Policija (03.05.24)
Wulka škoda w chorowni
Kamjenc. Mjeztym zo hewak w Kamjenskej chorowni pacientow hoja, dyrbjachu tam nětko policiju wołać. W nocy na srjedu su njeznaći wulku wěcnu škodu načinili. Kaž policija rozprawja, woni po wšěm zdaću wodowy honač manipulowachu, tak zo něhdźe 5 000 litrow wody wuběža. Při tym wobškodźichu so špundowanje, wjerch pincy, sćěny, přewětrjenska připrawa a lampy. Po prěnim trochowanju wučinja škoda něhdźe 50 000 eurow, njeje pak hišće doskónčnje wobličena. Nětko pytaja swědkow, kotřiž su snano něšto wobkedźbowali. Pokiwy přijimuja pod 03578/ 35 20.
Policija (02.05.24)
Za test přepjany był
Biskopicy. Z wopitymi kolesowarjemi dyrbi so policija nastajnosći zaběrać. Zo pak je něchtó tak pjany, zo ani alkoholowy test njezmištruje, so přehusto njestawa. Wutoru wječor su policisća w Biskopicach tajki pad dožiwili. Tam chcychu kolesowarja kontrolować. Tón pak přikaz, zo ma zastać, ignorowaše. Na to policisća jeho z awtom přesćahnychu a před nim zastachu. Muž pak njebě kmany tohorunja zastać a do słužbneho awta zastojnikow zajědźe. Na awće nasta při tym něhdźe 150 eurow škody. Poskićeny alkoholowy test Biskopičan zmištrować njemóžeše. Zastojnicy jemu tuž dalšu jězbu z kolesom zakazachu a přikazachu, zo ma krej dać, zo móhli zwěsćić, kelko alkohola je wón pił. Muž dyrbi so nětko wohroženja nadróžneho wobchada dla zamołwić, w policajskej rozprawje rěka.
Policija (25.04.24)
Ćěkanje pomhało njeje
Njedźichow. Po wšěm zdaću čuwy zhubił je we wčerawšich rańšich hodźinach wodźer Audija A 6 Avant, jako w Njedźichowje policajske awto za sobu wuhlada. Muž stupi na płun a smaleše zdźěla hač do 160 km/h spěšnje po statnymaj dróhomaj S 94 a S 92 kaž tež přez Lěsku (Lieske) a Debricy (Döbra) do směra na Kamjenc. Policisća jědźechu za nim, zhubichu pak Audi z wočow. Dokelž běchu zastojnicy čisło awta spóznali, wopytachu woni 27lětneho doma. Při tym so wukopa, zo měješe młody muž 0,4 promilow alkohola w kreji. Najskerje bě to přičina nócneho ćěkanja. Wón změje so nětko podhlada zakazaneho awtoweho wubědźowanja dla zamołwić.
Policija (24.04.24)
Šofer transportera zemrěł
Brunow. Při ćežkim wobchadnym njezbožu je wčera wječor na S 100 pola Brunowa (Brauna) wodźer transportera zemrěł. Wón bě z wotmachom do štoma zrazył a bu při zražce z awta ćisnjeny. We wobkruhu sto metrow pytachu wobornicy za dźělemi awta a ćěła.
Policija (19.04.24)
Wjele škody po zražce
Halštrow. Złe sćěhi měješe srjedu na pózdnim wječoru wobchadne njezbožo na statnej dróze S 94 při wotbóčce do Halštrowa. Tam bě 24lětna žona ze swojim Honda po puću, jako krótko do 23 hodź. sorna přez puć a runu smuhu do awta skoči. Zražki dla zajědźe wodźerka na lěwym boku jězdnje do skłoniny a zwróći. Skónčnje pak Honda zaso na kolesach, ale do nawopačneho směra steješe. Kaž policija zdźěli, so 24lětna snadnje zrani. Ze swojim awtom pak wona hižo dale jěć njemóžeše. Jězdźidło dyrbješe wona wotwlec dać. Po informacijach policije nasta něhdźe 15 000 eurow škody.
Policija (15.04.24)
Jězbna dowolnosć fuk
Malešecy. Při wobchadnej kontroli sobotu w Delnjej Hórce policisća zwěsćichu, zo steješe 35lětny wodźer VWja pod wliwom alkohola. Pola njeho naměrichu 1,42 promilow. Jeho jězbnu dowolnosć sej zastojnicy hnydom wobchowachu. Muž změje so nětko pjanosće w nadróžnym wobchadźe dla zamołwić.
Policija (12.04.24)
Lkw piwo zhubił
Habrachćicy. Wodźer piwoweho awta je štwórtk rano w Habrachćicach (Ebersbach) dźěle swojeje nakładowaneje twory zhubił. 43lětny po wšěm zdaću kašćiki prawje zawěsćił njeje. W prawej křiwicy so něhdźe połojca cyłkownje něhdźe 150 kašćikow z nakładneho awta suny a na puć padny. Dróhu dyrbjachu zdźěla zawrěć, zo móhli wohnjowi wobornicy rozbite bleše a kašćiki rumować. Wěcnu škodu trochuja na něšto wjace hač tysac eurow.
Policija (11.04.24)
W lěsu so paliło
Spale. Z dotal njeznateje přičiny je so wutoru wječor pola Spalow čwak lěsa palił. Wobydler je to wobkedźbował a krótko do 21.30 hodź. Wojerowsku wuchowansku dispatchernju zazwonił. Wottam wohnjowu woboru a policiju alarmowachu. Po informacijach Zhorjelskeje policajskeje direkcije wupřestrě so woheń na něhdźe 200 kwadratnych metrow. Za čas hašenja dyrbjachu wokrjesnu dróhu mjez Spalemi a Mučowom dospołnje zawrěć. Krótko do napoł dwanaćich běchu płomjenja podušene, tak zo móžachu tež dróhu zaso wočinić. Wojerowski policajski rewěr přepytuje w tym padźe lochkomyslneho zapalerstwa dla.
Policija (10.04.24)
Nimale dwójce tak spěšnje
Kulow. Zastojnicy Wojerowskeho policajskeho rewěra a wobchadneje stražowanskeje słužby su póndźelu dopołdnja na statnej dróze S 95 w Kulowje kombinowanu kontrolu spěšnosće přewjedli. Při wotbóčce wodočisćernje do směra na Wóslink je 50 km/h dowolenych. Wot 450 jězdźidłow, kotrež nimo měrjenskeje připrawy jědźechu, bě 122 přespěšnych. 70 šoferam kiwa pokuta, tamnym warnowanje. Najspěšniši bě wodźer VWja z Budyskim čisłom, kotrehož błysknychu ze 97 km/h. Wón změje nětko 400 eurow pokuty płaćić, dóstanje dwaj dypkaj w Flensburgu a dyrbi měsac nóžkować.
Elektrokoleso pokradnyli
Budyšin. W nocy na póndźelu su paduši na Budyskej Ostwaldowej elektrokoleso pokradnyli. Woni zadobychu so do pincy wjaceswójbneho domu a wzachu koleso typa Cube w hódnoće něhdźe 3 200 eurow sobu.
Policija (08.04.24)
Jehnjo z pastwy pokradnyli
Kulow. Móhłrjec pojutrownu rubiznu su sej njeznaći w Kulowje wupytali. Tam je so w nocy na pjatk młody boran z pastwy na Koćinskim puću zhubił. Jehnjo z čornej hłowu měješe po informacijach policije hódnotu něhdźe 150 eurow. Kriminalna słužba pad přepytuje.
