Kolesowar ćežko znjezbožił

Pančicy-Kukow. Ćežko zranił je so njedźelu popołdnju kolesowar w Pančicach-Kukowje. Kaž policija rozprawja, je 70lětny na dróze Při klóštrje swoje koleso ćišćał, jako so wón wo kromu puća zakopny a padny. Alkoholowy test zwěsći pola njeho 2,06 promilow alkohola w kreji. Wuchowanske mocy dowjezechu jeho do chorownje.

Njeznaći muža wobšudźili

Wojerecy. 28 000 eurow je 54lětny muž pola Wojerec zašłe dny zhubił. Po tym zo bě wón wot wobšudnikow pozdatnu mejlku swojeje banki dóstał, přeradźi wón sensibelne daty swojeho konta. Z nimi njeznaći wjacore razy pjenjezy z konta Wojerowčana wotzběhnychu. Policija pad přepytuje.

Wuměnkarjej pjenjezy zhubiłoj

Kamjenc. Z woporom wobšudnikow bě­štaj pjatk wječor wuměnkarjej-mandźelskaj pola Kamjenca. Skućićeljo na njeju zazwonichu a jimaj napowědachu, zo bě jeju syn ćežke wobchadne njezbožo zawinił. Wobšudnicy žadachu sej pjenjezy za kawciju. Bjez podhlada na wobšudnistwo přepodaštaj mandźelskaj cuzemu čłowjekej před swojimi chěžnymi durjemi něhdźe 25 000 eurow. W tym zwisku policija wospjet namołwja, zo njech wšitcy při tajkich a podobnych telefonatach kedźbliwi su. Najlěpje je, zo telefonat nablaku skónčiš a policiju informuješ. Wšojedne kotru stawizničku něchtó při te­lefonje powěda, nichtó njeměł cuzym ludźom­ swoje pjenjezy přewostajić.

Na zapławjenej dróze znjezbožił

Trjebjeńca. Sylny dešćik njeje so předwčerawšim jenož wo někotre zapławjene pincy postarał, ale takrjec tež wobchadne njezbožo zawinił. Krótko do 17 hodź. bě na zwjazkowej dróze B 6 do směra na Trjebjeńcu (Steindörfel) 54lětny wodźer Škody po puću. Dokelž bě dróha połna wody, zajědźe muž z jězdnje, zrazy do dweju štomow a so přewali. Alarmowana wohnjowa wobora dyrbješe znjezbože­neho z jeho awta wuswobodźić. Jězdźidło wuchowanskeje słužby dowjeze muža do chorownje. Wěcnu škodu trochuje policija na něhdźe 50 000 eurow. Zastojnicy policije njezbožo wobdźěłachu.