Policija (04.01.18)
Wjace hač dwójce tak spěšnje
Budyšin. Spěšnosć kontrolowała je policija zawčerawšim w 30 km/h-pasmje na Budyskich Schillerowych zelenišćach. W třoch hodźinach měrješe wona 700 jězdźidłow, a 67 bě přespěšnych. Njesławny rekord docpě wodźer Audija, kotrehož błysknychu ze 77 km/h. Wón změje nětko 200 eurow pokuty płaćić, dóstanje dwaj dypkaj w Flensburgu a dyrbi jedyn měsac nóžkować.
Policija (03.01.18)
Awtomat rozbuchnyli
Mały Wjelkow. Silwesterske praskotaki njejsu Nowe lěto w Małym Wjelkowje jenož k zawjeselenju wužiwali. Tam běchu zawčerawšim něhdźe w 6 hodź. cigaretowy awtomat rozbuchnyli a za to po wšěm zdaću pyrotechniske wudźěłki wužiwali. Hač su njeznaći cigarety abo pjenjezy spakosćili, njeje znate. Škoda wučinja něhdźe 3 000 eurow.
Policija (02.01.18)
Woheń wulku škodu načinił
Běła Woda. Wšo druhe hač měrliwy spočatk noweho lěta dožiwichu wohnjowi wobornicy wčera rano w Běłej Wodźe. Krótko po 6 hodź. wołachu jich k hašenju wohenja na Jabłóńskim puću. Tam bě so z dotal njeznateje přičiny najprjedy nakładowane drjewo palić započało. Pozdźišo přeskočichu płomjenja na susodnu garažu. Nimo Běłowodźanskich wobornikow běchu tohorunja jich kolegojo z Wuskidźe zasadźeni. Garaža so dospołnje wotpali, runje tak dwě jězdźidle w njej. Wobornikam drje so poradźi zadźěwać, zo płomjenja na susodny bydlenski dom přeskoča. Nastata horcota pak wuskutkowa tež na nim wěcnu škodu. Kelko to dokładnje bě, njeje hišće zwěsćene. Na zbožo so nichtó zranił njeje. Fachowc ma nětko přičiny wohenja přepytować. Najskerje bě so silwesterski praskotak do drjewa zabłudźił. Dalše přepytowanja je kriminalna policija přewzała.
Policija (29.12.17)
Špihele awtow wobškodźeli
Wojerecy. Po hodownych swjatych dnjach dožiwichu wjacori wobsedźerjo wosobowych awtow njelubu překwapjenku. Njeznaći běchu na wšelakich městnach we Wojerecach kaž tež w susodnym Ćisku a w bliskich Wulkich Ždźarach wot awtow škleńcu wonkownych špihelow wotstronili. Potrjechene běchu jězdźidła typow Mercedes Benz, Škoda a BMW. Dokładny wobjim škody drje hišće zwěsćić njemóžachu, po wšěm zdaću pak jedna so wo znajmjeńša 2 000 eurow. Zo móhli skućićelow namakać, prosy policija wobydlerjow wo pomoc. Štó je we Wojerecach na Schweitzerowej, Lilienthalowej a Armstrongowej kaž tež w Ćisku a we Wulkich Ždźarach podhladne jězdźidła abo wosoby widźał? Pokiwy přijimuja pod telefonowym čisłom 03571/ 46 50.
Policija (28.12.17)
Do rěznistwa so zadobyli
Wojerecy. Wokoło hodownych swjatych dnjow běchu so njeznaći na Wojerowskej Hasy Ziolkowskeho do rěznistwa zadobyli a pokradnychu tam třicyfrowu sumu pjenjez. Na to přepytachu tež rumnosće susodneje pjekarnje a načinichu wěcnu škodu něhdźe 4 000 eurow.
Pod wliwom drogow z awtom jěł
Brětnja. Zawčerawšim dopołdnja su policisća w Brětni na B 97 šofera Peugeota zadźerželi. Při kontroli woni zwěsćichu, zo bě 25lětny pod wliwom drogow po puću.
