Hłupeho žorta dla so zranił
Budyšin. Před Budyskim NSLDź je zawčerawšim njeznaty silwesterski praskotak do šachta při tamnišej studni ćisnył. W tym wokomiku pak bě runje dźěłaćer w něhdźe tři metry hłubokim šachće. Při rozbuchnjenju praskotaka poćerpje 53- lětny šok a so we wuchu zrani. Kaž policija pozdźišo zwěsći, jednaše so wo čěski praskotak z mjenom „La bomba“. Nětko spytaja zwěsćić, štó je sej tajki hłupy žort dowolił.
Při kupanju na swój wačok kedźbować
Bórk. Wospjet dyrbi so policija z padustwom při Šibojskim jězoru zaběrać. 47lětna žona je sej tam zawčerawšim popołdnju dojěła, zo by so kupała, a je swoju tobołu na přibrjoze wotpołožiła. Jako so wona z wody wróći, bě toboła fuk a z njej drasta a 550 eurow drohi časnik. Swědk bě muža wobkedźbował, kiž so z kolesom do směra na Wojerecy zminy. Dokładniše informacije k njemu pak bohužel žane njepředleža.
Pomoc na městnje njebyła
Łuty. Zo je sobotu wječor 69lětna žona we Łutach policiju wo pomoc wołała, drje sej wona prawje přemysliła njebě. Rentnarka informowaše, zo cuze jězdźidło na jeje priwatnym parkowanskim městnje steji. Na městnje policisća skónčnje zwěsćichu, zo žona prawje nima, dokelž jedna so wo zjawne městno. W tym wokomiku wšak šoferka hižo cyle strózba njebě. Pola njeje naměrichu mjenujcy 1,54 promilow alkohola w kreji, tak dyrbješe swoje papjery najprjedy raz wotedać.
Podhladny pakćik w bance
Wojerecy. Dokelž je wčera popołdnju njeznaty muž w bance na Wojerowskim Lipjecskim naměsće pakćik wotstajił a so zminył, zawołachu tam policiju. Na to su banku a susodne wobchody ewakuowali. Specialisća policije pakćik přepytowachu a zwěsćichu, zo jedna so wo atrapu bomby. Za mužom, kiž bě ju wotstajił, nětko pytaja.
Tankownju nadpadnył
Wojerecy. Wšo druhe hač měrny dźěłowy dźeń mějachu zawčerawšim sobudźěłaćerjo tankownje na kromje Wojerec při zwjazkowej dróze B 97. Krótko do 13 hodź. zastupi tam maskěrowany muž, hrožeše personalej z pistoli podobnym nastrojom a rubi na te wašnje něhdźe 450 eurow. Dalši pospyt, hišće wjace pjenjez z kasy wzać, so njeporadźi. Tuž so skućićel ze swojej rubiznu na žonjacym kolesu do směra na twaršćiznowe wikowanišćo zhubi. Z widejonahrawanja tankownje dósta policija prěnje wažne pokiwy na identitu rubježnika. Kriminalna policija je přepytowanja zahajiła a sćěhuje nětko konkretny podhlad na skućićela, kotrehož hižo znaja.
Dobroćiwosć znjewužiwał
Kinspork. Z woporom dobroćiwosće sta so zawčerawšim připołdnju 84lětny muž w Kinsporku. Na parkowanišću před kupnicu prošeše jeho njeznaty, hač móhł jemu pjenjezy měnjeć. Jako rentnar na to za drobnymi pjenjezami pytaše, wućahny jemu cuzy w starobje 40 do 50 lět něhdźe 80 eurow z móšnje. Starcej je to hakle pozdźišo napadnyło. W tym zwisku policija hišće raz na to skedźbnja, zo měli předewšěm starši ludźo kedźbliwi być, hdyž jich něchtó prosy jemu pjenjezy měnjeć. Strowa njedowěra móže w tajkich padach pomocliwa być.
Lětadło nuzowje přizemić dyrbjało
Sulšecy. Jako lećeše ultralochke lětadło minjenu sobotu připołdnju z Kamjenca do Rózborka, jeho motor nadobo wupadny. 62lětny pilot zahaji tuž nuzowe přizemjenje a sadźi mašinu pola Sulšec do žitnišća. Při tym přeprěči wón pólny puć, na čož so kolesa lětadła wotłamachu a pilot so zrani. Wuchowanske jězdźidło dowjeze jeho do chorownje. Skóncowane lětadło su najprjedy raz za dalše přepytowanja sćazali. Kelko škody je při njewšědnej akciji nastało, njeje hišće znate.
Specialne jězdźidło fuk
Zhorjelc. Wosebje ćežke transporty přewodźace jězdźidło su njeznaći sobotu popołdnju w Zhorjelcu pokradnyli. Napadnje žołte wobarbjene awto typa Renault ma hódnotu něhdźe 70 000 eurow. Za specialnym jězdźidłom nětko mjezynarodnje pytaja.
Wochłódźenje pytali
Kubšicy. Wobstajnje horce wjedro bě snano přičina padustwa w Kubšicach. Kaž Zhorjelska policajska direkcija zdźěla, běchu so njeznaći w času wot minjeneje póndźele do srjedy dopołdnja do firmy na Lubijskej dróze zadobyli. Tam měrjachu so na sudobja z chłódźenskim srědkom. 14 wjetšich blešow, dohromady 100 kilogramow ćežkich, su pokradnyli. Předewzaćel trochuje škodu na něhdźe 6 000 eurow. Za čo móhli paduši chłódźensku maćiznu wužiwać, bohužel znate njeje.
Łopač bagra do busa zrazyła
Sprjewiny Doł. Njewšědne njezbožo sta so zawčerawšim popołdnju na Zawodowej dróze w Sprjewinym Dole. Na wobjězdce bě 54lětny šofer z busom po puću, jako nadobo łopač bagra prědnju škleńcu wozydła přerazy a wulku škodu načini. 55lětny wodźer twarskeje mašiny bě po wšěm zdaću wopak wobličił, kak daloko jeje ruka saha. Na zbožo so nichtó njezrani. Sobujěducych w busu žanych njebě. Wěcna škoda pak je po informacijach policije z 10 000 eurami nahladna.