Policija (11.01.21)

póndźela, 11. januara 2021 spisane wot:

Z Kretschmerom diskutowali

Wulki Šunow. Njedźelu dopołdnja je skupina něhdźe 30 ludźi před priwatnej ležownosću sakskeho ministerskeho ­prezidenta Michaela Kretschmera (CDU) we Wulkim Šunowje demonstrowało. Kretsch­mer, kiž w tym času tam přeby­waše, je z nimi woměrje diskutował. Wjetšina wobdźělenych měješe nahubnik, často pak trěbny wotstawk njedodźeržachu. Zastojnicy policije zwěsćichu wosobinske daty ­někotrych demonstrantow. Zdobom pruwuja, hač su so wobdźělnicy přećiwo prawu zhromadźowanja přešli.

Awta bjez kolesow

Budyšin. Njeluboznu překwapjenku dožiwił je wobsedźer Audija A 4 sobotu dopołdnja w Budyšinje. Jeho awto steješe na parkowanišću na cyhelach a bjez kolesow. Zastojnicy Budyskeje policije pak móžachu jemu zdźělić, zo běchu zastojnicy zwjazkoweje policije w nocy na awtodróze A 4 we wosobowym awće marki Renault kolesa jeho awta namakali. Šofer běše 28lětny Polak.

Policija (08.01.21)

pjatk, 08. januara 2021 spisane wot:

Postajenja kontrolowali

Budyšin/Zhorjelc. Policija je wčera we wokrjesomaj Budyšin a Zhorjelc kontrole nastupajo korona-postajenja přewjedła. Při tym zwěsći 70 přeńdźenjow wukaza. Wjace hač sto zastojnikow bě we wobłuku kontrolow zasadźenych.

Demonstrowacych napominali

Budyšin. Na Budyskim Mosće měra je policija wčera zwěsćiła njepřizjewjene zhromadźenje. Něhdźe 25 wobdźělnikow z transparentami a swěčkami drje měješe nahubnik a dźeržeše so na postajeny wotstawk. Přiwšěm pak wobsteješe podhlad, zo njejsu zakoń wo zhromadźowanju wobkedźbowali.

Policija (07.01.21)

štwórtk, 07. januara 2021 spisane wot:

Sćěna pomórana była

Rakecy. Při bywšim nakupowanišću na Nowowjesnjanskej dróze w Rakecach su njeznaći sćěnu z barbu pomórali. Na pismo podobny wobraz ćehnješe so po dołhosći dwanaće metrow. Wobsadka policajskeho awta je wěcne wobškodźenje předwčerawšim připołdnju wuhladała. Dokelž barba hišće dospołnje sucha njebě, wuchadźeja zastojnicy z toho, zo běchu skućićeljo hakle krótko do toho tam „podźěłali“. Kelko škody woni ze swojim móranjom na prózdnym twarjenju načinichu, njehodźi so dotal wobličić.

Policija (06.01.21)

srjeda, 06. januara 2021 spisane wot:

Kołp na awtodróze

Budyšin. K njewšědnemu zasadźenju wołachu policiju wčera něhdźe w 4 hodź. na awtodróhu A 4 mjez Budyšinom a Wósporkom. Tam bě so mjez srjedźnym wobhrodźenjom kołp zabłudźił. Zo njeby k někajkemu njezbožu dóšło, policisća městno zawěsćichu. Jako so woni wulkemu ptakej bližachu, tón mócnje a agresiwnje na policistow porchaše (fauchen), kaž w jich rozprawje rěka. Z pomocu sobudźěłaćerjow awtodróhoweje mištrownje zwěrjo skónčnje z pomocu saka popadnychu a je daloko dosć preč wo awtodróhi donjesechu. Wottam kołp njezranjeny wotleća.

Z praskotakom škodu načinili

Běła Woda. Po wšěm zdaću ze silwes­terskim praskotakom su njeznaći w Běłej Wodźe w nocy na póndźelu škleń­čanu fasadu twarjenja wobškodźili. Po prěnim trochowanju wučinja škoda ně­hdźe 400 eurow. Policija pad nětko pře­pytuje.

Ilegalnych zadźerželi

Policija (05.01.21)

wutora, 05. januara 2021 spisane wot:

W nocy koleso pokradnył

Kulow. Hnydom prěnju njedźelu w nowym lěće je njeznaty w Kulowje wužił a tam koleso pokradnył. Kaž policija zdźěli, zadoby so wón předwčerawšim něhdźe w 3 hodź. na Wojerowskej dróze do wobchoda a spakosći z njeho mountainbike w hódnoće 2 500 eurow. Kedźbliwa swědka to pytny a alarmowaše ­policiju. Skućićelej so přiwšěm poradźi so z karbonowym kolesom typa Kellys zminyć. Policisća na městnje wšitko trěbne přepytachu a su pokradnjene koleso mjezynarodnje k pytanju wupisali. Přisłušna kriminalna słužba nětko za skućićelom a rubiznu slědźi.

