Awto z psom pokradnyli
Krušwica. Paduši njejsu wčera w Krušwicy jenož wosobowe awto pokradnyli, ale tež psa, kiž w jězdźidle bě. Wobsedźerka bě awto wotstajiła a so jenož dźesać mjeńšin wotsaliła. Jako so wróći bě 28 000 eurow drohi Mitsubishi fuk a z nim psyča, kotrejž Luna rěkaja. Policija z toho wuchadźa, zo su skućićeljo štyrinohača něhdźe wusadźili. Tohodla proša wobydlerjow na to dźiwać, hač něhdźe małeho bruneho psa bjez wobsedźerja wuhladaja. Wotpowědne pokiwy přijimuja zastojnicy w Běłowodźanskim policajskim rewěrje pod telefonowym čisłom 03576/ 26 20.
Dowolnosć dwójnika pokazał
Hózk. Z přizjewjenjom jězdźenja bjez jězbneje dowolnosće dla skónči so swjatkownu póndźelu wulět 63lětneho muža w Hózku. Tam jeho policisća krótko po 10 hodź. kontrolowachu a chcychu wězo tež jeho jězbnu dowolnosć widźeć. Tu drje muž zastojnikam pokaza. Kaž so na to wukopa, pak njebě to jeho jězbna dowolnosć, ale ta dwójnika kontrolowaneho. Wón sam mjenujcy scyła žanu płaćiwu dowolnosć njewobsedźi, kaž policisća spěšne zwěsćichu. Pospyt, z pomocu dokumenta bratra-dwójnika zastojnikam něšto nabarbić, je potajkim chětro zwrěšćił. Kak dołho je lepjeny z jězbnej dowolnosću dwójnika jězdźił, z policajskeje rozprawy bohužel njewuchadźa.
Při telefonje wobšudźili
Wojerecy. 37lětny muž z Wojerec je so minjeny dny z woporom telefonowych wobšudnikow stał a dźěl swojich nalutowanych pjenjez zhubił. Njeznaty bě so při telefonje jako sobudźěłaćer banki wudawał a zdźělił, zo bu z konta 37lětneho wjace hač 2 400 eurow wotknihowanych. Z tajnym čisłom, tak mjenowanej TAN móhł Wojerowčan wobkrućić, zo so suma zaso na jeho konto wróći. Do toho muž přizwoli. Z tym pak buchu pjenjezy hakle z jeho konta wotknihowane. Bórze na to so cuzy při telefonje znowa přizjewi a chcyše mějićela konta wospjet k přepokazanju pohnuć. Do toho wšak tón hižo njepřizwoli a informowaše policiju, dokelž bě drje pytnył, zo bu wobšudźeny.
Njezbožo wosy dla
Łuty. Wosy w swojim awće dla so 54lětny wodźer Opela předwčerawšim we Łutach prawje na wobchad koncentrować njemóžeše. Insekt bě so na mjezwočo muža sydnyło. Jako chcyše wón jeho wućěrić, zajědźe přez wobchadnu kupu. Na wobchadnym znamjenju a awće nasta dohromady 16 000 eurow škody.
Traktor do přirowa zajěł
Pančicy-Kukow. W přirowje skónčiła je so jězba młodeho traktorista předwčerawšim z Pančic-Kukow do směra na Wotrow. Na wokrjesnej dróze K9238 zajědźe 31lětny z dotal njeznateje přičiny na prawy bok jězdnje a skónčnje do přirowa. Traktorist so snadnje zrani. Škoda na jězdźidle wučinja něhdźe 11 000 eurow.
Do busa zrazyła
Malešecy. Dokelž njeje předjězbu wobkedźbowała, je 78lětna žona předwčerawšim w Malešecach z kolesom wotboka do busa zrazyła a so snadnje zraniła. Škoda na kolesu wučinja 250 eurow.
Kolesa pokradnyli
Lejno. Při Lejnjanskim jězoru běchu minjeny kónc tydźenja paduši kolesow po puću. W Lejnom (Geierswalde) su njeznaći w nocy na njedźelu dohromady tři kolesa typa Giant w cyłkownej hódnoće 3 500 eurow pokradnyli. Kolesa słušeja dowolnikam, kotřiž so tam kónc tydźenja wočerstwichu. Wojerowscy policisća pad přepytuja.
We wikowanišću so kuriło
Bělšecy. Krótko do připołdnja informowachu sobotu integrowanu wuchowansku dispatcharnju wo kurje na terenje twaršćiznoweho wikowanišća w Bělšecach (Ebendörfel). K hašenju přijědźechu wobornicy z Rašowa (Rascha), Bělšec a Budestec (Großpostwitz). Pod twarskim kontejnerom wuhladachu so palace drjewjane třěški. Kameradojo wšitko zhašachu a tomu zadźěwachu, zo płomjenja na bliski skład a wjacore jězdźidła přeskočichu. Policija nětko přepytuje, hač je snano něchtó naspomnjene drjewjane třěski wotpohladnje zapalił.
Woheń zamiškrić spytali
Budyšin. Njeprošeny wopyt mějachu w nocy na srjedu pola rentoweho zawěsćerja, kiž ma swoje rumnosće na Budyskej Kamjentnej hasy. Tam su so njeznaći namócnje zadobyli a wjacore rumnosće za hódnotnymi wěcami přepytali. Skónčnje zamiškrichu tež hišće woheń. Na zbožo pak so jenož dymješe a płomjenja so dale njerozpřestrěchu. Zapalerjo wzachu laptop, tak mjenowanu dockingowu staciju kaž tež kompjuterowej wobrazowce sobu. Hódnota rubizny wučinja po informacijach policije něhdźe 1 200 eurow.
Při přizemjenju znjezbožił
Kamjenc. 83lětny pilot ultralochkeho lětadła je wčera dopołdnja na Kamjenskim lětanišću znjezbožił a so snadnje zranił. Muž bě z mašinu typa Eurostar z Berlina do Kamjenca lećał. Jako bě w Lessingowym měsće hižo zaso na zemi, je so jemu po wšěm zdaću zmylk stał, tak zo mašina z prědnim dźělom doprědka padny. Wuchowanske mocy so wo rentnarja starachu. Zastojnicy wobchadneje policajskeje inspekcije přewzachu prěnje přepytowanja. Kelko škody je při njezbožu nastało, njeje znate.
Pokradnjene koło w interneće
Wojerecy. Ze swojej kedźbnosću staj mandźelskaj we Wojerecach přinošowałoj, paducha kolesa dosahnyć. Pola eBay pytaštaj wonaj za nowym kolesom. Jako běštaj kmane žonjace marki Giant namakałoj, daštaj ramikowe čisło najprjedy wot policije přepruwować. Kaž so wukopa, bu poskićene koleso minjeny tydźeń we Wojerecach pokradnjene. Policija za nim hižo pytaše. Město mandźelskeju jědźechu nětko policisća k wučinjenemu přepodaću. Tam zetkachu 30lětneho znateho – a pytane koleso. W bydlenju a pincy podhladneho namakachu dalše wěcy, kotrež běchu po wšěm zdaću pokradnjene, mjez druhim wšelki grat.
52 km/h přewjele
Ottendorf-Okrilla. 172 km/h bě rekord při kontroli spěšnosće w nocy na póndźelu na awtodróze A 4 pola Ottendorfje-Okrilli. Dowolenych je tam 120 km/h. Wodźer pólskeho Citroëna ma nětko 320 eurow pokuty płaćić a njesmě jedyn měsac žane awto wodźić. Při kontroli bě dohromady 85 wodźerjow přespěšnych.