Policija (06.12.23)
Rentnarce móšnju kradnył
Biskopicy. Hižo před dwěmaj tydźenjomaj su 69lětnej žonje w Biskopicach z toboły móšnju pokradnyli. Kaž policija hakle nětko rozprawja, bě rentnarka 23. nowembra w kupnicy na Hasy Carla Marije von Weber. Po wšěm zdaću je skućićel tobołu žony rozrězał a sej móšnju wzał. Hišće samsny dźeń wón štyricyfrowu sumu pjenjez z konta wuměnkarki wotzběhny. Kriminalna słužba Budyskeho policajskeho rewěra so z tymle padom zaběra. Nětko pytaja swědkow, kotřiž su mjenowany dźeń něšto podhladneho wobkedźbowali. Pokiwy přijimuja pod telefonowym čisłom 03591 3560.
Policija (04.12.23)
Whisky pokradnyli
Budyšin. Lubowarjo whiskyja pobychu sobotu připołdnju w kupnicy na Nowosólskej w Budyšinje. Tam pokradnychu dźesać blešow tohole palenca. Škoda wučinja něhdźe 200 eurow.
Policija (01.12.23)
Rentnarku wobšudźili
Arnsdorf. Z tak mjenowanym šokowym telefonatom su njeznaći wutoru staršej žonje w Arnsdorfje pjenjezy a debjenki wulišćili. Wudawajo, zo je wnučka při njezbožu dźěći moriła, žadaše sej pozdatna policistka 30 000 eurow kawcije. Telko pjenjez rentnarka spočatnje njeměješe. Pozdźišo přepoda wona snadnu pjećcyfrowu sumu pjenjez a štyri złoćane rjećazki. Hakle nazajtra při rozmołwje wona pytny, zo běchu ju njeznaći wobšudźili.
Policija (29.11.23)
Muža do jastwa dowjezli
Kamjenc. Komisar připad je póndźelu policistam w Kamjencu pomhał, wuslědźić muža, za kotrymž hižo dlěje pytachu. Na Halštrowskej dróze podpěrachu woni běrca (Gerichtsvollzieher) při jeho dźěle. Při tym zetkachu 48lětneho, kiž bě w bydlenju na wopyće. Přećiwo njemu předležeše přikaz zajeća. Zastojnicy dowjezechu muža tuž do jastwa, hdźež ma něhdźe pjeć měsacow wostać.
Policija (28.11.23)
Paduši w gratowni
Budyšin. Gratownju dobrowólneje wohnjoweje wobory w jednym z Budyskich měšćanskich dźělow su sej njeznaći w nocy na njedźelu jako cil wupytali. Po tym zo běchu so do jězdźidłoweje hale zadobyli, pokradnychu z jednoho Lkw-ja hydrawliski dźěłowy grat wobornikow w hódnoće něhdźe 5 000 eurow. Nimo toho nasta 2 000 eurow wěcneje škody.
Policija (27.11.23)
Diesel kradnyli
Jaseńca. We wulkim stilu kradnyli su njeznaći w nocy na sobotu w Jaseńcy. Z nakładneho awta a třoch bagrow wotklumpachu woni dohromady něhdźe 1 300 litrow diesela. Dale pokradnychu wšelki grat. Škoda wučinja 3 300 eurow.
Policija (24.11.23)
Strašnu ideju měł
Słona Boršć. Wodźer nakładneho awta je srjedu wječor na awtodróze A4 mjez Słonej Boršću a Hornim Wujězdom strašnu přestawku na nakromnym pasmje awtodróhi zapołožił. Wón bližeše so swojej předpisanej přestawce. Dokelž pak bě wotpočnišćo pola Słoneje Boršće z nakładnymi awtami přepjelnjene, měješe šofer žiwjenjastrašnu ideju, swoje jězdźidło bjez wobswětlenja na nakromnym pasmje parkować. Wobsadka policajskeho awta muža wubudźi a k parkowanišću zwonka awtodróhi přewodźa.
Symbole w prěnim sněze
Biskopicy. Prěni sněh su njeznaći w nocy na srjedu w Biskopicach znjewužiwali a na awće zakazane symbole do njeho mórali. Policija je wšitko zaso wotstroniła.
Policija (23.11.23)
Paduch ćeknył
Wojerecy. K rubježnemu padustwu je wutoru popołdnju w kupnicy na Wojerowskej Šulskej hasy dóšło. 43lětny muž bě sej tam wšelake twory do swojeho nachribjetnika tyknył a chcyše wobchod bjez zapłaćenja wopušćić. Tomu spyta jedna z přistajenych zadźěwać a podhladneho zadźerža. Z ćělnej namocu móžeše so muž wutorhnyć a z kupnicy ćekny. Při tym pak swój nachribjetnik z pokradnjenymi tworami w hódnoće něhdźe 40 eurow zhubi. Dokelž běchu w nachribjetniku wosobinske dokumenty 43lětneho, jeho přiwołana policija spěšnje identifikowa. Wón změje so nětko rubježneho padustwa dla zamołwić, kaž policajska direkcija informuje.
Policija (21.11.23)
Zakazane praskotaki nadešli
Wjelećin. Zastojnicy policajskeho rewěra Budyšin su zašłu sobotu popołdnju wosobowe awto při Awgusta Bebelowej dróze we Wjelećinje přepruwowali. Při tym policisća zwěsćichu, zo bě wodźer awta praskotaki w swojim wozydle měł. Te pak njeběchu něhdźe dopušćene. To woznamjenja přeńdźenje přećiwo zakonjej wo rozbuchlinach. Policisća mužej praskotaki wzachu a je wěsće chowachu. Kriminalna słužba chce 36lětneho Němca nastupajo wumjetowanja njedowoleneho skutka dla słyšeć. Wotpowědne pismo bu jemu posrědkowane.
Policija (20.11.23)
Do awta so zadobyli
Wojerecy. Zašły kónc tydźenja, wot pjatka na sobotu, su so dotal njeznaći do transportera na Wojerowskej Jurija Gagarinowej zadobyli. Awto marki Mercedes Vito bu z namocu wočinjene. Paduši pokradnychu z njeho srědki za rjedźenje we wysokosći połsta eurow. Wěcna škoda wučinja něhdźe 350 eurow.
Kólni běštej cil paduchow
Smochćicy. Hižo zašły tydźeń, sobotu 11. nowembra, su so njeznaći w Smochćicach na zahrodkownišćo měrili. Tam wočinichu z namocu durje dweju kólni a wzachu motorsku piłu, točensku mašinu, mašinu za pačenje drjewa a sadźbu lětnich wobručow sobu. Cyłkowna suma škody je něhdźe 1 450 eurow wysoka. Wěcna škoda wučinja 350 eurow.
