Policija (23.05.17)
Telewizor a radijo fuk
Torońca. Njeznaći zadobychu so w nocy na njedźelu do zahrodoweje ležownosće w Torońcy (Daranitz) w Kubšiskej gmejnje. Ze zahrodoweho domčka pokradnychu płony telewizor a radijo w cyłkownej hódnoće 500 eurow. Wěcnu škodu trochuje wobsedźer na 100 eurow.
Z awtom do štoma
Bukecy. Z dotal njeznateje přičiny je njedźelu připołdnju 78lětna wodźerka wosoboweho awta na zwjazkowej dróze B 6 na kromje Bukec na prawy bok jězdnje zajěła. Tam zrazy jeje Opel Corsa do štoma a rentnarka so snadnje zrani. Na městnje zasadźeni běchu lěkar, wohnjowi wobornicy a wotwlečenska słužba. Na awće nasta 8 000 eurow škody.
Policija (22.05.17)
Kamele wosrjedź města
Połčnica. Lědma swojim wočam wěrić chcychu wobydlerjo sobotu wječor w Połčnicy. W bydlenskej štwórći wuhladachu woni kamelej, a wonej sej tam woměrje łopjena štoma słodźeć daštej. Kaž so pozdźišo wukopa, běštej skoćeći z cirkusa ćeknyłoj, kotryž měješe w bliskosći swój stan natwarjeny. Sobudźěłaćerjo za štyrinohačomaj hižo pytachu a su jej dosahnyli, prjedy hač přiwołani policajscy zastojnicy přijědźechu.
Policija (19.05.17)
Kontejneraj so paliłoj
Kulow. W nocy na štwórtk běchu njeznaći na Kulowskim Schlossareckowym naměsće kontejneraj za staru papjeru zapalili. Přiwołana wohnjowa wobora móžeše woheń zhašeć. Wěcna škoda wučinja něhdźe 100 eurow. Kriminalna policija pyta nětko za skućićelemi.
Holcu z laserpointerom slepili
Běła Woda. 14lětnej holcy su so njeznaći na Budyskej dróze w Běłej Wodźe zawčerawšim wječor z tak mjenowanym laserpointerom wotpohladnje do wočow měrili a ju slepili. Holca na to skoržeše, zo ju woči bolitej. Dyrbjachu ju tuž k lěkarskemu zastaranju do chorownje dowjezć. Policija za njeznatymi slědźi.
Policija (18.05.17)
Hokate křiže mórali
Njebjelčicy/Němcy. Při busowym zastanišću na Jěžowskej dróze w Njebjelčicach dyrbjachu zawčerawšim zwěsćić, zo bě tam w nocy do toho něchtó hokate křiže namórał. Gmejna so wo to postara, zo so móranja zaso wotstronja. Podobne sta so w Němcach. Tam su njeznaći z barbu wjacore hokate křiže na štomy blisko kapałki pryskali. Mjeztym su wone přebarbjene. We woběmaj padomaj přepytuje statny škit kriminalneje policije.
Policija (17.05.17)
Tři motorske fuk
Budyšin. Mějićel jězbneje šule na Budyskej Müntzerowej dyrbješe zawčerawšim zwěsćić, zo su njeznaći z jeho předewzaća tři motorske pokradnyli. Stało bě so to po wšěm zdaću minjeny kónc tydźenja, jako so paduši do garaže zadobychu a ju wurumowachu. Policija pyta nětko za motorskimi typa Honda CBF (čorne), Honda CB 500 (běłe) a Honda VJF (čerwjene). Nimo toho su skućićeljo tři kožane kapy, tři nahłowniki a tři dešćowe płašće sobu wzali. Hódnotu rubizny trochuje mějićel jězbneje šule na něhdźe 20 000 eurow.
