Policija (16.05.18)
Wospjet pod wliwom drogow jěł
Prěčecy. Poprawom měješe wobsadka policajskeho awta zawčerawšim popołdnju hinaši nadawk, ale po puću zetka wona při kružnym wobchadźe blisko Prěčec „stareho znateho“ w jeho BMWju. Hakle před něšto tydźenjemi běchu zastojnicy 22lětneho muža kontrolowali a zwěsćili, zo bě wón drogi brał. Tuž nětko znowa zadźeržachu. Tež tónraz steješe wón wočiwidnje pod wliwom drogow, štož wotpowědny test wobkrući. Młody muž potajkim ničo přinawuknył njeje. Dalšu jězbu jemu policisća zakazachu. Dyrbjało-li tež přepytowanje kreje drogi wobkrućić, hroža njepolěpšomnemu dwaj dypkaj w Flensburgu, tysac eurow pokuty a tři měsacy zakaz jězdźenja.
Policija (15.05.18)
Do hrjebje padnył a so ćežko zranił
Kulow. Z kolesom podaštaj so w rańšich hodźinach minjeneje njedźele młodostnaj ze Salowa do Kulowa. Z dotal njeznateje přičiny zajědźe jedyn z njeju něhdźe 200 metrow před Kulowom z puća a padny do něhdźe tři metry hłubokeje hrjebje, w kotrejž rěčka ćeče. Kaž Zhorjelska policajska direkcija rozprawja, so 18lětny při tym ćežko zrani. Z helikopterom dowjezechu jeho do chorownje. Što bě so dokładnje stało, policija přepytuje.
Wobornicy hašeć dyrbjeli
Wulki Wjelkow. Palaceho so carporta dla su zawčerawšim wječor we Wulkim Wjelkowje wohnjowu woboru alarmowali. Drjewjana konstrukcija słušeše k bydlenskemu domej na nawsy. Po wšěm zdaću bě techniski defekt přičina wohenja. Wobsedźer bě najprjedy sam spytał płomjenja podusyć. Njeměješe pak při tym wjele wuspěcha, tak zo wone na susodnu kólnju přeskočichu. Hakle wohnjowym wobornikam z Budyšina, Małeho Wjelkowa, Słoneje Boršće a Sćijec so poradźi woheń zhašeć.
Policija (14.05.18)
Paduch sej lochko měł
Wóslink. Hnydom cyły slěd padustwow poradźi so njeznatemu minjeny pjatk we Wóslinku. Jeho „dźěło“ pak su jemu wobydlerjo chětro wolóžili. Přez njezamknjene pódlanske twarjenje dósta so cuzy dopołdnja do hłowneho domu a spakosći tam wjacore móšnje. Nimo toho pokradny koleso. Hnydom wokoło róžka zadoby so do zamknjeneje garaže, z kotrejež hrabny sej paduch moped typa Simson. Do toho pokradnjene koleso dyrbješe wón nětko wězo stejo wostajić. Policija pad přepytuje.
Policija (11.05.18)
Kontroli so spjećować chcyła
Biskopicy. Jako policisća zawčerawšim wječor w Biskopicach 35lětnu wodźerku Mitsubishija kontrolowachu, njeje w jeje awće jeno za alkoholom smjerdźało. Zastojnikam napadny tež słódka wóń canabisa. Při alkoholowym tesće naměrichu pola žony 1,5 promilow. Drogowy test wona wotpokaza. Na to přewodźachu ju policisća k wotedaću kreje. Přećiwo tomu so šoferka kopajo spjećowaše, ale bjez wuspěcha.
Policija (09.05.18)
Pokradnjene awto namakali
Běła Woda. Pólska policija je zawčerawšim blisko němskeje mjezy pokradnjeny Ford Kuga namakała. Jězdźidło w hódnoće 32 000 eurow běchu njeznaći něšto hodźin do toho w Běłej Wodźe pokradnyli. Při dalšim přepytowanju tohole pada policija zwěsći, zo bě tak mjenowany SUV póndźelu rano krótko po 4 hodź. kontrolu zwjazkoweje policije w Mužakowje přełamał a do Pólskeje ćeknył. Dźakowano pokiwej swědka su pólscy zastojnicy popołdnju samsneho dnja Ford blisko Łęknicy namakali.
