Policija (15.10.24)
Žane zwiski přerězaneho kabla dla
Žitawa. Pućowacy su póndźelu wječor na Žitawskim dwórnišću podarmo na ćah čakali. Po rozprawje zwjazkoweje policije su njeznaći skućićeljo škleńčnonićowy kabl při železniskej čarje Habrachćicy – Žitawa přerězali. To zawinowaše wupad wuhibowarnje a z tym wupad kóždežkuli ćaha. Narunanski wobchad z busami su zamołwići mjeztym zarjadowali. Woni liča z wupadom ćahow přez cyły dźeń. Potrjechene su zwiski na čarje mjez Žitawu a Choćebuzom kaž tež zwisk Drježdźany – Žitawa – Liberec. Wěcna škoda wučinja po měnjenju fachowcow 25 000 eurow.
Šoferow pod drogami lepili
Policija (11.10.24)
Ciwilna kuraža we Wjazońcy
Wjazońca. Hnydom dwójce bu 84lětna srjedu popołdnju we Wjazońcy z woporom skućićela. Jako při busowym zastanišću při hłownej dróze čakaše, wutorhny jej dotal njeznaty muž, kotryž w bliskosći přebywaše, tošku z ruki, wotsali so a přeborka ju. Pozdaću pak ničo „wužitneho“ njenamaka. Tak so nawróći a wohrožowaše seniorku z nožom. Někotři swědkojo přichwatachu žonje na pomoc a skućićel ćekny. Třo chrobli mužojo pak jeho přesćěhowachu, popadnychu ćěkaceho a informowachu policiju. Zastojnicy 43lětneho zajachu. W tesće na drogi namakachu amfetamin. Winy padustwa a pospyta rubjenstwa dla předstajichu skućićela štwórtk jatbowemu sudnikej.
Policija (10.10.24)
Wuspěšnje za paduchom slědźili
Wojerecy. Wuspěch měješe Wojerowska policija w swojich slědźenjach za pozdatnym paduchom. Zastojnicy dojědźechu sej wutoru do Budyskeje aleje we Wojerecach. Tam přepytowachu wotewrjenu pincu, w kotrejž namakachu mjez druhim pokradnjeny e-roler a wjacore kolesowe ramiki, kotrychž serijowe čisła běchu wotstronjene. W bjezposrědnej bliskosći pincy nadeńdźechu 23lětneho němskeho staćana, kotryž je policiji wšelakich deliktow dla hižo znaty. Po wukazu statneho rěčnistwa, wotkrychu policisća při přepytowanju bydlenja młodeho muža pohłušenske substancy, šmóratka, třělbu, municiju a wulki nóž. Zastojnicy wšitke objekty zawěsćichu a pad dale přepytuja.
Policija (08.10.24)
Wjacekróć napadnyła
Wojerecy. Hnydom někotre razy dyrbjachu zastojnicy policije w nocy wot njedźele na póndźelu 58lětneje žony dla zapřimnyć. Ukrainska staćanka napadny najprjedy na dróze Friedricha Ludwiga Jahna blisko busoweho zastanišća rjejenja a wołanja dla. Přichwatani policisća pak ju změrować njemóžachu. Jako jědźeše 49lětna kolesowarka na dróze nimo, spyta rjejaca žona ju z jězdźidła storčić. Kolesowarka pak zamó so jej wuwinyć. Policisća zajachu 58lětnu, kotraž měješe wočiwidnje psychiske problemy.
Kopjenje wobchada přewidźał
Zhorjelc. Na awtodróze A4 je njedźelu připołdnju blisko namjezneho přechoda mjez Pólskej a Němskej k njezbožu dóšło. 51lětny šofer awta typa Toyota, kotryž běše do směra Drježdźany po puću, přewidźeše kopjenje wobchada namjeznych kontrolow dla a zajědźe do awta 69lětneho před nim. Nichtó so zranił njeje. Wěcna škoda wučinja něhdźe 3 000 eurow.
Policija (07.10.24)
Wobchadne njezbožo ze zranjenej
Debsecy. Na swojej jězbje z Debsec do směra Šiborćic (Nieder Seifersdorf) je sobotu 24lětna šoferka ze swojim awtom typa Škoda Fabia na zwjazkowej dróze 122 znjezbožiła. Jako chcyše nalěwo na zajězd na awtodróhu do směra Drježdźan wotbočić, je prawdźepodobnje na napřećiwnej jězdnej přichadźace awto typa Mitsubishi přewidźała. Tak zrazyštej wobě jězdźidle do so. Šoferka Škody kaž tež 58lětny šofer Mitsubishija so při tym zraniłoj njejstaj. 77lětnu sobujěducu w Mitsubishiju pak dyrbješe wuchowanska słužba do chorownje wotwjezć. Wěcna škoda wučinja něhdźe 10 000 eurow.