Policija (04.01.21)

póndźela, 04. januara 2021 spisane wot:

Motorske pokradnyć chcył

Zdźěr. Dokelž słyšachu w nocy na njedźelu při swojich chěžnych durjach haru, wołachu wobydlerjo w Zdźěri we Wulkodubrawskej gmejnje policiju. Zastojnicy lepichu tam 44lětneho muža, kiž po puću motorske ćišćeše. Jězdźidło bě wón do toho z kólnje pokradnył. Na samsnej ležownosći bě so wón do toho do garaže zadobył a w njej wokno wosoboweho awta typa Mitsubishi rozbił. Zo móhł z awtom wotjěć, chcyše sej z bydlenskeho domu klučik wobstarać, zwrěšći pak na chěžnych durjach. Spo­kojić dyrbješe so z motorskim typa KTM w hódnoće 8 700 eurow. Policisća muža nachwilnje zajachu. Nuzowy lěkar zapokaza jeho pozdźišo do chorownje.

Policija (30.12.20)

srjeda, 30. decembera 2020 spisane wot:

Chłódźak zhubiła

Běła Woda. Z chłódźakom na puću dyrbješe so předwčerawšim policija w Běłej Wodźe zaběrać. 58lětna wodźerka wosoboweho awta typa Dacia bě techniski nastroj na awtowym připowěšaku transportowała. Po wšěm zdaću pak njebě jón na nim prawje přiwjazała, přetož na Srjedźnym puću wona chłódźak zhubi. Spočatnje pak to žona ani pytnyła njeje. Hakle kedźbliwej swědce wón wosrjedź dróhi napadny a wona policiju zazwoni. 58lětna dyrbi nětko z pokutu ličić, dokelž njebě chłódźak na připowěšaku prawje zawěsćiła. Hač móže wona nětko swoje silwesterske napoje přiwšěm chłódźić, bohužel znate njeje.

Policija (29.12.20)

wutora, 29. decembera 2020 spisane wot:

Alarm w žonopowej fabrice

Mały Wjelkow. K wulkozasadźenju wohnjoweje wobory je dźensa rano w Małym Wjelkowje dóšło. Krótko po 6 hodź. přizjewi w tamnišej žonopowej fabrice awtomatiska připrawa alarm. Přičinu namakachu wohnjowi wobornicy před zawodom w kontejneru, z kotrehož smjerdźeše a para wustupowaše. Dokelž w bliskosći tež strašne maćizny składuja, přiwołachu přidatnych kameradow. Dohromady bě 60 wobornikow zasadźenych. Na městnje natwarichu dekontaminěrowanske městno. Ze škitnej drastu podaštaj so wobornikaj do kontejnera. Wonaj móžeštaj změrować, zo jednaše so jeničce wo skóncowanu wopłóčkowu rołu a zo žadyn strach njewobsteješe.

Policija (28.12.20)

póndźela, 28. decembera 2020 spisane wot:

Dar wuspytać chcył

Kamjenc. K hodam darjeny e-scooter chcyše prěni dźeń hód 14lětny w Kamjencu wuspytać. Na Bambruchskej dróze pak jědźeše wón z nim wobsadce policajskeho awta runjewon do rukow. Zastojnicy porokowachu, zo njebě dwukolesaty nastroj zawěsćeny a pósłachu hólca domoj, wězo nóžkujo.

Mopedaj fuk

Wojerecy. Paduši, kotřiž su hodowne dny mopedaj typa Simson S 50 we Wojerecach a Niskej pokradnyli, su potrjechenym hodowne dny chětro skepsali. W času wot póndźele hač do soboty zadobychu so cuzy do garaže we Wojerecach a spakosćichu z njeje módry moped. Wón drje njebě přizjewjeny a njeměješe tuž tež žanu zawěsćensku značku. Při­wšěm trochuje jeho wobsedźer hódnotu jězdźidła na 2 500 eurow. Na Simson S 51 N měrjachu so paduši prěni dźeń hód w Niskej a pokradnychu bruny moped w popołdnišich hodźinach z dwora statoka. Na jězdźidle přičinjena zawěsćenska značka: 719 UXT. Po informacijach policije trochuje wobsedźer hódnotu mopeda na něhdźe 1 000 eurow. Za woběmaj jězdźidłomaj policija nětko slědźi.

Policija (23.12.20)

srjeda, 23. decembera 2020 spisane wot:

Paduši hnydom dwójce we wsy

Nadźanecy. W běhu něšto dnjow su paduši hnydom dwójce Nadźanecy (Nadelwitz) pola Budyšina „wopytali“. Kaž policija rozprawja, so woni hižo minjeny kónc tydźenja do składa awtowych wobručow zadobychu a dotal njeznatu ličbu kompletnych wobručow rozdźělnych fabrikatow pokradnychu. Kotry wobjim rubizna ma a kelko wěcneje škody je při padu­stwje nastało, dotal znate njeje. Wčera wječor pobychu cuzy znowa w Nadźanecach a spytachu so tam do kontejnera firmy zadobyć. Při namócnym zachadźenju načinichu skućićeljo něhdźe 2 000 eurow wěcneje škody. Do kontejnera zadobyć pak so jim přiwšěm njeporadźi. Přisłušna kriminalna słužba wobaj padaj přepytuje – mjez druhim tež, hač jedna so wo samsnych kriminelnych ludźi.

nawěšk

nowostki LND