Policija (22.07.16)
Z awtom so wjacekróć přećisnyła
Dobrošecy. Na statnej dróze S 109 mjez Budyšinom a Dobrošecami je młoda šoferka Rovera wčera popołdnju kontrolu nad wodźidłom zhubiła. W dołhej prawej křiwicy zjědźe wona z awtom z dróhi wjacore metry hłuboko a so wjacekróć přećisny. Ćežko zranjenu dyrbjachu žonu do chorownje dowjezć.
Njeskutkaj wujasnjenej
Zhorjelc. Kaž Zhorjelska policajska direkcija wčera zdźěli, je komisariat za cwólbowu kriminalitu po wobšěrnych slědźenjach dwě zadobywani do wuchodosakskeju hrajneju salonow wujasnił. Lětsa 14. februara w Budyšinje a 9. měrca w Lubiju běštaj so rumunskaj staćanaj w starobje 25 a 28 lět do tajkeju salonow zadobyłoj a tam dohromady 20 000 eurow pokradnyłoj.
Policija (21.07.16)
Motorski do štoma zrazył
Šćeńca. Dźensa něhdźe w 10 hodź. je 25lětny ze swojim motorskim na wokrjesnej dróze mjez Šćeńcu a Stróžu po puću z dotal njeznateje přičiny z jězdnje zajěł. Na to zrazy do štoma a wobchadneho znamjenja. Ćežko zranjeneho dowjezechu z helikopterom do Budyskeje chorownje.
Pytany wuměnkar zaso doma
Chelno. Wutoru wječor je policija na Budyskim Augusta Bebelowym naměsće dementneho muža nadešła. 87lětny bě bydlenje w Chelnje wopušćił. Po zdaću je na to z busom do Budyšina jěł.
Policija (20.07.16)
Derje wobkedźbowali a jednali
We Wojerecach je policija wčera rano 23lětneho paducha lepiła. Tón bě so z komplicu do pincow dweju domow na Hasy Brigitty Reimann zadobył. Wobydlerjo paduchow wobkedźbowachu a informowachu zastojnikow. Mužej ćeknyštaj, staj pak minjeny kónc tydźenja pokradnjene koleso a nachribjetnik ze zadobywanskim gratom stejo wostajiłoj. Z wysokodomu na tamnej stronje dróhi je wobydler na to ćěkaceju wobkedźbował a zdźěli policiji ćěkanski puć paduchow. Jednoho z njeju, 23lětneho, kotryž chcyše so ze zastojnikami bić, woni zajachu. Z popjerjowym sprayjom paducha přemóchu. Nětko slědźa za komplicu. Policija so kedźbliwym wobydlerjam za pomoc dźakuje.
Wažna informacija policije
Policija (19.07.16)
Tragika na čarje
Mjez Šěrachowom a Korzymjom je wčera popołdnju ćah Trilex 67lětneho muža sobu hrabnył, kiž bě njejapcy na kolije běžał, jako so ćah bližeše. Najebać hnydomne borzdźenje njezamó wodźer njezbožu zadźěwać. Ćah muža něhdźe 50 metrow sobu wlečeše. 67lětny zražku njepřežiwi. Pasažěrojo a wodźer ćaha wostachu njezranjeni. Jednočarowy wotrězk wostanje nachwilnje zawrjeny. Kriminalna policija pad nětko přepytuje.
Wotstawk njedodźerželi
Na awtodróze A4 njedaloko Połčničanskeje wotbóčki je wčera popołdnju k zražce třoch nakładnych awtow dóšło. Šofer Volva njedźiwaše na Iveco, kotryž před nim jědźeše, a zrazy do njeho. Dalši šofer situaciju njespózna a prasny na to ze swojim Iveco do znjezboženeju awtow. Cyłkowna škoda na jězdźidłach wučinja něhdźe 19 000 eurow.
Policija (18.07.16)
Z kolesom do latarnje a do sćěny
W nocy na njedźelu jědźeše kolesowar po Židowskej w Budyšinje. Njemějo pak hižo kontrolu nad kołom zrazy do latarnje a na to do sćěny. Při tym so zrani, zo dyrbjachu jeho do Budyskeje chorownje dowjezć. Tam postajichu, zo ma so krej 42lětneho na móžny podźěl alkohola přepytować. Wotběh njezboža je wobchadonjezbožowa słužba přepytowała.