Policija (04.10.24)
Přesćěhańca z njerjanym wukóncom
Łuty. Při wobchadnej kontroli na Złokomorowskej dróze we Łutach chcyše tamniša policija wčera wodźerja na kwad-mobilu zadźeržeć. Wón pak ignorowaše signal za zadźerženje policije a ćekny na B96 do směra Łuty-wjes. Zastojnicy policije ćěkaceho přesćěhowachu. Při tym zhubi 32lětny němski staćan kontrolu nad swojim kwad-mobilom a zajědźe do kerčiny a so lochce zrani. Jako zastojnicy muža kontrolowachu, zwěsćichu, zo jězbnu dowolnosć njewobsedźi. Nimo toho testowachu jeho na drogi. Test reagowaše pozitiwnje na cannabis, amfetamin a opiat. Dale zwěsćichu zastojnicy, zo kwad-šofer po prawje ani wobsydnik jězdźidła njeje. Policajski rewěr Kamjenc pad nětko wjacorych deliktow dla přepytuje.
Policija (01.10.24)
Muža w parku nadpadnyli
Biskopicy. W parku na ławce sedźo bu minjeny pjatk wječor w Biskopicach 49lětny nadpadnjeny. W bliskosći přebwachu tam tež dalše wosoby. Jako so wone Biskopičanej bližachu, dyri jemu jedna z nich njejapcy mjezwoči. Dyr běše tak mócny, zo škodowany z ławki padny a so zrani. Skućićel ćekny na elektrokolesu, „njezaby“ pak sej nachribjetnik zranjeneho „sobu wzać“. Wěcna škoda wučinja něhdźe 3 500 eurow. Zastojnicy policije za dotal njeznatym skućićelom slědźa.
Tepjenje rozbuchnyło
Lubij. W Lubiju je minjenu sobotu wječor w jednoswójbnym domje k eksploziji tepjenskeje připrawy dóšło. Při tym bu 60lětny wobydler ćežko zranjeny. Sobuwobydlerjej so na zbožo zraniłoj njejstaj. Škodu na domje trochuja fachowcy na něhdźe 100 000 eurow. Kriminalna policija pad nětko přepytuje a slědźi za přičinami njezboža.
Serija šokowych telefonatow
Policija (27.09.24)
Njewočakowane zajeće
Niska. Swěca kapsneje lampy je 39lětnu žonu srjedu do jastwa „dowjedła“. Wona přebywaše sobotu wječor z mužomaj na cuzej ležownosći w Niskej. Při tym wužiwachu kapsne lamy. Swědkojo informowachu policiju, jako swěcu na ležownosći wuhladachu. Při kontroli wosobow zastojnicy policije zwěsćichu, zo přećiwo 39lětnej wukaz zajeća předleži, dokelž njeběše chłostansku sumu 4 000 eurow zapłaćiła. Tak bu němska staćanka zajata.
Winik na njezbožu ćeknył
Wujězd. Na swojim puću na awtodróze A 4 do směra Zhorjelc je wodźer nakładneho awta awto 57lětneho muža při manewru přesćehnjenja mjez Wujězdom a Słonej Boršću nabok stłóčił, tak zo do srjedźneje škitneje planki zrazy. Wodźer Lkwja ćekny. Škodowany wosta njezranjeny. Wěcna škoda wučinja 10 000 eurow.
Policija (25.09.24)
Městnosć njezboža wopušćił
Budyšin. Póndźelu popołdnju je dotal njeznaty kolesowar při Žitnych wikach w Budyšinje městnosć njezboža wopušćił. 42lětna šoferka awta typa VW chcyše dozady z parkowanišća wujěć. Jako wotzady přichadźaceho kolesowarja wuhlada, pak wona zadźerža. Wočiwidnje tutón situaciju prawje posudźował njeje a do awta prasny. Při tym z kolesom padny a so zrani. Najebać to zalěze zaso na koleso a městno njezboža wopušći. Personalije zawostajił njeje.
Policija (24.09.24)
Šupa na dróze dla znjezbožiła
Wóspork. W nocy na póndźelu je 32lětna jězdźerka ze swojim awtom typa Ford na awtodróze A4 na směr Zhorjelc mjez Wósporkom a Šiborćicami (Nieder Seifersdorf) znjezbožiła. Přičina běše šup, kotrehož běše njenadźicy na jězdni wuhladała a kotremuž spyta so z awtom wuwinyć. Při tym zrazy do wodźenskeje planki a so lochce zrani. Cyłkowna wěcna škoda wučinja něhdźe 18 000 eurow.
Paduchow šrota lepili
Zhorjelc. Zastojnicy policije su po krótkej přesćěhańcy na firmowej ležownosći w Zhorjelcu njedźelu wječor pozdatneju paduchow šrota lepili. Kedźbliwy wobydler běše skućićelow, pólskeju staćanow w starobje 40 a 46 lět, při zadobyću wobkedźbował a spěšnje policiju alarmował. Dźakowano nadrobnemu wopisanju swědka su policisća wobeju njeskutka podhladneju spěšnje identifikować zamóhli. Na njeju čaka chłostanske jednanje padustwa a kaženja domjaceho měra dla.
