Policija (21.01.25)
Ze zmylka ničo nawuknyła
Wojerecy. Móhłrjec staru znatu su policisća njedźelu wječor we Wojerecach zadźerželi a kontrolowali. 44lětna žona bě tam ze swojim Opelom po puću, štož pak wona scyła njeby směła. Přetož wona steješe pod wliwom alkohola. Pola njeje naměrichu 0,5 promilow w kreji. Hórje pak bě, zo žona hižo žanu jězbnu dowolnosć njeměješe. Papjery běchu jej mjenujcy hakle před krótkim wobchadneho delikta dla wotewzali. Zo bychu dalšim jeje přeńdźenjam zadźěwali, sej policisća tónraz kluč jeje awta wobchowachu. Nimo toho zahajichu přećiwo 44lětnej jednanje dla jězdźenja bjez jězbneje dowolnosće.
Policija (17.01.25)
Nohu sej zatłusnył
Budyšin. Dźěłowe njezbožo je so wčera připołdnju na terenje bywšeje Budyskeje betonownje stało. W zawodźe Hentschke je sej muž při nakładowanju betonowych platow nohu zatłusnył. Na zbožo móžachu jeho ze situacije spěšnje wuswobodźić. Wuchowanske mocy na městnje pomhachu, tež helikopter bě přilećał.
Telewizor pokradnył
Habrachćicy. Nic na palenc, šokoladu abo parfim je so paduch srjedu w Habrachćicach (Neugersdorf) měrił, ale na wjetši techniski nastroj. We wobchodźe hrabny sej wón dopołdnja telewizor w hódnoće něhdźe 900 eurow a z nim z předawanišća ćekny. Sobudźěłaćerka hišće za nim spěchaše, ale jeho na puću z wočow zhubi. Po wšěm zdaću bě paduch do awta zalězł a z nim wotjěł.
Policija (16.01.25)
Awto so pěškow šmórnyło
Hodźij. Wobchadne njezbožo je so wutoru wječor na statnej dróze S 107 mjez Hodźijom a Žičenjom (Seitschen) stało. Tam běštaj 18lětny muž a 19lětna žona pěši po puću. Do samsneho směra bě 47lětna wodźerka Nissana po puću. Při přesćehnjenju wona z prawym špihelom do lěwje ruki muža dyri a jeho zrani. Tež jeho přewodnica so zrani, jako ju dźěle awta trjechichu. Wobaj dyrbještaj k lěkarjej.
Policija (15.01.25)
Paducha na kěrchowje wuslědźili
Běła Woda. Dokelž awtowe čisło BMWja njeeksistowaše, chcychu policisća jón wčera w Běłej Wodźe kontrolować. Šofer pak stupi na płun a wotjědźe. Jako z awtom pozdźišo do hrjebje zajědźe, muž dale pěši ćěkaše. Policajski pos jeho bórze na to na bliskim kěrchowje wuslědźi, hdźež bě so podhladny schował. Kaž so wukopa, je wón nimale 60 000 eurow drohi BMW we Wolfenbüttelu pokradnył. Na awće nasta 40 000 eurow škody.
Policija (14.01.25)
Pólski šofer smjertnje znjezbožił
Budyšin. Wčera w zažnych hodźinach je nakładne awto při parkowanišću pola Bórka na kromje Budyšina z dotal njeznateje přičiny do bliskeho lěska zajěło a při tym do wjacorych štomow zrazyło. 50lětny pólski šofer hišće na městnje njezboža zemrě. Po informacijach wobchadneje policije nasta něhdźe 20 000 eurow škody. Nětko pytaja swědkow, kotřiž móhli informacije wo wobchadnym njezbožu abo wo pólskim wodźerju podać. Štóž je něšto wobkedźbował, njech přizjewi so na Budyskim policajskim rewěrje pod 03591 3670.
Policija (10.01.25)
Pos paducha wuslědźił
Słona Boršć. Jako srjedu připołdnju napadny Audi Q 7 na wotpočnišćo Hornja Łužica pola Słoneje Boršće přijědźe a šofer motor njehasny, dołhož bě na nuzniku, je swědk policiju zazwonił. Policajski pos zastojnikam pomhaše, wodźerja awta na wotpočnišću wuslědźić. Kaž so wukopa, bě wón awto w hódnoće 35 000 eurow w Heidelbergu pokradnył. By-li wón jězdźidło hasnył, njemóhł je hižo zaso startować a dale jěć.
