Biskopicy. Při ćežkim wobchadnym nje­zbožu je wčera wječor mjez Biskopicami a Póckowami młody muž žiwjenje přisadźił. 28lětny wodźer VWja bě so něhdźe w 23 hodź. z awtom suwać započał a z lěwym bokom jězdźidła do štoma zrazył. Zražka bě tak sylna, zo wón w znjezboženym awće zemrě, hišće prjedy hač wuchowanske mocy přijědźechu. Zasadźene běchu wohnjowe wobory z Póckowow, Smělnje a Biskopic kaž tež skupina spěšneje pomocy z Wjazońcy. Awto bě tak jara­ skóncowane, zo so wuchowarjam hakle po hodźinje poradźi, zemrěteho z njeho wućahnyć. Zo baterija VWja 50 metrow dale ležeše, swědči wo tym, kak mócna zražka bě. Tež swětłomjetak le­žeše wjacore metry zdaleny. Policija nětko­ přepytuje, kak je k njezbožu dóšło.

Chelno. Woči wuwaleli su policisća za­wčerawšim, jako na zwjazkowej dróze B 96 w Chelnje nakładne awto kontrolowachu. Wulke jězdźidło bě mjenujcy pjeć tonow ćeše, hač dowolene. To pak njebě hišće wšo. Wone transportowaše cyłkownje 175 swini. Jednotliwe wotdźěle běchu za 18 skoćatow předwidźane, we woprawdźitosći pak bě w nich dwójce telko. Nimo toho bě přewysoke. A dokelž njeběchu wentile rołow začinjene, móžeše tež hišće jucha na puć běžeć. Jězba 64lětneho wodźerja nakładneho awta bě tak najprjedy raz nimo. Wón změje nětko pokutu płaćić.

Njeswačidło. Krótki čas njepřitomnosće wobydlerjow su paduši zawčerawšim w Njeswačidle wužiwali a so do jednoswójbneho domu na Hłownej dróze zadobyli. Při tym bě jim po wšěm zdaću samo wšojedne, zo bě to swětły dźeń dopoł­dnja. W domje přepytachu wšitke stwy za hódnotnymi wěcami a namakachu tak pjenježnu kasetu. W njej bě po informacijach wobydlerjow třicyfrowa suma pjenjez, kotraž nětko pobrachuje. Wěcnu škodu na chěžnych durjach trochuja na něhdźe­ 50 eurow. Kriminalna policija pad přepytuje.

Budyšin. Dobry čuch mějachu policisća zawčerawšim popołdnju, jako na parkowanišću Lubata při awtodróze A 4 wosobowe awto typa Ford kontrolowachu. Při tym­ zwěsćichu takrjec „pisany kwěćel“ njeskutkow, kaž w rozprawje Zhorjelskeje policajskeje direkcije rěka. Awto njebě zawěsćene, přičinjenej čisle běštej pokradnjenej, wodźer jězdźidła njeměješe płaćiwu jězbnu dowolnosć a w awće bě nimo toho pradło (Schlagstock). Taj­kile nastroj podleži zakonjej wo brónjach. Po prěnim přepytowanju so wukopa, zo běchu šofer kaž tež sobu jěducej žona a muž w starobje 34, 22 a 20 lět policiji w Saksko-Anhaltskej hižo z wjacorych padow znaći. Pokradnjenej čisle kaž tež pradło zastojnicy sćazachu. Wodźer awta kaž tež sobujěducaj změja so nětko wjacorych njeskutkow dla zamołwić, mjez druhim falšowanja wopismow, jězdźenja bjez jězbneje dowolnosće a zakonja wo winowatostnym zawěsćenju dla.