Policija (10.10.23)
Při njezbožu so zraniłoj
Pančicy-Kukow. Dwě zranjenej wosobje a tójšto wěcneje škody je wuslědk wobchadneho njezboža njedźelu popołdnju pola Pančic-Kukowa. Tam jědźeše wodźer Renaulta z Chróšćanskeho směra, po wšěm zdaću wosrjedź dróhi, kaž policija zdźěli. Jemu napřećo přijědźe wodźerka VWja. Wona drje spyta so hišće wuwinyć, njemóžeše pak zražce zadźěwać. Při tym so 42lětna šoferka VWja a jeje dźěćo zraništej. Jeju dowjezechu do chorownje. Na jězdźidłomaj nasta něhdźe 30 000 eurow škody. Wobě awće dyrbjachu wotwlec. 26lětny wodźer Renaulta změje so lochkomyslneho zranjenja ćěła dla zamołwić.
Policija (06.10.23)
Pjenjezy pokradnyli
Worklecy. Z njewšědnym padustwom zaběra so policija nětko we Worklecach. W nocy na srjedu zadobychu so tam paduši do twarjenja na Šulskej. Kaž policija dale zdźěli, pokradnychu paduši škleńčane sudobjo, w kotrymž běchu wjacore sta eurow hotowych pjenjez. Nimo toho nasta něhdźe 300 eurow wěcneje škody.
Plesternaki mjetali
Wojerecy. Plesternaki su njeznaći minjene dny we Wojerecach do woknow twarjenja na Rybarskej mjetali. Njedočinkam pak so njeporadźi, škleńcu woknow rozbić. Přiwšěm nasta 2 000 eurow škody.
Policija (05.10.23)
Zawinowar so přizjewił
Wojerecy. Hižo minjeny pjatk je so na parkowanišću Wojerowskeje kupnicy wobchadne njezbožo stało. Zawinowar pak so zminy. Předwčerawšim so muž na policajskim rewěrje přizjewi a njezbožo přizna. Při tym so wukopa, zo 65lětny hižo wot julija žanu jězbnu dowolnosć njewobsedźi a tuž awto scyła wodźić směł njeby.
Policija (04.10.23)
Zbožo w njezbožu měł
Kamjenc. Wichor je wčera wječor w Hornjej Łužicy wjacore štomy powalił a tak škodu načinił. Kedźbliweho jandźela pěstona měješe po wšěm zdaću šofer w Kamjencu. Wosrjedź jězby padny štom na jeho wosobowe awto. Kaž z dźiwom so muž njezrani. Zhorjelska policajska direkcija zliči w běhu dweju hodźin 13 zasadźenjow. Zwjetša dyrbjachu wohnjowi wobornicy štomy rumować.
Policija (02.10.23)
Keramiku pokradnyłoj
Wjazońca. Hornčerske wiki minjeny kónc tydźenja we Wjazońcy njejsu jenož lubowarjow keramiki přiwabili, ale tež paduchow. W nocy na njedźelu staj tam mužej ze zamknjeneho předawanišća keramiske wudźěłki w hódnoće 85 eurow spakosćiłoj. Sobudźěłaćer wěstotneje słužby je jednoho z njeju dosahnył a policiji přepodał. Tamny najprjedy ćekny. Policisća pak jeho pozdźišo tohorunja wuslědźichu.
Policija (29.09.23)
Wopačni třěchikryjerjo
Wojerecy. Při kromje puća stejacy transporter je policija srjedu we Wojerecach kontrolowała. W awće běchu wjacore wosoby. Při kontroli zjewi so dalša wosoba, kotraž runje ze susodneje ležownosće přichadźeše. Kaž policija rozprawja, bě muž tam po wšěm zdaću podarmo spytał, třěchikryjerske dźěła poskićeć. Štyrjo rumunscy staćenjo dóstachu přizjewjenje dla podhlada, zo su so přećiwo přemysłowemu porjadej přešli, dokelž ani přemysłowe přizjewjenje ani dalše trěbne podłožki njemějachu. Najskerje su mužojo w starobje 14 do 58 lět za podobne delikty w druhich zwjazkowych krajach zamołwići.
Policija (28.09.23)
Plantažu konopje namakali
Hermsdorf. Pódla awtodróhi A 4 pola Hermsdorfa su wobydlerjo póndźelu plantažu konopje namakali a policiju informowali. Zastojnicy zwěsćichu na to 250 tajkich rostlin na kromje pola ze słónčnymi róžemi. Kriminalna policija pad přepytuje.
Policija (27.09.23)
Padustwu zadźěwał
Niska. Sobudźěłaćer wagonownje w Niskej je na zawodnej ležownosći póndźelu rano paducha lepił. Wón informowaše hnydom policiju. Při přepytowanju skućićela namaka wona nimo metaloweho šrota w hódnoće 500 eurow tež mjeńše mnóstwo konopeje.
Statny škit pyta swědkow
Cyžecy. W zwisku z widejom w socialnych syćach, w kotrymž su młodostni wospjetnje z hitlerskim postrowom na oktoberskim swjedźenju w Cyžecach widźeć, je nětko decernat statneho škita přepytowanja přewzał. Za to pyta nadal swědkow.
Policija (22.09.23)
700 štomikow wutorhnyli
Smělnja. Wandalojo su minjeny čas w lěsu pola Smělnje w gmejnje Smělnja-Póckowy po wšěm zdaću bjez rozuma zachadźeli. Hdźež bu lěs hakle před třomi lětami zalěsnjeny, wutorhnychu woni něhdźe 700 douglasijow abo je wotłamachu, policija zdźěli. Štomiki běchu něhdźe pjeć lět stare. Wěcna škoda wučinja znajmjeńša něhdźe 7 000 eurow. Policija pad přepytuje.
Policija (21.09.23)
Wobšudnistwu zadźěwał
Budyšin. Žonje w Budyšinje je wutoru pozdatny sobudźěłaćer předewzaća Paypala při telefonje napowědał, zo je něchtó 500 eurow wot jeje konta wotzběhnył. Žona pak móhła to storněrować, hdyž tak mjenowane steam-karty kupi a tajne čisła zdźěli. Jeje mandźelski so tuž na puć do přichodneho wobchoda nastaji a chcyše tam tajke karty kupić. Při kasy jeho kedźbliwy sobudźěłaćer wobchoda na to skedźbni, zo móhło so snano wo wobšudnistwo jednać a zo měł tuž radšo na policiju zwonić. Sobudźěłaćer wobchoda a přiwołani policisća móžachu tak pjenježnej škodźe zadźěwać.
