Policija (21.09.16)
Z třěchi sej njezwěrił
Budyšin. Komisar připad je policiji zawčerawšim popołdnju w Budyšinje na runjewon kuriozne wašnje pomhał dosahnyć skućićela, kiž bě w nocy do toho při zadobywanju do předawanišća zakuskow na Hošic hasy wobdźěleny (SN rozprawjachu). Wobydlerjo mjenujcy něhdźe w 14 hodź. na policiju zazwonichu, zo na třěše přitwara na zadnim dworje předawanišća młody muž sedźi. Kaž so pozdźišo wukopa, bě sej wón tam přez schodźišćo domu wućeknył, zo by so před zastojnikami schował, jako woni při zadobywanju zapřimnychu a w předawanišću dweju paduchow lepichu. Jako komplica po tym na třěše sedźeše, so wón najskerje dopomni, zo so wysokosće boji, a njeje sej hižo dele zwěrił. Wobsadka policajskeho awta Budyskeho rewěra tuž rěbl přistaji, 19lětnemu dele kazaše a jeho nachwilnje zaja.
Policija (20.09.16)
Zadobywarjow lepili
Budyšin. Młodostnaj w starobje 17 a 19 lět běštaj so w nocy na póndźelu do hosćenca na Budyskej Hošic hasy zadobyłoj. Po tym zo staj sej žiwidła do nachribjetnikow spakowałoj, chcyštaj tež kasu wočinić. Policija pak bě spěšniša a jeju nachwilnje zaja. Před durjemi čakacaj komplicaj so zminyštaj.
Policija (19.09.16)
Awtomat a budku rozbuchnyli
Wojerecy. Wobydlerjo Lipjeckeho naměsta buchu wčera rano wot detonacije njejapcy ze spara torhnjeni. Kaž přiwołani policisća zwěsćichu, bě něchtó krótko po 4 hodź. při centeru Treff 8 cigaretowy awtomat rozbuchnył. Při tym skóncowaštej so tohorunja škleńčana třěcha a wokno susodneho frizerskeho salona. Škoda wučinja něhdźe 8 000 eurow. Jenož něšto mjeńšin pozdźišo je na Hufelandowej mócnje prasnyło. Tam bě přičina rozbuchnjena telefonowa budka. Jeje zbytki běchu we wobkruhu hač do 30 metrow rozbrojene. Načinjenu škodu trochuja tule na wjacore tysacy eurow. We woběmaj padomaj kriminalna policija přepytuje. Konkretne pokiwy na skućićelow pak dotal nima.
Policija (16.09.16)
Rentnarja wobšudźił
Wojerecy. Wopor swojeje dobroćiwosće sta so zawčerawšim 84lětny muž před Wojerowskim nakupowanišćom. Tam bě jeho cuzy narěčał, hač móhł jemu pjenjezy měnjeć. Rentnar wućahny swoju móšeń a da njeznateho do njeje pohladnyć, zo by sej trěbne drobne pjenjezy wzał. To pak cuzy šamale znjewuži a wućahny sej z móšnje něhdźe 50 eurow, štož starc hakle pozdźišo pytny.
Policija (15.09.16)
Drasta na zahrodźe fuk
Budyšin. Předewšěm na žonjacu drastu měrješe so njeznaty, kiž bě w nocy na wutoru w Budyšinje po puću. Kaž policija rozprawja, posłužowaše so wón z drastysušaka na zadnim dworje na Weigangowej. Tam zhubichu so hnydom tři nadrowcy a dwaj slipaj. Nimo toho je paduch paket klamorčkow z kwětkacym motiwom kaž tež měšk z dalšimi klamorčkami, kotrež na sušaku wisaše, sobu wzał. A skónčnje lubješe so cuzemu abo cuzej tež hišće šěra žonjaca sportowa jaka znački „Vaude“ z běłym zasmykom. Wobsedźerce nasta dohromady něhdźe 260 eurow škody.
Policija (14.09.16)
Drohi diagnozowy nastroj fuk
Mužakow. Wšelki grat kaž tež kompjuter su njeznaći w nocy na póndźelu z awtoweje zamkarnje w Mužakowje pokradnyli. Tež diagnozowy nastroj ležeše njezamknjeny w hali, a zadobywarjo njedachu sej dwójce kazać jón sobu wzać. Tele nastroje su paducham awtow wulce witane, dokelž móža z nimi motor jězdźidła tež bjez klučika startować. Rada policije, diagnozowe nastroje kaž pjenjezy po dźěle do trezora zamknyć, njebu w tymle padźe wobkedźbowana. Škoda wučinja 10 000 eurow.
Policija (13.09.16)
Awto po njezbožu so wupaliło
Grodk. Hrózbne wobchadne njezbožo sta so dźensa w nocy na zwjazkowej dróze B 156 pola Grodka. Poł hodźiny po połnocy wołachu tam wohnjowych wobornikow k hašenju. Na městnje woni widźachu, zo so awto pali, kotrež bě do toho do štoma zrazyło. Wodźer/ka so w awće spali. Hač jedna so wo muža abo žonu, njeje hišće zwěsćene.
Policija (12.09.16)
Kolesowar so zranił
Chrósćicy. Při wšěch zranjenjach hišće zbožo měł je 34lětny muž sobotu rano w Chrósćicach. Kolesowar bě krótko do 9 hodź. ze swojim psom na Hórnikowej po puću, jako z dotal njeznateje přičiny balansu zhubi a padny. Runje w tym wokomiku jědźeše tam wosobowe awto typa Seat nimo. Do njeho muž z hłowu dyri, tak zo dyrbjachu jeho do chorownje dowjezć. By-li awto muža přejěło, by njezbožo zawěsće hórje wušło.
Policija (09.09.16)
Na runym puću znjezbožiłoj
Biskopicy. Frontalnje do so zrazyłoj stej dźensa rano na statnej dróze S 111 pola Biskopic do směra na Budyšin wosobowej awće typa Škoda a Alfa Romeo. Wobaj šoferaj so ćežko zraništaj. Přičina zražki na runym puću njeje znata.
Policija (08.09.16)
Nowy trik bohužel fungował
Zhorjelc. Njeznaći su Zhorjelskej rentnarce pjećcyfrowu sumu pjenjez wulišćili. Najprjedy zazwoni pola njeje muž, wuda so jako wnučk a prošeše wo pjenjezy. Na to zazwoni žona, wuda so jako policistka a powědaše, zo je muža z tamneho telefonata wuslědźiła. Nětko by žadanu sumu pjenjez za napodobnjenje přepodaća trjebała. A rentnarka jej pjenjezy přepoda.