Policija (27.12.17)
Ćežke spalenja poćerpjeł
Koblicy. 55lětny Kobličan chcyše wčera rano kachle swojeje dźěłarnje zatepić. Zo by to spěšnišo šło, wužiwaše kapalinu za rjedźenje spinadłow. Po zdaću pak přewidźa wón dymjace žehliwo w kachlach, na čož dóńdźe k rozbuchnjenju, a płomjenja sapachu z kachli. Muž so tak jara spali, zo dyrbjachu jeho ćežko zranjeneho z wuchowanskim helikopterom do chorownje dowjezć.
W šuli škodu načinili
Šěrachow. Na hodownych swjatych dnjach su njeznaći w Šěrachowje po zdaću wostudu pasli a načinichu škodu při zakładnej šuli. Tam běchu škleńcu jednoho wokna rozbili a na dalšim woknje wobškodźichu ramik.
Hładku dróhu njewobkedźbował
Wopaka. We Wopakej bě wodźer Citröena wčera něhdźe w 22 hodź. na zwjazkowej dróze B 96, do směra na Budyšin, kontrolu nad jězdźidłom zhubił. Zalodźeneje jězdnje dla poča so suwać a zrazy do štoma. Při tym so wón kaž tež sobujěducy muž a dalša žona so zranichu. Wšitkich třoch dowjezechu do chorownje.
Bjez „papjerow“ z awtom jěł
Policija (22.12.17)
Chaos na awtodróze knježił
Porchow. Hodowna pućowanska žołma je dźensa w nocy na A 4 mjez Porchowom a Hornim Wujězdom swoje prěnje slědy zawostajiła. Krótko po 1.15 hodź. je tam na lěwej stronje jězdnje hnydom pjeć wosobowych awtow do so zrazyło. Porchowscy wohnjowi wobornicy mějachu tuž cyle krótku nóc. Prěni króć jich na pomoc wołachu, zo bychu dróhu wurjedźili. Z pomocu policije zestorkachu skóncowane a rozbite jězdźidła na kromu puća, zo njeby so wobchad přejara haćił. Jednu zranjenu wosobu dyrbjachu do chorownje dowjezć. Něhdźe w 2.45 hodz. žno Porchowscy wohnjowi wobornicy zaso w połnej monturje na awtodróze stejachu. Nimale na samsnym městnje kaž do toho, běchu tři awta do so zrazyli. Štó a što bě na tym wina, policija tež tónkróć prawje rjec njemóžeše.
Policija (21.12.17)
Ilegalne praskotaki sćazali
Wojerecy. Jako běchu zastojnicy Wojerowskeho policajskeho rewěra wutoru dopołdnja na patruli, rozbuchny na parkowanišću při gondlowanskim haće praskotak. Zastojnikam napadny při tym 26lětny Wojerowčan, kotrehož kontrolowachu. W jeho nachribjetniku nańdźechu 159 ilegalnych praskotakow. Pyrotechniku tuž hnydom sćazachu. Młodemu mužej hrozy nětko chłostanje přeńdźenja rozbuchadłoweho zakonja dla.
Policija (20.12.17)
Widejohry kradnyć chcył
Budyšin. Na hodownu nakup trochu hinašeho razu poda so zawčerawšim młody muž do Budyskeje kupnicy při Delnjokinjanskej dróze. Tam tykny sej widejohry w hódnoće něhdźe 600 eurow do toboły a wopušći kupnicu, bjez toho zo by je zapłaćił. Swědk pak to wobkedźbowaše a zawoła policiju. Zastojnicy wzachu 23lětneho sobu na policajski rewěr. Kaž so tam wukopa, měješe młody muž při swojim njeskutku najskerje pomocnicu. Na kotre wašnje je njeznata w tymle padźe pomhała, njeje znate.
Policija (19.12.17)
Ochranowska hwězda fuk
Kamjenc. Wulku prócu, kotruž mnozy při adwentnym wupyšenju swojeho domu nałožuja, skućićeljo znjewužiwaja a dohodownu pychu prosće kradnu. Zwěsćili su tajki pad w nocy na njedźelu w Kamjencu-Jěžowje. Tam bě něchtó wot prědnjeho boka bydlenskeho domu něhdźe 60 centimetrow wulku žołtu Ochranowsku hwězdu spakosćił. Wobsedźer trochuje jeje hódnotu na něhdźe 60 eurow. Policija nětko za paduchom pyta a drje dokładnišo hlada, štó sej tajku hwězdu něhdźe powěsnje.
