Policija (12.01.17)
Pytaja swědkow
Budyšin. K wobchadnemu njezbožu, kotrež je so póndźelu w 14.45 hodź. w Budyšinje stało, pyta policija swědkow. Dotal njeznata wosoba bě z čerwjenym awtom z Mužakowskeje naprawo na Flincowu wotbočiła. Runje w tym wokomiku 25lětna žona Flincowu přeprěči, tak zo awto do njeje zajědźe. Młoda žona suny so přez motorowu hawbu a padny. Šofer/ka so zminy, bjez toho zo by so jako wodźer/ka wo snadnje zranjenu pěšku starał/a. Kriminalna słužba Budyskeho policajskeho rewěra pad přepytuje a pyta swědkow, kotřiž su njezbožo wobkedźbowali abo móža pokiwy k šoferej abo šoferce dać. Swědcy njech přizjewja so w Budyskim policajskim rewěrje pod telefonowym čisłom 03591/ 35 60.
Policija (11.01.17)
Cuze pakety wočinjeli
Kamjenc. Póstowy zarjad na Andreasa Güntherowej w Kamjencu bě cil paduchow, kotřiž so tam w nocy na póndźelu zadobychu. Kaž policija rozprawja, su njeznaći wšitke rumnosće přepytali a wjacore pakety zwočinjeli. Nimo toho pokradnychu trezor z pjenjezami a kołkami, telewizor a mikrožołmu. Hódnota rubizny dotal znata njeje. Na twarjenju nasta něhdźe 300 eurow škody. Policija pad nětko přepytuje.
Policija (10.01.17)
Z lětnimi wobručemi jěł
Łuty. Wobsadka policajskeho awta je zawčerawšim popołdnju we Łutach wosobowe awto typa Peugeot kontrolowała. Zastojnikam bě jězdźidło napadnyło, dokelž bě wone połne sněha a tuž nic wěste za nadróžny wobchad. To pak njebě jeničke přeńdźenje 34lětneho wodźerja. Policistam mjenujcy napadny, zo měješe awto hišće lětnje wobruče. Tež pos muža bjez wosebiteje lěsycy w awće sobu jědźeše. Winowatosć zawěsćenja płaći po zakonju tohorunja za psy.
Policija (09.01.17)
Bjez jězbneje dowolnosće
Horni Wujězd. Swoju jězbu na awtodróze A 4 dyrbješe sobotu připołdnju swójba z dwěmaj dźěsćomaj njejapcy přetorhnyć. Jako 45lětneho wodźerja Chryslera a jeho žiwjensku towaršku pola Hornjeho Wujězda kontrolowachu, so wukopa, zo běchu mužej hižo před časom jězbnu dowolnosć sćazali. Po tym zo su policisća formality chłostanskeho jednanja wupjelnili, pak swójba přeco hišće dale jěć njemóžeše, přetož tež 37lětna sobujěduca jězbnu dowolnosć njeměješe. Dyrbjachu tuž na druheho šofera dočakać.
Policija (06.01.17)
Strašne mandariny
Słona Boršć. Wjace hač 23 tonow mandarinow w drjewjanych kašćikach transportowaše nakładne awto, kotrež su sej zastojnicy wobchadneje słužby awtodróhoweho policajskeho rewěra zawčerawšim na wotpočnišću Hornja Łužica při awtodróze A 4 blisko Słoneje Boršće bliže wobhladali. Kašćiki pod planu tak mjenowaneho sedłoweho připowěšaka ze žanymi pasami zawěsćene njeběchu a, kaž policija zdźěli, to tež na městnje změnić njemóžachu. Zastojnicy tuž 67lětnemu šoferej dalšu jězbu zakazachu, tak zo dyrbješe transportne předewzaće hinaše jězdźidło pósłać, na kotrež kašćiki z woblubowanymi južnymi płodami překładowachu. Šofer nakładneho awta drje dyrbi nětko runje tak pokutu płaćić kaž jeho 44lětny šef, kiž bě jemu słužbny nadawk za jězbu dał.
