Policija (15.02.18)
Jedne dźiwje swinjo mjenje
Běły Chołmc. Tójšto wěcneje škody nasta wčera rano, jako na statnej dróze S 108 mjez Běłym Chołmcom a Łazom dźiwje swinjo do wosoboweho awta zaběža. Něhdźe w 5.30 hodź. bě tam muž ze swojej Škodu po puću. Na kóncu praweje křiwicy jemu kundroz direktnje před jězdźidło skoči, štož so za dźiwje swinjo smjertnje skónči. Na awće nasta něhdźe 10 000 eurow škody. Wustróžany šofer staraše so wo wotwlečenske předewzaće, kotrež jeho awto sobu wza.
Do policista kopał
Budyšin. Nic z póstniskim wjeselom, ale z wulkim rozestajenjom mjez mužomaj a žonu skónči so w nocy na popjelnu srjedu karnewalowy čas w jednym bydlenju na Budyskej Ebertowej w Strowotnej studni. Dokelž wšitcy třo tam wótře na sebje rjejachu, wołachu wobydlerjo policiju. Jako zastojnicy k městnu harowanja přijědźechu, so jedyn z dweju muži do nich da. 42lětny pluwaše jim mjezwoči, do nich kopaše a nadawaše jim wudma. Zastojnicy wšak mějachu jeho spěšnje pod kontrolu. Zranił so na zbožo tež nichtó njeje.
Policija (14.02.18)
Ničo njesłyšeli a njewidźeli
Biskopicy. We wobchodźe na Biskopičanskej Cyrkwinskej hasy dyrbjachu zawčerawšim rano zwěsćić, zo bě so tam kónc tydźenja něchtó zadobył. Byrnjež wosrjedź města jedyn dom při druhim stał, njeje ze susodow nichtó ničo widźał abo słyšał. Samo rozbita škleńca zachodnych duri nikoho njepohnu policiju zazwonić. Paduši mějachu tuž chwile dosć, wšitke rumnosće za hódnotnymi wěcami přepytać. Při tym načinichu něhdźe 2 000 eurow wěcneje škody.
Na handy hladajo do sćežora prasnył
Wojerecy. 15lětny je so póndźelu nawječor na Wojerowskej Einsteinowej při kolesowanju radšo na swój handy koncentrował hač na nadróžny wobchad. To bě přičina, kotrejež dla wón bjez wobdźělenja druhich znjezboži. Dokelž njebě ani kuska na puć kedźbował, prasny młodostny bjez spinanja do sćežora nadróžneho wobswětlenja a so na hłowje ćežko zrani, kaž Zhorjelska policajska direkcija zdźěli. Dyrbjachu jeho w chorowni zastarać. Škoda na kolesu typa Diamant wučinja 50 eurow. Groćaneho konika je sej policija najprjedy raz wobchowała.
Policija (13.02.18)
Młodej žonje znjezbožiłoj
Zejicy. Ćežke wobchadne njezbožo sta so wčera dopołdnja na statnej dróze S 101 mjez Zejicami a Hornim Wujězdom. 28lětna wodźerka Mitsubishija zajědźe w lěwej křiwicy na napřećiwnu jězdnju a šmórny so Hyundaija 29lětneje. Wobě jězdźidle wostaštej hakle na polu stejo. Jeju wodźerce so ćežko zraništej. Młódšu je helikopter do chorownje dowjezł, tamnu zranjenu wuchowanske awto. Škoda wučinja 4 000 eurow.
Woheń wosrjedź nocy
Halštrow. Wšo druhe hač měrnu nóc mějachu dźensa w nocy w Halštrowje. Tam kaž tež w Rušicy, Krěpjecach, Protecach, Kamjencu a Brězni wołaše něhdźe w 2.30 hodź. sirena wobornikow k hašenju. Na Talpenbergskej bě woheń w garaži wudyrił. Něhdźe 70 wobornikow tomu zadźěwa, zo płomjenja na bydlenski dom w bjezposrědnim susodstwje přeskočichu. Wobydlerjo běchu woheń sčasom pytnyli a swój dom wopušćili, tak zo so nichtó njezrani. Něhdźe w 5 hodź. běchu płomjenja zhašane.
Policija (12.02.18)
Zastojnikam dźěło wolóžił
Kamjenc. Na Wojerowskej dróze blisko wotbóčki Beethovenoweje je minjeny pjatk wječor kedźbliwy wobydler tobołku namakał. W njej wuhlada wón titki ze zbytkami běłeho próška a donjese ju na policajski rewěr. Zastojnicy zwěsćichu, zo jednaše so po wšěm zdaću wo crystal. Wobsedźerja spěšnje wuslědźichu, přetož tón bě swój personalny wupokaz tohorunja w tobołce zawostajił. Jedna so wo 27lětneho Kamjenčana, kiž bě podobnych deliktow dla policiji hižo znaty. Kriminalisća so z padom nětko bliže zaběraja.
