Policija (13.04.17)
Želniwy mórak
Kulowc. Kriminalna słužba Wojerowskeho policajskeho rewěra bě nastupajo wjacore grafitijowe móranja přepytowała, kotrež běchu loni 25. julija w Kulowcu napadnyli. Nětko je 17lětneho jako podhladneho skućićela wuslědźiła. Swoje móranja na wjacorych wobchadnych znamjenjach a fasadach wón mjeztym přizna. Cyłkownje bě mórak něhdźe 1 500 eurow škody načinił. Znajmjeńša młodostny z Kulowca swoje přeńdźenje wobželnosća a chce škodu zarunać, kaž policija rozprawja. Přiwšěm dyrbi so statne rěčnistwo z padom zaběrać.
Policija (12.04.17)
Paduchow wuslědźili
Łuty/Wojerecy. Padustwo z Łutowskeje kupnicy 10. měrca tohole lěta je wujasnjene. Po wobšěrnych přepytowanjach je policija muži w starobje 28 a 35 lět z Wojerec wuslědźiła a jeju zajała. Wonaj běštaj tehdy z pokradnjenym awtom do wukładneho wokna kupnicy zrazyłoj a tam cigarety kaž tež elektroniske nastroje pokradnyłoj. Wodźer nakładneho awta tole wobkedźbowaše a je policiju informował.
Policija (11.04.17)
Wjacori chětro nuzne měli
Zhorjelc. Wobchadna stražna słužba Zhorjelskeje policajskeje direkcije je njedźelu wječor a w póndźelnych rańšich hodźinach na awtodróze A 4 blisko Ottendorfa-Okrille spěšnosć měriła. W běhu šěsćhodźinskeje akcije kontrolowachu wjace hač 4 000 jězdźidłow. 145 šoferow bě spěšnišo hač dowolenych 130 km/h po puću. W 108 padach wosta při warnowanju. 37 wodźerjow pak měješe wosebje nuzne a dyrbi přichodne dny pokutny pjenjez zapłaćić. Njesławny rekord docpě wodźer Citroëna z Wiesbadenskim čisłom, kotrehož błysknychu ze 190 km/h. Wón změje 240 eurow pokuty płaćić, dóstanje dwaj dypkaj w Flensburgu a dyrbi měsac nóžkować.
W šuli so paliło
Huska. W jednej rjadowniskej rumnosći Hušćanskeje šule je so sobotu rano papjernik palił. Dźeń do toho běchu šulerjo we wučbje chemije twjerde pjenjezy z acetonom rjedźili a wužiwanu papjeru po wšěm zdaću do papjernika ćisnyli. Hač je so papjera wotsamo zapaliła, policija nětko pruwuje.
Policija (10.04.17)
Při njezbožu so ćežko zranił
Kulow. Ćežke wobchadne njezbožo sta so sobotu wječor blisko Kulowa. 50lětny muž bě ze swojim Fordom z Mučowa přijěł a při wotbóčce do Brěžkow z dotal njeznateje přičiny kontrolu nad wodźidłom zhubił. Awto zajědźe na lěwy bok jězdnje, zwróći so a wosta na třěše ležo. Šofera dyrbjachu z ćežkimi zranjenjemi do chorownje dowjezć. Wěcnu škodu na wosobowym awće trochuje policija na něhdźe 16 000 eurow.
Policija (07.04.17)
Baterije so palili
Kamjenc. W baterije porjedźacej firmje na Kamjenskej Sewjernej je wčera wječor woheń wudyrił. Wobydlerjo běchu wobkedźbowali, zo sylny kur z prěnjeho poschoda twarjenja stupa. Wjace hač sto wohnjowych wobornikow, wuchowanskich pomocnikow a policistow bě zasadźenych. Strach za wobydlerjow po informacijach policije žadyn njewobsteješe.
Policija (06.04.17)
Z pukom alarm „zawinił“
Běła Woda. K njewšědnemu zasadźenju wołachu zawčerawšim wječor wohnjowu woboru a policiju do lodoweje hale Běłowodźanskich Liškow. Tam bě wohnjowa připrawa alarm přizjewiła. Na městnje zwěsćichu, zo bě hašenska woda na lodowe hrajnišćo ćekła. Što bě so stało? Při treningu bě hrajer po wšěm zdaću z pukom sprinklerowy pryskowak trjechił. Na to awtomatiska woheń přizjewjaca připrawa zaskoči, samostatnje wohnjowu woboru informowaše a – štož je jeje nadawk – hašensku wodu do objekta pryskaše. Njeličomne litry wody su tak na hrajnišćo wuběželi.
Policija (05.04.17)
Do jastwa chcył
Wojerecy. Při přepruwowanju personalijow 41lětneho we wčerawšich rańšich hodźinach we Wojerecach policistam napadny, zo njebě muž dotal napołoženu pokutu 125 eurow zapłaćił. Tohodla předležeše přećiwo njemu wukaz zajeća. By-li sumu na městnje zapłaćił, móhł wón jatbje w poslednim wokomiku zadźěwać. To pak 41lětny nochcyše. Město toho wón policistow prošeše jeho do jastwa dowjezć, štož zastojnicy nablaku sčinichu. Tam ma nětko wjacore dny wotsedźeć.
Policija (04.04.17)
Awto motorskemu předjězbu wzało
Běła Woda. Jedne z prěnich lětušich njezbožow, na kotrymž bě wodźerka motorskeho wobdźělena, sta so zawčerawšim pola Běłeje Wody. Na zwjazkowej dróze B 156 bě 22lětna wodźerka Suzukija z runje tak starej sobujěducej po puću, jako wodźer awta jeju předjězbu njewobkedźbowaše a do njeju zrazy. Wobě žonje so ćežko zraništej.
Policija (03.04.17)
Trik bohužel fungował
Budyšin. Z wnučkowym trikom su njeznaći minjeny pjatk 79lětnej žonje w Budyšinje pjećcyfrowu sumu pjenjez wulišćili. Młoda žona pola njeje připołdnju zazwoni a wuda so jako wnučka, kotraž pjenjezy trjeba, dokelž chce sej awto kupić. Pozdźišo zazwonichu dalši njeznaći, kotřiž jako pozdatni prawiznicy a kriminalisća „basničku wnučki“ wobkrućichu. Skónčnje rentnarka wjacore tysac eurow njeznatemu mužej přepoda. Woprawdźita wnučka je pad nazajtra policiji přizjewiła.
Policija (31.03.17)
Pólšćina pomhała
Zhorjelc. Dźakowano swojim pólskorěčnym znajomosćam su zastojnicy Zhorjelskeho policajskeho rewěra zawčerawšim wječor mužej žiwjenje wuchowali. Policistow kaž tež wuchowansku słužbu běchu na Zhorjelsku Hospitalsku hasu wołali. Na jednym z hornich poschodow wjaceswójbneho domu sedźeše muž na kromje wokna. Jeničce pólšćinu rěčacy 52lětny bě po wšěm zdaću psychisce chory. W jeho maćeršćinje so policisća z nim nimale dwě hodźinje měrnje rozmołwjachu, doniž so jim njeporadźi muža hrabnyć a jeho njezranjeneho do bydlenja sćahnyć. Wuchowanska słužba so dale wo njeho staraše.
