Policija (13.10.16)
Awto murju spotorhnyło
Kamjenc. Wutoru popołdnju wołachu policiju a wohnjowu woboru k njewšědnemu njezbožu na Beethovenowu w Kamjencu. Nakładne awto je při ranžěrowanju dźěl masiwneje murje sportorhnyło. Dźěle murje, kotrež na chódniku a dróze ležachu, dyrbjachu Kamjenscy wobornicy rumować. Pozdźišo pak dyrbješe tež měšćanska komunalna słužba z kolesnym nakładnikom wupomhać. Hač je njekedźbnosć šofera k njezbožu wjedła, to je nětko slědźenska naležnosć policije.
Awće do so zrazyłoj
Hamor. Wčera wječor stej w Hamoru njedaloko zajězda k Bjerwałdskemu jězorej Audijej do so zrazyłoj. Dokelž jedne z awtow na třěše ležeše, su tež Hamorsku a Krynhelečansku wohnjowu woboru zaalarmowali. Jedna wosoba so při nje- zbožu tak ćežko zrani, zo dyrbješe nuzowy lěkar z helikopterom přilećeć.
Policija (12.10.16)
86lětneho namakali
Kamjenc. Póndźelu bě napjatosć w Kamjencu wulka, jako pytachu tam 86lětneho, kiž bě so bjez slědow z domu na Christian-Weißmantelowej zhubił. Nimo policistow městneho policajskeho rewěra bě tež slědźacy psyk zasadźeny. Na zbožo bě patrulja starca na Jěžowskej nadešła.
Seniorka slubjenja „wučušliła“
Budyšin. Wobšudnicy spytachu w Budyskej Strowotnej studni 84lětnu zjebać. Kriminelni so pola njeje přizjewichu a slubichu seniorce něhdźe 30 000 eurow dobyća. Za to pak měła najprjedy za 900 eurow dobropis kupić. Rentnarka hnydom wopačne slubjenja „wučušli“.
Policija (11.10.16)
Woheń wulku škodu načinił
Berthelsdorf. W połnocy je z dotal njewuslědźeneje přičiny na Berthelsdorfskej přemysłowej přestrěni njedaloko Biskopic woheń wudyrił. 76 wohnjowych wobornikow gmejnskeje wohnjoweje wobory běchu na městnje, zo bychu płomjenja zhašeli. Po něhdźe štyrjoch hodźinach so jim to poradźi. Policija trochuje škodu na něhdźe 40 000 eurow.
W zawodomaj kradnyli
Porchow. Minjeny kónc tydźenja zadobychu so njeznaći w Porchowje do dweju zawodow na Šulskej dróze. Z prěnjeho objekta pokradnychu skućićeljo wjacore pakćiki kofeja, z druheho pak laptopaj, widejowu kameru a fotoaparat.
Policija (10.10.16)
Transporter so přećisnył
Delnja Hórka. Njedaloko Delnjeje Hórki je wčera wodźer transportera na B 156 z dotal njeznatych přičin z dróhi zjěł a so z jězdźidłom na polu přećisnył. Dokelž běchu durje wuhorbjene a awto na boku ležeše, bě šofer w jězdźidle zatłusnjeny. Wohnjowi wobornicy jeho wuswobodźichu. Tež ambulantna słužba bě na městnje, njetrjebaše pak wulce pomhać.
Opel do štoma zrazył
Budyšin. W nocy na njedźelu dóńdźe w Budyšinje na Mužakowskej dróze k njezbožu. Wodźer Opela je naprawo z dróhi zjěł a prasny do štoma.
Jězdźidle do so zrazyłoj
Njebjelčicy. Na wobjězdowej dróze mjez Njebjelčicami a Protecami stej pjatk něhdźe w 15 hodź. jězdźidle frontalnje do so zrazyłoj. Wjacore wosoby so při tym zranichu. Jich dyrbjachu zastarać.
