Policija (09.11.17)
Pytaja wobškodźene awto
Kamjenc. Nic skućićela, ale škodowaneho pyta policija w Kamjencu. Na tamnišim parkowanišću při Lessingowym parku bě 67lětna žona ze swojim Seatom do cuzeho awta prasnyła. Rentnarka městno njezboža skrótka wopušći, ale so bórze na to nawróći, zo by škodu zrjadowała. Cuze awto pak bě mjeztym wotjěło, na čož 67lětna policiju informowaše. Ta pyta nětko na prawym boku wobškodźene wosobowe awto. Pokiwy přijimuje Kamjenski policajski rewěr pod telefonowym čisłom 03578/ 35 20.
Policija (08.11.17)
Sam sebje zranił
Bjerwałd. Po swójbnym rozestajenju je 33lětny muž zawčerawšim popołdnju w Bjerwałdźe tež policiju zaběrał. Zazwoni nuzowe čisło a prašeše so za lěkarjom. Jako wobsadka policajskeho awta tam přijědźe, pokaza wón zastojnikam sekeru kaž tež trašawku a so nadobo z nožom sam zrani. Jeno z pomocu popjerjoweho sprayja móžachu jeho přewinyć. Při alkomatowym tesće naměrichu pola njeho 4,18 promilow alkohola w kreji. Lěkarsku pomoc pak muž wotpokaza.
Policija (07.11.17)
Šula wčera wupadnyła
Hamor. Nad přidatnym swobodnym dnjom wjeselić smědźachu so wčera holcy a hólcy Hamorskeje zakładneje šule. Přičina pak bě wšo druhe hač zwjeselaca. Pod třěchu bě z dotal njeznatych přičin woheń wudyrił, čehoždla so tam chětro kurješe. Alarmowachu tuž wohnjowu woboru, kotraž měješe wšitko spěšnje pod kontrolu. Přiwšěm su něhdźe 90 šulerjow hižo krótko po 7.30 hodź. zaso domoj pósłali. Zranił so na zbožo nichtó njeje. Fachowc wohnjoweje wobory je sej městnosć wčera bliže wobhladał a za tym slědźił, hač bě snano techniski njedostatk přičina wohenja.
Policija (06.11.17)
Transporteraj pokradnyli
Nadźanecy. W času wot minjeneho pjatka popołdnja hač do soboty dopołdnja zadobychu so njeznaći na teren rjemjeslniskeho zawoda w Nadźanecach pola Budyšina, hdźež garažowe wrota namócnje wočinichu. Z garaže su zamknjenej běłej transporteraj typa Ford Transit z čisłom BZ-MB 1408 resp. BZ-MB 1607 sobu wzali. Cyłkownu hódnotu awtow trochuje jeju wobsedźer na něhdźe 30 000 eurow. Hač su z firmy hewak hišće něšto pokradnyli a kelko škody je při zadobywanju nastało, njemóže policija hišće rjec. Kriminalni technikarjo wjacore slědy zawěsćichu. Za jězdźidłomaj nětko mjezynarodnje pytaja.
Policija (03.11.17)
Konje po měsće „dundali“
Kamjenc. Pjeć koni je sej zawčerawšim Lessingowe město bliže wobhladało. Wone běchu so z pastwy w Jěžowje wudobyli, a hakle blisko Pastwineje hory móžachu je zaso popadnyć. Na pastwiny płót bě do toho hałza padnyła a konjam tak nachwilnu swobodu zmóžniła.
Policija (02.11.17)
Pod wliwom drogow po awtodróze jěł
Budyšin. Pod wliwom drogow stejaceho młodeho muža je policija zawčerawšim na awtodróze A 4 mjez Budyšinom a Wósporkom zadźeržała. Jako zastojnicy 27lětneho wodźerja wosoboweho awta přesćahnychu, mějachu podhlad, zo bě tón drogi brał. Při kontroli na parkowanišću so wobkrući, zo steješe muž pod wliwom amfetaminow. Policisća jemu dalšu jězbu zakazachu a přewodźachu jeho k wotedaću kreje. Jeli w njej tohorunja slědy drogow namakaja, hrozy šoferej 500 eurow pokuty. Nimo toho njesmě měsac z awtom jězdźić.
Policija (01.11.17)
Konopjowe rostliny w bydlenju
Njechorń. Dokelž bě 30lětny muž w Njechornju pola Wósporka podhladny, zo drogi wobsedźi, je policija tele dny jeho bydlenski dom na nawsy přepytała. Při tym namaka dohromady 66 konopjowych rostlin, wjacore tyzy ze sušenym marihuanu, grat a nastroje za plahowanje konopje kaž tež snadne mnóstwo crystala. W přepytanym domje bydli tohorunja 59lětny nan podhladneho muža. Hač je wón něšto wo drogowej plantaži syna wědźał, dyrbja kriminalisća nětko wuslědźić.
Policija (30.10.17)
Herwart chětro zachadźał
Budyšin. Wjace hač sto razow su wčera we wobłuku Zhorjelskeje policajskeje direkcije policiju a wohnjowych wobornikow wołali, dokelž bě wichor Herwart štomy spowalał, hałzy wotłamał, třěšne cyhele z domow storhał kaž tež wjacore awta skóncował. W Pančicach-Kukowje je trójce sirena wuła, tež kameradojo ze Smjerdźaceje, Ralbic a Róžanta běchu zasadźeni. Zranił pak so na zbožo nichtó njeje. Wjacore třěšne cyhele su z Ralbičanskeje, Róžeńčanskeje a z klóšterskeje cyrkwje w Pančicach spadali.
Policija (27.10.17)
Jandźel pěston sobu jěł
Hamor. Wulke zbožo měješe wčera wodźer wosoboweho awta typa Ford na zwjazkowej dróze B 156 pola Hamora. Krótko do 7 hodź. zrazy wón do kapitalneho jelenja. Šofer bě drje hišće spinać spytał, njemóžeše pak zražce ze 14kónčkatym skoćećom zadźěwać. Přez wulkosć tajkich zwěrjatow hroža wodźerjam wosobowych awtow a jich sobujěducym wulke škody, na přikład, bychu-li mócne rohi prědnje wokno jězdźidła předyrili. Nimo toho skutkuja wahi dźiwiny dla při zražkach jara wulke fyzikaliske mocy na karoseriju. Wodźer Forda wčera rano pola Hamora měješe po wšěm zdaću jandźela pěstona jako sobujěduceho. Muž wosta njezranjeny. Jeho awto wšak hižo dale jěć njemóžeše. Wěcnu škodu trochuja na něhdźe 8 000 eurow. Policija tuž radźi, póćmje wosebje pomału přez lěsy jězdźić.
Policija (26.10.17)
Ze 104 km/h přez wjes
Dobrošecy. Na wjesnej dróze w Dobrošecach w Malešanskej gmejnje je policija zawčerawšim spěšnosć měriła. W času wot 14.30 hač do 19 hodź. je tam něhdźe 780 wozydłow nimo kontrolneho městna jěło. 30 wosobowych awtow bě wjele spěšnišo po puću hač dowolenych 50 km/h. Najnuznišo měješe VW z Budyskim čisłom. Jeho šofer smaleše ze 104 km/h přez wjes. Za to smě so wón nětko na dwuměsačny zakaz jězdźenja nastajić, dyrbi 280 eurow pokuty płaćić a dóstanje dwaj dypkaj w Flensburgu.
