„Wubědźowanje“ ze sćěhami

Wóspork. Dypk w Flensburgu a 80 eurow pokuty su wuslědk tak mjenowaneho „elefantoweho wubědźowanja“, kotrež bě policija zawčerawšim na awtodróze A 4 pola Wósporka wobkedźbowała. Přesćahowace nakładne awto trjebaše dlěje hač minutu, zo by po dołhosći jednoho kilometra nimo druheho Lkw-ja jěło. Policisća wodźachu 29lětneho šofera na přichodne parkowanišćo, hdźež jemu tónle zmylk rozłožichu. Wón by mjenujcy jenož přesćahnyć směł, by-li dosć wulku spěšnosć měł. Fachowcy wuchadźeja z toho, zo měło přesćahowace awto znajmjeńša 20 km/h spěšniše być.

Přepytuja bijeńcu na „plaće“

Budyšin. K namócnemu rozestajenju dóńdźe minjeny pjatk wječor na Budyskich Žitnych wikach. Tam je alkoholizowany 18lětny młodymaj mužomaj w starobje 17 a 21 lět mjezwoči bił. Tole roznjese so spěšnje po socialnych syćach, hdźež bě rěč wo lěwicarjach a prawicarjach. Kaž policija wuslědźi, steještej sej na „plaće“ skupinje napřećo, kotrejž přisłušatej po wšěm zdaću politisce lěwemu a prawemu spektrumej. Wjacore wosoby běchu alkoholizowane. Policiju přiwo­łachu w 21.30 hodź. Jako pak ta přijědźe, běchu so wšitcy zminyli. Jeničce třoch swědkow a sobudźěłaćerja wěstotneje słužby móžachu zastojnicy zwěsćić. 18lětny podhladny skućićel so pozdźišo na policajskim rewěrje přizjewi. Nětko přepy­tuja, hač ma rozestajenje woprawdźe politiski pozadk. Za to pytaja móžnych swědkow.

Pokradnjene awto so paliło

Lešawa. W nocy wot pjatka na sobotu je so w Lešawje blisko Haslowa BMW palił. Po tym zo bě někajki wubuch słyšała, spěchaše 59lětna k awtu, z kotrehož so hižo sylnje kurješe a kotrež so na to za­pali. Wohnjowi wobornicy płomjenja zhašachu. Žonu dyrbjachu zajědojćenja kura dla do chorownje dowjezć. Po slědźenjach policije so wukopa, zo bě něchtó BMW pjatk w Biskopicach pokradnył.

Třo ćežkozranjeni

Słona Boršć. Jako chcyše wodźer nakładneho awta sobotu dopołdnja pola Słoneje Boršće ze S 106 na awtodróhu wotbočić, wón napřećo přijěducy Renault přewidźa. Dóńdźe k zražce, při kotrejž so třo we wosobowym awće ćežko zranichu.

Dnjowe dochody fuk

Wojerecy. Přez pódlanske durje bě so wčera rano njeznaty do Wojerowskeho hosćenca zadobył. Tam hrabny sej na tejce ležacu móšnju z dnjowymi dochodami a so zaso zhubi. 53lětny mějićel hosćenca trochuje škodu na 760 eurow.