Policija (07.10.16)
Wo zranjenu so njestarał
Pančicy-Kukow. Jako wodźer swětłomódreho wosoboweho awta zawčerawšim w 15.15 hodź. z parkowanišća při kupnicy Netto w Pančicach-Kukowje na statnu dróhu S 100 wujědźe, njewobkedźbowaše wón předjězbu mopedistki. 17lětna dyrbješe nahle spinać, padny a so snadnje zrani. Zawinowar pak so z městna njezboža zminy. Swědcy, kotřiž su něšto wobkedźbowali, njech přizjewja so pod telefonowym čisłom 03578/ 35 20.
Policija (06.10.16)
Transporter so wupalił
Horni Wujězd. Na statnej dróze S 101 pola Hornjeho Wujězda je so wčera transporter wupalił. Šofer bě na awtodróze A 4 kur z motora stupać pytnył a awtodróhu wopušćił. Jemu so hišće poradźi nakładowane twory z awta wzać, prjedy hač płomjenja z jězdźidła sapachu.
Z piłu so smjertnje zranił
Njedźichow. Tragiske njezbožo je so zawčerawšim popołdnju w Njedźichowje stało. 66lětny muž chcyše tam z elektriskej rjećazowej piłu štom pušćić. Při tym so z mašinu na šiji zrani. Jemu njemóžachu hižo pomhać, na městnje njezboža wón za něšto mjeńšin wudycha.
Policija (05.10.16)
Mortweho namakali
Wojerecy. Při železniskich kolijach blisko mosta nad Čornym Halštrowom we Wojerecach su zawčerawšim připołdnju ćěło muža namakali. Kaž při blišim přepytowanju zwěsćichu, jedna so wo 44lětneho bjezdomneho z Wojerowskeje wokoliny. Kak je wón dokładnje žiwjenje přisadźił, njeje dotal znate, po wšěm zdaću pak je ćah do njeho zajěł.
Diesel kradnyli
Kulow. Póndźelny swjaty dźeń su njeznaći wužili a w Kulowje diesel kradnyli. Woni wotklumpachu něhdźe 200 litrow ćěriwa z bagra, kotryž steješe na twarnišću na Salowskej dróze. Kriminalna policija pad přepytuje.
Policija (04.10.16)
W probowym času alkohol pił
Běła Woda. Hdyž maš swoju jězbnu dowolnosć na probowy čas, nimaš při wodźenju jězdźidła pod wliwom alkohola stać. To je sej w nocy na minjenu njedźelu 26lětny w Běłej Wodźe wot policistow rozłožić dać dyrbjał. Zastojnicy běchu młodeho muža na Budyskej dróze kontrolowali a pola njeho 0,3 promile alkohola naměrili. Štož w normalnym padźe žadyn problem njeje, wšak za probowy čas jězbneje dowolnosće njepłaći. Tak ma 26lětny nětko ze selenej pokutu ličić. W najhóršim padźe móže so stać, zo dyrbi wón swoju jězbnu dowolnosć zaso wotedać.
Policija (30.09.16)
Starše žony wobkradnyli
Budyšin/Wojerecy. Hnydom tři starše žony stachu so zawčerawšim z woporom paduchow. W Budyšinje je njeznaty w parku Při měšćanskim nasypje 81lětnej tobołku wutorhnył. Žona hišće spyta ju kruće dźeržeć, štož pak so jej njeporadźi. Wona padny a so zrani. We Wojerecach bě 70lětna pola frizera a powěsny tobołku na garderobu. Jako chcyše woteńć, wona pytny, zo bě něchtó móšnju z ec-kartku a pjenjezami z njeje wzał. A popołdnju pokradnychu 91lětnej tobołku, jako bě wona nakupować. Škoda wučinja w tymle padźe 600 eurow.
Policija (29.09.16)
Z jastwa won a hnydom zaso nutř
Budyšin. Ani 24 hodźin po tym zo bu wutoru z Budyskeho jastwa pušćeny, je 39lětny muž w nocy na srjedu w sprjewinym měsće padustwo skućił. Ze zahrodoweho domčka na Mužakowskej je wón telewizor, radijo a žiwidła pokradnył a chcyše je z tohorunja pokradnjenym kolesom wotwjezć. Policisća pak pakostnika lepichu. W pospěšnym jednanju zasudźi jeho Budyske zarjadniske sudnistwo wčera k dźesać měsacam jastwa, kotrež smě 39lětny nětko nastupić.
