Pytaja za 14lětnej
Běła Woda. Zastojnicy policajskeho rewěra w Běłej Wodźe pytaja hižo wot srjedy, 5. junija, za 14lětnej Ashley D. a proša ludnosć wo podpěru. Młodostna je šwižna, něhdźe 1,60 m wulka a waži 63 kg. Wona ma ćmowo-swětłe, napoł dołhe włosy a nosy nawoči. Prawdźepodobnje běše so wona naposledk pak čorny pulower a čorne cholowy abo běły pulower a zelene cholowy woblekła. Prošu podajće pokiwy na policiju w Běłej Wodźe pod čisłom 03576- 2620 abo na kóždym policajskim rewěrje we wašej wokolinje.
Tankownju wobškodźił a ćeknył
Budyšin. Dotal njeznaty šofer nakładneho awta je tydźenja štwórtk do tankowanskeho stołpa na wotpočnišću Hornja Łužica-juh při awtodróze A4 zrazył a potom wotjěł. Škoda wučinja něhdźe 1 000 eurow. Policija přepytuje njedowoleneho wotsalenja z městna njezboža dla.
W truskalcach „pobyli“
Kamjenc. Zastojnicy policajskeho rewěra w Kamjencu su w nocy na srjedu na polu pola Gelenauwa dweju pozdatneju paduchow truskalcow lepili. Swědkojo běchu jich informowali. Skućićelaj běštaj 72lětny muž a 71lětna žona. Měještaj bow při sebi, kotryž bě k třećinje z truskalcami pjelnjeny. Wobaj spytaštaj so před zastojnikami schować. Škoda za bura wučinja něhdźe 20 eurow.
Do mopeda zrazył
Mješicy. Njeznaty šofer wosoboweho awta je póndźelu rano w Bukečan gmejnskim dźělu Mješicach do mopeda zrazył, potom pak dale jěł. 19lětny młodostny běše z mopedom z Bukec do Mješic po puću. Před zachodom do wsy wón zaborzdźi. Tole za nim jěducy wodźer awta po wšěm zdaću přewidźa a do njeho zrazy. Młodostny so lochce zrani. Wěcna škoda na mopedźe wučinja 500 eurow.
Kolesowarku přewidźał
Žitawa. Ze swojim nakładnym awtom je póndźelu wječor 73lětny muž do kolesowarki w Žitawje zrazył. 13lětna holca běše na kolesowanskim pućiku na Měrowej do směra naměsta Ottoka po puću jako awto typa Unimog z wujězda ležownosće na dróhu wujědźe. Winik zawostaji swoje personalije, po tym pak městno njezboža spěšnje wopušći. Swědk zawoła policiju, dokelž spózna, zo holca zranjena běše. Chorobne awto dowjeze škodowanu do chorownje k přepytowanju. Zastojnicy policije su jězdźerja mjeztym doma wopytali a jemu skóržbu dla njedowoleneho wotsalenja wot městna njezboža přepodali.
Trójny njeskutk
Budyšin. Hnydom trójce je 44lětny muž póndźelu popołdnju w Budyšinje skućićelstwo „zworał“. Najebać zakaza domu zastupi do předawanišća na Hošic hasy. Tam namóra špundowanje z permanentnym pisakom. Naposledk wołaše parole, kotrež po wustawje zakazane su. Sobudźěłaćerjo filiale jeho namołwjachu, twarjenje wopušćić. Nětko dyrbi so skućićel trójneho přeńdźenja dla před sudnistwom zamołwić.
Pod wliwom drogow znjezbožił
Pytaja za Tatianu B.
Zhorjelc. Hižo wot 17. meje pyta Zhorjelska policija za 16lětnej Tatianu B. Naposledk běše wona na dróze Bismarcka w Zhorjelcu po puću. Nětko prosy policija ludnosć wo pomoc. Zhubjena je 1,55 cm wulka, je šwižna a ma hładke, dołhe, swětłe włosy. Naposledk běše wona w čornych legginsach, ćmowej stepowanej kapje a w běłych sportowych črijach po puću. Pokiwy podajće prošu telefonisce pod čo. 03581 650 0.
Diesel pokradnyli
Kodrecy (Kodersdorf). Dohromady 350 litrow diesela su njeznaći skućićeljo njedźelu w nocy z dweju nakładneju awtow na parkowanišću „Wiesaer Forst“ při awtodróze A4 pokradnyli. Trochowana hódnota spakosćeneho diesela je 525 eurow. Škoda w zwisku ze załamanjom wučinja 50 eurow.
Policija (31.05.24)
Rentnarku do rozmołwy zapletli
Budyšin. Jako chcyše wuměnkarka srjedu w pjenježnym instituće na Weinertowej w Budyšinje z awtomata pjenjezy wotzběhnyć, zaplećechu ju njeznaći do rozmołwy. Při tym wuskušichu mužej a žona tajne čisło 86lětneje a samo jeje kartku z awtomata wzachu. Na to wotzběhny wobšudniska trójka wjace hač tysac eurow z konta staruški. Policija před tymle trikom warnuje a prosy, staršich swójbnych na to skedźbnić.
Policija (30.05.24)
Sornje so wuwinyć chcył
Malešecy. Ćežke wobchadne njezbožo je so wutoru wječor pola Malešec stało. Před BMWjom 22lětneho šofera chcyše sorna přez puć skočić. Młody muž spyta so wuwinyć, zhubi pak kontrolu nad jězdźidłom a zrazy frontalnje do štoma. Jeho dowjezechu z helikopterom do chorownje. Na awće nasta 15 000 eurow škody. Policija při tej składnosći radźi, so zwěrjatam na puću nic wuwinyć. Při tajkich manewrach spěšnje kontrolu zhubiš, štož wjedźe k hóršim škodam.
Policija (29.05.24)
Do płota zajěł a so zminył
Delni Wujězd. Roznošowar paketow je póndźelu w Delnim Wujězdźe škodu načinił. Jako z priwatneje ležownosće wróćo wujědźe, zajědźe do płota, hdźež bě klinkačk připrawjeny. Při tym nasta něhdźe 3 000 eurow škody. Wodźer awta so z městna njezboža zminy.
Policija (28.05.24)
Žiwe płoty zapalili
Kamjenc. Zapalerjo běchu w nocy na póndźelu w Kamjencu po puću a su wjacore žiwe płoty zapalili. Stało je so to na Njeswačanskej dróze, blisko Marijneje cyrkwje a na Dittrichowej. Dwójce su wobydlerjo płomjenja hašeli, jónu wohnjowi wobornicy. Nětko pyta policija swědkow, kotřiž su něšto wobkedźbowali.
Policija (27.05.24)
Lampy a debjenki kradnyli
Kamjenc. Bydlenski dom při Kamjenskej Pastwinej horje bě w nocy na sobotu cil njeznatych paduchow. Přez rozbite wokno dóstachu so woni do twarjenja. Z njeho pokradnychu drohe lampy a debjenki. Kelko škody su při tym načinili, dotal znate njeje.
Policija (22.05.24)
Dwójce bjez dowolnosće
Wojerecy. 32lětnu wodźerku VWja su póndźelu wječor we Wojerecach kontrolowali. Při tym so wukopa, zo wona scyła žanu jězbnu dowolnosć njeměješe. Nimo toho steješe žona pod wliwom drogow. Zo wona dale jěć njesmědźeše, pak ju smorže staraše. Tři hodźiny pozdźišo ju policisća znowa za wodźidłom jeje awta lepichu.
