Liška njezbožo zawiniła

Załom nad Sprjewju. 18lětna młodostna běše njedźelu wječor ze swojim awtom marki Opel na B98 na směr Wołbramecy (Steinigtwolmsdorf) po puću. Blisko Wjernarjec (Wehrsdorf) njejapcy liška na jězdnju skoči. Młoda žona spěšnje reagowaše a borzdźeše. Za njej jěduca 19lětna šoferka pak njezamó ze swojim awtom marki Škoda sčasom borzdźić a do Opela zrazy. Wona so lochce zrani – liška pak wućekny njezranjena. Wěcna škoda wučinja něhdźe 15 000 eurow.

Frontalna zražka z třomi zranjenymi

Zemicy-Tumicy. Na křižowanišću we Wjelkowje (Wölkau) stej póndźelu dopołdnja dwě wosobowej awće frontalnje do so zrazyłoj. 18lětna šoferka Audija běše po Budyskej dróze na směr Biskopicy po puću. Na křižowanišću z Delnjowujězdźanskej dróhu chcyše młoda žona na­lěwo do směra Zemic-Tumic wotbočić. Přewidźa pak napřećo jěduce awto marki Škoda a do njeho zrazy. Při njezbožu so šoferka Škody, šoferka kaž tež 17lětny ­sobujěducy Audija lochce zranichu a dyrbjachu na přepytowanje do chorownje. Wěcna škoda wučinja něhdźe 30 000 ­eurow.

Ćežke njezbožo

Wojerecy. 23lětny bě so sobotu ze swojim awtom na Kulowskej we Wojerecach njeznatemu zwěrjeću wuwinył. Při tym sprawa dróhi do štoma zrazy. Dokelž bě tak spěšnje po puću, suny so do dweju awtow na druhim boku dróhi a jej wobškodźi. Wodźer awta so při njezbožu ­ćežko zrani. Dohromady je wón wěcnu škodu 35 500 eurow naparał.

Z awtom do domskeho zrazył

Malešecy. Dokelž bě 38lětny ze swojim awtom w Malešecach do směra na Brězynu ­smalił, zrazy wón přez płót do sćěny domskeho. Škoda wučinja 35 000 eurow.

Młodostni z awtom jěli

Kumwałd. Njedowolena jězba z wosobowym awtom je so njedźelu w Kumwałdźe z wobchadnym njezbožom skónčiła. 15lětny je kontrolu nad Audijom zhubił a do płota kaž tež do wjacorych štomow zrazył. Najskerje bě pódla sedźacy 17lětny za šaltowanskej ručicu přimnył. W awće běštej hišće dalšej wosobje. Zranił pak so na zbožo nichtó njeje. Při wobdźěłanju njezboža so wukopa, zo bě wodźer alkohol pił. Pola njeho naměrichu 0,32 promilow. Tež 17lětny bě přehłuboko do škleńcy hladał. Pola njeho zwěsćichu 1,78 promilow alkohola. Awto njebě ani přizjewjene ani zawěsćene.

Na pohrjebnišću kradnyła

Budyšin. Nazymski čas, hdyž ludźo rowy swojich přiwuznych wosebje rjenje pyša, přiwabi tež paduchow na pohrjebnišća a kěrchowy. Sobotu dopołdnja přistajena pohrjebnišća na Budyskim Hrodźišku wobkedźbowaše, kak cuza žona wšelake wěcy z jednoho z rowow bjerješe. Na to narěčana drje podhladna kwětku zaso wróćo połoži, seklu, kwěćel a plećeneho jandźela pak sobu wza. Přiwuzna zemrěteho pozdźišo policiju informowaše.