Policija (10.08.23)
Sensory pokradnyli
Budyšin. Tak mjenowane wotstawkowe sensory wosobowych awtow su najskerje pola paduchow požadane. Předwčerawšim dopołdnja wottwarichu njeznaći tajke sensory wot Audija, kiž bě w parkowanskim domje na Budyskej Wonkownej Lawskej wotstajeny. Škoda wučinja 3 600 eurow. Hewak so awto skóncowało njeje, kaž policija zdźěli.
Frontalnje do so zrazyłoj
Budestecy. Ćežke wobchadne njezbožo sta so wčera krótko do připołdnja na Bebelowej w Budestecach. 53lětna wodźerka Suzukija bě z 55lětnym sobujěducym do směra na Wopaku (Oppach) po puću, jako z dotal njeznateje přičiny w lěwej křiwicy na napřećiwnu jězdnju zajědźe a frontalnje do Škody 66lětneho muža zrazy. Wobaj wodźerjej buštaj ćežko zranjenaj, sobujěducy snadnje. Škoda wučinja něhdźe 15 000 eurow.
Policija (09.08.23)
Spěšnosć měrili
Bluń. Předwčerawšim su policisća w Blunju spěšnosć měrili. Hdźež je 30 km/h dowolenych, registrowachu do wobeju směrow 933 jězdźidłow. 52 šoferow jědźeše přespěšnje. Z nich ma 20 wodźerjow pokutu płaćić. Najspěšniši bě Chrysler ze 74 km/h. Jeho šofer ma 400 eurow pokuty płaćić, dóstanje dwaj dypkaj w Flensburgu a dyrbi měsac nóžkować.
Policija (08.08.23)
Tobołku z bydlenja pokradnył
Wojerecy. Wobydlerka bydlenskeho domu we Wojerecach je njedźelu dopołdnja jeno skrótka do pincy šła a njeje bydlenske durje začiniła. Tón wokomik njeznaty wuži a jeje tobołku z wosobinskimi dokumentami a 120 eurami pokradny.
Policija (04.08.23)
Rentnarka móšeń sobu wzała
Wojerecy. 14lětna holca je srjedu na Wojerowskim policajskim rewěrje zdźěliła, zo je jej starša žona móšeń pokradnyła. Kaž holca powědaše, bě wona móšeń w nakupowanskim wozyčku kupnicy zabyła. Tole pytnywši so wróći, ale móšeń bě fuk. Runje w tym wokomiku pak wobkedźbowaše wona při wozyčkach staršu žonu, kotraž pak móšeń pječa widźała njeje. Pozdźišo 14lětna wot sobudźěłaćerki kupnicy zhoni, zo bě wobstražowanska kamera wobkedźbowała, kak starša žona móšeń z wozyčka wza. Policija nětko za žonu pyta.
Policija (03.08.23)
Awto přećežke było
Čorny Hodler. Transporter z trjebanymi awtami je policija w Čornym Hodlerju kontrolowała. Kaž so wukopa, bě wón 590 kilogramow ćeši hač dowolenych 3 500 kilogramow. Waha na wóskomaj bě wo 770 kilogramow překročena.
Policija (02.08.23)
Paducha lepili
Wochozy. Hnydom dwójce su so paduši minjene dny na teren Wochožanskeje brunicoweje jamy zadobyli a kable pokradnyli resp. pokradnyć chcyli. Njedźelu rano stej dwě wosobje něhdźe sto metrow kabla spakosćiłoj a při tym něhdźe 5 000 eurow škody načiniłoj. Wobstražowanska kamera hišće wobkedźbowaše, kak paduchaj ćeknyštaj. Nazajtra z kameru znowa cuze wosoby zwěsćichu. Přiwołana policija lepi na to 31lětneho pólskeho staćana, kiž chcyše runje 300 kilogramow ćežke kable wotnjesć.
Policija (01.08.23)
Wopiteho lepili
Budyšin. Dlěši čas nóžkować drje dyrbi nětko wodźer BMWja, kotrehož je policija njedźelu dopołdnja na Einsteinowej w Budyšinje kontrolowała. Pola njeho naměrichu 1,78 promilow alkohola w kreji. Jemu njejsu na to jenož krej wotewzali, ale tež jězbnu dowolnosć.
Policija (31.07.23)
Wobšudźić chcyłoj
Běła Woda. Mužej w starobje 35 a 46 lět staj sobotu wječor při tankowni na Budyskej dróze w Běłej Wodźe wjacore kanistry z dieselom napjelniłoj. Zličbowanku nimale 400 eurow pak zapłaćić nochcyštaj a wotjědźeštaj. Hnydom alarmowana policija jeju při hraničnym přechodźe w Mužakowje dosahny.
Policija (28.07.23)
Mopedist ćeknył
Trjebin. Wobsadce policajskeho awta je předwčerawšim wječor w Trjebinje moped napadnył, kotryž bě přespěšnje do směra na Slepo po puću. Zastojnicy chcychu wodźerja zadźeržeć, tón pak so jim wuwiny a twochny. Přiwšěm so policistam poradźi podhladneho wuslědźić. Pola njeho doma namakachu tež moped. Kaž so wukopa, 16lětny scyła žanu jězbnu dowolnosć njeměješe. Moped dachu zastojnicy wotwlec.
Policija (27.07.23)
Šofer po njezbožu zemrěł
Nowe Poršicy. Wo wobchadnym njezbožu, kotrež je so předwčerawšim na statnej dróze S 111 w Nowych Poršicach stało (SN wčera rozprawjachu), je policija přidatne informacije wozjewiła, kotrež wčera hakle po skónčenju redakciskeho časa dóńdźechu. 73lětny wodźer Audija, kiž bě zražku z nakładnym awtom zawinił, je wčera rano w chorowni zemrěł.
