Policija (02.04.25)
Z přetwarjenym elektrokolesom jěł
Budyšin. Hnydom wjacore přeńdźenja přećiwo předpisam zastojnicy Budyskeho rewěra zwěsćichu, jako póndźelu wječor wodźerja elektrokolesa na Budyskej Walskej kontrolowachu. Policisća pytnychu, zo bě jězdźidło 21lětneho z připrawu wuhotowane, z kotrejž móžeše płun dać. Nimo toho koleso hač do 45 km/h jědźeše, bjez toho zo wužiwar do pedalow teptaše. A skónčnje drogowy test na konop a amfetaminy pozitiwnje reagowaše. Z tym bě wječorna jězba młodeho muža nimo. Zamołwić změje so wón mjez druhim za jězdźenje bjez jězbneje dowolnosće a pod wliwom drogow.
Policija (01.04.25)
Z bitcoinami pjenjezy zhubił
Šěrachow. Internetni wobšudnicy su minjene tydźenje mužej w Šěrachowje wjele pjenjez wulišćili. Njeznaći 55lětneho spočatk měrca přerěčachu, konto za bitcoiny załožić. Na tele konto Šerachowčan we wjacorych krokach wysoku pjećcyfrowu sumu pjenjez přepokaza. Jako měješe so pozdźišo slubjeny dobytk wupłaćić, škodowany hižo žadyn kontakt k wobšudnikam njeměješe. Kriminalna słužba Budyskeho policajskeho rewěra pad nětko přepytuje. Při tej składnosći policija před inwesticijemi w interneće wuraznje warnuje. Ludźo měli tohorunja kedźbować, hdyž jim něchtó wulki dobytk za pjenjezy slubi.
Policija (31.03.25)
„Dyrdomdej“ w měsće
Kamjenc. Wulka rozhorjenosć knježeše sobotu popołdnju w Kamjencu. Tam bě so třilětne dźěćo na Hraničnej hasy na dyrdomdejske pućowanje po měsće podało. Něhdźe połtřeća hodźiny bě holčka zhubjena. Kaž policija rozprawja, běštaj sej staršej připołdniši wotpočink popřałoj a sej mysleštaj, zo tež jeju dźěćo spi. Te pak z wočinjenymi durjemi z domu twochny. Třilětna bě jeničce w pjeluškach. To napadny kedźbliwej wobydlerce na Karla Marxowej. Žona dźěćo policiji přepoda. Na zbožo so ničo stało njeje, tak zo móžachu holčku spěšnje zaso maćeri a nanej dowjezć. Žonje, kotraž bě ju wuhladała, so policija wuraznje dźakuje.
Dźěćo tragisce znjezbožiło
Brěznja. Tragiske dźěłowe njezbožo je so sobotu popołdnju w Brězni pola Kamjenca stało. Při bagrowanju na priwatnej ležownosći je sydomlětny hólc ćežko znjezbožił a hišće na městnje zemrěł. 54lětneho wodźerja bagera a mać dźěsća lěkarsce zastarachu. Kriminalna policija pad přepytuje.
Policija (27.03.25)
W Kamjencu smalacych lepili
Kamjenc. Zastojnicy Kamjenskeho policajskeho rewěra su wutoru dopołdnja na Połčničanskej dróze dodźerženje tam dowoleneje spěšnosće 50 km/h přepruwowali. Mjez dohromady 57 měrjenymi jězdźidłami běše pjeć přespěšnje po puću. Najspěšniši šofer překroči předpisanu spěšnosć wo 22 km/h. Skućićeljo mějachu warnowansku pokutu zapłaćić.
Policija (26.03.25)
Twarskeho dźěłaćerja ćežce zranił
Budyšin. 65lětny šofer, kotryž běše wutoru popołdnju na Budyskej Lubijskej z města won po puću, je ze swojim nakładnym awtom zběhacu dźěłowu platformu při křižowanišću Lubijska/Wósporska potorhnył. Při tym zrani so 46lětny muž, kotryž běše na platformje stejo dźěłał, ćežce. Wuchowanska słužba dowjeze jeho z helikopterom do chorownje. Wobchadna słužba je přepytowanja přewzała.
