Policija (04.03.19)
Spěšnišo hač dowolene
Kulow. Dobre wóčko mějachu sobotu wječor policisća w Kulowje. Jim napadny tak mjenowane lochke jězdźidło z nalěpkom 45 km/h. Dokelž pak bě awtko wočiwidnje spěšnišo po puću, kontrolowachu je a prošachu wo jězbnu dowolnosć 15lětneje wodźerki. Wona měješe swojej starobje wotpowědnje dowolnosć klasy AM. Za awto, spěšniše hač 45 km/h, pak by klasu B trjebała. Nětko chcedźa zwěsćić, hač bu jězdźidło manipulowane.
Podhladneho zajeli
Budyšin. K hašenju wołali su wohnjowych wobornikow w nocy na sobotu na Budysku Sukelnsku. Tam so w pincy bydlenskeho domu wjacore składowane wobruče palachu. Cyły dom dyrbjachu ewakuować. 45lětny muž je podhladny, zo bě woheń zamiškrił. Jeho policisća nachwilnje zajachu.
Policija (01.03.19)
Darmotnje tankował
Běła Woda. Na parkowanišću na Budyskej dróze w Běłej Wodźe je swědk zawčerawšim popołdnju młodeho muža wobkedźbował, kiž bě čisle swojeho VWja wuměnił. Na to jědźeše k tankowni, je tam swoje awto połne natankował a na to bjez zapłaćenja wotjěł. Přiwołani policisća 25lětneho pozdźišo w měsće zadźeržachu a přidatnje zwěsćichu, zo steješe wón pod wliwom drogow.
Policija (28.02.19)
Z awtom smjertnje znjezbožiła
Krušwica. Tragiski wukónc měješe wobchadne njezbožo wčera wječor na zwjazkowej dróze B 156 pola Krušwicy. Z dotal njeznateje přičiny stej tam awće frontalnje do so zrazyłoj. 58lětna wodźerka Citroëna so tak ćežko zrani, zo hišće na městnje njezboža zemrě. Jenak staru wodźerku VWja dowjezechu do chorownje.
Policija (27.02.19)
Štomy podrězali a sobu wzali
Połčnica. Njemało dźiwachu so tele dny wobsedźerjo lěsa w Oberlichtenauwje pola Połčnicy. Woni dyrbjachu zwěsćić, zo běchu so tam njeznaći ilegalnje z palnym drjewom zastarali. Brězy a chójny běchu zdźěla hač do wosom metrow wysoke. Zwostali su jenož wjerški štomow, zdónki běchu skućićeljo hižo wotwjezli. Načinjenu škodu trochuje wobsedźer na 800 eurow.
Do kolesowarja zrazyła
Bolborcy. 16lětny je so zawčerawšim pola Bolborc ćežko zranił. Wón bě ze swojim kolesom z ležownosće na wokrjesnu dróhu zajěł. 34lětna wodźerka VWja njemóžeše so jemu hižo wuwinyć a zrazy do njeho. Ćežko zranjeneho młodostneho dowjezechu do chorownje.
Policija (26.02.19)
Volvo so palił
Habrachćicy. W hornjołužiskich Habrachćicach je so dźensa w nocy blisko Lessingoweje wotstajeny Volvo palił. 24 wobornikow woheń zhaša. Na zbožo njejsu so płomjenja rozpřestrěli.
Z awtom pjany do štoma
Kulow. Njedźelu rano w pjećich je 30lětny na Kamjenskej dróze w Kulowje ze swojim awtom do štoma zrazył. Z wulkim zbožom móžeše šofer njezranjeny z dospołnje skóncowaneho Renaulta Kangoowa wulězć. Policija wšak pozdźišo zwěsći, zo měješe wodźer awta 2,16 promilow alkohola w kreji.
Policija (25.02.19)
Požadarjej azyla so biłoj
Lubij. W Lubiju staj so wčera wječor libyskaj požadarjej wo azyl w swojim přebywanišću na Dietricha Bonhoefferowej zwadźiłoj a biłoj. Kaž policija zdźěli, dyrbjachu zawołani zastojnicy rozkoru zhładkować. Wobeju bičkow su zranjeneju do chorownje dowjezli.
