Policija (19.03.18)
18lětny znjezbožił
Chelno. Na statnej dróze S 106 mjez Chelnom a Třomi Hwězdami je sobotu wječor 18lětny wodźer BMWja znjezbožił. Na zasněženej dróze zhubi wón kontrolu nad jězdźidłom a so z nim přećisny. Ćežko zranjeneho młodostneho dyrbjachu do chorownje dowjezć.
Policija (16.03.18)
Samodruha zranjena
Hnašecy. Při ćežkim wobchadnym njezbožu wčera popołdnju pola Hnašec su so štyri wosoby zranili, mjez nimi samodruha. 31lětna chcyše ze swojim Passatom statnu dróhu S 119 přeprěčić, njewobkedźbowaše pak předjězbu Renaulta a zrazy do njeho. Na to prasny Passat do dalšeho jězdźidła. Wěcna škoda wučinja nimale 30 000 eurow.
Policija (15.03.18)
Paduši w twarskim wozu byli
Smjerdźaca. Nócny měr na twarnišću w Smjerdźacej su njeznaći w nocy na wutoru wužili a so do twarskeho woza zadobyli. Z njeho pokradnychu elektriski grat w cyłkownej hódnoće 1 500 eurow. Wěcna škoda na twarskim wozu bě z dźesać eurami porno tomu snadna. Kriminalisća zawěsćichu slědy a nětko za skućićelemi pytaja.
Policija (14.03.18)
Paduši kolesow zaso aktiwni
Budyšin. Bližace so nalěćo někotrehožkuli pohnuwa, nětko swoje koleso z pincy abo garaže wućahnyć. Nic pak jenož wólnočasni sportowcy su zaso aktiwniši, tež paduši kolesow. Tohodla policija wobydlerjow namołwja swoje wobsydstwo škitać. Stabilny zamk měł za kóždy groćany konik samozrozumliwy być. Ale tež koděrowanje kolesa móže pomhać padustwo wujasnić. Z pomocu indiwidualneje kombinacije pismikow a čisłow hodźi so koleso swojemu poprawnemu wobsedźerjej lóšo přirjadować. W Budyskim a Zhorjelskim wokrjesu wšelake towarstwa, na přikład wobchadne straže abo ADFC tajke koděrowanske akcije poskićeja. Prěnja budźe 9. apryla wot 18 do 19 hodź. před hosćencom „Budyska piwarnja“ na Thomasa Mannowej.
Policija (13.03.18)
Ze 100 km/h po měsće smalił
Kamjenc. Runjewon rabiatnje je zawčerawšim popołdnju 35lětny muž ze swojim njepřizjewjenym motorskim po Kamjencu smalił. Swědcy běchu policiju na njeho skedźbnili, zadźeržeć pak wona motorskeho njemóžeše. Z městnami wón z něhdźe 100 km/h po měsće jědźeše, zdźěla samo po chódniku. Dokelž pak zastojnicy wědźachu, štó před nimi ćěka, woni 35lětneho pozdźišo w měsće jako pěška lepichu, po tym zo bě swoju mašinu mjeztym doma wotstajił.
Policija (12.03.18)
Jězbna dowolnosć fuk
Čelchow. Chětro hłuboko do piwoweje škleńcy pohladał je sobotu wječor 42lětny muž w Čelchowje a so na to z kolesom na dompuć nastajił. Policija pak jeho zadźerža a přewjedźe alkoholowy test, při kotrymž naměri pola kolesowarja 1,64 promilow alkohola w kreji. Za to dyrbi muž nětko na wěsty čas swoju jězbnu dowolnosć wotedać, dalokož tajku wobsedźi.
Štomy skradźu pušćeli
Krěpjecy. Paduši drjewa běchu minjene dny w klóšterskim lěsu na kromje Krěpjec při dźěle. Tam dyrbjachu zwěsćić, zo bě něchtó wjacore nahladne duby a topoły pušćił a wotwjezł. Nimo toho běchu dalše štomy njefachowje narězane, tak zo tež tam ze škodu liča. Pjenježnu stratu trochuja na něhdźe 8 000 eurow.
Wopačny alarm
Pančicy-Kukow. Wohnjowych wobornikow z Pančic-Kukowa a wokolnych wsow su wčera popołdnju do klóštra Marijineje hwězdy wołali. Alarmowa připrawa je tam woheń signalizowała. Kaž pak so wukopa, jednaše so wo wopačny alarm, tak zo móžachu wobornicy po něšto mjeńšinach zaso wotjěć.
Policija (09.03.18)
Z wopačnej bankowku zapłaćić chcył
Kamjenc. Swoju zličbowanku w Kamjenskej kupnicy chcyše zawčerawšim připołdnju muž z falšowanej 50eurowskej bankowku zapłaćić. Kasěrarce pak napadnychu pobrachowace wěstotne znamjenja na „kćenju“, na čož wona hnydom policiju informowaše. Zastojnicy podhlad wobkrućichu a zahajichu přećiwo 30lětnemu chłostanske jednanje. Při dokładnišim přepytowanju wopačneje bankowki so wukopa, zo bu na njej wotćišćane čisło hižo wjackróć za zhotowjenje wopačnych pjenjez wužiwane.
Policija (08.03.18)
Orchester policije wobkradnyli
Wojerecy. W nocy na wutoru su so njeznaći we Wojerecach do pućowanskeho busa zadobyli. Při tym jednaše so wo bus orchestra ukrainskeje policije. Hudźbnicy su tuchwilu na turneji a koncertowachu we Wojerecach. Z busa zhubichu so ec-kartka, nawigaciski nastroj a awtowe radijo. Při tej składnosći su paduši tež hišće klarinetu sobu wzali.
Policija (07.03.18)
Ćežke mašiny kradnyli
Pomorcy. Njeprošeny wopyt mějachu minjeny kónc tydźenja w jednym Pomorčanskim zawodźe. Zawčerawšim rano dyrbjachu sobudźěłaćerjo zwěsćić, zo běchu so tam njeznaći zadobyli. Z dźěłarnje pokradnychu paduši pjeć ćežkich mašinow za wobdźěłanje drjewa. Jich hódnotu trochuje wobsedźer na něhdźe 8 000 eurow. Kaž policija zdźěli, su skućićeljo lědma slědy zawostajili, štož wobdźěłanje pada poćežuje.
Policija (06.03.18)
Płunowód wobškodźili
Budyšin. Njeměrny wječor mějachu zawčerawšim wobydlerjo wjaceswójbneho domu na Budyskej Kamjentnej hasy. Woni dyrbjachu krótko po 17 hodź. swoje bydlenje wopušćić, dokelž w pincy za płunom smjerdźeše. Přiwołani wohnjowi wobornicy zwěsćichu, zo bě něchtó płunowód wotpohladnje skóncował. Bě drje tuž wulke zbožo, zo měšeńca płuna a powětra rozbuchnyła njeje. Sobudźěłaćer energijoweho zastaraćela wšitko přepruwowaše a alarm zběhny, tak zo móžachu ludźo zaso do swojich bydlenjow. Kriminalisća pad přepytuja.
