Policija (18.09.15)
Zhorjelc. Dźakowano spěšnemu pokiwej wobydlerja móžeše policija w Zhorjelcu wčera paducha lepić. Wobydlerjej bě podhladne, zo młodostny, jako jeho w rańšich hodźinach na puću wuhlada, swoje koleso pušći a ćekny. Swědk prawje reagowaše a informowaše policiju. Wobsadka policajskeho awta na to w bliskosći 18lětneho wuhlada a nachwilnje zaja. Jako jeho přepytowachu, namakachu nimo wšelakeho gratu k zadobywanju tohorunja nóž a powětrowu trašawku. Kaž so wukopa, steješe młody muž tež hišće pod wliwom drogow. Wón změje so nětko padustwa z brónjemi dla zamołwić. Zhorjelčanej pak so policija za jeho spěšny pokiw, z kotrehož pomocu móžachu młodostneho paducha lepić, wuraznje dźakuje.
Policija (17.09.15)
Bošecy/Lětoń. Hnydom dwójce su paduši tele dny wuchodnje Budyšina twarske mašiny a grat kradnyli. Tak zadobychu so w Bošecach do bróžnje, z kotrejež su nimo wšelkeho gratu tež koleso spakosćili. W Lětonju wočinichu na transporteru gratowy kašćik a wzachu z njeho betonowy zhusćak, dwě pile, niwelěrowanski nastroj a akušrubowak. Hódnotu rubizny powobličichu škodowani na dohromady něhdźe 8 400 eurow, wěcna škoda wučinja porno tomu jeno snadny dźěl toho, mjenujcy dźesać eurow za skóncowany zamk. Policija je zawčerawšim rano wo tym zhoniła a nětko za móžnymi skućićelemi slědźi.
Policija (16.09.15)
Kamjenc. Na njewšědne wašnje pomhali su wčera Kamjenscy wobornicy. Dwanaćelětna holca bě při Pobrjóžnej hasy na skału zalězła a so we wysokosći šěsć metrow posydnyła. Dele pak sej hižo njezwěri a wołaše tuž wo pomoc. Alarmowani wobornicy krosnowarku z pomocu wjerćiteho rěbla z jeje połoženja wuswobodźichu. Na zemi so po tym wo nju lěkarsce starachu. Zraniła so na zbožo njeje, snadny šok pak přiwšěm poćerpje.
Policija (15.09.15)
Łuty. Paducham po wšěm zdaću hižo ničo swjate njeje. We Łutach dyrbješe farar tamnišeje ewangelskeje cyrkwje zawčerawšim zwěsćić, zo běchu so njeznaći minjeny čas do Božeho domu při Wjesnej dróze zadobyli. Pokradnyli su z njeho něhdźe 350 lět staru cynowu dupu ze železnym wobhrodźenjom. Hódnotu sa- kralneje drohoćinki duchowny hišće dokładnje zwěsćić njemóžeše, maličkosć pak to runjewon njeje.
Policija (14.09.15)
Dobruša-Huska. Tragiske wobchadne njezbožo je so wčera dopołdnja na statnej dróze S 119 pola Hnašec w gmejnje Dobruša-Huska stało. Tam jědźeše 77lětny wodźer wosoboweho awta typa VW Passat do směra na Budyšin, jako so mjez wotbóčkomaj do Hnašec a Ćemjerc nadobo rozsudźi so zawróćić. Po wšěm zdaću rentnar wobkedźbował njebě, zo wotzady motorske přijědźe. Jeho 46lětny wodźer njemóžeše hižo borzdźić a zrazy wotboka do Passata. Wuchowanscy sanitetarjo drje hišće spytachu motorskeho reaniměrować, zražka pak bě tak ćežka, zo wón hišće na městnje njezboža zemrě. Wodźer Passata a třo sobujěducy w jeho awće so njezranichu. Wěcnu škodu trochuje policija na něhdźe 10 000 eurow.
