Policija (05.09.18)
Čołmik zaso namakali
Hamor. Hižo spočatk julija bě so při Hamorskim towarstwowym domje padlowanski čołmik zhubił. Tón wuhlada policajski zastojnik zawčerawšim w swojim wólnym času w zahrodce na Diesterwegowej w Hamoru poł zakryty pod planu. Hromadźe z wobsedźerjom sej policisća tam dojědźechu a zwěsćichu, zo jedna so wo pokradnjeny čołmik. Štó bě jón wotwjezł dyrbja nětko wuslědźić.
Policija (04.09.18)
Předjězbu njewobkedźbował
Wojerecy. Wjace hač 60 000 eurow škody nasta při wobchadnym njezbožu zawčerawšim dopołdnja we Wojerecach. 60lětny šofer Mercedesa njewobkedźbowaše na křižowanišću předjězbu 32lětneho wodźerja VWja a zrazy do jeho jězdźidła. 32lětny so snadnje zrani. Policija pozdźišo zwěsći, zo měješe wodźer Mercedesa 0,38 promilow alkohola w kreji.
Policija (03.09.18)
Awtomat rozbuchnyli
Wojerecy. Dokelž słyšeše wobydler na Wojerowskej Bebelowej sobotu wječor krótko do 22.30 wulki wrjeskot, zawoła wón policiju. Zastojnicy wuhladachu na městnje rozbuchnjeny cigaretowy awtomat a třoch podhladnych w starobje 16, 18 a 19 lět. Młodostni, kotrychž policija hižo derje znaje, hnydom přiznachu, zo běchu awtomat rozbuchnyli. Nimo toho mějachu w swojich nachribjetnikach wjetše mnóstwo cigaretow.
Policija (31.08.18)
Starušku při pohrjebnišću wurubił
Běła Woda. Při pohrjebnišću na Běłowodźanskej Georga Beckowej bu zawčerawšim 87lětna žona nadpadnjena a wurubjena. Skućićel čakaše na nju při pódlanskim zachodźe na pohrjebnišćo, pryskaše jej njeznatu maćiznu mjezwoči a wutorhny starušce tobołku. W njej běchu móšeń z něšto pjenjezami, wupokaz a kluče. Dalša žona na pohrjebnišću chwataše jej na pomoc. Přiwołana policija w bliskosći za rubježnikom pytaše, ale jeho tež z pomocu psa njenamaka. Kriminalisća pad dale přepytuja.
Policija (30.08.18)
W kupnicy z winom mjetali
Běła Woda. Winowe jahodki na so mjetali su mužej w starobje 38 a 46 lět kaž tež 33lětna žona zawčerawšim w Běłowodźanskej kupnicy. Ze žorta pak bu chutna naležnosć, kotraž wuwjercholi w rozestajenju a skónčnje w bijeńcy. Tak dyrbješe policija zakročić a wobdźělenych změrować. Wšitcy třo změja so zranjenja ćěła dla zamołwić.
Policija (29.08.18)
Susoda přebił
Klóšterska Nowa Wjes. Po wšěm zdaću žarliwosć bě přičina rozestajenja póndźelu wječor mjez mužomaj w Klóšterskej Nowej Wsy pola Kulowa. Alkoholizowany muž je tam swojeho susoda bił, kiž w awće sedźeše. Tež zadnje wokno jeho jězdźidła wón rozbi.
Policija (28.08.18)
Hejatosć k smjerći wjedła
Arnsdorf. Rozestajenje mjez rentnarjomaj, štó smě w brěčkarni jako prěni swój sad wotedać, je wčera dopołdnja w Arnsdorfje k smjerći jednoho z wobdźěleneju wjedło. Po tuchwilnych dopóznaćach chcyše so 74lětny ze swojim awtom nimo druhich jězdźidłow doprědka tłóčić, při čimž dóńdźe najprjedy k rozestajenju ze žonu. 77lětny muž přińdźe jej na pomoc. Wón napominaše tamneho, zo měł kaž wšitcy druzy čakać a stupi so před jeho awto. A nětko sta so to najhórše: 74lětny sydny so do awta, stupi na płun a zjědźe do 77lětneho. Při tym so tón tak ćežko zrani, zo pozdźišo w chorowni zemrě. Dokelž njejedna so wo njezbožo, ale złóstnistwo, přepytuje pad nětko kriminalna policija, najprjedy raz zranjenja ćěła ze smjertnym wukóncom dla.
Policija (27.08.18)
Wudźerske wuhotowanje fuk
Budyšin. Njelubu překwapjenku dožiwi lubowar wudźenja zawčerawšim dopołdnja w Budyšinje. Jako sej do swojeje garaže na Fabrikskej dóńdźe, dyrbješe wón zwěsćić, zo bě něchtó jeho dospołne wudźerske wuhotowanje pokradnył, mjez druhim 15 wudow, wudźenki a tójšto dalšeho. Hódnotu rubizny trochuje škodowany na něhdźe 700 eurow.
Policija (24.08.18)
Tragisce znjezbožiła
Budyšin. Na Dr. Salvadora Allendowej w Budyšinje je wobydler wčera rano něhdźe w 6 hodź. před wjaceswójbnym domom staršu žonu bjez wědomja a ćežko zranjenu namakał. Za 76lětnu pak přińdźe kóždažkuli pomoc přepozdźe, wona bě hižo zemrěta. Po prěnich přepytowanjach je žona najskerje z balkona swojeho bydlenja padnyła, zdźěli Zhorjelska policajska direkcija. Kriminalisća pad nětko přepytuja.
Policija (23.08.18)
Kriminelnu karjeru zahe zahajili
Mužakow. Z přewšo młodymi paduchami dyrbješe so policija wutoru w Mužakowje zaběrać. Hólcy w starobje dwanaće, 13 a 14 lět běchu w Běłej Wodźe kolesy pokradnyli a z nimaj do Mužakowa a tam přez hranicu do Pólskeje jěli. Mountainbike w hódnoće 260 eurow předachu za tójšto mjenje pjenjez potajerjej. Na dompuću do Němskeje policija padušnu trójku dosahny. Pjenjezy za předate koleso běchu hólcy hižo na pólskim boku na limonadu, cigarety a słódčizny zaměnili. Druhe pokradnjene koleso móžeše policija mjeztym jeho wobsedźerjej wróćić. Wšěch třoch pakostnikow přepodachu skónčnje jich staršim.
