Policija (12.10.22)
Při telefonje wobšudźili
Budyšin. 73lětneho Budyšana su njeznaći předwčerawšim wobšudźili a jemu štyricyfrowu sumu pjenjez wulišćili. Cuzy muž so přez whatsapp pola škodowaneho přizjewi a so jako jeho syn wudawaše. Jemu so poradźi rentnarjej napowědać, zo je w nuzowym połoženju. Dobroćiwy Budyšan přepokaza na to nimale 4 000 eurow, zo by pozdatnemu synej pomhał. Jako sej wobšudnik na to dalše pjenjezy žadaše, bě to 73lětnemu podhladne a wón informowaše policiju.
Policija (11.10.22)
Štom pokradnyć spytali
Trjebin. Na njewšědnu rubiznu měrjachu so njeznaći minjeny kónc tydźenja w Trjebinje. Tam podachu so na priwatnu ležownosć a započachu aziski klon wuryć. Dokónčili pak woni swój njeskutk njejsu. Snano je jich něchtó mylił, snano pak bě dźěło přećežke, přetož aziski klon ma chětro sylne korjenje. Přiwšěm je policija na městnje slědy zawěsćiła a nětko za skućićelemi pyta.
Z wobchoda pjenjezy spakosćili
Budyšin. Njeznaći su so w nocy na njedźelu do wobchoda na Budyskej Bohatej hasy zadobyli. Kaž policija rozprawja, woni we wobchodźe njemdrje zachadźachu, mobiliar skóncowachu a pjenjezy pokradnychu. Wo kotru sumu so jedna, bohužel znate njeje.
Policija (10.10.22)
Šofer kóčku wusadźił
Jědlow. Přeńdźenje přećiwo zakonjej wo škiće zwěrjatow bu sobotu Kamjenskemu policajskemu rewěrej znate. Swědk bě wobkedźbował, kak wodźer wosoboweho awta na statnej dróze S 94 blisko Jědlowa (Gödlau) mału kóčku z awta wza a wusadźi. Na to jědźeše muž dale. Informowani policisća pozdźišo kóčku namakachu a do zwěrjatownje dowjezechu. Njeskutk muža policisća přizjewichu.
Policija (07.10.22)
Grat pokradnyli
Bórkhamor. Grat w hódnoće něhdźe 7 000 eurow su njeznaći w nocy na srjedu w Bórkhamoru pokradnyli. Woni přewinychu płót ležownosće a zadobychu so do garaže. Z njeje wzachu wjacore motorske piły a točenske rězadło sobu. Škodowana firma njeje jeno swój grat zhubiła, ale poćerpje nimo toho 1 500 eurow wěcneje škody, policija rozprawja.
Policija (06.10.22)
Twarskej mašinje pokradnyli
Błohašecy. Dohromady 60 000 eurow škody nasta w nocy na wutoru w Błohašecach, jako njeznaći z firmy bager a kolesowy nakładowak pokradnychu. Zaswěćiwši mašinje jědźechu skućićeljo z nimaj přez ležownosće třoch zawodow a při tym wjacore płoty skóncowachu. Po wšěm zdaću paduši na to mašinje na Lkw połožichu a z nim wotjědźechu.
Policija (05.10.22)
Padustwu zadźěwał
Jaseńca. Kedźbliwy sobudźěłaćer firmy je wčera rano w Jaseńcy padustwu diesela zadźěwał. Něhdźe w 5 hodź. wuhlada wón na terenje zawoda njeznatu wosobu, kotraž chcyše z twarskich mašinow diesel wotklumpać. Sobudźěłaćer pozdatneho skućićela narěča, na to njeznaty ćekny. Po prěnim přepytowanju policije žana wěcna škoda nastała njeje, w mašinach tež žadyn diesel njepobrachuje.
Policija (04.10.22)
Konje při wohenju zahinyli
Brěžki. Wulku wěcnu, ale tež emocionalnu škodu zawostajił je woheń, kiž je w nocy na póndźelu na Zdźarowskej dróze w Brěžkach wudyrił. Z dotal njeznateje přičiny paleše so tam synowa bróžnja ratarskeho zawoda. Woheń zwěsćili a wobornikow alarmowali su krótko po połnocy. Kaž policija zdźěli so synowy skład dospołnje wotpali. Traktor, kiž pódla twarjenja steješe, so tohorunja zniči. Drje najwjetša škoda za wobsedźerja pak bě, zo je šěsć koni, kotrež běchu w bróžni zaměstnjene, zahinyło. Cyłkowna škoda njeje hišće powobličena, leži pak po dotalnych informacijach w šěsćcyfrowym wobłuku. Zasadźeni běchu dobrowólni wohnjowi wobornicy wokolnych wsow kaž tež Wojerowska powołanska wohnjowa wobora. Statnu dróhu S 285 dyrbjachu za čas hašenja dospołnje zawrěć. Za přičinami wohenja policija nětko slědźi.
Policija (30.09.22)
Kolesowarka policista biła
Budyšin. Na Budyskej Tuchorskej dróze je 71lětna kolesowarka srjedu popołdnju policista nadběhowała. Zastojnicy su podawk z bodycam dokumentowali. Seniorka běše zastojnikam napadnyła, dokelž njeje so prawje zadźeržała. Na to běchu žonu narěčeli. Jej pak pobrachowaše dowidźenje, zo nima wužiwać chódnik za pěškow ale dróhu, je-li kolesujo po puću. Dale njeje chcyła swoju identitu podać. Zastojnicy jej na to zakazachu z kolesom dale na chódniku jěć. Tomu pak so žona wobaraše a swoje koleso policistam do nohow suwaše a do nich borkaše. Jednomu policistej biješe žona z ruku mjezwoči. Zastojnik njebu při tutej akciji zranjeny. Policisća zhotowichu pokutnu informaciju nadběha na zastojnika dla. Nětko so tudyša kriminalna słužba z tutym padom zaběra. Do přepytowanja maja so natočenja na bodycam zapřijeć.
Policija (29.09.22)
Njezbožo z lochce zranjenymaj
Budyšin. Na njezbožu, kotrež bě so wutoru nawječor njewobkedźbowanja předjězby dla stało, stej so wobdźělenaj lochce zraniłoj. 65lětna šoferka wosoboweho awta marki Seat chcyše z Bórkskeje dróhi dolěwa na zwjazkowu dróhu 156 do směra na Delnju Hórku wotbočić. Při tym njeje wona předjězbu 59lětneho šofera wosoboweho awta marki Opel dosć derje wobkedźbowała. Wobaj šoferaj dyrbještaj so lochkeho zranjenja dla do chorownje na lěkowanje podać. Wěcna škoda wučinja něhdźe 18 000 eurow.
Policija (28.09.22)
Po njezbožu cyle jednorje dale jěł
Delni Wujězd. Na zwjazkowej dróze B 156, mjez wotbóčku Delni Wujězd/Bjerwałd je 58lětny šofer awta marki Opel póndźelu připołdnju njezbožo zawinił. Wón bě před nim jěduce nakładne kaž tež awto marki Ford w dołhej křiwicy přesćahnył a wodźidłomaj do boka zajěł. Potom jědźeše bjez zastaća dale do směra na Hamor. Šofer Forda bě sej značku spomjatkował a ju policiji sposrědkował. Ta je na to zwěsćiła, zo bě šofer Opela zranjeny a zo bě alkohol pił.