Policija (09.01.25)
Strašne rozestajenje
Wojerecy. Mjez mužomaj w starobje 36 a 40 lět je wutoru na Lipjeckim naměsće we Wojerecach werbalne rozestajenje eskalěrowało. Młódši z wobeju Němcow staršeho z nožom atakowaše a jeho ćežko zrani. Na to tež 40lětny nóž wućahny a do tamneho kłóješe. Tón bu při tym snadnje zranjeny. Po tym zo bě so starši kontrahent k lěkarskemu zastaranju do chorownje podał, policija wo padźe zhoni. Jako chcychu zastojnicy 36lětneho blisko městna njeskutka zajeć, wón jim napřećo chětro agresiwnje wustupowaše. Tež přećiwo trěbnemu lěkarskemu zastaranju so wón masiwnje wobaraše. Na to jeho nachwilnje zajachu a na Wojerowski policajski rewěr dowjezechu. Přećiwo woběmaj mužomaj přepytuja nětko strašneho zranjenja ćěła dla. 36lětny změje so nimo toho skřiwdźenja policistow dla zamołwić.
Policija (08.01.25)
Pjenjezy na nuzniku zabyła
Budyšin/Drježdźany. Na parkowanišću „Wiesaer Forst“ při awtodróze A 4 do směra na Drježdźany je póndźelu připołdnju 61lětna žona swoju tobołku zabyła. Hakle 175 kilometrow dale wona malheur pytny a wróćo jědźeše. Tobołka z dokumentami, kreditnymi kartkami a pjećcyfrowej sumu pjenjez w dolarach pak bě fuk. Swoje njezbožo zdźěli žona awtodróhowym policistam. Wječor přizjewichu so jich kolegojo z Drježdźan. Jim běchu wobydlerjo beigebarbnu tobołku jako namakanku přepodali. Hač na wobalku z pjenjezami hišće wšitko w njej bě. Policija pyta nětko swědkow, kotřiž su póndźelu popołdnju na parkowanišću „Wiesaer Forst“ wosobu z beigebarbnej tobołku wot nuznika přińć widźeli. Štóž móže tónle wosobu abo awto, do kotrehož je wosoba zalězła, wopisać, njech so pola policije přizjewi.
Policija (07.01.25)
Drohe koleso pokradnyli
Hodźij. Po wšěm zdaću w nocy na njedźelu su so njeznaći w Hodźiju do garaže na Starej Budyskej dróze zadobyli. Z njeje pokradnychu wubědźowanske koleso w hódnoće něhdźe 8 000 eurow. Dale spakosćichu skućićeljo twarnišćowe radijo kaž tež akušrubowak za dohromady 2 000 eurow. Wěcna škoda nastała njeje.
Awtomat rozbuchnyli
Kamjenc. Mócny wrjeskot je wobydlerjow Budyskeje dróhi w Kamjencu njedźelu rano ze spara torhnył. Krótko po 4 hodź. su tam njeznaći cigaretowy awtomat rozbuchnyli. Wěcna škoda wučinja něhdźe 5 000 eurow. Hač su skućićeljo cigarety a pjenjezy sobu wzali, znate njeje.
Wotstawk přesnadny był
Wulke Zdźary. Bjez škodow je 32lětny njedźelu wječor wobchadne njezbožo na zwjazkowej dróze B 96 pola Wulkich Zdźarow přetrał. Ze swojim Peugeotom dyrbješe wón před nim jěduceho awta dla spinać. Dokelž bě wotstawk přesnadny, wuwiny so wón nalěwo, suny so z jězdnje a so zwróći. Blachowa škoda wučinja 15 000 eurow.
Policija (02.01.25)
W składźe woheń wudyrił
Dźěwin. Silwesterskich pryzlow dla je so w Dźěwinje skład słomy wupalił. Skupina młodostnych bě tam po wsy po puću, jako 15lětna holca praskotak do hale ćisny. W hali bě 400 walčkow słomy, kotrež so zapalichu. Zasadźenych bě dźesać wohnjowych woborow ze 16 jězdźidłami a něhdźe 70 wobornikami. Jich dźěło bě sčasami ćežke, dokelž dyrbjachu wodu po dlěšej čarje z jězora klumpać. Hašenje traješe hač do dopołdnja Noweho lěta. Zranił so na zbožo nichtó njeje, wěcna škoda pak wučinja něhdźe 20 000 eurow.
