Policija (13.02.23)
Paduši w młodowni
Budyšin. Młodownja w Budyskim starym měsće z rjanym wuhladom na Sprjewiny doł je jedna z najrjeńšich Hornjeje Łužicy. To pak njeje njeznatych wotdźeržało, so tam w nocy na njedźelu zadobyć. Měrili su so skućićeljo na napojowej awtomataj, kotrejž namócnje wočinichu. Z jednoho wzachu něhdźe 700 eurow. Wjele wjetša je wěcna škoda, kotřiž paduši zawostajichu. Po informacijach policije wučinja wona něhdźe 7 000 eurow.
Kolesa pokradnyli
Budyšin. Swoje awto něhdźe wotstajić móže złe sćěhi měć. To dyrbješe wobsedźer Audija A 6 spóznać, kiž je pjatk rano swoje awto při Neuschowej promenadźe w Budyšinje wotstajił. Jako so krótko do připołdnja wróći, běchu wšitke štyri kolesa fuk. Paduši běchu je wotšrubowali a sobu wzali a tak něhdźe 1 400 eurow škody načinili. Nimo toho nasta na awće něhdźe 2 000 eurow wěcneje škody, kaž policija informuje.
Policija (10.02.23)
Ćežke njezbožo pola Swinarnje
Pančicy-Kukow. Při ćežkim njezbožu wčera popołdnju wokoło 15.30 hodź. na statnej dróze S 100 pola Swinarnje je 78lětny šofer Opela 82lětnu kolesowarku přewidźał, kotraž dróhu přeprěči. Opel jědźeše z Pančic-Kukowa do směra na Zejicy. Při zražce bu kolesowarka tak ćežko zranjena, zo dyrbjachu ju z wuchowanskim helikopterom do kliniki w Drježdźanach dowjezć. Statna dróha bě nimale poł hodźiny dospołnje zawrjena. Šofer awta njeje so zranił. Kameradojo dobrowólneje wohnjoweje wobory Pančicy-Kukow su městnosć njezboža zawěsćili a wuchowansku słužbu podpěrali.
Policija (09.02.23)
Zražka z wysokej škodu
Kamjenc (SN). Njezbožo z wysokej škodu bě předwčerawšim na Dwórnišćowej, w kružnym wobchadźe Böhnischoweho naměsta w Kamjencu. 89lětny šofer Fiata je po wšěm zdaću w kružnym wobchadźe 64lětneho za wodźidłom Toyoty přewidźał. Zražka zawini škodu 12 000 eurow.
Policija (08.02.23)
Najwjac w Budyšinje demonstrowało
Na wšelakich demonstracijach póndźelu wječor je so w Budyskim a Zhorjelskim wokrjesu nimale 2 690 wosobow wobdźěliło, policija wčera zdźěli. Najwjace běchu w Budyšinje (900), Zhorjelcu (420), Žitawje (330), Kamjencu (180) a Lubiju (120). Tematisce měrjachu so hromadźenja přewažnje přećiwo aktualnym politiskim rozsudam, zdźěla bu wójna w Ukrainje naspomnjena.
Policija (06.02.23)
Tukowy woheń při warjenju
Budyšin. Přihotujo wječer je Budyšanej woda přewariła. Tohodla je pódla warjenskeje płoniny wotstajena plastikowa bleša škrěła. W njej bě jědźny wolij, kotryž so zapali a tukowy woheń wuskutkowa. Hobbyjowy kuchar je wuchowansku centralu we Wojerecach informował. Na to je wón hromadźe z přećelku woheń w kuchni hašał. Tón bě hižo dospołnje zhašany, hdyž je Budyska powołanska wohnjowa wobora přijěła. Wobornicy mějachu jenož hišće elektriske kuchinske kachle wotpinyć a bydlenje přewětrjeć. Kaž policija zdźěli, staj mějićel bydlenja kaž tež jeho 20lětna žiwjenska partnerka snadnuške zajědojćenje dymoweho płuna dla poćerpiłoj.
Policija (03.02.23)
15lětna ćežko zranjena
Srjedu rano sta so při křižowanišću Goethoweje dróhi a Sewjerneje dróhi w Kamjencu njezbožo. 54lětny šofer awta družiny Škoda přewidźeše po wšěm zdaću 15lětnu šoferku motorskeho typa Simson. Młodostna bu při njezbožu ćežko zranjena. Wěcna škoda wučinja něhdźe 2 800 eurow.
Napiteju wodźerjow lepili
Srjedu bě policija na dwěmaj městnosćomaj wodźerja lepiła. W Běłej Wodźe kaž tež w Budyšinje měješe wotpowědny wodźer přewjele alkohola w kreji. Šofer VWja w Běłej Wodźe dóstanje bórze chłostanski list, dokelž měrjachu policisća pola njeho 0,8 promilow alkohola w kreji. Tež wodźer Forda w Budyšinje budźe 0,88 promilow dla pochłostany.
