Policija (01.12.17)
Alfa Romeo najspěšnišo smalił
Šešow. Na zwjazkowej dróze B 96 při wotbóčce do Šešowa je policija tele dny spěšnosć měriła. Z něhdźe 600 kontrolowanych je 18 šoferow dowolenu spěšnosć 70 km/h překročiło. Njesławny rekord docpě Alfa Romeo z Wojerowskim čisłom. Te smaleše tam ze 129 km/h. Wuslědk za jeho wodźerja rěka: 240 eurow pokuty, dwaj dypkaj a měsac nóžkować.
Policija (30.11.17)
Paduši w kinje
Wojerecy. Chětro njepřijomnje skónči so minjenu póndźelu wječor za Wojerowčanku wopyt kina w měsće. Wona bě poslednje předstajenje dnja wopytała a tam swoju móšeń ležo wostajiła. Jako tole hakle doma pytny a hnydom do kina zazwoni, pak so tam hižo nichtó njepřizjewi. Tuž so wona nazajtra do kina poda a so najprjedy wjeseleše, zo bě něchtó móšeń namakał a personalej wotedał. Pohladnywši pak do njeje žona zwěsći, zo běchu pjenjezy z móšnje pokradnjene. Policija pad přepytuje.
Policija (29.11.17)
Technika pomhała
Budyšin. Kak moderna technika w awtach při njezbožach pomha, je so wčera w Budyšinje pokazało. Na křižowanišću Zeppelinowa/Nowosólska chcyše wodźer BMWja w 17.30 hodź. nalěwo do centruma wotbočić. Dokelž ampla hižo žołte pokaza, muž bóle na płun stłóči, zo by z křižowanišća přišoł. Při tym poča so awto na mokrej jězdni suwać a prasny do ample. Dokelž bě BMW 60lětneho wodźerja z nuzowym systemom eCall wuhotowany, tón awtomatisce centralu zazwoni a sposrědkowa wšitke trěbne daty kaž městnosć, ličbu wosobow w awće a ličbu aktiwizowanych airbagow. Dokelž dyrbjachu ze zranjenymi ličić, zasadźichu mjez druhim lěkarja a wuchowanske awto. Zranił drje so nichtó njeje, škoda pak wučinja 21 000 eurow.
Policija (28.11.17)
Najebać zakaz dale jěła
Słona Boršć. Na wotpočnišću při awtodróze A 4 pola Słoneje Boršće je policija njedźelu popołdnju transporter kontrolowała. Zastojnicy zwěsćichu, zo jězdźidło ani přizjewjene ani zawěsćene njebě. 55lětnej wodźerce su tuž dalšu jězbu z awtom zakazali. To pak ju po wšěm zdaću njemyleše. Přetož tři hodźiny pozdźišo su dalši policisća samsnu žonu na parkowanišću blisko Kodersdorfa znowa z transporterom lepili.
Policija (27.11.17)
Dom so dospołnje wotpalił
Wojerecy. K hašenju su wobornikow sobotu rano we Wojerecach wołali. Woheń bě w prózdnym a na předań stejacym drjewjanym domje we wulkosći 15 króć dwanaće metrow wudyrił. Wjele hašeć pak kameradojo hižo njemóžachu, dokelž běchu so płomjenja po cyłym twarjenju spěšnje rozpřestrěli. Dyrbjachu dom tuž pod kontrolu wotpalić dać. Zranił so nichtó njeje a tež za susodne domy žadyn strach njewobsteješe. Po wuprajenju wobsedźerja měješe twarjenje hódnotu něhdźe 10 000 eurow. Wohnjowi wobornicy běchu ze 14 jězdźidłami zasadźeni, a to hišće cyłu sobotu, dokelž wětřik płomjenja nastajnosći znowa zamiškori. Kriminalna policija nětko přepytuje, kak je woheń wudyrił a hač so w tymle padźe snano wo zapalerstwo jedna.
Policija (24.11.17)
34lětneho wopiteho lepili
Gersdorf. Jako su zastojnicy patrulje Kamjenskeho policajskeho rewěra srjedu krótko do połnocy 34lětneho wodźerja Golfa w Gersdorfje kontrolowali, napadny jim „chorhojčka“ šofera. Tón měješe 1,78 promilow alkohola w kreji.
Z awta lampu pokradnyli
Bódricy. W Bódricach (Baderitz) zadobychu so njeznaći srjedu připołdnju do Opela. Pokradnyli su z njeho kapsnu lampu.
Policija (23.11.17)
27lětna ćežke njezbožo zawiniła
Trjebjeńca. Z Budyšina do směra na Lubij bě wčera popołdnju 27lětna šoferka ze swojim Audijom A4 na B 6 po puću. Krótko za Bukecami přesćahny wona nakładne awto z připowěšakom. Při tym pak napřećo přijěducy Ford S-Max přepozdźe widźeše a zrazy do njeho. Wšitcy sobujěducy Forda, 41lětna wodźerka, 71lětna a dwě dźěsći w starobje dźewjeć a 13 lět, so ćežko zranichu. Wodźerka Audija a 25lětny sobujěducy poćerpještaj lochke zranjenja. Wšitkich na njezbožu wobdźělenych dowjezechu do bliskeje chorownje. Wěcna škoda wučinja něhdźe 23 000 eurow. B 6 bě tři hodźiny dospołnje zawrjena.
Policija (21.11.17)
Kwady kradnyli
Sepicy. Po wšěm zdaću chětro kamjenjaty puć domoj mějachu njeznaći paduši w Sepicach. Z hale na Drježdźanskej pokradnychu w času wot minjeneje soboty popołdnja do njedźele připołdnja wjacore kwady. Kaž policija zdźěla, je wobsedźer zwěsćił, zo pobrachuja nimo štyrjoch dźěćacych dalši sportowy kwad, wjacore crossowe nahłowniki kaž tež grat a narunanske dźěle. Škoda wučinja něhdźe 15 000 eurow.
Policija (20.11.17)
Dróhi hładke byli
Wóslink. Na wjacorych městnach su so sobotu rano na hładkich pućach wobchadne njezboža stali. Pola Wóslinka bě 53lětny wodźer Renaulta krótko po wosmich na statnej dróze S 95 kontrolu nad swojim wozydłom zhubił. Renault zajědźe na lěwy bok jězdnje a so wjacore razy zwróći. Muž so při tym ćežko zrani, tak zo dyrbjachu jeho z helikopterom do chorownje dowjezć. Awto so dospołnje skóncowa. Wobdźěłanja njezboža a rumowanja dla je na statnej dróze k poćežowanjam wobchada dóšło.
Policija (17.11.17)
Zražka na křižowanišću
Bolborcy. K njelubemu zetkanju dweju wosoboweju awtow je zawčerawšim popołdnju na křižowanišću w Bolborcach dóšło. 71lětna wodźerka Audija bě tam ze Smochčanskeho směra přijěła a po wšěm zdaću předjězbu 55lětneje šoferki Opela njewobkedźbowała. Zražka bě tak mócna, zo so Opel z jězdnje suny a do sćěny domskeho prasny. Na twarjenju nasta něhdźe 10 000 eurow škody. Wobě žonje so snadnje zraništej. Na jeju jězdźidłomaj nasta dohromady dalšich 10 000 eurow wěcneje škody. Wobškodźene twarjenje dyrbješe statikar přepruwować. Wo wuslědku jeho posudka dotal ničo znate njeje.
