Policija (29.07.24)
Wopity kolesowar
Połčnica. Policisća z Kamjenskeho rewěra su zašłu nóc w Połčnicy na Třělnišću wobchadnu kontrolu přewjedli. Tam su w napoł dwěmaj 55lětneho kolesowarja kontrolowali. Muž wonješe sylnje za alkoholom. Testowy nastroj pokaza 1,68 promile. Policisća přikazachu wotewzaće kreje a zakazachu mužej dalšu jězbu.
Twarskej mašinje pokradnjenej
Budyšin. W Budyskim předewzaću na Nowosólskej su so njeznaći w nocy wot soboty na njedźelu z namocu zadobyli. Woni pokradnychu platowy připowěšak a nakładowak typa Kramer. Cyłkowna škoda wučinja něhdźe 24 000 eurow. Kriminalna policaja Budyskeho rewěra nětko dalše přepytowanja přewjedźe.
Njezbožowny manewer
Budyšin. Na Wojerowskej we Budyšinje je sobotu popołdnju krótko do napoł třoch 68lětny šofer awta marki VW Golf rozsudźił, před nim jěducy Mercedes Vita přesćahnyć. Při tym je muž awto 26lětneje šoferki šmórnył. Na to je wón kontrolu nad swojim awto zhubił a do chódnika zajěł a so latarnje dótknył. Potom wosta w přirowje stejo. Zastojnicy policije trochuja škoda na něhdźe 8 000 eurow.
E-bike pokradnyli
Policija (26.07.24)
Konjacy zapřah znjezbožił
Wulke Ždźary. Na dróze Při jězoru we Wulkich Ždźarach je srjedu wječor konjacy zapřah znjezbožił. Njejapke zwuki běchu konjej pozdatnje tak spłóšili, zo 70lětny pohonč kontrolu nad nimaj zhubi. Korejta so spowróći, pohonč so lochce zrani a dyrbješe do chorownje. K wěcownej škodźe dotal informacije njepředleža.
Do cyrkwje so zadobyli
Rakecy. Njeznaći skućićeljo su so srjedu do Rakečanske cyrkwje zadobyli. Tamniši wosadny farar je w běhu dopołdnja w cyrkwi rozbite wokno a wotewrjene durje do sakristije nadešoł. Po zdaću pak zadobywarjo ničo „trěbneho“ namakali njejsu – njeběchu ničo pokradnyli. Wěcna škoda wučinja 250 eurow. Kriminalna słužba pad přepytuje.
Policija (25.07.24)
Njezbožo z ćežko zranjenymi
Spytecy. 38lětna šoferka awta typa Opela běše na hłownej dróze wot Hodźija do směra Spytec po puću a zjědźe z dotal njeznatych přičin 70 metrow před Spytecami na napřećiwnu čaru. Tam storči frontalnje do přichadźaceho awta marki Peugeot. Šoferka Opela a sobujěducej holcy w starobje 5 a 10 lět kaž tež šoferka Peugeota so ćežko zranichu a dyrbjachu do chorownje. Wěcna škoda na jězdźidłomaj wučinja něhdźe 32 000 eurow. Policija prosy swědkow njezboža, jej dokładniše informacije telefonisce zdźělić a to pod čisłom: 03591-3670.
Policija (24.07.24)
Spěšnosć kontrolowali
Zhorjelc. Na awtodróze A4 na směr Zhorjelc je wobchadna policija při parkowanišću Lubata póndźelu popołdnju předpisanu spěšnosć 80 km/h kontrolowała. W běhu šěsć hodźin je dohromady 4 068 jězdźidłow přepruwowała. 519 z nich běše jasnje přespěšnje po puću. 153 skućićelow je pjenježnu pokutnu na městnje zapłaćiło, 366 šoferow dóstanje bórze póštu wot zarjada za pokutne pjenjezy. Negatiwny rekord je wodźer Mercedesa ze spěšnosću 159 km/h docpěł. Wón dyrbi nětko ze 700 eurami pokuty, z dwěmaj dypkomaj w Flensburgu a z třomi měsacami zakazom jězdźenja ličić. Nimo toho lepichu zastojnicy jědnaće šoferow, kotřiž njeběchu zakaz přesćehnjenja wobkedźbowali.
Policija (23.07.24)
Bróžnja so wotpaliła
Radšow (Groß Radisch). W Radšowje blisko Wysokeje Dubrawy mějachu zastojnicy wohnjoweje wobory kaž tež policije sobotu w nocy ruce połnej dźěła. Z dotal njeznatych přičin je so ratarska mašina, kotruž běchu wobsedźerjo na kóncu žnjenskeho dnja w bróžni wotstajili, zapaliła. Woheń so jara spěšnje wupřestrěwaše. Bórze palachu so w bróžni wotstajeny připowěšak a wosobowe awto kaž tež twarjenje same. Wšitko so wohenja dla zniči. Fachowcy trochuja sumu škodow na něhdźe 300 000 eurow. Přepytowar policije hišće za přičinu wohenja slědźi.
