Policija (22.07.19)
Zadobywarja lepili
Wojerecy. Dźakowano kedźbliwemu wobydlerjej móžachu w nocy na njedźelu we Wojerecach zadobywarja hnydom na městnje lepić. Swědk bě wobkedźbował, kak so njeznaty z kapsnej lampu do tak mjenowaneho Lutheroweho domu při Janskej cyrkwi zadobywa, a zawoła policiju. Zastojnicy spěšnje přijědźechu a 30lětneho skućićela zajachu. Při sebi měješe wón wotpowědny grat, z kotrymž bě so přez wokno do wosadneho domu zadobył. Pokradnył wón hišće ničo njebě. Škoda wučinja 20 eurow.
Policija (19.07.19)
Pokradnjeny bager namakali
Haslow. Z twarnišća w Haslowje su njeznaći w nocy na štwórtk 30 000 eurow drohi bager pokradnyli. Wotwjezli su jón z transporterom, kotryž běchu do toho w susodnych hornich Sulšecach spakosćili. Wčera připołdnju swědk transporter ze skóncowanym kolesom a z pokrad- njenym bagrom na dróze mjez Smochćicami a Wulkim Wjelkowom wuhlada.
Policija (18.07.19)
Woł ratarja zranił
Dubrjenk. Na njelube wašnje staj sej zawčerawšim popołdnju w Dubrjenku ratar a jeho woł blisko přišłoj. Kaž policija rozprawja, je so njemdre skoćo do 55lětneho muža dało a jeho ćežko zraniło. Wuchowanski helikopter dowjeze bura pozdźišo do chorownje. Zastojnicy Wojerowskeho policajskeho rewěra nětko bliše wobstejnosće, kotrež k zranjenjam muža wjedźechu, přepytuja.
Policija (17.07.19)
Wobšudnistwo so njeporadźiło
Budyšin. Pospyt, z falšowanym wupokazom paket wotewzać, so zawčerawšim 22lětnemu nigerianskemu staćanej poradźiło njeje. Sobudźěłaćerka wobchoda na Budyskej Serbskej hasy trik spózna a policiju informowa. Zastojnicy 22lětneho na to zadźeržachu a jemu falšowany wupokaz wotewzachu. Policija přepytuje dla falšowanja dokumentow.
Policija (16.07.19)
Sportowski zadobywar bjez rubizny
Wojerecy. Chětro sportowski bě zadobywar w nocy na póndźelu we Wojerecach. Na fasadźe produkciskeje hale krosnowaše wón štyri metry dowysoka, wočini tam wokno a zalězewši přez nje nutřka zaso dele krosnowaše. W hali wón wšitke kamory a polcy přepyta, powšěm zdaću pak ničo kmaneho njenamaka. Tuž wón přez wokno w přizemju zaso ćekny. Wěcna škoda wučinja přiwšěm 500 eurow.
Policija (15.07.19)
Paduchow w měsće lepili
Budyšin. Mužej w starobje 32 a 36 lět sej sobotu dopołdnja w kupnicy na Lubijskej w Budyšinje wjacore bleše palenca do swojeho nachribjetnika tyknyštaj, zo byštaj je kradnyłoj. Jako chcyše sobudźěłaćerka jeju zadźeržeć, storči jedyn z njeju žonu na bok a wobaj skućićelej ćeknyštaj. Policija pak jeju pozdźišo w měsće lepi a nachwilnje zaja. Hódnota rubizny wučinja 125 eurow.
Policija (12.07.19)
Běły próšk napadnył
Kamjenc. Za prědnim woknom wosoboweho awta w Kamjencu je policistam předwčerawšim běły próšk napadnył. Při drogowym tesće so wukopa, zo jednaše so wo amfetamin. Jako sej zastojnicy w přitomnosći 42lětneho wobsedźerja awto bliže wobhladachu, namakachu dwě pistoli, dźěle municije kaž tež cuzej awtowej čisle. Na to jězdźidło sćazachu, zo móhli je dokładnišo přepytać. Wuslědki hišće žane njepředleža.
Policija (11.07.19)
37lětneho zajeli
Budyšin. Zastojnicy tudyšeho policajskeho rewěra su wčera dopołdnja na Budyskej Schliebenowej bydlenje přepytali a 37lětneho muža zajeli. Zo njebychu hišće trajace přepytowanja wohrozyli, njejsu zdźělili, čehodla su bydlenje přepytali rěka w rozprawje policajskeje direkcije. Přećiwo zajatemu mužej předležeše sudniski wukaz zajeća, čehoždla jeho do jastwa dowjezechu. Nimo toho namakachu při kontroli tři konopjowe rostliny, kotrež sćazachu.
Policija (10.07.19)
Woheń škodu načinił
Ptačecy. Z dotal njeznateje přičiny je so póndźelu na ležownosći w Ptačecach (Tätzschwitz) w gmejnje Halštrowska Hola žiwy płót palił. Wulkeje suchoty dla přeskočichu płomjenja na susodnu garažu, na kontejner a tohorunja na blisku kólnju. Dohromady nasta něhdźe 50 000 eurow škody, rěka w policajskej rozprawje. Kriminalna policija přepytuje nětko podhlada zapalerstwa dla.
Policija (09.07.19)
Z awtom do stejaceho Lkw-ja
Biskopicy. Hdys a hdys přiwjezu do awtowych domow wosobowe awta, kotrež z nakładnych awtow dele jědu, tak zo je nadróžny wobchad trochu poćeženy. Runje w tajkim wokomiku je so wčera w Biskopicach wobchadne njezbožo stało. Wodźerka Hondy njebě stejacy Lkw wobkedźbowała a zrazy wotzady do njeho. Při tym so wona zrani, tak zo dyrbjachu ju do chorownje dowjezć. Čakacych awtow dla dóńdźe na bliskim křižowanišću k dalšemu njezbožu. Dróha bě połdra hodźiny zawrjena.
