Policija (10.01.23)
Dalše awta wobškodźene
Kubšicy. Hižo spočatk noweho lěta dyrbješe so policija w Kubšicach z wjacorymi wobškodźenymi wosobowymi awtami zaběrać. Njeznaći běchu najskerje na silwesterskim kóncu tydźenja do nich ze šrotowymi kulkami třěleli, kaž so wone za hońtwu pjerizny wužiwaja. W běhu přepytowanjow so wukopa, zo bě tež wikowar awtow we wsy wot tohole njeskutka potrjecheny. Dohromady nasta na jědnaće wobškodźenych awtach něhdźe 30 000 eurow škody. Policija pyta nětko swědkow, kotřiž su wokoło silwestra něšto podhladneho w Kubšicach wobkedźbowali (tel. 03591 35 60).
Policija (06.01.23)
Rubježnika lepili
Wojerecy. Po rubježnym padustwje je policija předwčerawšim we Wojerecach skućićela lepiła. Młody muž bě dopołdnja najprjedy z předawanišća na Łužiskim naměsće metalowu piłu pokradnył. Z njej 28lětny wonka zamk kolesa typa Road Rider přerěza. Wone bě něhdźe 1 500 eurow hódne. Pasant tole wobkedźbowaše a muža narěča. Na to rubježnik jemu z nožom hrožeše a z kolesom wotjědźe. Alarmowani policisća jeho bórze na to w bliskosći lepichu. Muža su najprjedy na rewěr sobu wzali, po trěbnych policajskich naprawach pak jeho zaso pušćichu.
Policija (05.01.23)
Kóń do awta zaběžał
Sprjewiny Doł. K zražce mjez wosobowym awtom a konjom je předwčerawšim rano w Sprjewinym Dole dóšło. Wodźer Passata bě na statnej dróze S 130 do směra na Nowu Wjes po puću, jako kóń na jězdnju běžeše. Šofer drje nahle zaborzdźi, njemóžeše pak zražce hižo zadźěwać. Kóń ćekny, na awće nasta něhdźe 4 000 eurow škody.
Awtomat wosta zamknjeny
Budyšin. Cigaretowy awtomat su njeznaći w silwesterskej nocy na Budyskej Allendowej rozbuchnyć spytali. Kaž policija hakle nětko zdźěli, tyknychu skućićeljo praskotaki do faška, hdźež móžeš sej normalnje cigarety won wzać. Byrnjež praskotaki rozbuchnyli, wosta awtomat zamknjeny. Přiwšěm nasta něhdźe 5 000 eurow škody.
Policija (04.01.23)
Na awta třěleli
Kubšicy. Wosom wosobowych awtow su njeznaći minjeny kónc tydźenja w Kubšicach wobškodźili. Jězdźidła parkowachu na Starej Lubijskej dróze. Předwčerawšim rano zwěsćichu, zo bě něchtó ze šrotowymi kulkami, kajkež so za hońtwu pjerizny wužiwaja, na awta třělał. Wěcnu škodu trochuja na něhdźe 23 000 eurow. Policisća namakachu na městnje njeskutka wjacore plastikowe patronowe dudki.
Přespěšnych lepili
Smochćicy. Na statnej dróze S 106 mjez Słonej Boršću a kružnym wobchadom w Chelnje při wotbóčce do Smochćic, hdźež je 70 km/h dowolenych, je policija předwčerawšim popołdnju a wječor pjeć hodźin dołho spěšnosć měriła. Wot 363 měrjenych jězdźidłow bě 59 přespěšnych. Najnuznišo měješe Mercedes z Emmendingena, kotrehož błysknychu ze 121 km/h. Šofer dyrbi nětko měsac zjawne wobchadne srědki wužiwać, 320 eurow pokuty płaćić a dóstanje dwaj dypkaj w Flensburgu.
Policija (03.01.23)
Prěni dźeń lěta so rozestajiłoj
Nowa Łuka. Wšo druhe hač dobre přeća do noweho lěta wuměništaj sej předwčerawšim popołdnju mužej w starobje 21 a 40 lět w Nowej Łuce w gmejnje Halštrowska Hola. Njeznateje přičiny dla so wonaj najprjedy werbalnje rozestajištaj, pozdźišo so tež ćělnje do so daštaj. Při tym bu młódši z njeju zranjeny, tak zo dyrbješe so lěkarsce zastarać dać. Nimo toho bu jeho awto trochu wobškodźene, jako 40lětny z wotmachom do prawych prědnich duri kopny.
