Policija (04.11.24)
Póćmje do howjadow zrazył
Chrósćicy. 30lětny šofer transportneho awta marki VW běše sobotu w połnocy na Puću při pomniku w Chrósćicach po puću. Wosrjedź njewobswětleneje dróhi stejachu tři młode howjada, kotrež jězdźer přepozdźe wuhlada, tak zo do jednoho z nich zrazy. Wone wobchadne njezbožo přežiwiło njeje. Tamne zwěrjata so nhjezranichu, wobsydnicy su je pozdźišo zapopadnyli. Howjada móžachu z pasty twochnyć, dokelž běše zastaranje elektriskeho płotu z milinu přetorhnjene. Cyłkowna škoda wobchadneho njezboža wučinja něhdźe 21 000 eurow. Policija nětko za přičinami wobškodźenja płotu slědźi.
Policija (29.10.24)
Razantnych jězdźerjow lepili
Połčnica. Team wobchadneje dohladowanskeje słužby je sobotu na awtodróze A 4 pola Połčnicy do směra Drježdźan spěšnosć wobchadnych wobdźělnikow přepruwował. Na městnje dowolenu spěšnosć 120 km/h je wot 5 763 měrjenych jězdźidłow 377 překročiło. Mjez wobchadnymi skućićelemi staj Budyšan a Kamjenčan negatiwnej rekordaj ze spěšnosću 208 resp. 203 km/h „docpěłoj“.
Policija (25.10.24)
Krawe slědy k skućićelej wjedli
Wjelećin. Dotal njeznatych přičin dla je 49lětny muž we Wjelećanskim hosćencu blisko parkoweje łučiny randalěrował a so při tym nic njemało zranił. Po puću k swojemu bydlenju zawostaji jasny krawy slěd, kotremuž trjebachu na pomoc wołani zastojnicy policije jenož sćěhować. Jako muža kazachskeho pochada w bydlenju dosćahnychu, zawołachu jeho zranjenjow dla chorobnu słužbu. Wěcne wobškodźenje w hosćencu wučinja něhdźe 700 eurow. Policisća zawěsćichu slědy na městnje njeskutka a dokumentowachu wuprajenja mějićela hosćenca a dalšich swědkow. Budyska kriminalna słužba dalše přepytowanja přewjedźe.
Policija (24.10.24)
Wobšudźerjo dale aktiwni
Zhorjelc. Wot minjeneho tydźenja sem su wobšudźerjo, kotřiž so telefonisce jako policisća wudawaja, w kónčinje kołowokoło Slepoho, Wojerec a Radeberga wospjet aktiwni byli. Mjez druhim su 90lětnemu Slepjanej na tute wašnje dohromady 30 000 eurow pokradnyli (SN rozprawjachu). Wutoru su wobšudźerjo kołowokoło Zhorjelca wjacorych ludźi zazwonili. Dohromady šěsć potrjechenych pak reagowaše přikładnje a rozumnje. Wšitcy su hnydom Zhorjelski policajski rewěr informowali, tak njedyrbjachu žanu škodu wobskoržić.
Policija (22.10.24)
Wopačni policisća seniora zjebali
Slepo. Njeznaći skućićeljo su sobotu wječor w Slepom 90lětneho muža zjebali. Jako policisća so wudawajo běchu škodowaneho w běhu dnja wospjet zawołali a jemu zdźělili, zo přepytuja pad wobšudnistwa w jeho susodstwje a zo dyrbja w tutym zwisku tež jeho bydlenje přepytować. To sta so bórze po tym, jako přińdźe jedyn ze skućićelow jako zastojnik kriminalneje policije předrasćeny mužej „na wopyt“, zo by přepytowanje přewjedł a mjez druhim zwěsćił kelko hotowych pjenjez ma w bydlenju „składowanych“. Wobšudnik nadeńdźe dohromady něhdźe 20 000 do 30 000 eurow, kotrež w njewobkedźbowanym wokomiku pokradny a spěšnje bydlenje wopušći. Nětko je „prawa“ kriminalna policija přepytowanja zahajiła. Policija zjawnosć na to skedźbnja, zo nihdy přepytowanje nastupajo w bydlenju składowane zamóženstwa njepřewjeduje.