Policija (08.05.18)
Awto so wupaliło
Wóspork. Na awtodróze A 4 krótko za Wósporskej wotbóčku do směra na Drježdźany je so wčera popołdnju nakładne awto dospołnje wupaliło. Čehodla bě woheń wudyrił, njeje znate. Šoferej so poradźi, z awta wulězć. Na to móžeše wón jeno přihladować, kak so jeho dźěłowy nastroj z woporom płomjenjow stanje. Te přeskočichu tohorunja na zadni dźěl jězdźidła, tam pak na zbožo ničo nakładowane njebě. Alarmowana wohnjowa wobora měješe woheń spěšnje pod kontrolu. Awtodróha bě dlěje hač hodźinu dospołnje zawrjena.
Policija (07.05.18)
40 ludow pčołkow pokradnyli
Kromola. Při kontroli swojich pčołkow w Kromoli dyrbješe pčołar minjeny pjatk popołdnju zwěsćić, zo běchu jemu njeznaći z kromy rěpikoweho pola na wšěch 40 pčolacych ludow pokradnyli. Po wšěm zdaću sta so to w času wot 29. apryla hač do minjeneho pjatka. Na te wašnje je pčołar wjace hač milion pčołkow zhubił. Policija tuka na to, zo běchu paduši profije, kotřiž wědźa, kak maš z pčołkami wobchadźeć. Runje nalěto tajke pady přiběraja. Potrjecheny wobsedźer trochuje škodu na něhdźe 5 000 eurow. Wón pak njeje jenički, kiž pod tymle padustwom ćerpi. Ratarjo wokolnych polow so nětko strachuja, zo so pobrachowace pčołki na žně wuskutkuja.
Z motorskim do přirowa
Pěskecy. Ćežko zranił je so minjeny pjatk popołdnju młodostny na dróze mjez Smjerdźacej a Němskimi Pazlicami. W dołhej lěwej křiwicy blisko Pěskec zhubi 16lětny kontrolu nad swojim motorskim typa KTM 125 a zajědźe z nim do přirowa. Při tym so ćežko zrani. Wěcna škoda na motorskim wučinja po informacijach Zhorjelskeje policajskeje direkcije něhdźe 500 eurow.
Policija (04.05.18)
Rentnar wopor jebaka
Budyšin. Njeznaty muž je zawčerawšim 88lětneho Budyšana zjebał. Wón rentnarja w měsće narěča, wuda so jako znaty a jědźeše z nim do jeho bydlenja na Niemöllerowej. Tam přepoda jemu jako dar kožanej kapje a tobołu, za čož pak chcyše nadobo pjenjezy. To 88lětny wotpokaza, skónčnje pak tola pokaza, hdźe ma swoje pjenjezy schowane. Tam wza sej cuzy wjacore sta eurow a so zhubi. Štóž je minjene dny tohorunja kožane twory poskićene dóstał, njech přizjewi to policiji pod telefonowym čisłom 03591/ 35 60.
Policija (03.05.18)
Muž na třěchu zalězł
Biskopicy. Muž na třěše bydlenskeho doma na Belmsdorfskej w Biskopicach je zawčerawšim wječor policiju, wuchowansku słužbu a wohnjowu woboru dlěje hač dwě hodźinje zaběrał. Po rozkorje w swójbje bě 27lětny na třěchu twarjenja zalězł a nochcyše ju hižo wopušćić. Hakle po dobrym přirěčowanju policistow bě wón zwólniwy, přez třěšne wokno wróćo do domu hić. Wohnjowi wobornicy běchu mjeztym wulku płachtu přihotowali, jeli by wón runowahu zhubił. Pozdźišo bě 27lětny zwólniwy, so lěkarjej předstajić. Policisća alkoholizowaneho muža přewodźachu.
Policija (02.05.18)
Rubiznu zaso namakali
Bambruch. Njeznaći zadobychu so w nocy na póndźelu w Bambruchu do bydlenskeho domu, kiž tuchwilu přetwarjeja. Z njeho pokradnychu wšelake mašiny a grat w hódnoće něhdźe 5 000 eurow. Póndźelu připołdnju zhoni policija po pokiwje swědka wo wosobowym awće typa BMW w Kamjencu, w kotrymž bě mjenowana rubizna. Awto słuša 35lětnemu mužej, kiž je policiji znaty.