Policija (11.09.15)
Hodźij. Njewšědne njezbožo je so wčera připołdnju w Hodźiju stało. Tam parkuja transportery Fährmannec pjekarnje zwjetša na zadnim boku zawoda, zwotkelž wužiwaja Praskowski puć, zo bychu twory do předawarnjow wozyli. Wčera pak njewotboči šofer transportera na puć, ale jón z dotal njeznateje přičiny přeprěči, přełama płót a suny so po skłoninje na dwaj metraj hłubšo ležace sportnišćo. Awto jědźeše na to runjewon přez hrajnišćo a přełama na jeho tamnej kromje wobhrodźenje. Při tym sej šofer wolijowu wanju jězdźidła roztorha. Tołsta smuha wolija ćehnješe so na to dale přez susodne hrajkanišćo hač k štomam před Hodźijskim spjatym jězorom. Wodźer awta jědźeše nimo sportoweho domu wróćo do wsy, při pěstowarni pak wone zapraji. Wobornicy z Hodźija, Spytec a Brězy dyrbjachu wolij zrumować. Wo přičinach njemóžeše šofer ničo rjec.
Policija (10.09.15)
Slepo. Zo njeznaći awtowe čisła kradnu a je za njeskutki wužiwaja, so často stawa. Zo pak wobkradnjeny swójske čisła zaso namaka, porno tomu lědma. Stało je so to zawčerawšim w Slepom. Na parkowanišću kupnicy wuhlada žona wosobowe awto z čisłomaj, kotrejž bě jej něchtó před něšto dnjemi pokradnył. Přiwołana wobsadka policajskeho awta sej BMW 318i bliže wobhlada a zwěsći, zo bě jón něchtó 23. awgusta w Běłej Wodźe na Liebknechtowej pokradnył. Móžni skućićeljo pak po wšěm zdaću w bliskosći njeběchu. Kriminalna policija nětko za nimi slědźi.
Policija (09.09.15)
Budyšin. Dokelž bě jeho zawčerawšim na awtodróze A 4 pola Budyšina do směra na Zhorjelc wosobowe awto typa Audi A 6 z rozbitym nabóčnym woknom přesćahnyło, je kedźbliwy šofer policiju zazwonił, měnjo, zo staj mužej w Audiju jězdźidło pokradnyłoj. Jako policija wopisane awto na přichodnym parkowanišću kontrolowaše, so wukopa, zo wone tole pokradnjene njebě. Pólskaj mužej w starobje 41 a 18 lět běštaj na dompuću ze Španiskeje, hdźež staj so samaj z woporom paduchow stałoj, kotřiž běchu so do Audija zadobyli.
Policija (08.09.15)
Wojerecy. Takrjec „při dźěle“ lepi policija we wčerawšich rańšich hodźinach muža, kiž chcyše na terenje firmy na Narćanskim puću we Wojerecach milinowód kradnyć. Wjacore metry w hódnoće 700 eurow bě sej hižo spřihotował, jako tam wobsadka policajskeho awta přijědźe. 34lětny drje spyta hišće ćeknyć, njeměješe pak žanu šansu. Zastojnicy jeho popadnychu. Wěcnu škodu wobliča priwatny zawod na 200 eurow.
Policija (07.09.15)
Njeswačidło. Na zwjazkowej dróze B 96 pola Njeswačidła je so sobotu wječor ćežke wobchadne njezbožo stało. Z Budyskeho směra přijěducy 36lětny wodźer Opela zajědźe w prawej křiwicy blisko wotbóčki do Holešowa na lěwy bok jězdnje. Napřećo přijěducy šofer Mercedesa móžeše so runje hišće tak wuwinyć a zajědźe na zelenu kromu puća. Opel pak zrazy na lěwym boku do betonoweho sćežora a wosta po tym hakle w přirowje na prawym boku dróhi stejo. Jeho wodźer so při tym ćežko zrani. Jako přičina njezboža so pozdźišo wukopa, zo bě 36lětny dospołnje pjany. Pola njeho naměrichu mjenujcy tři promile alkohola w kreji.
