Jedne awto pokradnyli, dwě nic

Budyšin. W nocy na wutoru běchu paduši awtow w Budyskej Strowotnej studni po puću. Z Nageloweje zhubi so slěbrobarbny VW Golf Plus z hamtskim čisłom BZ-MC 277. Hódnotu pjeć lět stareho jězdźidła trochuje jeho wobsedźer na 10 000 eurow. Na Gagarinowej běchu so njeznaći podarmo prócowali VW Golf GTI kaž tež VW Tiguan pokradnyć. Do Golfa drje so woni zadobychu, motor zaswěćić pak so jim njeporadźi. Při tamnym jězdźidle zwrěšćichu skućićeljo hižo na durjach. Přiwšěm nasta na woběmaj wosobowymaj awtomaj cyłkowna wěcna škoda něhdźe 2 000 eurow.

Smjertny wopor njezboža

Porchow. Při ćežkim wobchadnym nje­zbožu wčera něhdźe w 13.30 hodź. na awtodróze A 4 mjez wotbóčkomaj Porchow a Horni Wujězd je 28lětny wodźer awta žiwjenje přisadźił. Ze swojim Seatom bě wón na lěwej jězdni do směra na Zhorjelc po puću, jako 53lětny šofer nakładneho awta z praweje jězdnje na lěwu změni a wotboka do Seata załoži.­ Zražka bě tak mócna, zo so prědni dźěl awta dospołnje skóncowa, samo motor bu wutorhnjeny. Młodemu mužej njemóžachu hižo pomhać, nuzowy lěkar móžeše jenož hišće jeho smjerć zwěsćić. Rumowanja a wobdźěłanja njezboža dla bě awtodróha do směra na Zhorjelc wjacore hodźiny zawrjena. Sčasami bě rynk čakacych jězdźidłow hač do pjeć kilometrow dołhi. W tym zwisku policija chwali, zo běchu šoferojo tak mjenowanu wuchowansku hasku přikładnje wutworili, zo móžachu wuchowarjo spěšnje k městnu nje­zboža dojěć.