Policija (05.01.17)
Pytaja swědkow
Smjerdźaca. K wobchadnemu njezbožu, kotrež je so zawčerawšim na dróze mjez Smjerdźacej a Němskimi Pazlicami stało, pyta policija swědkow. Krótko po 15.30 hodź. bě wodźer VW Golfa po wšěm zdaću tak daloko nalěwo jěł, zo dyrbješe so napřećo jěduca 22lětna šoferka VWja Polo wuwinyć. Při tym zajědźe wona přez kromu jězdnje, zhubi kontrolu nad wodźidłom a suny so z awtom na lěwym boku puća do přirowa. Na zbožo so młoda žona njezrani, na jeje jězdźidle pak nasta 5 000 eurow škody. Wodźer tamneho awta so zhubi. Štóž je njezbožo wobkedźbował abo móže pokiwy k wodźerjej Golfa dać, njech přizjewi so pod telefonowym čisłom 03578/ 35 20.
Policija (04.01.17)
Rumpodich drje přemało wobradźił
Kinspork. Po wšěm zdaću njespokojom ze swojimi hodownymi darami běštaj mužej w Kinsporku. Zawčerawšim informowachu swědcy policiju, zo běštaj wonaj z kupnicy 37 taflow šokolody spakosćiłoj a z awtom ćeknyłoj. Zastojnicy jězdźidło pozdźišo na zwjazkowej dróze B 97 zadźeržachu a muži w starobje 35 a 29 lět kontrolowachu. Při tym njenamakachu jenož mjenowane šokolody, ale tež dalše słódčizny w hódnoće něhdźe 200 eurow. Dźěl z toho pochadźeše z padustwa samsny dźeń w dalšej Kinsporskej kupnicy. Policija paduchow nachwilnje zaja.
Drogi brał a znjezbožił
Biskopicy. Z dotal njeznatych přičin je póndźelu wječor 36lětny wodźer awta Subaru w Biskopicach na prawym boku jězdnje do dweju płotow zrazył a na to ćeknył. Dźakowano pokiwej swědka lepichu muža na to na bliskim parkowanišću. Při kontroli zwěsćichu, zo steješe wón pod wliwom amfetaminow. Tuž jeho k wotedaću kreje přewodźachu.
Policija (03.01.17)
Wjele sćerpnosće trjebali
Budyšin. Dweju wobchadneju njezbožow dla tworjachu so wčera připołdnju na awtodróze A 4 do směra na Drježdźany kilometry dołhe rynki čakacych awtow. Blisko wotbóčki Budyšin-zapad bě najprjedy wodźer Opela do dalšeho Opela zrazył a jón do VWja storčił. 33lětna žona w Opelu so při tym zrani. W nastawacym rynku čakacych awtow zajědźe na to Honda do Nissana a storči jón do Opela. W tym padźe so dźěćo w Hondźe snadnje zrani. Dohromady nasta nimale 25 000 eurow škody. Sčasami sahaše kolona awtow hač do Wósporka. Krótko do 15 hodź. běštej městnje njezboža zrumowanej. Hakle po tym so dołhe rynki jězdźidłow poněčim rozpušćichu.
Policija (02.01.17)
Tragedija spočatk lěta
Ottendorf-Okrilla. Při wobchadnym njezbožu na awtodróze A 4 je wčera muž žiwjenje přisadźił. Blisko Ottendorfa-Okrille bě něhdźe w 21.15 hodź. wodźer VW Passata z dotal njeznateje přičiny wotzady do Peugeota zajěł. Wobě jězdźidle jědźeštej najprjedy nalěwo a po tym naprawo, hdźež so Peugeot zwróći. Jeho 28lětna wodźerka so ćežko zrani, jeje sobujěducy pak hišće na městnje njezboža zemrě.
Policiju 161 razow wołali
Zhorjelc. Wot silwestra we 18 hodź. hač do Noweho lěta w 6 hodź. su w Budyskim a Zhorjelskim wokrjesu 161 razow policiju wołali. Zwjetša dyrbjachu rozestajenja mjez swójbnymi a znatymi złahodźić, 17 razow jednaše so wo wobškodźenje wěcow, 13 razow wo zranjenje ćěła a 20 razow wo mjeńši woheń.
Policija (30.12.16)
Z praskotakami škodu načinili
Wojerecy. Byrnjež silwesterske praskotaki a rakety hakle jutře a njedźelu dowolene byli, worakawcy z tym po wšěm zdaću zaso raz čakać njemóža. Zawčerawšim wječor su njeznaći we Wojerecach w bydlenskim domje na Budyskej aleji praskotaki zapalili a je zdźěla do listowych kašćikow mjetali. Te so při tym runje tak skóncowachu kaž posłužowanska tafla lifta w samsnym domje. Wěcnu škodu trochuje policija na 400 eurow.