Motorske pokradnyli
Njeznaći zadobychu so w Biskopicach do zamknjeneje garaže a pokradnychu motorske w hódnoće 2 400 eurow. W garaži wotstajenu sněhowu frezu a kófr z gratom paduši tohorunja sobu wzachu. Nimo toho načinichu škodu 800 eurow.
Policija (15.07.16)
Z peletami do přirowa
Ketlicy. Z dotal nic dokładnje znateje přičiny je wčera popołdnju 24lětny wodźer nakładneho awta pola Ketlic blisko Lubija na statnej dróze S 112 z puća do přirowa zjěł. Na awće bě 30 tonow drjewjanych peletow k tepjenju. Te dyrbjachu najprjedy na hinaše jězdźidło překładować, prjedy hač móžachu znjezbožene awto zaso na puć stajić. Młodemu šoferej so na zbožo ničo njesta, wěcna škoda pak wučinja něhdźe 40 000 eurow.
Policija (14.07.16)
Alkohol a cigarety kradnyli
Budyšin. Wobchod na Budyskej Kotołskej bě zawčerawšim w rańšich hodźinach cil dotal njeznatych paduchow. Po tym zo běchu so tam namócnje zadobyli, pokradnychu z wobchoda wjacore bleše likera, někotre kartonki cigaretow a kašćik piwa. Škodu rubizny trochuje mějićel na něhdźe tysac eurow.
Awtomat rozbuchnyli
Lejno. Na chětro spektakularne wašnje su sej dźensa w nocy njeznaći cigarety přiswojili. W Lejnom pola Wojerec rozbuchnychu woni cigaretowy awtomat. Detonacija bě najskerje poměrnje sylna, přetož blachowe dźěle běchu we wotstawku wjacorych metrow rozbrojene. Skućićeljo wurumowachu z awtomata cigarety w hódnoće 400 eurow, wěcna škoda je dźesać króć wjetša.
Policija (13.07.16)
Debjenki a telewizor fuk
Ratarjecy. Do dweju bydlenskeju domow su so njeznaći zawčerawšim rano respektiwnje dopołdnja w Ratarjecach na kromje Budyšina zadobyli a w nimaj wšitke rumnosće přepytali. Po prěnich dopóznaćach pokradnychu debjenki, telewizor a fotowu techniku. Skućićeljo spytachu so hišće do dalšeho domu zadobyć, po wšěm zdaću pak je jich alarmowa připrawa wotdźeržała. Jeničce wěcna škoda wučinja něhdźe 1 500 eurow.
Sorna na awtodróze
Budyšin. Chětro so nastróžił a na zbožo jenož wěcnu škodu poćerpjeł je 38lětny wodźer awta zawčerawšim na awtodróze A 4. Při wotbóčce Budyšin-wuchod zaběža jemu sorna do VWja. Hajnik dyrbješe zranjene zwěrjo zatřělić. Na awće nasta něhdźe 1 500 eurow škody.
Policija (12.07.16)
Transporter z kolesami fuk
Słona Boršć. Na awtodróhowym wotpočnišću Hornja Łužica pola Słoneje Boršće su njeznaći zawčerawšim popołdnju běły Renault Master pokradnyli. Na dwě lěće starym jězdźidle z pólskim čisłom bě 52 nowych kolesow nakładowane. 38lětny šofer bě po puću do Mnichowa, hdźež měješe kolesa přepodać. Rubiznu trochuja na něhdźe 82 000 eurow.
Paducha awta lepili
Němcy. Při wobchadnej kontroli w Němcach je policija zawčerawšim rano pozdatneho paducha awta lepiła. Po tym zo běchu wodźerja Golfa zadźerželi, so wukopa, zo bu jězdźidło w nocy na minjeny pjatk z garaže we Wulkich Ždźarach pokradnjene. Golf njebě scyła přizjewjeny a jeho čisle njeběštej płaćiwej.
Policija (11.07.16)
Dźěćo do awta zamknjene było
Wojerecy. Napjata situacija nasta sobotu na pózdnim popołdnju na Starej Berlinskej dróze we Wojerecach. Tam bě něhdźe w 17.45 hodź. dwulětne dźěćo do wosoboweho awta typa VW zamknjene. Při wšěm njezbožu bě tež hišće awtowy klučik w zamknjenym jězdźidle. Tuž ničo druhe njezwosta, hač wohnjowu woboru alarmować. Kameradojo hólčka z awta wuswobodźichu, bjez toho zo by so wón zranił. Hač bě sej z klučikom hrajkał abo so na hinaše wašnje zamknył, z policajskeje rozprawy njewuchadźa.
