Policija (06.04.23)
Dźěl kubłanišća ewakuowali
Budyšin. W Budyskim powołansko-šulskim centrumje w Schillerowych zelenišćanach je so dźensa dopołdnjo kašćik za zawěstki w pincy stareho twarjenja palił.
Kaž Anja Leuschner ze Zhorjelskeje policajskeje direkcije zdźěla, je techniski defekt woheń wubudźił. Nastata škoda we wysokosći 5 000 eurow elektroniku nastupa. Wuknjacy, wuwučowacy a dalši sobudźěłaćerjo su twarjenje po zalarmowanju wopušćili. Po tym zo běštej policija a wohnjowa wobora swoje dźěło zakónčiłoj, su z wučbu pokročowali.
Do Budyskeho powołansko-šulskeho centruma słuša zdobom Serbska fachowa šula za socialnu pedagogiku.
Policija (05.04.23)
Před sportownju awto pokradnyli
Załom. Wosebje njehańbići paduši su předwčerawšim wječor w Załomju awto pokradnyli. Jeho wobsedźer runje w sportowni sportowaše, jako paduši do njezamknjeneje hale přińdźechu a wočinjenu předrasćernju přepytachu. Nimo tableta wzachu tež kluč awta sobu. Jězdźidło steješe wonka na parkowanišću. Skućićeljo so do njeho sydnychu a wotjědźechu. W Suzukiju běchu dalše hódnotne wěcy a wosobinske papjery wobsedźerja. Policija drje hnydom za awtom pytaše, njemóžeše pak je namakać. Škodu trochuja na nimale 4 000 eurow. W tym zwisku policija poruči, k sportowanju žane hódnotne wěcy sobu wzać abo je znajmjeńša w bliskosći měć.
Policija (04.04.23)
Z awtom ćěkał
Wojerecy. Na zwjazkowej dróze B 97 chcyše policija předwčerawšim wječor BMW, kiž bě z Njedźichowa do Wojerec po puću, kontrolować. Šofer pak wotpowědne signale ignorowaše. Wón stupi na płun a zastojnicy smalachu za nim. We Wojerowskim starym měsće woni jeho najprjedy z wočow zhubichu, pozdźišo pak prózdne awto na Drježdźanskej dróze namakachu. Bórze na to lepichu zastojnicy tež šofera, kiž bě so za žiwym płotom schował. Kaž so wukopa, měješe wón wšu přičinu, před policistami ćěkać. 36lětny bě konop a kokain brał. Nimo toho namakachu pola njeho wjetše mnóstwo wopojnych srědkow, wjacore šmóratka a plastowe titki z drogami. Namakane wěcy policisća runje tak sćazachu kaž BMW. 36lětny změje so nětko hnydom wjacorych deliktow dla zamołwić, mjez druhim ilegalneho awtoweho wubědźowanja dla.
Policija (03.04.23)
Trezor pokradnyli
Boranecy. Tójšto škody načinichu njeznaći minjeny štwórtk w Boranecach w Radworskej gmejnje. Jako bě wobsedźer jednoswójbneho domu něhdźe w 15.30 hodź. w swojej garaži, so skućićeljo do domu zadobychu. Z njeho pokradnychu trezor, w kotrymž běchu po informacijach policije pjećcyfrowa suma pjenjez a lutowanskej knižce. Policija pyta nětko swědkow, kotřiž su snano něšto podhladneho wobkedźbowali.
Policija (31.03.23)
Dźiwja honjeńca
Rózbork. Dokelž 42lětny muž wupožčeny VW Golf wróćił njeje, je wobsedźer wupožčowarnje awtow policiju wo pomoc prosył. Předwčerawšim wuhladachu pytane awto na parkowanišću w Rózborku. Jako so policisća bližachu, stupi 42lětny na płun a wotjědźe. Jedyn z policistow dyrbješe při tym nabok skočić. Zastojnicy hnydom za ćeknjenym smalachu, tak zo so dźiwja honjeńca započa. Ta wjedźeše najprjedy po lěsach a łukach wokoło Zentendorfa a Nieder Neuendorfa. Skónčnje dźěše wróćo do Rózborka. Na torhošću měrješe so pytany z awtom na skupinu pěškow, kotraž dyrbješe nabok hić. Na to policisća VW najprjedy z wočow zhubichu. Pozdźišo namakachu prózdne jězdźidło w bliskim lěsu. 42lětny bě so mjeztym zhubił. Dokelž pak je wón po mjenje znaty, drje tež jeho hišće lepja.
