Warnuja před wobšudnikami

Budyšin. Žołmu wobšudniskich telefonatow je policija wčera w Hornjej Łužicy zwěsćiła. Z Kamjenca, Kumwałda, Załomja a Lubija je wjace hač dźesać wotpowědnych pokiwow wobydlerjow dóšło. Na zbožo nihdźe škoda nastała njeje. Zo by tak wostało, měli ludźo kedźbliwi być. Wobšudnicy přizjewja so jako policisća a mjenuja samo čisło swojeho běrowa, najskerje zo by to wěrje podobnje klinčało. W někotrych padach běchu tež pozdatni swójbni při aparaće. Zwjetša woni ludźom napowědachu, zo bě so njezbožo stało, zo je něchtó zemrěł a zo dyrbi zawinowar do jastwa. Tomu móhło so z kawciju wotwobarać. Za to žadachu wot zawołanych hač do 50 000 eurow. Policija namołwja ludźi, so wobwliwować njedać a cuzym na žadyn pad pjenjezy abo debjenki přepodać. Kohož su skućićeljo zazwonili, njech so pola policije přizjewi.

Wjele pjenjez zhubił

Łuty. Kaž policija hakle nětko zdźěli, bě wobydler Łutow minjene tydźenje z woporom wobšudnikow. Na internetnej stronje, kotraž seriozna skutkowaše, inwe­stowaše muž pjećcyfrowu sumu pjenjez do tak mjenowaneje kryptoweje měny. Pozdźišo so wukopa, zo su pje­njezy fuk. Wojerowska kriminalna słužba so z padom zaběra.

Zasadźenje wuža dla

Kamjenc. Mortweho hada dla su wutoru w Kamjencu policiju zasadźili. Wu­stróžana žona připołdnju zdźěli, zo je hada wuhladała. Jako zastojnicy dojědźechu, zwěsćichu, zo je to njestrašny wuž (Ringelnatter). Mortwe zwěrjo zrumowachu.

Awto do kolesa zrazyło

Mały Wjelkow. Ćežke wobchadne nje­zbožo stało je so wutoru w Małym Wjelkowje. Tam je 57lětna wodźerka Renaulta naprawo na zwjazkowu dróhu B 96 wotbočiła. Při tym njewobkedźbowaše wona kolesowarja, kiž bě do směra na Budyšin po puću. 72lětny muž so při zražce ćežko zrani, tak zo dyrbjachu jeho do chorownje dowjezć.

Pohonč so zranił

Krěpjecy. Z njewšědnym njezbožom je so policija póndźelu připołdnju w Krěpjecach pola Halštrowa zaběrała. Tam bě konjacy zapřah po puću. Jako so kóń nadobo „zesamostatni“ a na pohonča hižo njeposłuchaše, padny 70lětny muž ze zapřaha. Wón bě so na hłowje zranił. Kaž policija zdźěli, kóń ze zapřahom dale běžeše. Štyrinohača pak pozdźišo zaso dosahnychu.

Rěku zanjerodźili

Budyšin. Dźakowano pokiwej swědka je policija njedźelu wječor zwěsćiła, zo je Sprjewja w Budyšinje při Mosće swjateho ducha zanjerodźena. Na wodźe płuwaše módra so błyšćata maćizna, při kotrejž so po wšěm zdaću wo lak jednaše. Alarmowana wohnjowa wobora je proby z rěki wzała. Pozdźišo tež zwěsćichu, hdźe je so maćizna do rěki dóstała. Kriminalna policija pad dale přepytuje.

Spytaja wobšudźić

Budyšin. Wot měrca tohole lěta dóstawaja wobydlerjo a firmy w Budyskim a Zhorjelskim wokrjesu mailki abo listy, kotrychž wotpósłar je pječa Němska zakonska zawěsćernja za njezboža (DGUV). W nich připowědźa so nowy digitalny model prewencije, za kotryž měli adresaća pjenjezy na španiske konto přepokazać. Před tym policija wuraznje warnuje. Štóž je tajku mailku dóstał, njech to policiji zdźěli, zo móhli zastojnicy za woprawdźitym wotpósłarjom slědźić.