Policija (18.10.24)
W palacym bydlenju zranjeny
Biskopicy. Njemało nastróži so 37lětny Biskopičan, jako so srjedu připołdnju do swojeho bydlenja na Dróze Ernsta Thälmanna nawróći a tam so wupřestrěwacy woheń zwěsći. Jemu so poradźi, wjetše płomjenja zhašeć. Jědojteho płuna a kura dla so při tym zlochka zajědojći. Wohnjowa wobora běše z dohromady wosom jězdźidłami na městnje. Wěcna škoda wučinja 15 000 eurow. Přičina wohenja dotal jasna njeje. Kriminalna policija je wotpowědne slědźenje zahajiła.
Policija (17.10.24)
Kokoše a nukla pokradnyli
Wojerecy. Dotal njeznaći skućićeljo su na ležownosći při Kamjentnej dróze we Wojerecach w poslednich tydźenjach dohromady šěsć kokošow kaž tež nukl pokradnyli. Wobsedźerjo su domjace zwěrjata wonka na zahrodźe w swobodźe dźerželi, tak zo su je paduši bjez wulkich zaraćenjow prosće zapopadnyć a „sobu wzać“ móhli. Cyłkowna škoda wučinja něhdźe 160 eurow. Kriminalna słužba Wojerowskeho policajskeho rewěra skućićelstwo přepytuje.
Policija (16.10.24)
Slědźa za ćěłom nowonarodźeneho
Drježdźany. Drježdźanske statne rěčnistwo a policajska direkcija Drježdźany pytatej wot spočatka septembra za mortwym nowonarodźenym, tak zdźěli rěčnik statneho rěčnistwa Jürgen Schmidt. W tutym zwisku su zamołwići póndźelu popołdnju tež zawod za kompostowanje w Kulowje za ćěłom dźěsća přeslědźili. Hač su je namakali, njeje rjekł. Po tuchwilnym stawje přepytowanjow zamołwići z toho wuńdu, zo je mać dźěćo hižo mortwe porodźiła. Město njeskutka morjenja je wona skerje zranjenja zakonja pochowanja dla podhladna.
Policija (15.10.24)
Žane zwiski přerězaneho kabla dla
Žitawa. Pućowacy su póndźelu wječor na Žitawskim dwórnišću podarmo na ćah čakali. Po rozprawje zwjazkoweje policije su njeznaći skućićeljo škleńčnonićowy kabl při železniskej čarje Habrachćicy – Žitawa přerězali. To zawinowaše wupad wuhibowarnje a z tym wupad kóždežkuli ćaha. Narunanski wobchad z busami su zamołwići mjeztym zarjadowali. Woni liča z wupadom ćahow přez cyły dźeń. Potrjechene su zwiski na čarje mjez Žitawu a Choćebuzom kaž tež zwisk Drježdźany – Žitawa – Liberec. Wěcna škoda wučinja po měnjenju fachowcow 25 000 eurow.
Šoferow pod drogami lepili
Policija (11.10.24)
Ciwilna kuraža we Wjazońcy
Wjazońca. Hnydom dwójce bu 84lětna srjedu popołdnju we Wjazońcy z woporom skućićela. Jako při busowym zastanišću při hłownej dróze čakaše, wutorhny jej dotal njeznaty muž, kotryž w bliskosći přebywaše, tošku z ruki, wotsali so a přeborka ju. Pozdaću pak ničo „wužitneho“ njenamaka. Tak so nawróći a wohrožowaše seniorku z nožom. Někotři swědkojo přichwatachu žonje na pomoc a skućićel ćekny. Třo chrobli mužojo pak jeho přesćěhowachu, popadnychu ćěkaceho a informowachu policiju. Zastojnicy 43lětneho zajachu. W tesće na drogi namakachu amfetamin. Winy padustwa a pospyta rubjenstwa dla předstajichu skućićela štwórtk jatbowemu sudnikej.