Policija (24.03.25)
Mopedaj spěšnje zaso namakali
Radwor. Njeznaći skućićeljo su minjeny pjatk rano při Radworskej šuli wotstajenej a wotzamknjenej mopedaj marki Simson pokradnyłoj. Na pomoc zwołana policija zwěsći dźakowano modernej GPS-technice poziciju jězdźidłow. Cyłkownje 4 000 eurow hódnej mopedaj nańdźechu skónčnje blisko Porchowa we wotstajenym transporteru. Přećiwo wobsedźerjej transportera su nětko přepytowanske jednanje wosebje ćežkeho padustwa dla zahajili.
Policija (21.03.25)
Njezbožo ze smjertnym woporom
Rakecy. Wčera popołdnju něhdźe w 14.30 hodź. je na zwjazkowej dróze B 96 mjez Stróžu a Rakecami k ćežkemu wobchadnemu njezbožu dóšło. Z dotal njejasnych přičin zajědźe 77lětna žona ze swojim wosobowym awtom w křiwicy na napřećiwnu jězdnju dróhi a zrazy frontalnje do bližaceho so nakładneho awta. Zražka běše tak sylna, zo šoferka hišće na městnje njezboža zemrě. 37lětny šofer nakładneho awta so ćežko zrani. Zwjazkowa dróha běše přepytowanjow posudźowarjow na městnje dla dźewjeć hodźin dospołnje zawrjena. Policija trochuje wěcnu škodu tuchwilu na dohromady něhdźe 60 000 eurow.
Policija (20.03.25)
Njewuspěšny paduch
Połčnica. Wočiwidnje jara aktiwneho paducha je Kamjenska policija wutoru popołdnju w Połčnicy zajała. Předawarjo twarskich wikow su muža při tym wobkedźbowali, kak je sej wšelake rjemjeslniske mašiny a graty skradźu do wačoka tyknył. Jako chcyše paduch předawanišćo bjez zapłaćenja wopušćić, jeho narěčachu – wón pak twochny. Wjacori předawarjo a kupcy jeho přesćěhowachu. Wón pak jim znowa ze swojim awtom twochny. Mjeztym jemu tež informowani policisća sćěhowachu. Skónčnje nadeńdźechu awto paducha při Dróze Połčničanski doł. Swědk informowaše zastojnikow, zo je skućićel podłu rěčki Połčnicy do směra na Kinspork ćeknył. Dołho njetraješe, zo policisća 37lětneho Georgičana popadnychu a zajachu. Cyłkowna hódnota rubjenych tworow, kotrež w jeho awće nadeńdźechu, wučinja 5 000 eurow.
Policija (19.03.25)
Do cyrkwje so zadobyli
Chrósćicy. Njeznaći su so njedźelu popołdnju, mjez 15 a 18 hodź., do cyrkwje w Chrósćicach zadobyli. Podarmo spytachu skućićeljo z namocu cyrkwinsku jałmožnicu rozłamać. Wěcna škoda, kotruž su zawostajili, wučinja po tuchwilnym pohódnoćenju 200 eurow. Paduši pokradnychu mjenujcy něhdźe 100 eurow hódny wołtarny křiž. Policisća su na městnje slědy zawěsćili. Kriminalna słužba Kamjenskeho policajskeho rewěra je přepytowanja přewzała.
Policija (18.03.25)
Wopojeneho po přesćěhańcy lepili
Wodowe Hendrichecy. Zastojnicy čěskeje policije su njedźelu rano zahe na hraničnym přechodźe mjez Čěskej a Němskej šofera awta marki Peugeot zadźeržeć spytali. 41lětny čěski staćan pak stupi na płun a twochny jim na němsku stronu mjezy. Čěscy policisća jeho přesćěhowachu a dóstachu bórze podpěru zastojnikow policiskeho rewěra Žitawa-Horni kraj. Naposledk poradźi so jim ćěkaceho zadźeržeć. Spěšnje wujewi so zastojnikam přičina ćěkańcy. Spěšnotest na drogi reagowaše pozitiwnje na substancu kokain a muž měješe 0,64 promilow alkohola w kreji.
Namócne rozestajenje ze sćěwkami
Běła Woda. Jako spytachu policisća Běłowodźanskeho rewěra njedaloko dwórnišća sobotu wječor personalije 22lětneho muža zwěsćić, kotryž běše 18lětnemu na hłowu dyrił, započa tón na zastojnikow hrózbnje swarjeć. Test na alkohol zwěsći 1,72 promilow. Po tym zo běše młodostny skućićel tež zastojnika ćělnje nadběhował, jeho na blaku zajachu. Kriminalna słužba dale přepytuje.
