14 zranjenych při njezbožu

Wochozy. Ćežke wobchadne njezbožo je so wčera dopołdnja na zwjazkowej dróze B 156 při wotbóčce do Wochoz stało. 77lětny chcyše ze swojej Hondu z hłowneje dróhi nalěwo wotbočić. Z dotal nje­znateje přičiny tři wosobowe awta wot­zady do njeje zajědźechu. Wodźer napřećo přijěduceho Forda Transit je tohorunja kontrolu nad wodźidłom zhubił, zrazy do Hondy a so zwróći. Dwě wosobje so ćežko zraništej, dwanaće snadnje. Helikopteraj dowjezeštej ćežkozranjeneju do chorownje, tamnych zastarachu na městnje.

Dźěćo so zraniło

Kulow. Při wobchadnym njezbožu w Kulowje je so zawčerawšim popołdnju dźewjećlětny hólc snadnje zranił. Dźěćo je blisko stareho dwórnišća z kolesowanskeje šćežki na puć zjěło a njeje při tym na wobchad kedźbowało. 37lětna wodźerka Opela njemóžeše zražce hižo zadźěwać. Wuchowanska słužba dowjeze dźewjećlětneho do chorownje.

Hižo rano wopita była

Budyšin. Njemało dźiwachu so policisća zawčerawšim rano na Drježdźanskej dróze w Budyšinje, jako kontrolowachu wodźerku Opela. Dokelž napadny jim „chorhojčka“ žony, přewjedźechu alkoholowy test a naměrichu pola 45lětneje 2,82 promilow, a to w 7.45 hodź. Dalšu jězbu žonje wězo zakazachu a přewodźachu ju ke kontroli kreje. Tež klučik jeje awta sej zastojnicy wobchowachu.

Awto pokradnyli

Budyšin. Njeznaći su w nocy na srjedu Při Špitałskich łukach w Budyšinje ćmowy Audi A 4 pokradnyli. Nimo wosobinskich wěcow běchu w jězdźidle nastroje za inženjerski zawod, kamera a laptop. Škodu trochuje wobsedźer na nimale 30 000 eurow.

Na móšnju njekedźbowała

Wojerecy. Zawčerawšim připołdnju je njeznaty w jednej Wojerowskej kupnicy 75lětnej žonje móšnju pokradnył. Wona bě swój wačok nakupowanskemu wozyčkej připowěsnyła a so tworam na polcach přiwobroćiła. W tym wokomiku sahny cuzy za móšnju. W njej bě nimo ec-kartki a wosobinskich papjerow třicyfrowa suma pjenjez.