Wodźeše awto bjez dowolnosće
Srjedu připołdnju kontrolowachu zastojnicy awtodróhoweho policajskeho rewěra na A 4 do směra Zhorjelc dwě nakładowej awće z francoskej awtowej značku. Při tym wukopa so, zo běštej wobě jězdźidle wotzjewjenej a njeměještej płaćiwu dowolnosć za wobchad. Pólskaj šoferaj w starobje 36 a 60 lět mataj nětko z chłostanjemi ličić.
Policija (02.02.23)
Bydlenski dom so palił
Z Budyskeje Wjelećanskeje dróhi bu dźensa rano woheń w třěšnym stole wjaceswójbneho domu přizjewjeny. Zasadźenske mocy Budyskeje powołanskeje wohnjoweje wobory běchu bjezposrědnje na městnje a nawjedowachu ewakuaciske a hašenske dźěła w domje, kaž tež w susodnym domje. Podpěrane buchu zasadźenske mocy wot Wjelećanskeje wohnjoweje wobory. Něhdźe 20 ewakuowanych wosobow bu najprjedy w linijowym busu a potom w bliskim awtowym domje zaměstnjenych. Mediciniske zastaranje na zbožo trěbne njebě. Po informacijach wohnjoweje wobory njebudźe přechodnje najskerje wjac móžno, w twarjenju bydlić. Wo přičinje wohenja njemóžeše wohnjowa wobora žane informacije sposrědkować.
Policija (01.02.23)
Přez WhatsApp seniora přelesćił
Podhladne powěsće přez powěsćowu słužbu WhatsApp je minjene dny něchtó z Ottendorfa-Okrille dóstał. Njeznate čisło wuda so jako syn tutoho. Wón jemu pisaše, zo by nowy handy měł a njeby hišće onlinebanking wužiwać móhł. Na to sćěhowaše próstwa, přepokazanku něhdźe 1 720 eurow přewzać. To zjebany tež sčini. Po tym zo bu jemu wobšudnistwo wědome, wobroći so wón na policiju. Kriminalna policija pad přepytuje a warnuje wospjet před tym, so na pjenježne žadanja pušćić. Njedawno započachu powěsće zwjetša z narěču „Witaj mama, halo papa“.
Lód z awta padnył
Spadowace lodowe a sněhowe skaliska su póndźelu rano małotransporter na A 4 mjez Delnim Wujězdom a Słonej Boršću wobškodźili. Zmjerznjene kruchi padnychu wot jěduceho Daimleroweho sedłoweho ćaha, kotryž bu wot 24lětneho wodźeny. Šofer njebě jězdźidło do zajězda jězby po wšěm zdaću porjadnje kontrolował. Na naslědnym małotransporteru nasta wěcna škoda něhdźe 500 eurow. Awtodróhowi policisća přiwzachu njezbožo a zhotowichu pokazku.
Policija (31.01.23)
Něhdźe třećina přespěšnje po puću
Minjenu sobotu su zastojnicy wobchadneje stražowanskeje słužby płaćiwe 80 km/h na A 4 na wysokosći wotpočnišća Lubata mjez Zhorjelcom a Budyšinom kontrolowali. Wot něhdźe 3 160 jězdźidłow běchu 1 101 přespěšni. Najspěšniši bě wodźer Audija, kotryž bu z 188 km/h měrjeny. Šofera wočakuje pokuta 700 eurow, dwaj dypkaj w Flensburgu a třiměsačny zakaz jězdźenja. Nimo toho kontrolowachu zastojnicy njedźelu štyrjoch wodźerjow nakładnych awtow na A 4. Pólskaj a běłoruskaj jězdźerjej njemóžeštaj wuwzaćnu dowolnosć nastupajo njedźelniši zakaz jězdźenja pokazać. Jězba bě tuž skónčena.
Policija (30.01.23)
Prózdny dom so palił
Bukecy. Wuchowanske mocy, wohnjowa wobora a policija chwatachu sobotu wječor do Kołwazy. Tu bě z njewujasnjeneje přičiny k wohenjej prózdneho bydlenskeho domu dóšło. Wohnjowe wobory wokolnych gmejnow běchu z něhdźe 70 kameradami zasadźene a wojowachu přećiwo płomjenjam. Pomocnicy běchu wjacore hodźiny na městnje a móžachu woheń hakle njedźelu rano hašeć. Wosoby so njezranichu. K wysokosći škody tuchwilu žane dopóznaća njepředleža. Kriminalna policija je přepytowanja podhlada zapalerstwa dla zahajiła. Statok bu 2021 z nuzowanjom zrumowany a bu we wokrjesu jako „dwór messiejow“ znaty.
Moped namakał
Wojerecy. Kedźbliwy wobydler informowaše sobotu dopołdnja policiju, dokelž steješe za wjaceswójbnym domom we Wojerecach na Käthe-Niederkirchskej dróze moped bjez zawěsćenskich znamješkow. Patrulja Wojerowskeho policajskeho rewěra poda so na městno a přepruwowaše žołty moped typa S 50. Wukopa so, zo bu tutón spočatk oktobra loni w Grodku pokradnjeny. Wjeselo pola wobsedźerja směło wulke być, hdyž móže swój moped bórze zaso přewzać.