Policija (02.01.23)
Kólnja so paliła
Mučow. K hašenju wołachu wobornikow silwester wječor do Mučowa. Tam bě so najskerje praskotaka dla žiwy płót zapalił. Sylneho wětřika dla wupřestrěchu so płomjenja na kólnju. W njej běchu moped, traktor k syčenju trawnika, koleso, awtowe wobruče a dalši grat. Po informacijach policije nasta 15 000 eurow škody. Zranił so na zbožo nichtó njeje. Wobornicy zadźěłachu, zo płomjenja na dalše twarjenja přeskočichu.
Policija (30.12.22)
Zakazane praskotaki namakali
Załom. W zwisku z kónclětnym praskotanjom a z nim zwisowacymi strachami při wužiwanju njedowoleneje pyrotechniki je policija předwčerawšim kontrole w namjeznej kónčinje z Čěskej přewjedła. Tak zastojnicy na štyrjoch městnach w Załomju a na dalšim w Šěrachowje pola sydom wosobow njedowolenu pyrotechniku, tak mjenowane pólske praskotaki kategorije F3 a F4, namakachu. Žony a mužojo w starobje 18 do 27 lět změja so přeńdźenja přećiwo zakonjej wo rozbuchadłach dla zamołwić.
Policija (29.12.22)
Z alkoholom nimale do hata zajěła
Jaseńca. Zbožo w njezbožu drje měješe w rańšich hodźinach wčerawšeje srjedy 58lětna wodźerka Forda w Jaseńcy. Žona bě z Wětrowa přijěła a w nahłej prawej křiwicy přejara na lěwy bok jězdnje zajěła. Tam přejědźe chódnik, zrazy do wobchadneho znamješka a skónčnje do wobhrodźenja wjesneho hata. Jězdźidło wisaše potom křiwje na skłoninje a hrožeše so do hata sunyć. Na zbožo móžeše so žona sama a njezranjena z wosoboweho awta wuswobodźić. Přiwołani dobrowólni wohnjowi wobornicy so wo to starachu, zo njeby so awto dale do wody sunyło. Z pomocu specialneho jězdźidła Ford z jeho njezbožowneje situacije wućahnychu. Do toho běchu na haće zadźěwk připrawili, zo njeby so wolij wupřestrěć móhł. Při wobdźěłanju njezboža so wukopa, zo měješe žona 1,92 promilow alkohola w kreji. Po informacijach policije nasta na awće něhdźe 25 000 eurow wěcneje škody.
Policija (28.12.22)
Rentnarjej móšnju pokradnyli
Wojerecy. Žadyn měrny druhi hodowny swjaty dźeń njeměješe rentnar we Wojerecach. 89lětny bě předwčerawšim z kolesom na Becherowej po puću, jako jemu njeznaći móšnju z kolesoweho korbika pokradnychu. W móšni běchu wupokazy a pjenjezy. Škoda wučinja něhdźe 500 eurow.
Paduši w bydlenju
Budyšin. Hodowny kónc tydźenja su so njeznaći w Budyšinje do bydlenja zadobyli. W času wot pjatka dopołdnja hač do póndźele dopołdnja łamachu so woni do wjacebydlenskeho domu na Listowej. Paduši wzachu črije, kameru a sterejowu připrawu w cyłkownje hódnoće něhdźe 1 500 eurow sobu.
Policija (27.12.22)
Rozestajenje po njezbožu
Njeswačidło. Mało hodowneho měra začuwachu wobdźělnicy wobchadneho njezboža patoržicu dopołdnja na B 96 pola Njeswačidła při wotbóčce do Holešowskeje Dubrawki. Tam běštej VW a BMW do so zrazyłoj, zranił pak so nichtó njeje. 35lětna wodźerka BMWja a jeje 32lětny sobujěducy kaž tež 19lětny wodźer VWja sej mjez sobu winu na zražce přisuwachu. Jedyn druhemu wudma nadawaše a jemu hrožeše. Policija pyta nětko swědkow.
