Policija (25.08.23)
W Budyšinje so paliło
Budyšin. Na Budyskej Pawoła Njekowej dróze je so dźensa rano třěcha wjaceswójbneho domu paliła. Hišće dźensa dopołdnja su tam wohnjowi wobornicy płomjenja hašeli, tak zo njemóžeše so woheń dale po domje a susodnych twarjenjach wupřestrěć. Wšitcy wobydlerjo domu móžachu so sčasom wuchować. Dohromady bě sto zasadźenskich mocow Budyskeje wohnjoweje wobory a wjesnych wohnjowych woborow, wohnjoweju woborow Biskopicy a Wjelećin kaž tež zasadźenske skupiny policije a wuchowanskeje słužby na městnje.
Policija (24.08.23)
Před šulu wobchad kontrolowali
Wojerecy. Před zakładnej šulu na kromje města bě byrgarski policist kontrolował, hač so starši, kotrež dźěći do šule woža, na prawidła dźerža. Tři přestupjenja zakaza parkowanja wón zwěsći a wodźerjow awtow ertnje porokowa.
Policija (23.08.23)
Šofer policiji najprjedy ćeknył
Budyšin. Zastojnikam Budyskeho policajskeho rewěra napadny zawčerawšim wječor w Strowotnej studni čerwjeny Suzuki Alto. Šofer trochu spodźiwnje awto wodźeše. Zastojnicy spytachu jeho zadźeržeć, tola wón ćekny. Policisća awto hač do Krakec přesćěhowachu, hdźež zajědźe šofer na ležownosć. Zastojnicy awto tak wotstajichu zo njemóžeše wodźer Suzukija hižo ćeknyć. To bě jemu wšojedne a prasny do praweje strony policajskeho awta. Test pozdatnu přičinu strašneje jězby wujasni. Tak zwěsćichu pola šofera 2,82 promile w dychu.
Jedna wosoba zemrěła
Wojerecy. Z dotal njeznateje přičiny je wčera rano woheń při Wojerowskej Budyskej aleji wudyriło. Wobydler wjaceswójbneho domu bě to pytnył a wohnjowu woboru wołał. Zasadźenske mocy wobydlerjow wuchowachu a woheń hašachu. Jedna wosoba pak hišće na městnje zemrě. Kriminalna policija pad přepytuje
Policija (22.08.23)
Z prokawu třělał
Radeberg. W Großerkmannsdorfje pola Radeberga je muž sobotu na pózdnim wječoru z prokawu na ludźi třělał. Na zbožo njeje wón nikoho trjechił. Zawołana policija z wosebitej jednotku SEK 19lětneho skućićela wuslědźichu. Nětko ma wón z chłostanskim jednanjom ličić.
Policija (21.08.23)
Pozdatne granaty namakali
Haslow. Dźěłaćerjo twarnišća při Čornicy pola Haslowa su minjeny štwórtk popołdnju štyri pozdatne granaty namakali. Fachowcy za wotstronjenje tajkich namakankow su je pruwowali. Kaž so wukopa, jednaše so wo stare sudobja za płun, kotrež fachowcy wěcywustojnje wotstronichu.
Policija staršich poradźuje
Budyšin. Dale a bóle informuje policija na staršiskich wječorach w zakładnych šulach wo wužiwanju medijow kaž šmóratkow a prewenciji. Wjele dźěći dósta tajki nastroj k zastupej do šule. Policija staršich wo digitalnym škiće poradźuje.
Policija (18.08.23)
Drohi njedostatk zwěsćili
Prěčecy. Wobchadna wobstražowanska słužba Budyskeho policajskeho rewěra je předwčerawšim w Prěčecach ratarske mašiny kontrolowała. Při tym napadny zastojnikam 33lětny wodźer traktora z připowěšakom. Wón wožeše wulke walčki słomy, kotrež njeběchu dosć zawěsćene. Nimo toho zwěsćichu techniske njedostatki. Za to změje młody muž 60 eurow płaćić a dóstanje dypk w Flensburgu.
Policija (16.08.23)
Psa jednu nóc zastarali
Tjebin. Njewšědneho hosća mějachu w nocy na wutoru na Běłowodźanskim policajskim rewěrje. Wobydlerjej w Trjebinje bě póndźelu wječor cuzy psyk přiběžał. Dokelž štyrinohač žadyn chip njeměješe a tež žane hinaše pokiwy k jeho wobsedźerjej spóznać njeběchu, dowjeze muž psa k policiji. Zastojnicy so jednu nóc wo njeho starachu. Wutoru rano so potom wobsedźer pola policije přizjewi. Policisća dowjezechu Eddyja, kaž psyk rěkaše, domoj a jeho wolóženemu wobsedźerjej přepodachu.
Policija (15.08.23)
Při jězoru koleso pokradnyli
Wojerecy. Hižo zaso je so při kupanskim jězoru padustwo stało. Po tym zo je so sobotu při Berzdorfskim jězoru pola Zhorjelca awto zhubiło, su njeznaći njedźelu při Šibojskim jězoru elektrokoleso pokradnyli. Wobsedźer bě je blisko kupanskeho pobrjoha wotstajił. Paduši składnosć wužichu a z kolesom wotjědźechu. Škodu trochuje policija na nimale 700 eurow.
Policija (14.08.23)
Při kupanju awto pokradnyli
Zhorjelc. Zo dyrbiš při kupanju na swoje wosobinske wěcy kedźbować, wě nětko wobsedźer wosoboweho awta typa Audi A3. Wón bě so sobotu rano w Berzdorfskim jězoru pola Zhorjelca kupał. W tym času njeznatej wosobje jeho na pobrjohu wotpołožene wosobinske wěcy přepytaštej. Z nich wzaštej awtowy kluč a z Audijom wotjědźeštej. Kaž dalše slědźenja wunjesechu, bě awto hižo bórze na to přez hranicu do Pólskeje jěło. Wone bě něhdźe 8 000 eurow hódne.
Policija (11.08.23)
Dwě zranjenej po wohenju
Běła Woda. Woheń hašeć dyrbjachu předwčerawšim w Běłej Wodźe. Njeznaći běchu na nutřkownym dworje wjacebydlenskeho domu wotpadkowe sudobjo zapalili. Te steješe pod drjewjanym balkonom, kotryž so tohorunja zapali. Płomjenja rozpřestrěchu so na pincu a chódbu twarjenja. Kaž policija rozprawja, chcyštej žonje w starobje 20 a 66 lět dom přez chódbu wopušćić. Při tym pak přewjele kura dychaštej. Wuchowanske mocy dowjezechu wobě do chorownje.
