Policija (25.04.16)
Konjace sedła kradnyli
Wulki Wosyk. Njewšědnu rubiznu su sej njeznaći tele dny we Wulkim Wosyku w Porchowskej gmejnje wupytali. Tam zadobychu so do rumnosćow jěchanskeho towarstwa Tuchorski lěs a pokradnychu na wšě 20 konjacych sedłow. Po informacijach policije su wone dohromady něhdźe 30 000 eurow hódne. Nimo toho načinichu skućićeljo tójšto wěcneje škody, kotrejež rozměr njeje hišće doskónčnje zwěsćeny.
Brikety na puću leželi
Malešecy. K zasadźenju trochu hinašeho razu wołachu sobotu rano wohnjowych wobornikow do Lěskeje w Malešanskej gmejnje. Tam bě njeznate jězdźidło na zwjazkowej dróze B 156 wjetše mnóstwo briketow zhubiło, tak zo awta hižo po dróze jěć njemóžachu. Wobornicy dyrbjachu tuž najprjedy brikety zezběrać a dróhu wurjedźić. Policija pyta nětko swědkow, kotřiž su snano wobkedźbowali, štó bě brikety zhubił. Informacije přijimuje Budyski policajski rewěr pod telefonowym čisłom 03591/ 35 60.
Policija (22.04.16)
Wopity a rozwólny
Budyšin. Definitiwnje wopačne městno za swoje worakawstwo je sej zawčerawšim wječor młody muž w Budyšinje wupytał. Před tudyšim policajskim rewěrom blisko dwórnišća zalěze 20lětny na třěchu parkowaceho policajskeho awta a da so wot swojeho kumpla fotografować. Tale rozwólnosć njewosta wězo njewobkedźbowana. Jako wobsadka dalšeho policajskeho awta nimo přijědźe, młodaj mužej ćeknyštaj. Zastojnicy pak 20lětneho dosahnychu. Při tesće naměrichu zastojnicy 1,6 promilow alkohola w kreji. Kriminalna policija so nětko z tymle padom dale zaběra a mjez druhim pruwuje, hač jedna so wo wobškodźenje wěcow.
Policija (21.04.16)
Diesel kradnyli
Lejno. Tři skowanske nastroje kaž tež 1 300 litrow diesela pokradnychu njeznaći w nocy na wutoru z twarnišća w Lejnom w gmejnje Halštrowska Hola. Škoda wučinja něhdźe 13 000 eurow.
Policija (20.04.16)
W kupjeli kradnyli
Łaz. Zawrjenu Łazowsku kupjel su sej paduši minjeny kónc tydźenja jako cil wupytali. Kaž sobudźěłaćer gmejny policiju informowaše, běchu so njeznaći tam namócnje zadobyli. W sanitarnym twarjenju wočinichu woni wjacore durje, pokradnychu z rumnosćow někotre armatury z dušow a wotšrubowachu ručicy wot durjow nuznikow. Z techniskeje rumnosće, kotraž słuži mjez druhim tomu, chlorowy płun do wody měšeć, wotstronichu zawěstki a wzachu hłowny milinowy kabel sobu. Hódnotu rubizny trochuja na něhdźe tysac eurow, runje telko wučinja wěcna škoda.
Policija (19.04.16)
Bus so zawróćić chcył
Bukecy. Njewšědny wuskutk měješe wobchadne njezbožo wčera mjez Bukecami a Trjebjeńcu. Tam bě wosobowe awto wotboka do nakładneho awta zajěło. W rynku čakacych jězdźidłow chcyše so bus na dróze zawróćić, suny pak so ze zadnej wósku do přirowa. Jeno z ćežkej techniku móžachu jón wućahnyć.