Cigaretowy awtomat rozbuchnyli
Wojerecy. Na Budyskej aleji we Wojerecach běchu njeznaći sobotu rano cigaretowy awtomat rozbuchnyli. Při tym so tón chětro wobškodźi. Skućićeljo su dotal njeznate mnóstwo pjenjez a cigaretow sobu wzali. Kriminalny technikar je slědy zawěsćił. Policija pyta za swědkami, zo by wandalow lepić móhła.
Policija (22.02.19)
Awto so paliło
Ohorn. Na awtodróze A 4 je so wčera popołdnju do směra na Zhorjelc pola Ohorna awto paliło. Z hišće njeznateje přičiny bě so jězdźidło zapaliło, šofer pak móžeše je sčasom z dróhi wodźić. Wohnjowi wobornicy z Ohorna a Połčnicy płomjenja zhašachu.
Z přijězda A 4 do so zrazyłoj
Budyšin. Jako chcyše wodźer Peugeota wčera popołdnju z přijězda A4 Budyšin-zapad do směra na Wojerecy nalěwo wotbočić, přewidźa wón z Małeho Wjelkowa wotprawa přijěducu Škodu. Awće do so zrazyštej, při čim so zawinowar njezboža zrani. Jeho dowjezechu do chorownje.
Policija warnuje před jebakami
Budyšin. W Budyšinje a wokolinje spytachu jebacy srjedu staršich ludźi z „wnučkowym trikom“ wobšudźić. Potrjecheni pak to sčasom spóznachu a zawołachu policiju. Po puću su tež „vodafonowi“ wobšudnicy. Woni spytaja při durjach dubiozne telefonowe zrěčenja wobzamknyć. Policija warnuje: „Ruce preč!“
Policija (21.02.19)
Kontejneraj w płomjenjach stałoj
Kulow. Wutoru rano su njeznaći w Kulowje na parkowanišću mjez Starym dwórnišćom a Kamjenskej dróhu wotstajenej kontejneraj za papjeru zapalili. Wohnjowi wobornicy płomjenja zhašachu, wěcna škoda wučinja tysac eurow.
Kwaklate linije jěł
Klětno. Kedźbliwa Klětnjanka wutoru připołdnju policiji zdźěli, zo bě jej kwaklate linije jěducy VW napadnył. Bjez dźiwa tež: Policija naměri w kreji 68lětneho šofera 1,68 promilow alkohola.
Bydlenski připowěšak so wotpalił
Belmsdorf. W Biskopicam přisłušacym Belmsdorfje je so w nocy na srjedu campingowy připowěšak wotpalił. Jón su koparjo jako předrasćernju wužiwali.
Policija (20.02.19)
Dyrbi měsac nóžkować
Njebjelčicy. Na statnej dróze S 94 pola Njebjelčic je policija zawčerawšim spěšnosć měriła. Z něhdźe 1 700 kontrolowanych jězdźidłow bě 105 přespěšnych. Najnuznišo měješe wodźer VWja, kotrehož lepichu ze 128 km/h. Wón dyrbi nětko měsac nóžkować, dóstanje dwaj dypkaj a dyrbi 240 eurow pokuty płaćić.
Policija (19.02.19)
Paduši w bydlenju byli
Budyšin. Jednoswójbny dom na Budyskej Dieselowej běchu sej paduši minjeny kónc tydźenja jako cil wupytali. W času wot pjatka ranja hač do njedźele wječora so woni tam zadobychu a wšitke rumnosće přepytachu. Pokradnyli su třicyfrowu sumu pjenjez. Nimo toho načinichu něhdźe 2 000 eurow wěcneje škody. Kriminalisća zawostajene slědy zawěsćichu.
Zastojnikam hrozył
Wojerecy. 19lětny młodostny je zawčerawšim policiju we Wojerecach zaběrał. Wokoło připołdnja bě wón z čornej barbu něšto na sćěnu twarjenja při Łužiskim naměsće pryskał. Pozdźišo wobydlerjo samsneho muža dla policiju znowa wołachu, jako je při hrajkanišću na Hasy měra hewrjekał a ludźi wohrožował. Dokelž 19lětny tež policajskim zastojnikam hrožeše, wzachu jeho sobu na Wojerowski rewěr.
