Policija (19.06.19)
Jeli a telefonowali
Budyšin. Najebać krute abo mobilne rěčenske připrawy a byrnjež pokuta wot 60 na 100 eurow zwyšena była, mnozy šoferojo při jězdźenju přeco hišće swój handy wužiwaja a z nim telefonuja abo w socialnych medijach surfuja. Tak su zastojnicy awtodróhoweje policajskeje direkcije předwčerawšim dopołdnja na A 4 pola Budyšina wodźerja nakładneho awta kaž tež třoch šoferow wosobowych awtow lepili, kak jěducy handy w ruce dźerža a telefonuja. Woni dóstanu nětko list, zo maja pokutu płaćić.
Policija (18.06.19)
Na twarnišću zachadźeli
Kamjenc. Tójšto škody načinichu njeznaći minjeny kónc tydźenja na twarnišću nakupowanišća na Kamjenskej Fichtowej. Na nowym špundowanju zawostajichu woni móranja z čerwjenej barbu. Mjez druhim napisachu we wulkosći třoch króć pjeć metrow pismiki ACAB. Dale su polcu a sćěny z barbu napryskali. A skónčnje storčichu nakupowanski wozyčk do wokna a je rozbichu. Kelko škody dokładnje načinichu, njeje hišće doskónčnje zwěsćene. Kriminalna policija so z tymle padom zaběra.
Policija (17.06.19)
Granatu rozbuchnyli
Klukš. Na polu blisko Klukša su sobotu wječor granatu namakali. Specialisća rozbuchadła wotstronjowaceje słužby zwěsćichu, zo njehodźi so wona transportować. Tohodla dyrbjachu ju na městnje rozbuchnyć. Dokelž ležeše granata zwonka wobydleneje kónčiny, njetrjebachu nikoho ewakuować. Wčera krótko po 5 hodź. namakanku rozbuchnychu.
Policija (14.06.19)
W njewjedrje za psom pytał
Běła Woda. Njewšědne zasadźenje mějachu zastojnicy Běłowodźanskeho policajskeho rewěra předwčerawšim wosrjedź njewjedra. Pola nich bě so wobydler přizjewił a zdźělił, zo w bydlenskim bloku napřećo něchtó z kapsnej lampu wokoło běha, štož měješe swědk za podhladne. Wobsadka policajskeho awta sej tónle pad bliže wobhlada a bě najskerje runje tak zadźiwana, kaž wony muž z kapsnej lampu. Zastojnikam wón mjenujcy wuswětli, zo swojeho psa pyta. Tón ma najskerje paniski strach před njewjedrom a je swojemu knjezej při błyskanju a hrimanju prosće ćeknył. Hač su štyrinohača skónčnje zaso namakali, policajska rozprawa bohužel njepřeradźa.
Policija (13.06.19)
Wobšudnik žonje pjenjezy wulišćił
Budyšin. Z telefoniskim trikom su njeznaći zawčerawšim 75lětnej žonje wšitke nalutowanki wulišćili. Budyšanka dósta wjacore telefonaty, w kotrychž so njeznaty jako Drježdźanski kriminalny policist wudawaše. Wón rentnarce napowěda, zo bu jeje dźowka po wobchadnym njezbožu zajata. Za jeje pušćenje měła 75lětna wěstu sumu pjenjez zapłaćić. Wobšudnikej so poradźi žonu wo tym přeswědčić, zo so wona ze 14 000 eurami a wšěmi swojimi debjenkami z Budyšina na puć do Drježdźan poda. Na Wienskim naměsće na ničo złeho njemyslaca pjenjezy a debjenki posołej přepoda. Po tym zo tež dwě hodźinje pozdźišo hišće nichtó, kaž bě dorěčane, pušćenja jeje dźowki dla na žonu zazwonił njeje, poča wona dwělować a so na Drježdźanskim dwórnišću na policiju wobroći. Ta pad nětko přepytuje.