Policija (09.02.18)
Wopačni policisća zazwonili
Kinspork. Jako policisća wudachu so njeznaći, kotřiž zawčerawšim pola muža w Kinsporku zazwonichu. Pječa běchu někoho zajeli, kiž měješe adresu muža při sebi. Nětko wobhonichu so „zastojnicy“ za tym, kelko pjenjez ma Kinsporčan na konće a hač ma debjenki doma. Muž pak bě skedźbliwy dosć, wobchowa požadane informacije za sebje a zazwoni woprawdźitu policiju, kotraž tónle pad dale přepytuje.
Policija (08.02.18)
Pytany Audi na awće ADAC
Słona Boršć. Na awtodróhowym wotpočnišću při A 4 do směra na Zhorjelc napadny policiji wčera transporter ADAC, na kotrymž bě Audi A4 cabriolet nakładowany. Kontrolujo čisło Audija so zastojnicy njemało dźiwachu, zo so za awtom pyta. Sobudźěłaćer ADAC pak móžeše njewšědne wobstejnosće spěšnje rozrisać. Awto bu w Němskej pokradnjene a w Pólskej zaso namakane. W nadawku pólskeho statneho rěčnistwa měješe ADAC nadawk, jězdźidło wobsedźerjej wróćić. Dokelž měješe sobudźěłaćer we wuchodnej Sakskej dalše nadawki spjelnić, bě tež wuslědźene, čehodla jeho jězba znowa do směra na Pólsku wjedźeše. Ručež wobsedźer swój Audi zaso změje, so awto z pytanskich lisćinow policije šmórnje.
Paduch nětko w jastwje
Kamjenc. 36lětneho muža je kupnicowy detektiw zawčerawšim w Kamjencu lepił. Přiwołana policija zwěsći, zo njeje wón prěni raz kradnył a zo přećiwo njemu přikaz zajeća předleži. Tuž dowjezechu jeho do jastwa.
Policija (07.02.18)
Joint so hišće palił
Wojerecy. Prawy čuch we wěrnym zmysle słowa měješe wobsadka policajskeho awta zawčerawšim wječor na Teschenskej we Wojerecach. Najebać šćipatu zymu sedźeštaj tam młodostnaj wonka, štož bě zastojnikam podhladne. Jich podhlad so jako prawy wopokaza, přetož při kontroli mužow w starobje 19 a 20 lět čuchachu policisća za konop typisku wóń. Zwotkel so wona bjerješe, bě spěšnje jasne. Na zemi ležeše mjenujcy hišće zapaleny joint. Při dokładnej kontroli namakachu zastojnicy pola młódšeho tak mjenowany crusher a titku za drogi.
Policija (06.02.18)
Tobołka fuk
Wojerecy. Njelubje skónči so za 55lětnu žonu we Wojerecach sobotu wječor wopyt w dejnerowym wobchodźe. Jako na swoju skazanku čakaše a z personalom popowěda, wotstaji wona ručnu tobołku na ławku a ju skrótka z wočow zhubi. Tónle wokomik wuži njeznaty muž, kiž bě tohorunja kupc we wobchodźe. Wón sej tobołku hrabny a so z njej nablaku zminy.
... a historiske motorske tež
Kumwałd. Tójšto škody načinichu paduši, kotřiž zadobychu so zawčerawšim do składa w Kumwałdźe. Z njeho su historiske motorske typa Triumph z lěta 1925 sobu wzali. Hódnotu mašiny trochuje jeje wobsedźer na něhdźe 12 500 eurow. Nimo toho wočinichu njeznaći wjacore kamory a spakosćichu z nich wustajene eksponaty. Jich dokładnu hódnotu dyrbja hakle zwěsćić, trochuja pak ju na štyricyfrowu sumu.
Policija (05.02.18)
Zastojnikow křiwdźił
Wojerecy. Natutkany młodostny je sobotu wječor we Wojerecach policistam pismiki „A.C.A.B.“ přiwołał. Wone steja za jendźelsku parolu „All cops are bastards“ („Wšitcy policisća su bastardy“). 16lětny bě w zašłosći hižo wjacore razy policistam napadnył, tak zo wzachu jeho sobu na rewěr. Tam naměrichu pola młodostneho 0,6 promilow alkohola w kreji a přepodachu jeho staršimaj. Wonaj drje z nim chutne słowčko porěčitaj.
Policija (02.02.18)
Lisćina deliktow dołha
Budyšin. Při kontroli wosoboweho awta w nocy na štwórtk w Budyšinje je policija hnydom wjacore delikty zwěsćiła. Tak steješe 22lětny wodźer Forda pod wliwom drogow. Awtowej čisle buštej dźeń do toho wot druheho jězdźidła pokradnjenej. Nimo toho šofer scyła žanu jězbnu dowolnosć njewobsedźeše, jeho Fiesta bě hižo wot srjedź januara wotzjewjeny a njebě tuž zawěsćeny. Dale namakachu w awće personalny dokument, kotryž bu něhdźe sobu wzaty a za kotrymž policija hižo pytaše.
