Policija (12.04.19)
Konop plahowałoj
Běła Woda. W bydlenjomaj dweju muži w starobje 39 a 43 lět w Běłej Wodźe a Krušwicy je policija zawčerawšim 50 konopjowych rostlin resp. něšto stow gramow marihuany namakała. Bórze na to lepichu podhladneju při předawanišću zakuskow w Derbnje a jeju zajachu. Tež w awće měještaj wonaj drogi. 43lětneho je sudnik wčera do přepytowanskeje jatby tyknył, přećiwo 39lětnemu tohorunja přepytuja.
Policija (11.04.19)
Paduchow na awtodróze dosahnyli
Budyšin. Spěšnje wuslědźili su policisća zawčerawšim wječor padustwo na Budyskej Stieberowej. Tam běštaj mužej w starobje 29 a 32 lět we wobchodźe wjacore bleški parfima w hódnoće 130 eurow pokradnyłoj a jón wopušćejo alarm zawiniłoj. W swojim Opelu ćěkaštaj wonaj do směra na awtodróhu A 4, wjacore policajske awta smalachu za nimaj. Při wotbóčce Niederseifersdorf skućićelow skónčnje zadźeržachu. W jeju awće namakachu zastojnicy wšitke parfimowe bleški, nóž a trašawku. Nimo toho so při drogowym tesće wukopa, zo bě šofer najskerje drogi brał. Rubiznu, nóž a pistolu policisća sćazachu. Wo wšitko dalše stara so nětko kriminalna policija.
Policija (10.04.19)
Šulerjo wopiteho lepili
Wulke Ždźary. Zhromadnje ze šulerjemi je policija zawčerawšim před Wulkoždźarowskej Zakładnej šulu spěšnosć awtow měriła. Z 21 kontrolowanych šoferow běchu štyrjo přespěšni. Mjez nimi bě 60lětny wodźer Citroëna, kiž wosom km/h přespěšnje nimo šule jědźeše. Bóle grawěrowace hač tele přeńdźenje pak bě, zo měješe muž napadnu alkoholowu chorhojčku. Pola njeho naměrichu 1,64 promilow alkohola w kreji, a to hižo w 7.30 hodź. Jeho jězbna dowolnosć je wězo fuk.
Policija (09.04.19)
Wohenje zamiškrili
Budyšin. Najskerje přewjele wólneho časa mějachu zawčerawšim njeznaći w Budyskej Strowotnej studni. Kaž policija rozprawja, su woni na štyrjoch městnach na kóncu Otta Nageloweje woheń na suchej lěsnej pódźe zamiškrili a nimo toho spytali štom zapalić. Za to wužiwachu grilowy zapalak. Na zbožo žana wjetša škoda nastała njeje. Přiwšěm so kriminalna policija z padom nětko zaběra.
Policija (08.04.19)
Do nakładneho awta zrazył
Trjebjeńca. Ćežke wobchadne njezbožo sta so dźensa rano na zwjazkowej dróze B 6 w Trjebjeńcy (Steindörfel) pola Bukec. Tam chcyše wodźer motorskeho před nim jěduce nakładne awto přesćahnyć, jako wón z dotal njeznateje přičiny wotzady do njeho zajědźe. Na to zrazy z połnym wotmachom do napřećo přijěduceho LKWja. Při zražce so motorske dospołnje skóncowa, jeho wodźer wosta z ćežkimi zranjenjemi na puću ležo. Přiwołany nuzowy lěkar jeho na městnje zastara, pozdźišo dowjezechu muža do chorownje. Zwjazkowa dróha bě wjacore hodźiny dospołnje zawrjena, tak zo dóńdźe w rańšim powołanskim wobchadźe k dołhim rynkam čakacych awtow.
Policija (05.04.19)
Papjery falšowane byli
Běła Woda. Překwapjenku dožiwichu policisća zawčerawšim w Běłej Wodźe, jako wodźerja VWja kontrolowachu. Wón pokaza pólsku jězbnu dowolnosć. Zastojnicy pak zwěsćichu, zo muž poprawom žanu pólsku jězbnu dowolnosć njewobsedźi. Nimo toho bě wón hižo w februaru w zwisku z dźiwinowym njezbožom wopačne papjery předpołožił. Po wšěm zdaću běchu wone tak derje falšowane, zo to tehdy njenapadny.
Policija (04.04.19)
Granaće we wjerchu namakali
Delni Wujězd. Zo při torhanju stareho twarjenja tu abo tamnu překwapjenku dožiwiš, njeje ničo njewšědneho. Předwčerawšim, wutoru, pak so w Delnim Wujězdźe tola chětro dźiwachu, jako běchu sobudźěłaćerjo twarskeje firmy w dodźeržanym domje při dźěle. W mjezywjerchu pod špundowanjom wuhladachu woni popołdnju dwě granaće, štož wobydler wězo policiji přizjewi. Rozbuchlinu wotstronjowaca słužba je namakance wotwjezła. Kaž Zhorjelska policajska direkcije rozprawja, běštej wonej wonkownje w dosć dobrym stawje. Nutřka w nimaj pak hižo žane rozbuchadło njebě. Na prašenje, štó bě granaće w Delnjowujězdźanskim domje něhdy schował a čehodla, pak najskerje hižo nichtó wotmołwić njemóže.
Policija (03.04.19)
Bróžnja so dospołnje wotpaliła
Demjany. K hotowemu infernu wołachu wohnjowu woboru dźensa něhdźe w 4.30 hodź. do Demjan (Diehmen) pola Huski. Tam bě woheń w 50 króć 15 metrow wulkej bróžni wudyrił a twarjenje nimale dospołnje zničił. W bróžni bě nimo ratarskich mašinow něhdźe dwaceći swini, kotrež wobornicy před płomjenjemi wuchowachu. Sčasami wobornicy dosć hašenskeje wody njemějachu. Přičina wohenja njeje znata.
Policija (02.04.19)
Firmje tójšto škody načinili
Brězyna. Bližace so nalětnje dźěła w zahrodkach běchu snano přičina, zo su so njeznaći w nocy na minjenu njedźelu do firmy w Brězynje (Brösa) pola Malešec zadobyli. Tam pokradnychu woni wjacore poměrnje drohe motorske piły, motorske kosy a wšelke z akuwom ćěrjene zahrodkarske graty w hódnoće 15 000 eurow. Nimo toho načinichu skućićeljo tójšto dalšeje wěcneje škody, kotruž trochuja na něhdźe 4 000 eurow.
Policija (01.04.19)
Koleso sam přetwarił
Budyšin. Žane přetwarjene awto abo moped, ale technisce změnjene koleso sta so minjeny pjatk w Budyšinje z padom za policiju. Na Stieberowej kontrolowachu zastojnicy kolesowarja, kiž bě bjez swěcy po puću. Při kontroli zwěsćichu, zo bě koleso tak přetwarjene, zo móhło wone bjeze wšeho hač do 50 km/h spěšnje jěć. Mjez druhim je wobsedźer wjacore sylne akuwy do swojeho jězdźidła zatwarił a tohorunja elektriske kable sam składł. Z tymle kolesom njesmědźeše wobsedźer najprjedy raz dale jěć.