Policija (16.05.17)
Padustwo wujasnjene
Budyšin. Po tym zo su so njeznaći minjeny pjatk do banki na Budyskej Bohatej zadobyli a kompjuterowej wobrazowce pokradnyli, je policija tónle pad hišće samsny dźeń wujasniła. Podhladnaj staj Budyšanaj w starobje 20 a 21 lět. Wobaj běštaj dźeń do toho młodostneho wurubiłoj a staj policiji derje znataj.
Policija (15.05.17)
Złotaki a slěbornaki fuk
Wojerecy. We wobłuku měnjenskeje bursy pjenjez stej njeznatej wosobje sobotu dopołdnja we Wojerowskej Łužiskej hali čerwjeny tablet z dohromady dwanaće drohotnymi pjenjezami pokradnyłoj. Při tym jedna so wo štyri złotaki a wosom slěbornakow. Jich cyłkownu hódnotu trochuja na 20 000 eurow. Jedyn ze skućićelow zapleće wobsedźerja pjenjez do rozmołwy, mjeztym je sej dalša wosoba tablet wzała a so z nim wotsaliła.
Smjertnje zbjezbožiła
Hory. Při wobchadnym njezbožu na dróze z Noweje Łuki do Ptačec je sobotu wječor 51lětna žona žiwjenje přisadźiła. Z dotal njeznateje přičiny zajědźe wona ze swojim Mercedesom w prawej křiwicy na lěwy bok dróhi a prasny do dweju štomow. Při sylnej zražce zleća žona z awta a hišće na městnje njezboža zemrě.
Policija (12.05.17)
Motorski so ćežko zranił
Błohašecy. Na křižowanišću statneju dróhow S 100 a S 106 pola Błohašec je so wčera popołdnju znowa ćežke wobchadne njezbožo stało. 67lětny šofer BMWja chcyše nalěwo do směra na Kamjenc wotbočić, njewobkedźbowaše pak předjězbu napřećo přijěduceho motorskeho. Jeho 38lětny wodźer so při zražce ćežko zrani. Z helikopterom dowjezechu jeho do chorownje.
Policija (11.05.17)
Alkohol pił a z awtom jěł
Budyšin. Dźakowano skóncowanemu kolesu awta lepi policija zawčerawšim wječor šofera, kiž je pod wliwom alkohola jěł. Jemu bě so při jězbje po Budyskim Židowje nadobo wobruč puknyła. 40lětny zhubi na to kontrolu nad wodźidłom a zrazy do parkowaceho awta. Při wobdźěłanju njezboža policisća pytnychu, zo muž pod wliwom alkohola steji. Kontrola wunjese jedyn promil alkohola w kreji. Wodźerjej awta tuž dalšu jězbu zakazachu a sćazachu jemu jězbnu dowolnosć.
Policija (10.05.17)
Kolesowar znjezbožił
Delni Wujězd. Na statnej dróze S 108 je so wčera po připołdnju kolesowar při wobchadnym njezbožu ćežko zranił. 70lětny jědźeše z Łaza do směra na Delni Wujězd. 60lětna wodźerka wosoboweho awta chcyše jeho přesćahnyć. W tym wokomiku so rentnar rozsudźi nalěwo wotbočić, tak zo dóńdźe k zražce. Ćežko zranjeneho muža dowjezechu do chorownje. Pola njeho naměrichu 0,82 promilow alkohola w kreji. Wěcna škoda wučinja něhdźe tysac eurow.
W klubje pjenjezy kradnyli
Pěskecy. W času wot njedźele wječora hač do póndźele popołdnja běchu so njeznaći namócnje do Pěskečanskeho młodźinskeho kluba zadobyli a přepytachu w nim wšitke rumnosće. Pokradnyli su pjenježnu kasetu, w kotrejž bě třicyfrowa suma pjenjez. Wěcnu škodu powobliči jedyn ze zamołwitych na něhdźe 500 eurow. Kriminalna technikarka je na městnje slědy zawěsćiła. Policija pad nětko dale přepytuje.
