Policija (10.03.20)
Třo młodostni zranjeni
Nowoslicy. Přewulka spěšnosć bě najskerje přičina wobchadneho njezboža dźensa w nocy w Nowoslicach. Na statnej dróze S 101 je so z Chróšćanskeho směra přijěducy wodźer Forda suwać započał, do přirowa zajěł a zwróćił. Wón a dalšej młodostnaj so ćežko zranichu. Nimale 30 wohnjowych wobornikow z Chrósćic, Nuknicy, Sernjan a Ralbic bě zasadźenych. Woni městno wuswětlichu a pomhachu při transporće zranjenych. Lětnje wobruče awta běchu chětro wotjězdźene.
Policija (09.03.20)
Kaž njemdry jězdźił
Horni Wujězd. Awtodróhu A 4 mjez Hornim Wujězdom a Słonej Boršću je drje 44lětny wodźer VWja Amarok sobotu z wubědźowanskej čaru zaměnił. Přesćahnywši ciwilne awto sakskeje hotowostneje policije na prawym boku wón krótko před nim zaso dolěwa zawiny. Jeno ze spěšnej reakciju móžeše šofer policajskeho awta hóršemu zadźěwać. Na wotpočnišću Hornja Łužica-juh bě jězba 44lětneho skónčnje nimo. Tam njejsu jenož jeho jězbnu dowolnosć sćazali, ale nańdźechu pola njeho tež elektrošoker a nóž.
Policija (06.03.20)
Po njezbožu ćeknył
Narć. 60lětny wodźer BMWja je zawčerawšim wječor w Narću do sćežora nadróžneho wobswětlenja zrazył, při tym 6 000 eurow škody načinił a na to z městna njezboža ćeknył. Swědcy pak we wsy bydlaceho spóznachu a policiju informowachu. Zastojnicy muža na to doma wopytachu, hdźež jeho z podawkom konfrontowachu. Při tym woni zwěsćichu, zo steješe wón pod njesnadnym wliwom alkohola. Test wunjese pola 60lětneho na wšěch 1,9 promilow alkohola w kreji. Tak prošachu policisća jeho k wotedaću kreje. Nětko njezměje so wón jeno zawinowanja njezboža pod wliwom alkohola dla zamołwić, ale tež ćeknjenja z městna njezboža dla.
Policija (05.03.20)
Trik z wnučkom njefungował
Kamjenc. Hnydom třo rentnarjo w Kamjencu a wokolinje dóstachu předwčerawšim spodźiwne telefonaty wot pozdatnych wnučkow. W prěnim padźe žadaše sej njeznaty 25 000 eurow a přizjewi, zo chce popołdnju na kofej přińć a sej pjenjezy wotewzać. W druhim padźe dósta 82lětna podobny telefonat. Tež tu so wobšudnik ke kofejej přizjewi a wudawaše, zo trjeba pjenjezy. Přišoł pak nichtó njeje. A skónčnje přizjewi so njeznaty pola 90lětneje žony a žadaše sej 20 000 eurow. Na zbožo wšitcy třo rentnarjo pospyt wobšudnistwa spóznachu a słuchatko połožichu. Wšitke pady je kriminalna policija přewzała a namołwja staršich ludźi, dale skedźbni być.
Policija (04.03.20)
Z awtom do ponyja zrazyła
Kulow. Njewšědne njezbožo sta so póndźelu popołdnju na Mučowskej dróze w Kulowje. Tam bě žona z Toyotu z Wojerowskeje dróhi do směra na Mučow po puću. Nadobo stupi cyle njewšědny zawinowar njezbožow na jězdnju – pony. Šoferka wosoboweho awta njezamó hižo borzdźić a zrazy do njeho. Wona so na zbožo njezrani. Tež pony, kotrehož bě sej skótny lěkar dokładnje wobhladał, wosta po zdaću njezranjeny. Přiwšěm wučinja wěcna škoda něhdźe 3 000 eurow.
Policija (03.03.20)
Wjelk žiwjenje přisadźił
Běła Woda. Wobchadne njezbožo wjelka dla sta so předwčerawšim po připołdnju na zwjazkowej dróze B 156 mjez Běłej Wodu a Krušwicu. Wjelkaj přeprěčištaj tam jězdnju, jako runje Audi přijědźe. 69lětny wodźer awta njemóžeše hižo zaborzdźić a zrazy do jednoho z njeju. Štyrinohač zražku njepřežiwi.
Policija (02.03.20)
Nadźija na zymski sport
Běła Woda. Byrnjež na zymske wjedro najprjedy raz žane wuhlady njebyli, su so njeznaći w Běłej Wodźe ze zymskim wuhotowanjom zastarali. Z jedneje garaže pokradnychu woni mjenujcy poraj sněhakowarskich čriji, tři pory sněhakow a wotpowědne kije. Cyłkownu hódnotu trochuje wobsedźer po informacijach policije na něhdźe 1 500 eurow.
Policija (28.02.20)
Rentnarku wobkradnyli
Wojerecy. Wjacori njeznaći su předwčerawšim připołdnju we Wojerecach 85lětnu žonu wobkradnyli. Při jeje bydlenju na Lipecskim naměsće skućićelka rentnarku do rozmołwy zapleće. W tym času dóstachu so dalši paduši do bydlenja staruški, přepytachu tam wšitke rumnosće a pokradnychu kasetu z něšto stow eurami kaž tež lutowansku knižku. Hakle wječor žona pytny, zo běchu ju wobkradnyli, a zazwoni policiju. Zastojnicy jej pomhachu, lutowanske konto zawrěć.
Policija (27.02.20)
Konsekwency za započatkarja
Budyšin. Na wjeršku póstniskeho časa je policija wot štwórtka zašłeho tydźenja hač do minjeneje wutory w zesylnjenej měrje šoferow wosobowych awtow na jich kmanosć jězdźenja kontrolowała. W Budyskim a Zhorjelskim wokrjesu lepichu dohromady 24 wodźerjow. Wosmjo z nich běchu drogi brali, šěsnaćo stejachu pod wliwom alkohola. Mjez nimi bě 20lětny, kotrehož su njedźelu wječor w Korzymju zadźerželi. Jako započatkar dyrbjał wón dospołnje strózby być, alkomat pak pokaza 0,46 promilow. Za to dóstanje młody muž dypk w centralnym registrje w Flensburgu a změje 250 eurow pokuty płaćić. Nimo toho podlěši so jeho probowy čas na štyri lěta. A skónčnje dyrbi so wón na tak mjenowanym natwarnym seminarje wobdźělić, kotryž je po informacijach policije z tójšto wudawkami zwjazany.
