chcychu policisća awto kontrolować. Šofer pak stupi na płun. Při Ćežkej horje pola Běłeje Wody wón a dalši sobujěducy tčacy wostaštaj a pěši ćeknyštaj. W awće namakachu zastojnicy wjacore kanistry z dohromady 200 litrami diesela kaž tež hadźicu. Hdźe běchu njeznataj ćěriwo pokradnyli, nětko přepytuja.
Policija (18.10.17)
Dyrbi měsac nóžkować
Budyšin. Na awtodróze A 4 mjez wotbóčkomaj Budyšin-wuchod a Budyšin-zapad je spěšnosć na 120 km/h wobmjezowana. Hač so tole dodźerži, je policija zawčerawšim dopołdnja kontrolowała. Wjace hač 3 600 jězdźidłow je wot 7 hač do 12.30 hodź. nimo měrjenskeje stacije jěło. 159 šoferow bě spěšnišo hač dowolene po puću. W 110 padach wostanje při poroku. 49 wodźerjow pak měješe wosebje nuznje a dóstanje nětko list, zo dyrbja pokutu płaćić. Najspěšniši bě wodźer wosoboweho awta, kotrehož měrichu ze 174 km/h. Za to změje wón 240 eurow płaćić, dóstanje dwaj dypkaj w Flensburgu a dyrbi měsac nóžkować.
Policija (17.10.17)
Wopity po puću był
Bóšicy. Zastojnicy Budyskeho policajskeho rewěra zadźeržachu zawčerawšim popołdnju na Nowobóšćanskim puću 37lětneho wodźerja Opela. Alkoholowy test pola njeho wunjese, zo měješe wón 2,18 promilow alkohola w kreji. Dale zastojnicy zwěsćichu, zo muž scyła žanu jězbnu dowolnosć njeměješe.
Wodźerka njekedźbowała
Wulke Ždźary. Na zwjazkowej dróze B 96 we Wulkich Ždźarach je njedźelu 52lětna wodźerka motorskeho přepozdźe pytnyła, zo dyrbješe před njej jěducy Peugeot zastać, a do njeho zrazy. Na to suny so awto hišće do Renaulta. Šoferaj awtow a jeju sobujěducej so snadnje zranichu, wodźerka motorskeho pak ćežko.
