Policija (23.11.22)
W bróžni kradnyli
Ćemjercy. Mała wjes Ćemjercy pola Budyšina so w policajskich rozprawach lědma raz jewi. Nětko pak su tež tam paduši pobyli. Woni zadobychu so minjene dny do bróžnje, z kotrejež pokradnychu wuhotowanje za krosnowanje kaž tež wšelki grat. Po informacijach policije wučinja škoda něhdźe 2 700 eurow.
Znjezboženej žonje pomhali
Běła Woda. Jako pomocnicy w nuzy wopokazachu so policisća a wohnjowi wobornicy předwčerawšim připołdnju w Běłej Wodźe. Na Brechtowej bě starša žona w swojim bydlenju padnyła a sej sama hižo pomhać njemóžeše. Na zbožo móžeše wona nuzowe čisło wolić. Wobornicy wočinichu bydlenje a policisća přepodachu žonu wuchowanskej słužbje.
Policija (22.11.22)
Po zadobywanju awto zapalili
Łaz/Bjerwałd. Palace so awto pola Bjerwałda je policiju w nocy na póndźelu k wjacorym njeskutkam wjedła. Najprjedy běchu so njeznaći do lokala we Łazu zadobyli a z hrajneju awtomatow 2 000 eurow pokradnyli. Tež trezor před skućićelemi wěsty njebě. Z njeho zhubi so něšto stow eurow. Nimo toho namakachu kluč za transporter typa Mercedes. Z nim so paduši z Łaza zminychu. Pola Bjerwałda awto potom zapalichu. Wohnjowi wobornicy móžachu płomjenja podusyć. Po informacijach policije nasta něhdźe 85 000 eurow škody.
Moped pokradnyli a namakali
Budyšin. W nocy na njedźelu su so njeznaći w Budyšinje do garaže Při bělenišćach zadobyli a moped typa SR1 pokradnyli. Kaž policija zdźěli bě dwukolesate jězdźidło wjace hač 3 000 eurow hódne. Nimo toho wzachu paduši kompresor sobu. Njewobškodźeny moped policija pozdźišo w bliskosći zaso namaka a móžeše jón wobsedźerjej wróćić.
Policija (21.11.22)
Party eskalěrowała
Wojerecy. W namócnym rozestajenju wuwjercholi sobotu wječor party w pincy wjaceswójbneho domu na Wojerowskej Einsteinowej. Jedyn z wobydlerjow so hóršeše, zo młodostni přewótře swjeća. Na to młodej mužej w starobje 17 a 18 lět do 61lětneho wobydlerja bić započeštaj. Při tym jeho mjezwoči zraništaj, tak zo dyrbješe muž do chorownje. Młodostnaj běštaj do toho tójšto alkohola piłoj. Napitaj hišće přiwołanych policistow skřiwdźištaj.
Policija (18.11.22)
Plaketu pokradnyli
Biskopicy. Wobsedźerjo awtow měli hdys a hdys pohladać, hač maja hišće swoju plaketu za TÜV na awtowym čisle přičinjenu. W Biskopicach su njeznaći tajku plaketu tele dny wot Škody Octavia pokradnyli. Awto steješe na parkowanišću při Póckowskej dróze. Z kołkom w swojich awtowych papjerach drje móže mějićel dopokazać, zo je Škoda přepruwowany, wušparanja wón přiwšěm ma, dokelž dyrbi sej nowu plaketu wobstarać.
Policija (17.11.22)
Pokradnjene awto lepili
Słona Boršć. W Hessenskej pokradnjeny Audi Q5 je policija předwčerawšim na awtodróze A4 lepiła. Dokelž wodźerka trochu njewěsće jědźeše, zadźeržachu SUV při wotpočnišću pola Słoneje Boršće. Žona chcyše najprjedy pěši ćeknyć, ju pak spěšnje dosahnychu. Na to so wukopa, zo bu awto w nocy do toho w hessenskim Limburgu pokradnjene. 32lětna pólska staćanka njeměješe jězbnu dowolnosć a steješe pod wliwom drogow. Ju tyknychu do přepytowanskeje jatby.
Policija (15.11.22)
Elektrokolesy pokradnyli
Kamjenc. Policija registruje we wuchodnej Sakskej dźeń a wjace padustwow elektrokolesow. Tak su njeznaći w nocy na njedźelu na Sewjernej w Kamjencu pedelec w hódnoće něhdźe 3 800 eurow spakosćili. W Zhorjelcu zhubi so w samsnej nocy e-bike w hódnoće 1 600 eurow z wjaceswójbneho domu.
Policija (14.11.22)
W kuchni hašeć dyrbjeli
Budyšin. Woheń w kuchni bydlenja na Budyskej Karla Marxowej dyrbješe wohnjowa wobora wčera popołdnju hašeć. Wobydlerjo běchu bydlenje hižo wopušćili. Na kachlach namakachu kameradojo přismudźene wěcy, mjez druhim poćehnjenje za łožo.
Policija (11.11.22)
Bager pokradnyli
Slepo. Na twarnišću při Dźěwinskim puću w Slepom su so w nocy na srjedu paduši rozhladowali, a to jara dokładnje. Woni měrjachu so na mały bager typa JCB, kiž nětko na twarnišću pobrachuje. Kak su jón dokładnje wotwjezli, znate njeje. Na kóždy pad je žołta twarska mašina něhdźe 25 000 eurow hódna. Zastojnicy Běłowodźanskeho rewěra na městnje slědy zawěsćichu a nětko za bagrom kaž tež skućićelemi pytaja.
Policija (10.11.22)
Z busom kontrolowali
Budyšin. Wobchadna policajska inspekcija je předwčerawšim mobilnu kontrolu z ciwilnym busom na awtodróze A 4 přewjedła. Na te wašnje móžachu policisća takrjec do jězbnych kabinow nakładnych awtow hladać a wobkedźbować, z čim so šoferojo nimo wodźenja swojeho jězdźidła hewak hišće zaběraja. Tón dźeń zwěsćichu, zo štyrjo wodźerjo připasani njeběchu, jedyn njeje wěstotny wotstawk k před nim jěducemu awtu dodźeržał a štyrjo za čas jězby swój handy wužiwachu.
Policija (09.11.22)
Pěška so zraniła
Budyšin. Dokelž je 74lětny wodźer awta předwčerawšim w Budyšinje na wopačny pedal stupił, je so 52lětna žona snadnje zraniła. Na Serbskich hrjebjach chcyše muž wróćo z parkowanskeho městna wujěć. Město toho pak zajědźe wón doprědka. Tak bu 52lětna pěška mjez awtom a parkowanskim awtomatom zatłusnjenja. Při tym so wona snadnje zrani. Žonu móžachu na městnje lěkarsce zastarać. Policija nětko přepytuje, hač bě muž pedalej w awće zaměnił abo hač bě so wot spinadła na płun wotsunył.