Do wikow za twaršćizny so zadobyli
Budyšin. Njeznaći skućićeljo su so sobotu na dotal njeznate wašnje do twarskich wikow při Delnjokinjanskej dróze w Budyšinje zadobyli. Jednoho z nich nadeńdźe sobudźěłaćer wěstotneje firmy a informuje policiju. Najebać spěšnych pytanskich naprawow, poradźi so paducham ćeknyć. Hižo nahromadźene a składowane rubjenstwo w cyłkownej hódnoće 5 500 eurow pak njejsu sobu wzać móhli.
Policija (22.07.24)
Ćěło namakali
Šunow-Barton (Schönau-Berzdorf a. d. Eigen). Swědkojo su minjeny pjatk na zjawnym parkowanišću w Šunowje-Bartonju mortweho 65lětneho němskeho staćana namakali. Nimo policije přichwata chorobne awto kaž tež wohnjowa wobora. Spočatnje skućićel ćekny z awtom do njeznateho směra. Kriminalni technikarjo su slědy na městnje njeskutka zawěsćili. Policajske jednotki, mjez druhim z psom a helikopterom, su móžne směry ćěkanja pruwowali. Podhlad morjenja so wobkrući. Zastojnikam poradźi so morjenja podhladneho w Zhorjelcu wotkryć a zajeć. Kriminalne přepytowanja policije k pozadkam pada hišće traja. Awto skućićela, módry Suzuki SX4 ze Žitawskej wobchadnej značku, pak wona dale pyta. Tohodla prosy Zhorjelska policiska direkcija swědkow wo dalše informacije pod tel. čo. 03581-468100.
Policija (19.07.24)
Blisko Budyšina bě jězba ke kóncej
Budyšin. Zastojnicy Budyskeje slědźenskeje jednotki su srjedu rano 42lětneho šofera pokradnjeneho bydlenskeho mobila typa Fiat Challenger na A 4 krótko po parkowanišću „Am Wacheberg“ popadnyli a zajeli. Paduch ignorowaše spočatnje namołwu policije zadźeržeć. Krótko před wotjězdom Šiborćicy (Nieder Seifersdorf) zastojnicy pólskeho staćana zajachu. Přepytowanja dopokazachu, zo běše so Fiat Challenger w nocy do toho w Lipsku pokradnył. Krejny test na drogi pola skućićela reagowaše pozitiwnje na amfetaminy.
Płót pokradnyli
Budyšin. Njeznaći skućićeljo su minjeny tydźeń něhdźe 40 do 50 metrow płota, kotryž areal firmy na Nowej promenadźe w Budyšinje wobdawaše, pokradnyli. Wěcna škoda wučinja něhdźe 3 000 eurow. Lokalna kriminalna słužba přepytuje.
Awto zaso namakali
Policija (18.07.24)
Warnuje před wobšudnikami
Jěžow. Póndźelu wječor su wobšudnicy 78lětnu žonu w Jěžowje přelesćili a sej dohromady 22 000 eurow spakosćili. Dotal njeznaći njeskutka podhladni běchu so telefonisce ze stawiznu wo znjezboženej dźowce pola njeje přizjewili. Jedyn ze skućićelow wuda so jako zastojnik kriminalneje policije a zdźěli žonje, zo dyrbjała dźowka do jastwa. Jenož z 35 000 eurami kawciju móhła wona tomu zadźěwać. Seniorka da so wot stawizny zaslepić a je chwilu pozdźišo cyłe swoje zamóženstwo, dohromady 22 000 eurow, wot swojeho konta wotzběhnyła. Na parkowanišću při Łučinskej dróze je pjenjezy njeznatej žonje přepodała. Po wopisanju swědkow je wona 30 do 50 lět stara, něhdźe 160 cm wulka, zasadźita a pozdatnje aziskeho pochada. Policija warnuje před tutym wupruwowanym trikom wobšudnikow.
Policija (17.07.24)
Zabłudźena čorna wowca
Łuty. Wot póndźele popołdnja błudźi so ćeknjena čorna wowca kołowokoło wjeski Łuty (Lauta). Swědk je zwěrjo na parkowanišću nakupowanskich wikow při tym wobkedźbował, kak wone zas a zaso do sćěny wobchoda bodźeše. Jako policija dojědźe, běše so wowca hižo do směra Wuchodneje dróhi zminyła. Nimale tři hodźiny pozdźišo wuhladachu swědkojo zwěrjo podłu železniskich kolijow mjez Čornym Chołmcom a Wojerecami. Němska železnica je wobchad na čarje tohodla přechodnje wobmjezowała. Dalši swědk wuhlada wowcu pozdźišo při skale w Čornym Chołmcu. Po tym přebytk zwěrjeća hižo znaty njeje. Wojerowska policija prosy wo pokiwy pod tel. čo. 03571 4650.
Policija (16.07.24)
Značce na policiskim awće pokradnył
Žitawa. 23-lětny je njedźelu w nocy wobchadnej znamješce na policiskim awće lokalneho policiskeho rewěra w Žitawje pokradnył. To sčini w času, jako zastojnicy policije runje pada kaženja měra dla w domje přebywachu. Jako so wróćichu jim falowacej značce njenapadnyštej. Hakle swědk njeskutka jich na to skedźbni. Zastojnikam poradźi so, skućićela wuslědźić a w susodstwje popadnyć.
