Mortwu namakali
Wojerecy. 25lětnu wobydlerku Wojerowskeho domu za požadarjow azyla su zawčerawšim mortwu w jeje stwě namakali. Dokelž njeje přičina jeje smjerće znata, su ćěło obdukowali. Pokiwy na złóstnistwo policija tuchwilu nima. Hdźe su mandźelski zemrěteje a jeje štyri dźěći, njeje znate. Kaž policija zdźěli, pak njeje 32lětny mandźelski podhladny. Tukanja, zo je něchtó žonu morił, su po dotalnych dopóznaćach wopačne. Kriminalna policija pad přepytuje.
Nic njeboz, ale granata
Šunow. Spodźiwny metalowy nastroj su mějićeljo ležownosće zawčerawšim wječor w Šunowje při dźěle w zahrodce namakali. Spočatnje mějachu woni namakanku hišće za prědni dźěl stareje njebozoweje mašiny. Při blišim wobhladanju pak so wukopa, zo jedna so wo tankowu granatu. Powostanku z časa Druheje swětoweje wójny su sobudźěłaćerjo rozbuchlinu wotstronjowaceje słužby hišće samsny wječor wotwjezli a fachowje znješkódnili.
Do jastwa dyrbjał
Bělšecy. Wobsadka ciwilneho policajskeho jězdźidła je zawčerawšim w Bělšecach wosobowe awto kontrolowała. Při tym so wukopa, zo přećiwo 44lětnemu sobujěducemu dwaj přikazaj zajeća předležitej. Dokelž bě wón wospjet drogowych deliktow dla napadnył, bu k wjacorym měsacam jastwa zasudźeny. Nastupił pak swoje chłostanje dotal njeje. Jako policisća jeho drastu a nachribjetnik kontrolowachu, namakachu wšelake nastroje za konsum drogow a snadne mnóstwo crystala. 44lětneho dowjezechu hnydom do jastwa.
Pony w měsće po puću
Kamjenc. Na Kamjenskej Pastwinej horje ćeknjeny pony je wčera rano na tamnišej Wuchodnej hasy po puću był. Hakle na Njeswačanskej dróze so poradźi štyrinohača popadnyć.
W skale so zatepił
Häslich. 64lětny muž je so sobotu popołdnju w skale pola Häslicha w gmejnje Haselbachtal zatepił. Ze swojim dźesaćlětnym wnučkom so tam muž kupaše, nadobo pak so hižo na powjerch wody njewróći. Wnučk a dalši kupacy za podnurjenym pytachu, bohužel bjez wuspěcha. Mjeztym alarmowachu wohnjowych wobornikow, kotřiž sobu pytachu. Hakle hobbyjowaj nurjakaj, kotrajž běštaj připadnje na městnje, muža z něhdźe jědnaće metrow hłubokosće wućahnyštaj. Jeho reaniměrować so njeporadźi, tak zo móžeše přiwołany nuzowy lěkar jenož hišće smjerć 64lětneho zwěsćić. Dokładne přičiny njezboža policija nětko přepytuje.
Při dźěle znjezbožił
Budyšin. Ćežke dźěłowe njezbožo je so zawčerawšim na twarnišću noweje bydlenskeje štwórće při Budyskich Špitałskich łukach stało. Tam nastawa 23 jednoswójbnych domow. W jednym z nich je 51lětny dźěłaćer tak njezbožownje stupił, zo padny wón z wysokosće połdra metra na špundowanje. Při tym zrazy muž na stejacu železnu žerdź, kotraž so jemu do hornjeho sćehna zakłó. Ćežko zranjeneho dowjezechu jeho do Budyskeje chorownje. Dokładnu přičinu njezboža policija přepytuje.
W hribach so zabłudźił
Póckowy. 89lětny muž je wutoru popołdnju pola Póckowow do hribow šoł a so tam najskerje zabłudźił. Jeho syn alarmowaše wčera rano policiju. Na to je wjace hač 20 policistow, 16 Póckowskich wohnjowych wobornikow za rentnarjom pytało. Zasadźenej běštej tohorunja helikopter a wosebje wukubłany pos, tak mjenowany mantrailer. Krótko do připołdnja 89lětneho namakachu. W tym zwisku policija na to skedźbnja, při hribypytanju radšo handy při sebi měć, jeli so woprawdźe zabłudźiš.