Policija (12.06.19)
Pjenjezy a awto pokradnyli
Hózk. W krótkim času su njeznaći póndźelu rano w ratarskim zawodźe w Hózku wulku škodu načinili. W běhu jenož 15 mjeńšin pokradnychu tam po informacijach policije pjeć z pjenjezami pjelnjenych kasetow, bow z drobnymi pjenjezami kaž tež móšnju. Nimo toho spakosćichu klučiki na terenje zawoda stejaceho předawanskeho awta a z nim wot- jědźechu. Dźěl kasetow a pjenjez namaka policija pozdźišo w bliskim lěsu. Dohromady nasta zawodej nimale 30 000 eurow škody. Za paduchami kaž tež za awtom z čisłom BZ-XA 579 policija pyta.
Policija (11.06.19)
Lampy wotšrubowałoj
Běła Woda. Njewšědnu zaběru wupytaštaj sej mužej w nocy na swjatkownu póndźelu w Běłej Wodźe. Něhdźe hodźinu po połnocy wobydlerka wobkedźbowaše, kak wonaj na twarnišću na Heinricha Heinowej wěstotne lampy wot twarnišćoweho wobhrodźenja wotšrubujetaj. Hnydom informowani policisća pakostnikow w starobje 25 a 30 lět hišće na městnje njeskutka lepichu. Hižo wotšrubowane lampy dyrbještaj wonaj zaso připrawić. Přiwšěm změjetaj so za pospytne padustwo zamołwić.
Policija (07.06.19)
Dowolowe bydlenje njezapłaćił
Załom. Wotsrjedź zašłeho tydźenja bě 67lětny muž w Załomju swoje dowolowe bydlenje šěsć dnjow młodemu mužej přewostajił. Při tym wón z toho wuchadźeše, zo hósć posledni dźeń za přenocowanje w apartmenće zapłaći. Předwčerawšim pak sej přenajer bydlenja mysleše, zo prawje njewidźi. Njeznaty młody muž bě so rano zahe zhubił, bjeztoho zo by zapłaćił. Přewšo rozhorjeny 67lětny policiju zazwoni. Kriminalisća so po bydlenju rozhladowachu a spytachu kmane slědy zawěsćić. Kaž policajska direkcija zdźěli, wučinja nastata škoda něhdźe 150 eurow. Pad nětko dale přepytuja.
Policija (06.06.19)
Do běrowow so zadobyli
Słónkecy. Zo třo njeznaći nawječor w Słónkecach (Schlungwitz) w gmejnje Dobruša-Huska na twarske róšty krosnuja, bě wobydlerjej zawčerawšim podhladne, a wón informowaše policiju. Po róštach dósta so trójka do zarjadniskeho twarjenja, hdźež někotre běrowy přepytachu. Hač su něšto pokradnyli, njeje jasne. Jako chcychu njeznaći přišedši z twarjenja ćeknyć, so jim pasant do puća stupi. Jemu so poradźi, 16lětneho tak dołho kruće dźeržeć, doniž policija njepřijědźe. Policisća namakachu na to nachribjetnik, kotryž bě jedyn z třoch ležo wostajił. Pola njeho móhło so wo 14lětneho hólca jednać. Třeći podhladny so zhubi.
Policija (05.06.19)
Muža dwójce zajeli
Budyšin. Hnydom dwójce móžeše sej młody muž póndźelu celu Budyskeho policajskeho rewěra wotnutřka wobhladać. Dopołdnja bě wón na Póstowym naměsće zakazane parole bjakał a prawicu wupřestrěł. Alarmowanym policistam wón na to wudma nadawaše. Dokelž nochcyše muž tež po chutnej rozmołwje ze zastojnikami bjakać přestać, jeho sobu wzachu. Na rewěrje naměrichu pola njeho 2,28 promilow alkohola w kreji. Lědma zo běchu jeho popołdnju pušćili, 33lětny na Hošic hasy znowa parole wołaše. Na te wašnje zawěsći sej wón wospjet wopyt w celi policajskeho rewěra. Wčera rano su jeho druhi raz na swobodu pušćili. Decernat statny škit Zhorjelskeje policajskeje direkcije so z padom nětko zaběra.