Policija (30.03.23)
Padušnu trójku lepili
Wojerecy. Třoch paduchow je policija předwčerawšim wječor we Wojerecach při kradnjenju lepiła. Telefoniski pokiw wjedźeše zastojnikow k prózdnemu twarjenju na Scharnhorstowej. W nim zwěsćichu wjacore skóncowane durje a před domom w karje přihotowanu rubiznu. Bórze na to wuhladachu policisća w bliskich kerkach schowanych třoch paduchow. Pola nich namakachu wjetšu ličbu pokradnjenych wěcow z twarjenja. Zastojnicy wšitko sćazachu. Mužej w starobje 41 a 50 lět kaž tež 35lětna žona změja so nětko wosebje ćežkeho pada padustwa dla zamołwić.
Policija (29.03.23)
Pódla gratownje so paliło
Wojerecy. Kólnja je so předwčerawšim popołdnju na Rathenauwowej we Wojerecach paliła. Při tym jednaše so wo pódlanske twarjenje tamnišeje dobrowólneje wohnjoweje wobory. Wohnjowi wobornicy mějachu tuž jara krótki puć a płomjenja spěšnje podusychu. Přiwšěm nasta něhdźe 5 000 eurow škody. Dokelž njemóžachu wuzamknyć, zo jedna so wo zapalerstwo, dyrbješe sej fachowc po hašenju kólnju bliže wobhladać. Što mějachu wobornicy w pódlanskim twarjenju składowane, znate njeje.
Policija (28.03.23)
Přesmykowanje strašne było
Policija (27.03.23)
Palne drjewo pokradnyli
Wojerecy. Zo je palne drjewo mjeztym jara požadane, dyrbješe wobsedźer zahrodki na Rólnym puću we Wojerecach minjeny kónc tydźenja zwěsćić. W zymskich měsacach wón wjacore tydźenje w swojej zahrodce njebě. W tym času tam njeznaći po wšěm zdaću wjacore razy pobychu a dohromady něhdźe tři kubikne metry drjewa pokradnychu. Škodu trochuje policija na něhdźe 300 eurow.
Papjery wotedać dyrbjał
Hamor. 57lětneho wodźerja Škody su policisća sobotu wječor pola Hamora na puću do Krynhelec kontrolowali. Pola njeho přewjedźechu alkoholowy test a zwěsćichu, zo měješe muž 1,16 promilow alkohola w kreji. Swoje awto dyrbješe na to stejo wostajić a policistam jězbnu dowolnosć wotedać.
Policija (24.03.23)
Na pohrjebnišću kradnył
Budyšin. Najprjedy njeznaty muž je předwčerawšim rano na pohrjebnišću Při měšćanskim nasypje w Budyšinje narownu platu a wobhrodźenje rowa pokradnył. Po pokiwje swědka lepi policija 41lětneho w jeho awće. W bagažniku namakachu zastojnicy něhdźe 60 króć 70 centimetrow wulku platu z bronzy a wobhrodźenje rowa z kopora. Při drogowym tesće so wukopa, zo steješe pólski staćan pod wliwom amfetaminow. Tuž dyrbješe wón krej wotedać, nimo toho jeho policajsce registrowachu. Kriminalny technikar při namakanych wěcach slědy zawěsći. Po dorěčenju ze statnym rěčnistwom skućićela z policajskeho rewěra pušćichu. Kelko škody je wón načinił, dotal znate njeje. Kriminalna słužba pad dale přepytuje.