Tružki kradnyć chcyli
Kamjenc. Na mosazowe tružki, potajkim na barbity metal, měrjachu so njeznaći minjene dny na zawodowym terenje na Kamjenskej Nakładodwórnišćowej hasy. Tam namakachu zawčerawšim wjacore stabilne nakupowanske tity, napjelnjene z metalowymi třěskami w hódnoće něhdźe 1 000 eurow. Po wšěm zdaću bě sej něchtó tity přihotował, zo by je pozdźišo wotnjesł. Při dokładnišej kontroli policisća zwěsćichu, zo bu tam hižo do toho zamk pokradnjeny a zo běštaj znajmjeńša dwaj skućićelej na městnje.
Jutrownu swěčku pokradnyć chcył
Ralbicy. Kedźbliwi wobydlerjo su zawčerawšim tomu zadźěwali, zo so z Ralbičanskeje wosadneje cyrkwje jutrowna swěčka zhubi. Krótko do 17 hodź. bě tam 39lětny muž něhdźe 1,20 metrow wulku swěčku z wołtarja wzał a so z njej wotsalił. To pak swědk wobkedźbowaše a hromadźe z dalšimi wjesnjanami za mužom spěchaše. Jako jemu swěčku zaso wotewzachu, so wona bohužel skóncowa. Ryzy materielnu škodu powobličeja na něhdźe 50 eurow. Wo padustwje informowachu na to policiju.
Z mjasom so zastarał
Biskopicy. Najskerje wopak zrozumił je njeznaty muž w Biskopicach namołwu, sej skład žiwidłow na wjacore dny wutworić. Wón bě so w nocy na njedźelu do wjaceswójbneho domu na Belmsdorfskej zadobył. Tam spakosći ze zamróžaka dwaj kilogramaj howjazeje pječenje, tři kilogramy mjasa wot swinjaceje šije a dalše tři kilogramy kaslera w cyłkownej hódnoće 180 eurow. Wobydlerjo słyšachu něhdźe w 4 hodź. něšto podhladneho z pincy a widźachu, kak muž z nachribjetnikom ćeknje.
„Wutřěle“ z wótřerěčaka byli
Dubc. Kedźbliwy wobydler přizjewi so sobotu připołdnju pola policije, dokelž bě při hatach w Dubcu pola Rěčic pječa něchtó na ptački třělał. Krótke naprašowanje pola rybarja, kiž tamniše haty wobhospodarja, naležnosć spěšnje wujasni. Zo bychu wobstatk rybow škitali, běchu tam alarmowu připrawu instalowali. Z njej wothrawaja w njewobstajnych wotstawkach přez wótřerěčak praskot, kotryž ma rybjacych rubježnikow wućěrić.
Dwě hodźinje zatłusnjeny
Chrjebja. Nimale dwě hodźinje wohnjowi wobornicy wčera připołdnju trjebachu, prjedy hač móžachu zatłusnjeneho šofera z jeho znjezboženeho awta wuchować. Šofer Mercedesa bě mjez Chrjebju a Klětnom na runym puću na lěwy bok jězdnje zajěł a do štoma zrazył. Při tym so wón ćežko zrani.
Njesćerpnosć změje sćěhi
Słona Boršć. Twarske dźěła na awtodróze A 4 pola Budyšina tuchwilu wuskutkuja, zo so tam nimale wšědnje dołhe rynki čakacych awtow tworja. Zawčerawšim je to 23lětnemu wodźerjej BMWja najskerje předołho trało. Wón zajědźe na nabóčne pasmo a tamne awta přesćahny. Hłupe za njeho jenož bě, zo je jedne z tychle awtow ciwilne jězdźidło awtodróhoweje policije było. Njesćerpnosć 23lětnemu nětko wunjese, zo změje 100 eurow pokuty płaćić a zo nimo toho dypk w Flensburgu dóstanje.