Policija (23.07.18)
Na balkonje so paliło
Budyšin. Z dotal njewujasnjeneje přičiny so wčera rano něhdźe w 4.10 hodź. w Budyskej Strowotnej studni na balkonje třećeho poschoda bydlenskeho domu paleše. W času hašenja kameradow Budyskeje wohnjoweje wobory dyrbješe 25 wosobow swoje bydlenje wopušćić. Płomjenjow dla bu fasada wobškodźena. Wěcnu škodu zastojnicy na něhdźe 15 000 eurow trochuja. Zranił so nichtó njebě, po hašenju smědźachu so wšitcy wobydlerjo do swojich bydlenjow wróćić.
Z 2,24 promilemi na kolesu
Kamjenc. Jako běchu sobotu něhdźe w 22.45 hodź. zastojnicy Kamjenskeho policajskeho rewěra w Lessingowym měsće na Macherowej dróze po puću, swojim wočam wěrić nochcychu. Wuhladachu mócnje „čumpaceho“ so kolesowarja. Bjez dźiwa tež: 37lětny měješe 2,24 promilow alkohola w kreji.
Wopity z awtom jěł
Pančicy-Kukow. Při wobchadnej kontroli je policija pjatk popołdnju w Pančicach-Kukowje šofera Suzukija lepiła, kiž měješe 0,68 promilow alkohola w kreji. 57lětny dyrbi z pjenježnej pokutu a zakazom wodźenja jězdźidła ličić.
Policija (20.07.18)
Štó je na kocora třělał?
Chróst. Wobsedźerka kocora w Chrósće pola Wulkeje Dubrawy je kónc junija swojeho lubuška ćežko zranjeneho wuhladała. Skótny lěkar zwěsći, zo bě něchtó po wšěm zdaću z powětrowku na njeho třělał. Z operaciju dyrbješe lěkar kocorej projektil wotstronić. Mjeztym so Maxlej zaso lěpje dźe. Kriminalna policija pad přepytuje a pyta swědkow. Štóž wě, štó je na kocora třělał, abo štóž je to snano samo wobkedźbował, njech so pola policije přizjewi. Nimo toho pyta policija informacije, hač su so w Chrósće a wokolinje minjeny čas podobne pady stali. Pokiwy přijimuja na Budyskim policajskim rewěrje pod telefonowym čisłom 0 35 91 / 35 60.
Policija (19.07.18)
Šofer paduchow njepytnył
Ohorn. Jězbny plan šofera nakładneho awta su njeznaći w nocy na srjedu přemjetali. 39lětny rano pytny, zo bě něchtó za čas jeho přestawki na awtodróhowym parkowanišću pola Ohorna nimale 150 litrow diesela z tanka jeho jězdźidła wotklumpał. Muž je w tym času w šoferskej kabinje spał a njeje wo njeskutku ničo pytnył. Cyłkownu škodu trochuje wodźer Lkw-ja na něhdźe 250 eurow. Nětko pyta policija swědkow, kotřiž su snano něšto podhladneho wobkedźbowali.
Policija (18.07.18)
Spinadła zaprajili
Worcyn. Wodźer traktora je so zawčerawšim při wobchadnym njezbožu pola Worcyna ćežko zranił. Na wuskim puću dyrbješe wón borzdźić. Po wšěm zdaću pak spinadła dweju připowěšakow zaprajichu, tak zo wozaj do napřećo přijěduceho Lkw-ja zrazyštej. Nakładowany rěpik so na jězdnju wusypa.
Policija (17.07.18)
Pytaja swědku
Wojerecy. Zastojnicy Wojerowskeho rewěra pytaja žonu, kotraž bě 1. julija při lěsnym pohrjebnišću padustwu zadźěwała. Něhdźe w 13.30 hodź. chcyše tam 25lětny skućićel ručnu tobołku pokradnyć, jako žona jeho narěča, pak tón ćekny. Swědka zawoła policiju a muža tak derje wopisa, zo policisća jeho pozdźišo lepichu. Žona, wo kotrejž je jeno swójbne mjeno znate, zo mjeztym wotsali. Nětko ju proša, so jako swědka pod telefonowym čisłom 0 35 71 / 46 50 přizjewić.
Policija (16.07.18)
W tunlu awto ćišćał
Königshain. Lědma wěrić móžachu sobudźěłarjo kontrolneho centruma awtodróhoweho tunla pod Limasom, štož su sobotu wječor na wobrazowkach widźeli. Tam muž swoje wosobowe awto typa Peugeot na prawej jězdni do směra na Zhorjelc ćišćeše. Krótko do wuchoda tunla alarmowana policija dalšemu ćišćenju zadźěwa. Pola šofera přewjedźeny test wunjese 1,56 promilow alkohola w kreji. Njewšědny wulět skónči so za 43lětneho z tym, zo sej zastojnicy jeho jězbnu dowolnosć wobchowachu.
Policija (13.07.18)
Přez telefon wobšudźili
Bretnig. Z woporom wobšudnikow sta so tele dny žona w Bretnigu. Při wjacorych telefonatach wudawachu so njeznaći skućićeljo jako sobudźěłaćerjo Microsofta a 58lětnej napowědachu, zo je jeje kompjuter połny wirusow. Po přikazu cuzych sćahny sej žona wjacore programy na swój ličak, přeradźi čisło swojeho handyja a zapoda připósłane TANy. Z nimi wotzběhnychu wobšudnicy 850 eurow z jeje konta.
Policija (12.07.18)
Znowa bjez papjerow jěł
Zubornička. W Malešecach wuhladachu zawčerawšim muža za wodźidłom Renaulta, kotrehož běchu w zašłosći hižo wospjet bjez jězbneje dowolnosće lepili. Tónraz wón před policistami ćěkaše a smaleše zdźěla hač do 200 km/h spěšnje do směra na Zuborničku. Tam pak zhubi kontrolu nad wodźidłom, šmórny so wobhrodźenja mosta a zajědźe skónčnje do rěčki. 51lětny změje so nětko znowa na sudnistwje zamołwić.
Policija (11.07.18)
Podhladnaj hižo raz napadnyłoj
Wojerecy. Wobsadka policajskeho awta je wčera rano we Wojerecach padustwu zadźěwała. Zastojnicy wuhladachu dweju muži w starobje 24 lět při wobchodźe na Dillingenskej. Jako wonaj policistow widźeštaj, spytaštaj ćeknyć, policistaj pak běštaj spěšnišej a jeju nachwilnje zaještaj. Přepytujo jeju awto z pólskim čisłom namakaštaj wulki hamor a mjezwočowej masce. Z tajkimi utensilijemi běštaj 24lětnaj w juniju hižo w Budyšinje napadnyłoj. Nimo toho staj wobaj tež w Pólskej zadobywanskich deliktow dla znataj. Policija nětko pruwuje, hač du dalše padustwa na jeju konto.
Policija (10.07.18)
Čisle a antena fuk
Salow. Diskoteka kuntworow minjeny kónc tydźenja w Salowje njeje jenož mnohich wopytowarjow přiwabiła, ale samo paduchow. Mjeztym zo je so tam 23lětny z přećelemi zabawjał, so druzy z jeho Seatom zaběrachu. Wotšrubowachu wobě značce jězdźidła a pokradnychu třěšnu antenu. Nimo toho awto młodeho muža rozdrapachu. Dohromady načinichu wjace hač tysac eurow škody, kaž policija rozprawja.