Policija (18.04.16)
Zražka na awtodróze
Porchow. Wulke poćežowanje wobchada zawiniło je wobchadne njezbožo wčera po připołdnju na awtodróze A 4 mjez wotbočkomaj Ohorn a Porchow. Tam 51lětny wodźer Opela na lěwym boku jědźeše, zo by wjacore jězdźidła přesćahnył, mjez druhim Ford Mondeo. Jako běštej wobě awće pódla sebje, so 19lětny wodźer Forda rozsudźi, na lěwy bok zajěć. Při tym pak njewobkedźbowa, zo tam hižo Opel jědźeše, tak zo wobě wotboka do so zjědźeštej. 51lětny zajědźe z awtom na lěwu kromu jězdnje a zrazy do wobhrodźenja. 19lětny bu doprawa stłóčeny a tam tohorunja do wobhrodźenja zrazy. Při tym bu dalša wosoba w tymle jězdźidle ćežko zranjena. Na woběmaj jězdźidłomaj nasta wěcna škoda z pjećcyfrowskej sumu.
Ideja so njezešlachćiła
Policija (15.04.16)
Padustwo awta wudawał
Zhorjelc. 32lětny Durinčan ze Sangerhausena chcyše po wšěm zdaću swoju zawěsćernju wobšudźić. W měrcu wón policiji zdźěli, zo su jemu awto pokradnyli. Pólska policija je awto před něšto dnjemi w Zgorzelecu nadešła. Tam měješe sej je 32lětny wotewzać. Jako wón zawčerawšim po swoje jězdźidło přijědźe, napadny zastojnikam, zo běše wón jara podobny na wosobu, kotraž bě awto w měsće wotstajiła. Wobstražowanska kamera bě tule scenu tehdy filmowała. W přesłyšowanju młody muž na to přizna, zo je padustwo jeničce wudawał. Nětko so kriminalna policija z tymle padom zaběra. Awto wostanje najprjedy raz sćazane. Tež pólska policija pruwuje, hač je muž zakonje zranił.
Policija (14.04.16)
W zahrodkach pobyli
Zubornička. W zahrodkownišću při Olbje w Zuborničce su njeznaći wobsedźerjam wjacorych zahrodkow jich wjeselo nad nimi skazyli. W nocy na wutoru so tam skućićeljo do dohromady sydom zahrodnych domčkow zadobychu, zo bychu je za hódnotnymi wěcami přepytowali. Hač su něšto pokradnyli, njeje hišće wujasnjene. Tež w bliskim předawanišću žiwidłow njeznaći swoje „zbožo“ pospytachu, zwrěšćichu pak. Na woknje nasta něhdźe 1 000 eurow wěcneje škody.
Policija (13.04.16)
Paduši sej lochko měli
Nowa Wjes. Chětro dołho darmotnje z awtom jězdźić móža nětko njeznaći, kotřiž su w běhu minjeneho kónca tydźenja w Nowej Wsy w gmejnje Šprjewiny Doł něhdźe 2 000 litrow diesela pokradnyli. Kaž policija zdźěli, bě ćěriwo w štyrjoch połnje natankowanych twarskich mašinach, kotrež stejachu bjez dohlada blisko statneje dróhi S 130. Přidatnje lochko sej paduši mějachu, dokelž njeběchu wěka tankow zamknjene. Wěcna škoda wučinja 2 000 eurow.
Policija (12.04.16)
Alkohol a žadyn kónc
Budyšin. Drogi a alkohol su přičiny, kotrež wjedu w nadróžnym wobchadźe najčasćišo k njezbožam. Loni zregistrowachu we wokrjesomaj Budyšin a Zhorjelc dohromady 334 zražkow, při kotrychž běchu wodźerjo jězdźidłow pak alkohol pili abo drogi brali. Lětuša statistika drje budźe podobna. Jeničce zawčerawšim dyrbješe so policija w Hornjej Łužicy z dźewjeć tajkimi padami zaběrać. Tak stachu so wjacore wobchadne njezboža, zawinowane wot wopitych šoferow. Dalšich lepichu zastojnicy při wobchadnych kontrolach. We wšěch padach čakaja na potrjechenych čućiwa pjenježna pokuta a dypki w Flensburgu.
