Policija (09.10.18)
Hižo dopołdnja wopity był
Narć. Na zwjazkowej dróze B 96 pola Narća je policija zawčerawšim dopołdnja wopiteho šofera zadźeržała. Něhdźe w 10.30 hodź. zwěsćichu pola 46lětneho wjac hač dwaj promilej alkohola w kreji. Hač bě wón na zažnym rańšim piwku pobył abo předołho hejsował, wšak znate njeje.
Policija (08.10.18)
Z motorskim znjezbožił
Róžant. Zły wukónc měješe sobotu popołdnju probowa jězba 47lětneho muža z motorskim w Róžeńće. Po swójskich wuprajenjach so při jězbje nadobo zadnje koleso mašiny wotsuny. Na to zhubi wodźer kontrolu nad wodźidłom a zajědźe přez płót priwatneje ležownosće. Při wobdźěłanju njezboža pak so wukopa, zo měješe wón 1,64 promilow alkohola w kreji. Nimo toho motorske zawěsćene njebě. Zranjenjow dla dowjezechu muža do chorownje.
Policija (05.10.18)
Pos hólca do nohi kusnył
Budyšin. Hižo minjenu póńdźelu je na Budyskej Kamjentnej pos njeznateje žony 14lětneho hólca do nohi kusnył. Psa wjedźeše starša žona při rolatoru. Swoje mjeno a adresu pak wona młodostnemu přeradźić nochcyše. Nětko policija za žonu pyta. Wona je 65 do 70 lět a ma čerwjeno-brune krótke włosy.
Policija (04.10.18)
Paduši w firmje
Budyšin. 13 płunowych blešow z maćiznu za klimowe připrawy su njeznaći minjene dny z firmy na Drježdźanskej dróze w Budyšinje pokradnyli. Zawodej nasta tak škoda nimale 7 000 eurow.
Policija (02.10.18)
Štó je dary zběrał?
Běła Woda. Wjacore wosoby běchu 21. septembra popołdnju w Běłej Wodźe wočiwidnje w słužbnej drasće sobudźěłaćerjow Němskeho čerwjeneho křiža (DRK) po puću. Kaž Zhorjelska policajska direkcija rozprawja, prošachu njeznaći při chěžnych durjach wobydlerjow wo dary za DRK. Při tym zapisowachu sej daty potrjechenych ludźi. Nětko pyta policija swědkow, z kotrymiž běchu so njeznaći rozmołwjeli a kotřiž su wosobinske daty dale dali. Pokiwy přijimuje Běłowodźanski policajski rewěr pod telefonowym čisłom 03576/ 26 20.
Policija (01.10.18)
Sornomaj so wuwinyła a znjezbožiła
Hamor. Dospołnje skóncowane je nětko awto 58lětneje žony, kotraž bě sobotu rano na zwjazkowej dróze B 156 mjez Hamorom a Delnim Wujězdom po puću. Jako nadobo sornje na puć stupištej, chcyše so wona jimaj wuwinyć. Při tym zajědźe z jězdnje a z awtom zwróći. Šoferka so při tym snadnje zrani. Sornje so njezranjenej do lěsa zhubištej.
Policija (28.09.18)
Pos přepławjenje zawinił
Biskopicy. Z njewšědnym padom přepławjenja dyrbještej so wohnjowa wobora a policija wčera w Biskopicach zaběrać. Z bydlenja w druhim poschodźe ćečeše woda do delnich bydlenjow. Kaž so wukopa, pak mějićel hornjeho bydlenja scyła doma njebě, za to pak jeho wulki pos. Po wšěm zdaću bě dogga lačna, so při honaču napi, ale ručicu zaso dele njestłóči, tak zo myjadło bórze přeběža. Wobornicy we wjacorych bydlenjach wodu wuklumpachu. Wo nastatej škodźe dyrbi mějićel psa nětko ze swojej zawěsćernju porěčeć.
Policija (27.09.18)
W kupnicy móšeń pokradnyli
Pančicy-Kukow. 29lětnej žonje su njeznaći minjenu póndźelu popołdnju w kupnicy Netto w Pančicach-Kukowje móšeń pokradnyli. Žona drje bě swój nachribjetnik w nakupowanskim wozu krótki čas njewobkedźbowany wostajiła. Tutu składnosć njeznaći wužiwachu a za móšnju sahnychu. Nimo wupokaza a pjenježnych kartow zhubi so tohorunja dwucyfrowa suma pjenjez. Kriminalna policija pad přepytuje a radźi, wosobinske wěcy njewobkedźbowane njewostajić.
Kóń do awta zaběžał
Prěčecy. Wjacore konje so wčera rano pola Bolborc ze swojeje pastwy wudobychu. Jedyn z nich je krótko po 5 hodź. na statnej dróze S 100 pola Prěčec do wosoboweho awta zaběžał a so při tym snadnje zranił. Skótny lěkar jeho zastara. Šofer so na zbožo zranił njeje.
Policija (26.09.18)
Pokradnjene awto namakali
Rakecy. Wosobowe awto typa BMW 318i, kotrež bě so před tydźenjomaj z garaže w Běłej Wodźe zhubiło, su zawčerawšim w Rakecach namakali. Wobydlerjej bě 27 lět stare jězdźidło bjez čisłow napadnyło. Po tym zo kriminalisća awto přepytachu, móžachu je wobsedźerjej wróćić.
Policija (25.09.18)
Štó je błyskač skóncował?
Němcy. Nic kóždemu so lubi, hdyž při kromje puća nadobo błyskač wuhlada. Druhdy so samo stanje, zo spyta něchtó spěšnosć měrjacy aparat skóncować. Z najnowšim tajkim padom zaběra so nětko policija w Němcach. Tam běchu njeznaći w nocy na njedźelu, 16. septembra, stacionarny błyskač na Drježdźanskej dróze po wšěm zdaću z praskotakami wobškodźili. Při tym so akustiski alarm připrawy zaswěći. Nětko pyta policija swědkow, kotřiž su snano něšto wobkedźbowali, předewšěm skupinu třoch wosobow ze swětłej drastu, kotřiž krótko po połnocy do směra na Wojerecy nóžkowachu. Pokiwy přijimuja pod telefonowym čisłom 03571/ 46 50.
